ហេតុអ្វីបានជាអារ៉ាប៊ីសាអូឌីតប្តូរយុទ្ធសាស្រ្តនៅយេម៉ែន?
ចុះផ្សាយនៅថ្ងៃ៖
ស្តាប់ - ០៥:៣៥
ជាងមួយខែមកហើយដែលប្រទេសអារ៉ាប៊ីសាអូឌីតបានដឹកនំាកម្លំាងសម្ព័ន្ធមិត្តអារ៉ាប់វាយប្រហារផ្លូវអាកាសលើពួកឧទ្ទាមហ៊ូទីស្សក្នុងប្រទេសយេម៉ែន។ គឺជាប្រតិបត្តិការដែលទីក្រុងរីយ៉ាដដាក់ឈ្មោះថា « ព្យុះសង្ឃរាដាច់ខាត »។ តែនៅពេលនេះ និងបន្ទាប់ពីបានបើកការទម្លាក់គ្រាប់បែកលើទីតំាងរបស់ពួកឧទ្ទាមហ៊ូទី្សយ៉ាងចាស់ដៃជាង ១ខែមក អារ៉ាប៊ីសាអូឌីតហាក់ដូចជាបានបន្ធូរដៃបន្តិច ដោយបានប្តូរពីប្រតិបត្តិការ « ព្យុះសង្ឃរាដាច់ខាត » ទៅជាប្រតិបត្តិការ « ស្ថាបនាក្តីសង្ឃឹមឡើងវិញ »។ ហេតុអ្វីបានជាអារ៉ាប៊ីសាអូឌីតបានសម្រេចចិត្តប្តូរយុទ្ធសាស្រ្តរបស់ខ្លួននៅយេម៉ែន?
គឺនៅថ្ងៃទី២១ មេសាកន្លងទៅថ្មីៗនេះដែលប្រទេសអារ៉ាប៊ីសាអូឌីតបានប្រកាសឲ្យដឹងពីការបិទបញ្ចប់ប្រតិបត្តិការដំណាក់កាលទី១ ក្រោមឈ្មោះ « ព្យុះសង្ឃរាដាច់ខាត » និងចាប់ផ្តើមបើកប្រតិបត្តិការដំណាក់កាលទី២ ក្រោមឈ្មោះថា « ស្ថាបនាក្តីសង្ឃឹមឡើងវិញ » នៅក្នុងប្រទេសយេម៉ែន។ ចាប់ពីពេលនេះតទៅ ប្រតិបត្តិការទម្លាក់គ្រាប់បែកប្រឆំាងនឹងពួកឧទ្ទាមហ៊ូទី្ស និងក្រុមប្រដាប់អាវុធអ្នកគំាទ្រលោកអតីតប្រធានាធិបតីអាលី អាប់ដាឡាសាឡេនៅយេម៉ែននឹងត្រូវកាត់បន្ថយ បន្ទាប់ពីបានវាយប្រហារយ៉ាងដំណំអស់រយៈពេល ១ខែកន្លងមក។ កម្មវត្ថុនៃដំណាក់កាលទី២ របស់ទីក្រុងរីយ៉ាដនឹងត្រូវផ្តោតសំខាន់លើបញ្ហាសន្តិសុខ ប្រឆំាងនឹងភេរវនិយម និងការស្វែងរកដំណោះស្រាយឲ្យវិបត្តិយេម៉ែនតាមផ្លូវនយោបាយ។
ក៏ប៉ុន្តែ ឧត្តមសេនីយអារ៉ាប៊ីសាអូឌីតដែលជាអ្នកនំាពាក្យរបស់កម្លំាងអារ៉ាប់វាយប្រហារលើពួកឧទ្ទាមហ៊ូទី្សនៅយេម៉ែនបានព្រមានទុកជាមុនរួចជាស្រេចថា គោលដៅនៃដំណាក់កាលទី១ និងដំណាក់កាលទី២ នៅតែដដែលគ្មានផ្លាស់ប្តូរអ្វីទេ ពោលគឺទប់ស្កាត់ការបំលាស់ទីរបស់ពួកឧទ្ទាមហ៊ូទី្សដើម្បីកុំឲ្យពួកនេះដើរបង្កសកម្មភាពនៅផ្ទៃក្នុងប្រទេសយេម៉ែន។ តាមរយៈសម្តីរបស់ឧត្តមសេនីយអារ៉ាប៊ីសាអូឌីតរូបនេះនំាឲ្យគេយល់បានថា ប្រតិបត្តិការទម្លាក់គ្រាប់បែកលើពួកឧទ្ទាមហ៊ូទី្សអាចនឹងបន្តមាន តែមិនអចិន្ត្រៃយ៍ដូចមុនទៀតឡើយ។ បើយោងតាមក្រសួងការពារជាតិអារ៉ាប៊ីសាអូឌីត ប្រតិបត្តិការវាយប្រហារផ្លូវអាកាសរបស់កម្លំាងអារ៉ាប់នៅយេម៉ែនទទួលបានជោគជ័យ ដោយបំបាត់បានទំាងស្រុងនូវរាល់ទង្វើគំរាមកំហែងលើប្រទេសអារ៉ាប៊ីសាអូឌីត និងបណ្តាប្រទេសជិតខាង។
ចំណែកលោកប្រធានាធិបតីយេម៉ែនហាឌីដែលកំពុងជ្រកកោនក្នុងទឹកដីអារ៉ាប៊ីសាអូឌីតក៏បានចាត់ទុកប្រតិបត្តិការរបស់កម្លំាងអារ៉ាប់ថា ជាជោគជ័យដែរ និងថា លោកនឹងវិលត្រឡប់មាតុប្រទេសវិញនាពេលឆាប់ៗខាងមុខ។ តែបញ្ហានៅត្រង់ថា ចលនាឧទ្ទាមហ៊ូទី្ស ក៏ដូចជាក្រុមប្រដាប់អាវុធអ្នកគំាទ្រលោកអតីតប្រធានាធិបតីសាឡេនៅយេម៉ែនមិនបានយល់ឃើញដូច្នេះឯណា។ សម្រាប់ពួកគេ ការដែលអារ៉ាប៊ីសាអូឌីតបានប្តូរយុទ្ធសាស្រ្តពីប្រតិបត្តិការ « ព្យុះសង្ឃរាដាច់ខាត » ទៅជាប្រតិបត្តិការ « ស្ថាបនាក្តីសង្ឃឹមឡើងវិញ » ពេលនេះ គឺជាបរ៉ាជ័យរបស់កម្លំាងអារ៉ាប់ និងជាជោគជ័យរបស់ខ្លួន។
មកដល់ត្រង់ចំណុចនេះនំាឲ្យមានសំណួរមួយចោទឡើងថា តើការពិតនៅត្រង់ណា?
សម្រាប់ទីក្រុងរីយ៉ាដ មានសញ្ញាពីរដែលអាចបញ្ជាក់ពីភាពចុះខ្សោយរបស់កម្លំាងឧទ្ទាមហ៊ូទី្ស ទី១ គឺប្រតិបត្តិការវាយប្រហារផ្លូវអាកាសរយៈពេល ១ខែរបស់កម្លំាងអារ៉ាប់ និងទី២ គឺការដែលគណបក្សនយោបាយរបស់អតីតប្រធានាធិបតីយេម៉ែនសាឡេបានគំាទ្រសេចក្តីសម្រេចចិត្តលេខ ២២១៦ អនុម័តដោយក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី១៤ មេសាកន្លងទៅ។ គឺជាសេចក្តីសម្រេចចិត្តដែលបានជម្រុញឲ្យក្រុមឧទ្ទាមហ៊ូទី្សដកកម្លំាងថយចេញពីដែនដីដែលពួកគេបានចូលកាន់កាប់នារយៈពេលប៉ុន្មានខែចុងក្រោយនេះ។ គួរជម្រាបជូនថា ក្រុមប្រដាប់អាវុធស្មោះស្ម័គ្រនឹងលោកសាឡេក៏បានរួមកម្លំាងជាមួយពួកឧទ្ទាមហ៊ូទី្សដើម្បីសោយរាជ្យនៅយេម៉ែនដែរ។
ក៏ប៉ុន្តែ និងបើគេសង្កេតមើលឲ្យបានជាក់ស្តែងបន្តិចឃើញថា កម្លំាងរបស់ពួកឧទ្ទាមហ៊ូទី្សមិនបានចុះខ្សោយទេ ពោលគឺនៅតែរឹងមាំដដែល ហើយប្រមុខឧទ្ទាមដែលមានវ័យក្មេងថែមទំាងបានចេញមុខប្រកាសក្តែងៗថា មិនដែលមានបំណងចង់ទម្លាក់អាវុធចុះចាញ់ម្តងណាឡើយ។ បើអ៊ីចឹងសួរថា ហេតុអ្វីបានជាអារ៉ាប៊ីសាអូឌីតបានសម្រេចចិត្តប្តូរយុទ្ធសាស្រ្តរបស់ខ្លួនពីប្រតិបត្តិការ « ព្យុះសង្ឃរាដាច់ខាត » ទៅជាប្រតិបត្តិការ « ស្ថាបនាក្តីសង្ឃឹមឡើងវិញ » យ៉ាងដូច្នេះ?
តាមពិតទៅ គឺអាចមានហេតុផលសំខាន់ចំនួនពីរដែលបានបង្ខំចិត្តអារ៉ាប៊ីសាអូឌីតឲ្យប្តូរយុទ្ធសាស្រ្តរបស់ខ្លួននៅយេម៉ែន ទី១ គឺវិបត្តិមនុស្សធម៌ និងទី២ គឺការដែលទីក្រុងរីយ៉ាដចង់ផ្តល់ឱកាសឲ្យមានដំណោះស្រាយផ្លូវទូតចំពោះវិបត្តិយេម៉ែន។ និយាយពីវិបត្តិមនុស្សធម៌ ថ្មីៗនេះ អង្គការសហប្រជាជាតិបានលើកឡើងពីតួលេខមនុស្សស្លាប់ជិត ១០ ០០០នាក់ និងរបួសជាង ៦ ០០០នាក់ ព្រមទំាងស្ថានការណ៍មនុស្សធម៌ដ៏មហន្តរាយនៅយេម៉ែនមានដូចជា កង្វះទឹកស្អាតប្រើប្រាស់ កង្វះចំណីអាហារ ថ្នំាពេទ្យ និងភ្លើងអគ្គិសនី។ សុទ្ធសឹងជាបញ្ហាដែលអារ៉ាប៊ីសាអូឌីតបានទទួលគំនាបខ្លំាងពីសហគមន៍អន្តរជាតិឲ្យបញ្ឈប់ការវាយប្រហារលើយេម៉ែន។
និយាយពីដំណោះស្រាយផ្លូវទូត អារ៉ាប៊ីសាអូឌីតបានសម្លឹងឃើញចំណុចវិជ្ជមានចំនួន ៣ ដែលនឹងអាចចេញរួច ទី១ គឺការដែលរុស្ស៊ីបានឈរនៅកណ្តាលទាក់ទងនឹងសេចក្តីសម្រេចចិត្តលេខ ២២១៦ របស់ក្រុមប្រឹក្សាសន្តិសុខ ទី២ ការតែងតំាងលោកអាម៉េដនាពេលឆាប់ៗខាងមុខ ជាប្រេសិតពិសេសរបស់អង្គការសហប្រជាជាតិទទួលបន្ទុកវិបត្តិយេម៉ែនជំនួសលោកបឺណូម៉ារដែលអារ៉ាប៊ីសាអូឌីតបាត់ការទុកចិត្ត និងទី៣ គឺការតែងតំាងលោកបាហាដែលសព្វថ្ងៃជានាយករដ្ឋមន្រ្តីយេម៉ែនឲ្យកាន់តំណែងអនុប្រធានាធិបតី។
គឺការតែងតំាងលោកបាហាជាអនុប្រធានាធិបតីយេម៉ែនដែលអារ៉ាប៊ីសាអូឌីតមានក្តីសង្ឃឹមច្រើនថា វិបត្តិនយោបាយយេម៉ែននឹងអាចបិទបញ្ចប់តាមផ្លូវនយោបាយ។ មានអាយុ ៥០ឆ្នំា លោកបាហាត្រូវបានគេស្គាល់ជាអ្នកនយោបាយមានទឹកមាត់ប្រៃ និងចេះសម្របសម្រួល ពិសេសលោកទទួលបានការគំាទ្រពីពួកឧទ្ទាមហ៊ូទី្ស ក៏ដូចជាក្រុមសកម្មជនអ្នកគំាទ្រលោកអតីតប្រធានាធិបតីធ្លាក់ពីអំណាចសាឡេ។ ផ្លូវនយោបាយ ពិតជាច្រកមួយដែលសហគមន៍អន្តរជាតិចង់បាន តែអ្នកដែលហាក់ដូចជាចង់បានលឿនជាងគេ គឺអារ៉ាប៊ីសាអូឌីត ព្រោះការបន្តអូសស្ថានការណ៍ក្នុងផ្លូវសង្រ្គាមនឹងអាចធ្វើឲ្យខ្លួនជាប់ផុងកាន់តែជ្រៅពិបាកដកចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ