អេហ្ស៊ីប៖លោកហូស្ន៊ី មូបារ៉ាក់បានរួចខ្លួន សុបិនរបស់អ្នកចង់បានលទ្ធិប្រជាធិបតេយ្យ និងសិទ្ធិសេរីភាពក៏ត្រូវចប់ត្រឹមនេះ !
ចុះផ្សាយនៅថ្ងៃ៖
ស្តាប់ - ០៤:៥៧
កាលពីថ្ងៃសៅរ៍ ទី២៩ វិច្ឆិកាកន្លងទៅ តុលាការកំពូលក្នុងប្រទេសអេហ្ស៊ីបបានលើកលែងការចោទប្រកាន់ចំពោះលោកអតីតប្រធានាធិបតីហូស្ន៊ី មូបារ៉ាក់។ លោកមូបារ៉ាក់ដែលបានជាប់ចោទនៅក្នុងការស្លាប់បាតុករប្រមាណជា ១០០នាក់ក្នុងអំឡុងពេលបាតុកម្មទាមទារឲ្យលោកចុះចេញពីអំណាចកាលពីឆ្នំា ២០១១ និងដែលត្រូវបានតុលាការទីក្រុងគែរកាត់ទោសដាក់គុកលោកអស់មួយជីវិតកាលពីខែមិថុនា ឆ្នំា ២០១២។ ក្រៅពីរួចខ្លួននៅក្នុងបទចោទប្រកាន់សម្លាប់មនុស្ស លោកមូបារ៉ាក់ក៏បានរួចខ្លួននៅក្នុងរឿងអាស្រូវផ្សេងដែរ ពិសេសក្នុងរឿងពុករលួយ។ តែសំណួរដែលគ្រប់គ្នាកំពុងចោទនៅពេលនេះ គឺទាក់ទងនឹងតម្លាភាព និងភាពយុត្តិធម៌របស់តុលាការ ព្រោះថា ទន្ទឹមនឹងការសម្រេចឲ្យលោកមូបារ៉ាក់រួចខ្លួន តុលាការបែរជាបន្តតាមធ្វើទុកបុកម្នេញសកម្មជនបក្សប្រឆំាងទៅវិញ ពិសេសពួកភាតរអ៊ីស្លាម។
វិលចុះ វិលឡើង ប្រជាជនអេហ្ស៊ីបបាននំាគ្នាមកធ្វើបាតុកម្មជាថ្មីនៅទីលានតារៀក្នុងទីក្រុងគែរ ដូចដែលពួកគេធ្លាប់បានធ្វើកាលពី ៣ឆ្នំាមុន ពោលក្នុងឆ្នំា ២០១១។ តែអ្វីដែលខុសគ្នារវាងបាតុកម្មលើកនេះ និង ៣ឆ្នំាមុននៅត្រង់ថា នៅឆ្នំា ២០១១ ពួកគេបាននំាគ្នាធ្វើបាតុកម្មទាមទារឲ្យលោកប្រធានាធិបតីហូស្ន៊ី មូបារ៉ាក់ចុះចេញពីមុខតំណែង តែនៅថ្ងៃនេះ ពួកគេបានធ្វើបាតុកម្មប្រឆំាងនឹងតុលាការដែលបានសម្រេចឲ្យលោកមូបារ៉ាក់រួចខ្លួនពីការចោទប្រកាន់នានា ពិសេសរឿងការស្លាប់បាតុករជាច្រើនរយនាក់កាលពីបាតុកម្មក្នុងឆ្នំា ២០១១ នោះឯង។ គួររម្លឹកជូនឡើងវិញថា នៅក្នុងសវនាការកាត់ទោសលោកអតីតប្រមុខរដ្ឋមូបារ៉ាក់ក្នុងឆ្នំា ២០១២ តុលាការទីក្រុងគែរបានសម្រេចដាក់ទោសលោកមូបារ៉ាក់ឲ្យជាប់គុកអស់មួយជីវិតពីបទបានចេញបញ្ជាឲ្យប៉ូលីសធ្វើការបាញ់រះលើហ្វូងបាតុករ។ ទន្ទឹមនឹងជាប់ចោទក្នុងរឿងសម្លាប់មនុស្ស លោកមូបារ៉ាក់ក៏បានទទួលទោសនៅក្នុងរឿងអំពើពុករលួយដែរ។
ទម្ងន់ទោសដែលក្រុមមេធាវីរបស់លោកមូបារ៉ាក់បានសម្រេចប្តឹងឧទ្ធរណ៍ និងដែលទីបំផុតនៅថ្ងៃសៅរ៍ ទី២៩ វិច្ឆិកានាចុងសប្តាហ៍កន្លងទៅថ្មីៗនេះ តុលាការកំពូលបែរជាបានសម្រេចលើកលែងការចោទប្រកាន់ទំាងអស់លើរូបលោកមូបារ៉ាក់ទៅវិញ និយាយតាមបែបសាមញ្ញ គឺសម្រេចឲ្យលោកមូបារ៉ាក់រួចខ្លួនពីការចោទប្រកាន់កន្លងមក ពិសេសក្នុងរឿងសម្លាប់មនុស្សដែលតុលាការទីក្រុងគែរបានកាត់ទោសឲ្យលោកដេកក្នុងគុកអស់មួយជីវិតរួចទៅហើយ។ វាពិតណាស់ថា រឿងតុលាការវាជារឿងរបស់តុលាការដែលតាមធម្មតា គ្មានអំណាចណាមួយអាចលូកដៃចូលជ្រៀតជ្រែកបានឡើយ តែនៅក្នុងប្រទេសអេហ្ស៊ីប ប្រព័ន្ធតុលាការត្រូវបានគេចោទថា មានលក្ខណៈនយោបាយ ពោលមិនបានសម្រេចរឿងក្តីដោយផ្អែកលើយុតិធម៌ទេ តែបែរជាផ្អែកលើពណ៌សម្បុរនយោបាយទៅវិញ។
ដើម្បីអាចបញ្ជាក់ពីចំណុចនេះបាន គេគួរតែវិលក្រោយទៅនិយាយពីរឿងអតីតកាលបន្តិច ពោលក្រោយការធ្លាក់ពីអំណាចរបស់លោកហូស្ន៊ី មូបារ៉ាក់ក្នុងឆ្នំា ២០១១។ គឺជាឆ្នំាដែលប្រជាជនអេហ្ស៊ីបបានធ្វើបដិវត្តន៍ ដោយចម្លងយកតាមបដិវត្តន៍អារ៉ាប់ដែលមានប្រភពកំណើតចេញមកពីប្រទេសទុយនីស៊ី។ បន្ទាប់ពីបានកំចាត់លោកមូបារ៉ាក់ចេញពីអំណាចផ្តាច់ការជាង ៣០ឆ្នំារួចហើយ ការរៀបចំបោះឆ្នោតជ្រើសរើសប្រធានាធិបតីថ្មីក៏ត្រូវបានរៀបចំឡើងតាមបែបប្រជាធិបតេយ្យជាលើកទី១ នាពាក់កណ្តាលឆ្នំា ២០១២។ នៅពេលនោះ លោកម័រស៊ីមកពីគណបក្សភាតរៈអ៊ីស្លាមបានជាប់ឆ្នោតជាប្រធានាធិបតីថ្មី។ តែកាន់អំណាចមិនបានប៉ុន្មានផង ក៏ស្រាប់តែប្រជាជនបាននំាគ្នាធ្វើបាតុកម្មទាមទារឲ្យលោកម័រស៊ីចុះចេញពីតំណែងវិញ។ ការបះបោររបស់ប្រជាជនបានឈានដល់ដំណាក់កាលមួយដែលជម្រុញឲ្យលោកឧត្តមសេនីយអាល់ស៊ីស៊ីធ្វើរដ្ឋប្រហារទម្លាក់លោកម័រស៊ីក្នុងខែកក្កដា ឆ្នំា ២០១៣។ បន្ទាប់មក គឺរូបមេរដ្ឋប្រហារអាល់ស៊ីស៊ីនេះឯងដែលបានឡើងកាន់តំណែងប្រធានាធិបតីអេហ្ស៊ីបមកដល់សព្វថ្ងៃ។
ត្រឡប់ទៅនិយាយពីកិច្ចការរបស់តុលាការវិញម្តង នៅក្នុងសម័យអន្តរកាលរយៈពេល ៣ឆ្នំាចុងក្រោយនេះ ពោលតំាងពីក្រោយការធ្លាក់ពីអំណាចរបស់លោកមូបារ៉ាក់ ការឡើងកាន់អំណាចរបស់លោកម័រស៊ី បន្ទាប់មក ការធ្លាក់ពីអំណាចរបស់លោកម័រស៊ី ព្រមទំាងការឡើងកាន់តំណែងប្រធានាធិបតីរបស់លោកអាល់ស៊ីស៊ីថ្មីៗនេះមក តុលាការមិនចេះខ្វះការងារធ្វើទេ ពិសេសក្នុងសំណុំរឿងលោកមូបារ៉ាក់ និងបក្សពួកលោកមូបារ៉ាក់ និងបន្តដោយសំណុំរឿងលោកម័រស៊ី ព្រមទំាងក្រុមសកម្មជនភាតរៈអ៊ីស្លាម។ តែអ្វីដែលគួរឲ្យកត់សម្គាល់តំាងពីលោកអាល់ស៊ីស៊ីបានឡើងកាន់តំណែងប្រធានាធិបតីមក តុលាការបែរជាជាប់ដៃខ្លំាងនៅក្នុងយុទ្ធនាការកាត់ទោសញាត់គុកដោយមិនរើសមុខនូវក្រុមភាតរៈអ៊ីស្លាមរបស់លោកម័រស៊ីទៅវិញ និយាយឲ្យស្រួលយល់ តុលាការកំពុងចាត់វិធានការសម្របតាមរដ្ឋាភិបាលរបស់លោកអាលស៊ីស៊ីដែលកំពុងបន្តប្រម៉ាញ់ពួកប្រឆំាងខ្លួន។
ការហ៊ាននិយាយយ៉ាងដូចនេះ ព្រោះនៅក្នុងសប្តាហ៍ដែលតុលាការបានលើកលែងការចោទប្រកាន់លើរូបលោកមូបារ៉ាក់ តុលាការបែរជាបានកាត់ទោសក្មេងមិនទាន់ពេញវ័យចំនួន ៧៨នាក់ឲ្យដេកក្នុងគុកពី ២ ទៅ ៥ឆ្នំា ដោយបានចោទពួកនេះពីបទបានគំាទ្រចលនាភារតៈអ៊ីស្លាម។ នេះដោយមិនបានរាប់បញ្ចូលនូវសកម្មជនអ្នកគំាទ្រលោកម័រស៊ីរាប់រយនាក់ផ្សេងទៀតដែលបានទទួលទោសប្រហារជីវិត និងដែលកំពុងស្ថិតក្នុងគុកនាពេលសព្វថ្ងៃទេ។ វាពិតណាស់ថា ការដែលតុលាការបានសម្រេចឲ្យលោកមូបារ៉ាក់រួចខ្លួនពេលនេះ បានធ្វើឲ្យមានអ្នកសប្បាយចិត្តផង និងអ្នកក្តៅក្រហាយផង។ រីឯលោកប្រធានាធិបតីអាល់ស៊ីស៊ីដែលព្យាយាមមិនធ្វើអត្ថាធិប្បាយចំពោះរឿងតុលាការគ្រាន់តែបានធានាថា ប្រទេសអេហ្ស៊ីបកំពុងធ្វើដំណើរទៅមុខ កំពុងសម្លឹងទៅអនាគត និងមិនអាចត្រឡប់ក្រោយវិញបានឡើយ។
តាមរយៈពាក្យសម្តីរបស់អតីតឧត្តមសេនីយ និងជាប្រធានាធិបតីរូបនេះនំាឲ្យប្រជាជនអេហ្ស៊ីបអ្នកស្រឡាញ់លទ្ធិប្រជាធិបតេយ្យ និងចង់បានសេរីភាពយល់បានភ្លាមថា សុបិនរបស់ពួកគេកាលពី ៣ឆ្នំាមុនក៏បានឈានដល់ទីបញ្ចប់នៅក្នុងថ្ងៃដែលតុលាការបានកាត់ទោសឲ្យលោកហូស្ន៊ី មូបារ៉ាក់រួចខ្លួននោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ