លោកអតីតប្រធានាធិបតីអេហ្ស៊ីបមូបារ៉ាក់បានរួចខ្លួនពីការចោទប្រកាន់ក្នុងរឿងសម្លាប់មនុស្ស
នៅក្នុងប្រទេសអេហ្ស៊ីប ទីបំផុត តុលាការកំពូលបានលើកលែងការចោទប្រកាន់លើលោកអតីតប្រធានាធិបតីហូស្នី មូបារ៉ាក់ពីបទទទួលខុសត្រូវលើការស្លាប់បាតុករប្រមាណជា ១០០នាក់នាសម័យបដិវត្តន៍បះបោរកាលពីខែមករា ឆ្នំា ២០១១។ គួររម្លឹកជូនថា ការសម្រេចរបស់តុលាការកំពូលពេលនេះ គឺជាការទាត់ចោលសេចក្តីសម្រេចរបស់តុលាការដែលបានកាត់ទោសលោកប្រមុខរដ្ឋធ្លាក់ពីអំណាចមូបារ៉ាក់ឲ្យជាប់គុកអស់មួយជីវិត។ ទន្ទឹមគ្នានេះ តុលាការកំពូលក៏បានច្រើនចោលការចោទប្រកាន់លើរូបលោកមូបារ៉ាក់ពីរឿងអាស្រូវពុករលួយដែរ ដោយសំអាងថាគ្មានភស្តុតាងច្បាស់លាស់។
ចុះផ្សាយនៅថ្ងៃ៖
ស្តាប់ - ០២:១២
គ្មានការចោទប្រកាន់ គឺគ្មានការផ្តន្ទាទោស។ នៅទីបំផុត តុលាការកំពូលបានបដិសេធការចោទប្រកាន់លើរូបលោកអតីតប្រធានាធិបតីអេហ្ស៊ីបហូស្នី មូបារ៉ាក់ដោយយល់ឃើញថា សុទ្ធសឹងជាការចោទប្រកាន់មានលក្ខណៈនយោបាយ និងដែលតុលាការកំពូលមិនអាចធ្វើចំណាត់ការលើការចោទប្រកាន់របៀបនេះបានទេ។ គួរជម្រាបជូនថានាពេលកន្លងមក លោកមូបារ៉ាក់ត្រូវបានតុលាការទីក្រុងគែរកាត់ទោសដាក់គុកអស់មួយជីវិតពីបទទទួលខុសត្រូវលើការស្លាប់បាតុករប្រមាណជា ១០០នាក់នៅក្នុងក្បួនបាតុកម្មបះបោរប្រឆំាងរដ្ឋាភិបាលកាលពីថ្ងៃទី ២៥ មករា ឆ្នំា ២០១១។ ក្បួនបាតុកម្មដែលឈានដល់ការទម្លាក់លោកមូបារ៉ាក់ចេញពីអំណាច និងដែលបដិវត្តន៍របស់ប្រជាជនកាលណោះបានបណ្តាលឲ្យមានមនុស្សស្លាប់សរុបជិត ៨៥០នាក់។
ឥឡូវនេះ ក្រុមមេធាវីការពារលោកមូបារ៉ាក់កំពុងស្វែងរកលទ្ធភាពក្នុងការដោះលែងកូនក្តីរបស់ខ្លួនដែលត្រូវបានតុលាការកាត់ទោសដាក់គុកចំនួន ៣ឆ្នំានៅក្នុងរឿងផ្សេងទៀត ព្រោះបើគិតមកដល់ថ្ងៃនេះ លោកមូបារ៉ាក់បានស្ថិតក្នុងគុកអស់រយៈពេលជាង ៣ឆ្នំាមកហើយ។ ទន្ទឹមគ្នានេះ លោកមូបារ៉ាក់ក៏ត្រូវបានតុលាការកំពូលសម្រេចឲ្យរួចខ្លួននៅក្នុងរឿងអាស្រូវពុករលួយដែរ ពិសេសទាក់ទងនឹងការលក់ឧស្ម័នហ្គាសទៅឲ្យប្រទេសអ៊ីស្រាអែល។ រឿងអាស្រូវនេះក៏មានជាប់ពាក់ព័ន្ធនឹងកូនប្រុសពីរនាក់របស់លោកមូបារ៉ាក់ តែក៏ត្រូវបានតុលាការកំពូលសម្រេចឲ្យរួចខ្លួនទំាងពីរនាក់។ ដោយឡែក និងក្រៅពីរូបលោកមូបារ៉ាក់ តុលាការកំពូលក៏បានច្រើនចោលការចោទប្រកាន់លើអតីតរដ្ឋមន្រ្តីម្នាក់ក្នុងជំនាន់លោកមូបារ៉ាក់ដែរ គឺរដ្ឋមន្រ្តីក្រសួងមហាផ្ទៃដែលបានទទួលការចោទប្រកាន់ពីបទទទួលខុសត្រូវលើការស្លាប់បាតុករដូចលោកមូបារ៉ាក់ដែរ។
ក្រោយពីរួចការចោទប្រកាន់ភ្លាម លោកមូបារ៉ាក់បានផ្តល់បទសម្ភាសន៍ឲ្យទូរទស្សន៍ដោយបញ្ជាក់ថា លោកមិនបានធ្វើអ្វីខុសទេ។ ក្រុមសកម្មជនអ្នកគំាទ្រលោកមូបារ៉ាក់បានសម្តែងក្តីសប្បាយរីករាយ ដោយនំាគ្នារំាលេងតាមដងផ្លូវ។ តែសម្រាប់ក្រុមគ្រួសារជនរងគ្រោះវិញ ពួកគេបានសម្តែងកំហឹងក្តៅក្រហាយ និងចាត់ទុកការសម្រេចរបស់តុលាការកំពូលថា មិនយុត្តិធម៌។ គួររម្លឹកជូនថា មានអាយុ ៨៦ឆ្នំា លោកមូបារ៉ាក់បានកាន់អំណាចផ្តាច់ការរយៈពេល ៣០ឆ្នំា មុននឹងត្រូវកម្លំាងមហាជនទាញទម្លាក់ក្នុងឆ្នំា ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ