លោកស្រីយីងឡាក់ត្រូវតុលាការធម្មនុញ្ញថៃដកតំណែងជានាយករដ្ឋមន្រ្តីចាំផ្ទះ
ចុះផ្សាយនៅថ្ងៃ៖
ស្តាប់ - ០៦:២៣
នៅថ្ងៃពុធនេះ តុលាការធម្មនុញ្ញថៃបានចេញសេចក្តីសម្រេចបញ្ចប់តំណែងជានាយករដ្ឋមន្រ្តីចាំផ្ទះរបស់លោកស្រីយីងឡាក់ ព្រមទាំងរដ្ឋមន្រ្តីចំនួន ៩រូបផ្សេងទៀត ពីបទថាបានរំលោភអំណាច នៅក្នុងការតែងតាំង និងផ្លាស់ប្តូរមន្រ្តីជាន់ខ្ពស់ផ្នែកសន្តិសុខជាតិ កាលពីឆ្នាំ២០១១។ ភ្លាមៗក្រោយពីតុលាការចេញសេចក្តីសម្រេច រដ្ឋាភិបាលភឿថៃក៏បានប្រកាសតែងតាំងរដ្ឋមន្រ្តីក្រសួងសុខាភិបាលឲ្យឡើងមកជំនួសលោកស្រីយីងឡាក់ ជានាយករដ្ឋមន្រ្តីចាំផ្ទះ រហូតដល់មានការបោះឆ្នោតជាថ្មី។
សំណុំរឿងនៅតុលាការធម្មនុញ្ញបានកើតឡើង ពីពាក្យបណ្តឹងរបស់សមាជិកព្រឹទ្ធសភាមកពីគណបក្សប្រជាធិបតេយ្យ ដែលជាគណបក្សប្រឆាំង ទាក់ទងនឹងការផ្លាស់ប្តូរតំណែងប្រមុខដឹកនាំទីប្រឹក្សាសន្តិសុខជាតិ កាលពីឆ្នាំ២០១១។
នៅក្នុងសវនាការ យើងឃើញលោកស្រីយីងឡាក់ឆ្លើយការពារខ្លួនថា ការផ្លាស់ប្តូរតំណែងប្រមុខទីប្រឹក្សាសន្តិសុខជាតិ គឺស្ថិតក្នុងសមត្ថកិច្ចរបស់នាយករដ្ឋមន្រ្តី ស្របទៅតាមរដ្ឋធម្មនុញ្ញ ហើយការសម្រេចប្តូរតំណែងនេះត្រូវបានធ្វើឡើង ដោយគោរពទៅតាមនីតិវិធីត្រឹមត្រូវ ពោលគឺ ឆ្លងកាត់កិច្ចប្រជុំគណៈរដ្ឋមន្រ្តី។
ក៏ប៉ុន្តែ តុលាការធម្មនុញ្ញបានសម្រេចថា ថ្វីដ្បិតតែក្នុងនាមជានាយករដ្ឋមន្រ្តី លោកយីងឡាក់មានអំណាចផ្លាស់ប្តូរប្រមុខទីប្រឹក្សាសន្តិសុខជាតិនេះមែន ក៏ប៉ុន្តែ លោកស្រីបានប្រើអំណាចរបស់ខ្លួន ដើម្បីបម្រើផលប្រយោជន៍បក្សពួកក្រុមគ្រួសារ ពោលគឺ ធ្វើការផ្ទេរតំណែងប្រមុខដឹកនាំក្រុមប្រឹក្សាសន្តិសុខចេញ ដោយយកអគ្គស្នងការប៉ូលិសជាតិមកជំនួស ដើម្បីទុកតំណែងអគ្គស្នងការប៉ូលិសនេះទៅឲ្យបក្សពួក គឺប្អូនប្រុសអតីតភរិយារបស់លោកថាក់ស៊ីន។
តុលាការសម្រេចបញ្ចប់តំណែងលោកស្រីយីងឡាក់ និងរដ្ឋមន្រ្តីចំនួន ៩នាក់ ដែលបានចូលរួមអនុម័តការសម្រេចផ្លាស់ប្តូរតំណែងប្រមុខដឹកនាំក្រុមប្រឹក្សាសន្តិសុខជាតិនេះ ក៏ប៉ុន្តែ មិនបានរំលាយរដ្ឋាភិបាលចោលទាំងមូល ដូចការបារម្ភរបស់គណបក្សភឿថៃ និងក្រុមអាវក្រហម កាលពីមុននោះទេ។
សមាសភាពរដ្ឋាភិបាលរបស់លោកស្រីយីងឡាក់ ដែលនៅសេសសល់ បានសម្រេចតែងតាំងរដ្ឋមន្រ្តីក្រសួងសុខាភិបាល គឺលោក នីវ៉ាត់ទំរ៉ុង ប៊ូនសុងប៉ៃសាន (Niwattumrong Boonsongpaisan) ឲ្យឡើងមកកាន់តំណែងជានាយករដ្ឋមន្រ្តីចាំផ្ទះ រហូតដល់មានការបោះឆ្នោតជាថ្មី ដែលគេគ្រោងធ្វើ នៅថ្ងៃទី២០ ខែកក្កដា ខាងមុខ ក្រោយពីការបោះឆ្នោត កាលពីខែកុម្ភៈ ត្រូវបានតុលាការធម្មនុញ្ញប្រកាសធ្វើមោឃភាព។
នៅក្រោយពីលោកស្រីយីងឡាក់ត្រូវតុលាការដកចេញពីតំណែង នៅពេលនេះ គេកំពុង រង់ចាំតាមដានមើលប្រតិកម្មពីសំណាក់ក្រុមអ្នកគាំទ្រលោកស្រីយីងឡាក់ គឺក្រុមអាវក្រហម ដែលកន្លងមកធ្លាប់បានប្រកាសរួចហើយថា ពួកគេត្រៀមខ្លួនចេញធ្វើបាតុកម្មទ្រង់ទ្រាយធំនៅបាងកក ដើម្បីការពារលោកស្រីយីងឡាក់ ប្រសិនបើតុលាការហ៊ានទម្លាក់លោកស្រីពីតំណែង។
គេបារម្ភថា ពួកអាវក្រហមអាចនឹងមានការប៉ះទង្គិចគ្នាជាមួយក្រុមអាវលឿង ដែលកំពុងបន្តធ្វើបាតុកម្ម នៅក្នុងទីក្រុងបាងកកដែរ ដើម្បីទាមទារឲ្យលោកស្រីយីងឡាក់ចុះចេញពីតំណែង ហើយប្រគល់អំណាចឲ្យ “ក្រុមប្រឹក្សាប្រជាជន” ដែលជាស្ថាប័នដែលមិនកើតចេញពីការបោះឆ្នោត ជាអ្នកដឹកនាំរដ្ឋាភិបាលបណ្តោះអាសន្នជំនួសវិញ។
គេសង្កេតឃើញថា ចាប់តាំងពីក្រោយរដ្ឋប្រហារយោធាទម្លាក់លោកថាក់ស៊ីនកាលពីឆ្នាំ២០០៦មក តុលាការធម្មនុញ្ញថៃ បានចេញសេចក្តីសម្រេចរំលាយគណបក្ស ឬដកតំណែងនាយករដ្ឋមន្រ្តីស្និទ្ធនឹងលោកលោកថាក់ស៊ីន ចំនួន ៣រូបហើយ គឺលោកសាម៉ាក ស៊ុនដារ៉ាវេត លោកស៊ុមឆៃ វង់សាវ៉ាត់ និងចុងក្រោយ គឺលោកស្រីយីងឡាក់។ រាល់លើកក្រុមអ្នកគាំទ្រលោកថាក់ស៊ីន តែងតែនាំគ្នាចាត់ទុកសេចក្តីសម្រេចរបស់តុលាការធម្មនុញ្ញនេះថាជាការធ្វើរដ្ឋប្រហារតាមផ្លូវតុលាការ។
ចំពោះសេចក្តីសម្រេចដកតំណែងលោកស្រីយីងឡាក់ នៅថ្ងៃពុធនេះ គេឃើញថា តុលាការធម្មនុញ្ញហាក់ដូចជាសម្រេចផ្ទុយទៅនឹងអ្វីដែលខ្លួនធ្លាប់ធ្វើ កាលពីឆ្នាំ២០១១ ទាក់ទងនឹងបណ្តឹងសុំដកតំណែងលោកអាភិស៊ីតវេចាជីវ៉ា ដែលបច្ចុប្បន្នជាមេដឹកនាំបក្សប្រឆាំង ក៏ប៉ុន្តែ កាលណោះជានាយករដ្ឋមន្រ្តីចាំផ្ទះ ដូចជា លោកស្រីយីងឡាក់ នៅពេលនេះដែរ។
កាលពីក្នុងករណីលោកអាភិស៊ីត តុលាការធម្មនុញ្ញបានសម្រេចមិនចាត់ការលើបណ្តឹងសុំដកតំណែងលោកអាភិស៊ីត ដោយលើកហេតុផលថា លោកអាភិស៊ីតបានបញ្ចប់តំណែងជានាយករដ្ឋមន្រ្តីខ្លួនឯងទៅហើយ តាមរយៈការប្រកាសរំលាយសភា និងរៀបចំបោះឆ្នោតឡើងវិញ។
ចំពោះករណីលោកស្រីយីងឡាក់វិញ លោកស្រីយីងឡាក់ក៏បានរំលាយសភារួចហើយដែរ ដោយរង់ចាំតែការបោះឆ្នោត ដើម្បីជ្រើសរើសនាយករដ្ឋមន្រ្តីអាណត្តិថ្មី គឺដូចជាករណីលោកអាភិស៊ីត កាលពីឆ្នាំ២០១១ដែរ។ ក៏ប៉ុន្តែ តុលាការចេញសេចក្តីសម្រេចបញ្ចប់ទាំងតំណែងជានាយករដ្ឋមន្រ្តីចាំផ្ទះរបស់លោកស្រីយីងឡាក់។
នៅក្នុងសេចក្តីសម្រេចថ្ងៃនេះ តុលាការធម្មនុញ្ញមិនបានហាមលោកស្រីយីងឡាក់មិនឲ្យធ្វើនយោបាយទេ។ ដូច្នេះ តាមធម្មតា លោកស្រីនៅតែអាចឈរឈ្មោះក្នុងការបោះឆ្នោត នៅខែកក្កដាខាងមុខនេះបាន។ ក៏ប៉ុន្តែ លោកស្រីយីងឡាក់ នៅជាប់នឹងក្តីក្តាំធំមួយទៀត ទាក់ទងនឹងការចោទប្រកាន់ពីបទពុករលួយ ពាក់ព័ន្ធនឹងនយោបាយទិញអង្ករ។ សំណុំរឿងនេះកំពុងស្ថិតក្នុងដៃអង្គភាពប្រឆាំងអំពើពុករលួយ ដែលអាចនឹងចេញសេចក្តីសម្រេចឆាប់ៗខាងមុខនេះថា តើនឹងត្រូវធ្វើការចោទប្រកាន់លោកស្រីជាផ្លូវការដែរឬក៏យ៉ាងណា។ ការចោទប្រកាន់ពីបទពុករលួយនេះ ប្រសិនបើតុលាការសម្រេចឲ្យលោកស្រីយីងឡាក់ជាប់ពិរុទ្ធ លោកស្រីអាចនឹងត្រូវហាមមិនឲ្យធ្វើនយោបាយរហូតដល់ទៅ ៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ