ការសន្យាមិនឈរឈ្មោះអាណត្តិថ្មីរបស់លោកមូបារ៉ាក់មិនបានរំងាប់កំហឹងក្រុមប្រឆាំង
កាលពីយប់ថ្ងៃអង្គារ ១ កុម្ភៈ ២០១១នេះ ក្រោយពីបាតុករជាង១លាននាក់ចេញធ្វើបាតុកម្មនៅទូទាំងប្រទេស អេហ្ស៊ីព្ទ លោកហូស្នី មូបារ៉ាក់ បានប្រកាសថា លោកនឹងមិនចុះចេញពីតំណែងឥឡូវនេះទេ ក៏ប៉ុន្តែ លោកក៏នឹងមិនឈរឈ្មោះជាប្រធានាធិបតីទៀតដែរ ពេលអាណត្តិរបស់លោកត្រូវផុត នៅខែកញ្ញា ២០១១ខាងមុខនេះ។ ការសន្យានេះមិនបានធ្វើឲ្យបាតុករស្ងប់ចិត្តនោះទេ។ ពួកគេនៅតែបន្តធ្វើបាតុកម្ម ដោយទាមទារឲ្យលោកមូបារ៉ាក់ចុះចេញពីតំណែងឥឡូវនេះ។
ចុះផ្សាយនៅថ្ងៃ៖
បទវិភាគរបស់ សេង ឌីណា
ក្រុមប្រឆាំងបានប្តេជ្ញាថានឹងប្រមូលមនុស្សឲ្យបាន១លាននាក់ចេញ ធ្វើបាតុកម្ម នៅថ្ងៃអង្គារ ម្សិលមិញ។ យោងតាមទូរទស្សន៍អាល់ហ្សាហ្សេរ៉ា មនុស្សចេញមកធ្វើបាតុកម្មមានចំនួនលើសពី១លាននាក់ទៅទៀត។
កងទ័ពអេហ្ស៊ីព្ទ ដែលបានប្រកាសទទួលស្គាល់ថា បាតុកម្មប្រឆាំង គឺជារឿងត្រឹមត្រូវ ហើយថានឹងមិនប្រើកម្លាំងបង្ក្រាបបាតុករ ពិតជាបានធ្វើតាមពាក្យសន្យានេះមែន។ មិនតែប៉ុណ្ណោះ កងទ័ពថែមទាំងត្រូវបានដាក់ពង្រាយ ដើម្បីរក្សាសុវត្ថិភាពរបស់បាតុករទៀតផង ដោយបានឆែកឆេរហាមឃាត់មិនឲ្យមានអាវុធចូលក្នុងកន្លែងបាតុកម្ម។ ក្រុមប៉ូលិស ដែលធ្លាប់តែជាអ្នកបង្រ្កាបបាតុកម្ម ក៏មិនត្រូវបានអនុញ្ញាតឲ្យចូលទៅកន្លែងបាតុកម្មដែរ។ ចាប់ពីពេលចាប់ផ្តើមមានចលនាប្រឆាំងរដ្ឋាភិបាលអេហ្ស៊ីព្ទមក មានតែនៅថ្ងៃអង្គារ ម្សិលមិញនេះទេ ដែលបាតុកម្មបានប្រព្រឹត្តទៅដោយគ្មានការបង្រ្កាបពីអាជ្ញាធរ។
នៅយប់ថ្ងៃអង្គារ លោកមូបារ៉ាក់បានធ្វើសេចក្តីថ្លែងការណ៍មួយតាមទូរទស្សន៍ជាតិ ដោយមានចាក់ផ្សាយបន្តនៅទីកន្លែងបាតុកម្មផង។ លោកមូបារ៉ាក់បានប្រកាសរំឭកអំពីគុណបំណាច់របស់លោកចំពោះអេហ្ស៊ីព្ទ និងអំពីស្នាដៃដែលលោកសម្រេចបាន ក្នុងពេលកាន់អំណាច ហើយបានប្រកាសថា លោកនឹងមិនចុះចេញពីតំណែងនៅពេលនេះទេ។ ក៏ប៉ុន្តែ លោកបានប្តេជ្ញាថានឹងធ្វើកំណែទម្រង់ ដែលលោកបានសន្យា ហើយថា លោកនឹងមិនឈរឈ្មោះជាប្រធានាធិបតីទៀតទេ នៅពេលលោកផុតអាណត្តិ នៅខែកញ្ញា ២០១១ខាងមុខ។
ការសន្យាមិនឈរឈ្មោះអាណត្តិថ្មីនេះ មិនបានធ្វើឲ្យបាតុករប្រឆាំងស្ងប់ចិត្តនោះទេ។ ពួកគេបានស្រែកទាមទារឲ្យលោកមូបារ៉ាក់ចុះចេញពីតំណែងភ្លាមៗ នៅពេលនេះ ដោយមិនចាំដល់ផុតអាណត្តិទេ។ បាតុកររាប់ពាន់នាក់បានបន្តស្ថិតនៅ “ទីលានសេរីភាព” ពេញមួយយប់ថ្ងៃអង្គារ។ ពេលព្រឹកឡើង ពួកគេក៏បានចាប់ផ្តើមការតវ៉ាបន្តទៀត ដោយស្រែកទាមទារឲ្យលោកមូបារ៉ាក់ចុះចេញពីតំណែង។
ក្រុមអ្នកនយោបាយប្រឆាំងក៏បានប្រកាសដែរថា គេនឹងមិនបើកការចរចាជាមួយរដ្ឋាភិបាលទេ ដរាបណាលោកមូបារ៉ាក់នៅបន្តកាន់តំណែង។ ពួកគេគ្រោងនឹងរៀបចំបាតុកម្មដ៏ធំម្តងទៀត នៅថ្ងៃសុក្រខាងមុខ។
នៅយប់ថ្ងៃអង្គារ ម្សិលមិញ ក្រោយពីសេចក្តីថ្លែងការណ៍របស់លោកមូបារ៉ាក់ លោកអូបាម៉ាក៏បានធ្វើសេចក្តីថ្លែងការណ៍មួយ ទាមទារឲ្យលោកមូបារ៉ាក់ចាប់ផ្តើមរៀបចំផ្ទេរតំណែង ពីពេលឥឡូវនេះទៅ។ ប្រធានាធិបតីបារាំង និងនាយករដ្ឋមន្រ្តីអង់គ្លេសក៏បានធ្វើការទាមទារ ប្រហាក់ប្រហែលគ្នានេះដែរ។
នៅថ្ងៃពុធនេះ ក្នុងពេលដែលក្រុមប្រឆាំងនៅបន្តធ្វើបាតុកម្ម គេឃើញមានក្រុមអ្នកគាំទ្រលោកមូបារ៉ាក់រាប់ពាន់នាក់ ក៏បាននាំគ្នាចេញមកធ្វើបាតុកម្មដែរ ដើម្បីគាំទ្រឲ្យលោកមូបារ៉ាក់បន្តកាន់តំណែងតទៅទៀត។ បាតុកម្មទាំងពីរក្រុមក៏បានប៉ះទង្គិចគ្នា នៅ “ទីលានសេរីភាព”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ