បក្សប្រឆាំងថៃមិនគាំទ្រការបោះឆ្នោតសាថ្មីហើយទាមទារឲ្យលោកស្រីយីងឡាក់ចុះពីតំណែង
គណបក្សប្រឆាំងថៃ គឺគណបក្សប្រជាធិបតេយ្យ ដឹកនាំដោយលោកអតីតនាយករដ្ឋមន្រ្តីអាភិស៊ីត វេចាជីវ៉ា បានប្រកាសច្រានចោលផែនការរបស់រដ្ឋាភិបាល ក្នុងការរៀបចំការបោះឆ្នោតឡើងវិញ ដែលនឹងត្រូវធ្វើនៅខែកក្កដាខាងមុខនេះ។ ផ្ទុយទៅវិញ មេដឹកនាំគណបក្សប្រជាធិបតេយ្យបានទាមទារឲ្យលោកស្រីនាយករដ្ឋមន្រ្តីយីងឡាក់ ចុះចេញពីតំណែង ហើយបង្កើតរដ្ឋាភិបាលបណ្តោះអាសន្នមួយឲ្យគ្រប់គ្រងប្រទេសជំនួសវិញ។
ចុះផ្សាយនៅថ្ងៃ៖
ស្តាប់ - ០១:៤៤
រដ្ឋាភិបាល និងគណៈកម្មាធិការជាតិរៀបចំការបោះឆ្នោតថៃ បានសម្រេច កាលពីថ្ងៃពុធ ថា នឹងរៀបចំការបោះឆ្នោតសាជាថ្មីឡើងវិញ នៅថ្ងៃទី២០ ខែកក្កដា ខាងមុខនេះ ក្រោយពីការបោះឆ្នោត កាលពីខែកុម្ភៈ ត្រូវតុលាការធម្មនុញ្ញប្រកាសទុកជាមោឃៈ។ ការបោះឆ្នោត ដែលកាលណោះត្រូវទទួលរងនូវការរំខានពីសំណាក់ក្រុមបាតុករស្និទ្ធនឹងបក្សប្រឆាំង ហើយគណបក្សប្រជាធិបតេយ្យផ្ទាល់ក៏បានធ្វើពហិការមិនចូលរួម។
ចំពោះការបោះឆ្នោតឡើងវិញ នៅខែកក្កដាខាងមុខនេះ គណបក្សប្រឆាំងថៃក៏បានប្រកាសច្រានចោលជាមុនផងដែរ ដោយនៅថ្ងៃសៅរ៍នេះ លោកអាភិស៊ីត វេចាជីវ៉ា ប្រមុខដឹកនាំគណបក្សប្រជាធិបតេយ្យ បានទាមទារឲ្យលោកស្រីយីងឡាក់ចុះចេញពីតំណែងជានាយករដ្ឋមន្រ្តីចាំផ្ទះ ដើម្បីបើកផ្លូវឲ្យមានការបង្កើតរដ្ឋាភិបាលបណ្តោះអាសន្នមួយជំនួសវិញ។
តាមគំនិតរបស់លោកអាភិស៊ីត រដ្ឋាភិបាលបណ្តោះអាសន្ននេះនឹងចាត់ចែងឲ្យមានការជជែកពិភាក្សាលើកំណែទម្រង់ប្រព័ន្ធនយោបាយស៊ីជម្រៅ ដើម្បីដាក់ឲ្យប្រជាពលដ្ឋអនុម័តតាមរយៈការបោះឆ្នោតប្រជាមតិ ហើយបន្ទាប់មក ទើបរៀបចំការបោះឆ្នោតតំណាងរាស្រ្តជាក្រោយ។
តាមពិត សំណើរបស់ប្រមុខបក្សប្រឆាំងថៃនេះ មិនខុសពីការទាមទាររបស់មេដឹកនាំក្រុមបាតុករអាវលឿងនោះដែរ។ កន្លងមក មេដឹកនាំក្រុមបាតុករអាវលឿង គឹលោកស៊ូថេប ធឿកស៊ូបាន តែងតែបានទាមទារឲ្យលោកស្រីយីងឡាក់ ប្រគល់អំណាចទៅឲ្យ “ក្រុមប្រឹក្សាប្រជាជន” មួយ ដែលជាស្ថាប័នមិនកើតចេញពីការបោះឆ្នោត ដើម្បីជាអ្នករៀបចំធ្វើកំណែទម្រង់ប្រព័ន្ធនយោបាយ។
គួររំឭកឡើងវិញថា លោកអាភិស៊ីត ព្រមទាំងគណបក្សប្រជាធិបតេយ្យ ធ្លាប់ទទួលរងនូវការរិះគន់យ៉ាងខ្លាំងរួចមកហើយ នៅពេលដែលគណបក្សនេះធ្វើពហិការមិនចូលរួមក្នុងការបោះឆ្នោត កាលពីខែកុម្ភៈកន្លងទៅ ដោយអ្នករិះគន់បានលើកឡើងថា ការធ្វើពហិការរបស់បក្សប្រឆាំងកំពុងតែធ្វើឲ្យវិបត្តិនយោបាយថៃអូសបន្លាយពេលកាន់តែយូរដោយគ្មានដំណោះស្រាយ ហើយលទ្ធិប្រជាធិបតេយ្យថៃ ដែលកំពុងតែផុយស្រួយស្រាប់ ក៏កាន់តែរង្គោះរង្គើកាន់តែខ្លាំងឡើងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ