អ៊ីស្រាអែលផ្តើមចេញមុខសងសឹកនឹងប្រទេសដែលបានបោះឆ្នោតគាំទ្រលើសេចក្តីសម្រេចរបស់អ.ស.ប.
ចុះផ្សាយនៅថ្ងៃ៖
ស្តាប់ - ០៦:៣១
នៅក្នុងប្រទេសអ៊ីស្រាអែល រដ្ឋាភិបាលរបស់លោកនាយករដ្ឋមន្រ្តីបិនយ៉ាមីន នេតាន់យ៉ាហ៊ូបន្តបញ្ចេញប្រតិកម្មប្រឆាំងនឹងសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃសុក្រ ទី២៣ ធ្នូ និងចាត់វិធានការជាក់ស្តែងប្រឆាំងនឹងប្រទេសដែលបានបោះឆ្នោតគាំទ្រលើសេចក្តីសម្រេចចិត្តនោះ។ ការដែលអ៊ីស្រាអែលមិនអាចទប់កំហឹងបាន ព្រោះសេចក្តីសម្រេចចិត្តរបស់អ.ស.ប.បានទាមទារឲ្យអ៊ីស្រាអែលបញ្ឈប់ជាបន្ទាន់នូវការបន្តសាងសង់ និងការតាំងលំនៅឋាននៅក្នុងដែនដីរបស់ប៉ាឡេស្ទីន។
បន្ទាប់ពីបានកោះហៅឯកអគ្គរដ្ឋទូត និងឯកអគ្គរាជទូតចំនួន ១០រូបប្រចាំអ៊ីស្រាអែលទៅសួរនាំមក រដ្ឋាភិបាលអ៊ីស្រាអែលផ្តើមធ្វើការសងសឹកលើប្រទេសដែលបានបោះឆ្នោតគាំទ្រលើសេចក្តីសម្រេចចិត្តនោះ។ មុនគេ គឺប្រទេសអ៊ុយក្រែនដោយលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបានសម្រេចចិត្តលុបចោលវិញនូវដំណើរទស្សនកិច្ចរបស់សមភាគីអ៊ុយក្រែនលោក Volodymyr Groïsman នៅក្នុងប្រទេសអ៊ីស្រាអែលនាថ្ងៃសៅរ៍ចុងសប្តាហ៍នេះ។
អ៊ីស្រាអែលមិនបានលើកយកហេតុអ្វីអ្វីទៅបញ្ជាក់ទេ តែគេអាចដឹងបានថា មកពីអ៊ីស្រាអែលមិនសប្បាយចិត្តនឹងអ៊ុយក្រែនដែលបានបោះឆ្នោតគាំទ្រលើសេចក្តីសម្រេចចិត្តរបស់ក្រុមប្រឹក្សាសន្តិសុខប្រឆាំងអ៊ីស្រាអែល។ គួរបញ្ជាក់ថាកន្លងមក ទីក្រុងគៀវមានជំហរប្រយ័ត្នប្រយែងខ្លាំងណាស់ចំពោះជម្លោះនៅតំបន់ដើមបូព៌ារវាងអ៊ីស្រាអែល និងប៉ាឡេស្ទីន។ តែលើកនេះ អ៊ុយក្រែនបែរជាបានបញ្ចេញសំឡេងប្រឆាំងអ៊ីស្រាអែលដោយចាក់ស្របជាមួយប្រទេសផ្សេង និងដែលកាយវិការរបៀបនេះបានធ្វើឲ្យអ៊ីស្រាអែលក្តៅស្លឹកត្រចៀកងំ។
មួយវិញទៀត ក្រសួងការបរទេសអ៊ុយក្រែនថែមទាំងបានផ្សព្វផ្សាយសេចក្តីថ្លែងការណ៍មួយរិះគន់ ទិតៀនលើប្រតិកម្មរបស់អ៊ីស្រាអែលចំពោះសេចក្តីសម្រេចចិត្តរបស់ក្រុមប្រឹក្សាសន្តិសុខ។ ក្រោយសេចក្តីថ្លែងការណ៍នោះ អ៊ុយក្រែន និងអ៊ីស្រាអែលក៏បានកោះហៅឯកអគ្គរដ្ឋទូតម្ខាងៗទៅសួរនាំ។ ទីក្រុងគៀវបានពន្យល់បកស្រាយថា ការដែលខ្លួនបោះឆ្នោតគាំទ្រលើសេចក្តីសម្រេចចិត្តរបស់ក្រុមប្រឹក្សាសន្តិសុខប្រឆាំងអ៊ីស្រាអែល ក៏ដោយសារតែខ្លួនក៏ជាប្រទេសរងគ្រោះដោយការលាបត្របាក់ទឹកដីពីរុស្ស៊ីដូចដែលប៉ាឡេស្ទីនកំពុងរងគ្រោះពីអ៊ីស្រាអែលអ៊ីចឹងដែរ។
គឺនៅក្នុងន័យនេះហើយបានជាអ៊ុយក្រែនអំពាវនាវឲ្យមានការគោរពច្បាប់អន្តរជាតិឲ្យបានត្រឹមត្រូវ ទោះបីជាដើម្បីអធិបតេយ្យនៅអ៊ុយក្រែន ឬនៅក្នុងដែនដីប៉ាឡេស្ទីនក្តី។
អ៊ីស្រាអែលប្រដូចសន្និសីទអន្តរជាតិនៅបារាំងនាថ្ងៃទី១៥ មករាជា សវនាការ « Dreyfus »
នៅថ្ងៃទី១៥ មករាខាងមុខ បារាំងនឹងធ្វើជាម្ចាស់ផ្ទះរៀបចំសន្តិសីទអន្តរជាតិមួយស្តីពីជម្លោះអ៊ីស្រាអែល និងប៉ាឡេស្ទីន។ តែអ៊ីស្រាអែល តាមរយៈលោករដ្ឋមន្រ្តីការពារជាតិ Avigdor Lieberman បានប្រដូចសន្និសីទនេះទៅនឹងសវនាការ « Dreyfus »សម័យទំនើបប្រឆាំងអ៊ីស្រាអែល។ សូមជម្រាបជូនថា Dreyfus គឺជាឈ្មោះមន្រ្តីយោធាជនជាតិជ្វីហ្វម្នាក់ដែលត្រូវបានតុលាការបារាំងកាត់ទោសពីបទចារកម្មកាលពីឆ្នាំ ១៨៩៤។ រឿងរ៉ាវប្រវត្តិសាស្រ្តយូរលង់មួយនេះបានបន្តក្លាយជាព្រឹត្តិការណ៍ដែលបង្កប់ដោយនិមិត្តរូបនៃការប្រឆាំងជនជាតិជ្វីហ្វមកដល់បច្ចុប្បន្ន។
លោក Lieberman បានយល់ឃើញថា សន្និសីទអន្តរជាតិស្តីពីជម្លោះអ៊ីស្រាអែល និងប៉ាឡេស្ទីនដែលបារាំងគ្រោងរៀបចំនៅថ្ងៃទី១៥ មករាខាងមុខ ជាសវនាការ« Dreyfus » សម័យទំនើបដើម្បីកែនប្រមូលសហគមន៍អន្តរជាតិឲ្យប្រឆាំងអ៊ីស្រាអែល។ តាមលោក Lieberman អ្វីដែលខុសគ្នានៅត្រង់ថា សវនាការ« Dreyfus » ឆ្នាំ ១៨៩៤ មានជនជាប់ចោទតែម្នាក់គត់នៅក្នុងរង្វង់ក្រចកសេះ តែសវនាការ« Dreyfus » សម័យទំនើបនឹងមានរដ្ឋអ៊ីស្រាអែល និងពលរដ្ឋជ្វីហ្វទាំងអស់តែម្តងដែលស្ថិតក្នុងរង្វង់ក្រចកសេះ។
សូមជម្រាបជូនថា សន្តិសីទអន្តរជាតិស្តីពីជម្លោះអ៊ីស្រាអែល និងប៉ាឡេស្ទីនដែលបារាំងគ្រោងរៀបចំធ្វើនៅថ្ងៃទី១៥ មករាខាងមុខនឹងមាន ៧០ប្រទេសចូលរួម តែគ្មានវត្តមានអ៊ីស្រាអែល និងប៉ាឡេស្ទីនទេ។ ភាគីជម្លោះទាំងពីរអ៊ីស្រាអែល និងប៉ាឡេស្ទីនក៏ត្រូវបារាំងអញ្ជើញដែរ តែអញ្ជើញឲ្យមកទទួលសាររបស់សន្និសីទ។ លោកប្រមុខរដ្ឋអំណាចប៉ាឡេស្ទីនអាបាស់បានយល់ព្រមតាមការអញ្ជើញរបស់បារាំងរួចហើយ តែលោកប្រមុខរដ្ឋាភិបាលអ៊ីស្រាអែលនេតាន់យ៉ាហ៊ូបានប្រកាសមិនទៅបារាំងទេ។
សហគមន៍អន្តរជាតិចង់ផ្ញើសារឲ្យអ៊ីស្រាអែល
ចំណាត់ការ និងសង្រ្គាមពាក្យសម្តីរបស់អ៊ីស្រាអែលទល់នឹងក្រុមប្រទេសដែលគាំទ្រសេចក្តីសម្រេចចិត្តក្រុមប្រឹក្សាសន្តិសុខអាចនឹងមិនជះផលវិបាកអ្វីធំដុំប៉ុន្មានទេចំពោះអ៊ីស្រាអែលខ្លួនឯង និងចំពោះប្រទេសផ្សេង។ ក៏ប៉ុន្តែ ការប្រទាញប្រទង់គ្នាពេលនេះអាចបង្កប់ជានិម្មិតរូបនយោបាយមួយធំធេងណាស់សម្រាប់អ៊ីស្រាអែលក៏ដូចជាសហគមន៍អន្តរជាតិនៅក្នុងជម្លោះរវាងអ៊ីស្រាអែល និងប៉ាឡេស្ទីនដ៏រុំារ៉ៃ និងស្មុគស្មាញ។ សេចក្តីសម្រេចចិត្តរបស់ក្រុមប្រឹក្សាដែលបានទាមទារឲ្យអ៊ីស្រាអែលបញ្ឈប់ជាបន្ទាន់នូវការបន្តសាងសង់ និងការតាំងលំនៅឋាននៅក្នុងដែនដីរបស់ប៉ាឡេស្ទីនក៏ជាសេចក្តីសម្រេចចិត្តមួយបង្កប់ដោយនិមិត្តរូបដែរ ព្រោះថា បើអ៊ីស្រាអែលមិនគោរពក៏អ៊ីស្រាអែលគ្មានទោសទ័ណ្ឌអ្វីដែរ។
សមាជិកទាំង ១៥ប្រទេសនៅក្នុងក្រុមប្រឹក្សាសន្តិសុខបានយល់ច្បាស់ណាស់ចំពោះបញ្ហានេះ តែការដែលពួកគេបាននិយាយសំឡេងតែមួយដូចគ្នាពេលនេះ ជាសារមួយដែលគេចង់បញ្ជូនប្រាប់អ៊ីស្រាអែលពីការទទូចចង់បាន និងការចង់ឃើញរបស់សហគមន៍អន្តរជាតិនូវដំណោះស្រាយរដ្ឋពីររស់ក្បែរគ្នាដោយសុខសន្តិភាពរវាងអ៊ីស្រាអែល និងប៉ាឡេស្ទីន។ សហគមន៍អន្តរជាតិបានយល់ឃើញថា គឺការបន្តអនុវត្តនយោបាយអាណានិគមរបស់អ៊ីស្រាអែលលើដែនដីរបស់ប៉ាឡេស្ទីននោះហើយដែលជាឧបសគ្គចម្បងនៅក្នុងដំណើរស្វែងរកសន្តិភាពរវាងអ៊ីស្រាអែល និងប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ