ក្រោយបរាជ័យនៅក្រុមប្រឹក្សាសន្តិសុខប៉ាឡេស្ទីននឹងសុំចូលជាសមាជិកតុលាការព្រហ្មទណ្ឌអន្តរជាតិ
ចុះផ្សាយនៅថ្ងៃ៖
លោកម៉ះមូដ អាបាស់ ប្រមុខដឹកនាំប៉ាឡេស្ទីននឹងសុំចូលជាសមាជិកតុលាការអន្តរជាតិ នៅថ្ងៃពុធនេះ ក្រោយពីក្រុមប្រឹក្សាសន្តិសុខអ.ស.បច្រានចោលសេចក្តីសម្រេចលើដំណោះស្រាយសន្តិភាពជាមួយអ៊ីស្រាអែល ដែលស្នើឡើងដោយប៉ាឡេស្ទីន និងក្រុមប្រទេសអារ៉ាប់។
លោកម៉ះមូដ អាបាស់ នឹងកោះប្រជុំមន្រ្តីកំពូលៗ នៅល្ងាចថ្ងៃពុធ នៅវេលាម៉ោង ៦និង៣០នាទីម៉ោងក្នុងស្រុក ត្រូវនឹងម៉ោង ១១និង៣០នាទីយប់ ម៉ោងនៅប្រទេសកម្ពុជា ដើម្បីជជែកអំពីជំហានដែលត្រូវធ្វើ ក្រោយពីបរាជ័យ នៅក្រុមប្រឹក្សាសន្តិសុខ។
មន្រ្តីជាន់ខ្ពស់ប៉ាឡេស្ទីនបានបង្ហើបឲ្យដឹងថា លោកអាបាស់នឹងចុះហត្ថលេខាលើអនុសញ្ញាអន្តរជាតិមួយចំនួន ក្នុងនោះក៏មានលក្ខន្តិកៈក្រុងរ៉ូមផងដែរ ដើម្បីឲ្យប៉ាឡេស្ទីនអាចក្លាយជាសមាជិកតុលាការព្រហ្មទណ្ឌអន្តរជាតិ។
ការចូលជាសមាជិកតុលាការព្រហ្មទណ្ឌអន្តរជាតិនឹងផ្តល់សិទ្ធិឲ្យប៉ាឡេស្ទីនអាចប្តឹងទៅតុលាការឲ្យបើកការស៊ើបអង្កេត និងជំនុំជម្រះលើឧក្រិដ្ឋកម្មសង្រ្គាម ឬឧក្រិដ្ឋកម្មប្រឆាំងមនុស្សជាតិ ដែលអ៊ីស្រាអែលប្រព្រឹត្តលើពលរដ្ឋប៉ាឡេស្ទីន ឬនៅលើទឹកដីប៉ាឡេស្ទីន។ ក៏ប៉ុន្តែ មេដឹកនាំ និងពលរដ្ឋប៉ាឡេស្ទីនខ្លួនឯងក៏អាចនឹងត្រូវតុលាការព្រហ្មទណ្ឌអន្តរជាតិនាំខ្លួនយកទៅកាត់ទោសបានដែរ។
កាលពីល្ងាចថ្ងៃអង្គារ ក្រុមប្រឹក្សាសន្តិសុខអ.ស.បបានច្រានចោលសេចក្តីព្រាងមួយ ដែលស្នើឡើងដោយប្រទេសហ្សកដានី ក្នុងនាមប៉ាឡេស្ទីន ដោយក្នុងក្នុងសេចក្តីព្រាងនេះមានចែងពីចំណុចសំខាន់ៗពីរ។ ទីមួយ ដាក់កំហិតឲ្យអ៊ីស្រាអែល និងប៉ាឡេស្ទីនចរចាគ្នាឲ្យចេញជាកិច្ចព្រមព្រៀងសន្តិភាពឲ្យបានក្នុងរយៈពេលយ៉ាងយូរបំផុត ១ឆ្នាំ ដើម្បីឈានទៅបង្កើតរដ្ឋប៉ាឡេស្ទីនឯករាជ្យ ដោយយកក្រុងហ៊្សេរុយសាឡឹមខាងកើតជារដ្ឋធានី។ ទីពីរ ទាមទារឲ្យអ៊ីស្រាអែលដកកងទ័ពទាំងអស់ និងបញ្ចប់រាល់ការដាក់អាណានិគមលើទឹកដីប៉ាឡេស្ទីន ត្រឹមឆ្នាំ២០១៧។
ក៏ប៉ុន្តែ ការទាមទាររបស់ប៉ាឡេស្ទីនត្រូវទទួលបរាជ័យ ដោយសេចក្តីសម្រេចនេះមិនទទួលបានសំឡេងគាំទ្រគ្រប់គ្រាន់ នៅក្រុមប្រឹក្សាសន្តិសុខ ដោយមានប្រទេសតែ ៨ ប៉ុណ្ណោះ ដែលបោះឆ្នោតគាំទ្រ (បារាំង រុស្ស៊ី ចិន លុចសំបួ ហ្សកដានី អាហ្សង់ទីន ឈីលី និងឆាដ)។ ប្រទេសចំនួន ២ បោះឆ្នោតប្រឆាំង (អាមេរិក និងអូស្រ្តាលី) ចំណែកប្រទេស ៥ ផ្សេងទៀតអនុប្បវាទ (អង់គ្លេស កូរ៉េខាងត្បូង លីទុយអានី នីហ្សេរីយ៉ា និងរវ៉ាន់ដា)។
គួរបញ្ជាក់ថា នៅក្នុងក្រុមប្រឹក្សាសន្តិសុខ ដើម្បីឲ្យសេចក្តីសម្រេចមួយអាចអនុម័តចេញរួច ទាល់តែបំពេញនូវលក្ខខណ្ឌចាំបាច់ពីរ៖ ទីមួយ ត្រូវមានសំឡេងគាំទ្រយ៉ាងតិច ៩សំឡេង និងទីពីរ គ្មានប្រទេសជាសមាជិកអចិន្រ្តៃយ៍ណាមួយបោះឆ្នោតប្រឆាំង ដែលគេហៅថា បោះឆ្នោតវ៉េតូ។
នៅពេលដាក់សេចក្តីព្រាងនេះឲ្យក្រុមប្រឹក្សាបោះឆ្នោត ប៉ាឡេស្ទីន រំពឹងថា យ៉ាងហោចណាស់នឹងអាចរកសំឡេងគាំទ្រឲ្យបានគ្រប់ ៩សំឡេង ដើម្បីបង្ខំឲ្យអាមេរិកប្រើសិទ្ធិវ៉េតូ។
ប្រសិនបើមានសំឡេងគាំទ្រគ្រប់ ៩សំឡេងហើយ តែសេចក្តីសម្រេចនេះនៅតែអនុម័តចេញមិនរួច ដោយសារតែអាមេរិកប្រើសិទ្ធិវ៉េតូ គេអាចទម្លាក់ការទទួលខុសត្រូវទៅលើអាមេរិកថាជាអ្នកធ្វើឲ្យដំណោះស្រាយនេះត្រូវទទួលបរាជ័យ ដែលអាចជាសម្ពាធធំមួយដល់អាមេរិក ពីព្រោះ វាអាចធ្វើឲ្យប៉ះពាល់ទៅដល់ទំនាក់ទំនង រវាងអាមេរិក និងបណ្តាប្រទេសអារ៉ាប់ ជាពិសេស ប្រទេសដែលកំពុងចូលរួមគាំទ្រអាមេរិកក្នុងយុទ្ធនាការប្រយុទ្ធប្រឆាំងនឹងពួកជីហាតរដ្ឋអ៊ីស្លាមនៅអ៊ីរ៉ាក់ និងស៊ីរី។ ក៏ប៉ុន្តែ នៅទីបំផុត សេចក្តីសម្រេចនេះរកសំឡេងគាំទ្រមិនគ្រប់ ៩សំឡេង ហើយអាមេរិកក៏មិនចាំបាច់ត្រូវប្រើសិទ្ធិវ៉េតូ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ