អ.ស.ប. តម្រូវឲ្យភាគីទាំងអស់នៅយេម៉ែនដាក់អាវុធចុះ ជាបន្ទាន់
ប្រឈមមុខជាមួយនឹង ការបាញ់ប្រហារគ្នាកាន់តែក្តៅគគុក ដែលធ្វើឲ្យចំនួនអ្នកស្លាប់នៅយេម៉ែន មានកាន់តែច្រើន អង្គការសហប្រជាជាតិ បានអំពាវនាវនៅថ្ងៃសុក្រទី ១៧ មេសា ថាភាគីទាំងអស់ ត្រូវទំលាក់អាវុធឈប់បាញ់ ជាបន្ទាន់ ហើយត្រូវរៀបចំជួបចរចាគ្នា។ ដូចគ្នាដែរ អង្គការមនុស្សធម៌មួយចំនួន បានអំពាវនាវឲ្យមានការបើកផ្លូវ ដើម្បី ដឹកយកជំនួយថ្នាំពេទ្យ និងស្បៀងអាហារ ទៅជួយប្រជាជនយេម៉ែន។ អារ៉ាប៊ីសាអ៊ូឌីត ដែលដឹកនាំការវាយប្រហារលើយេម៉ែន ធ្វើមិនដឹងមិនឮ ពីការអំពាវនាវទាំងនេះទេ។
ចុះផ្សាយនៅថ្ងៃ៖
ស្តាប់ - ០២:១៧
អង្គការកាកបាទក្រហមអន្តរជាតិ ដែលមានទីស្នាក់ការនៅក្រុងហ្ស៊ឺណែវ ប្រទេសស្វ៊ីសបានប្រកាសថា យេម៉ែន កំពុងស្ថិតក្នុងភាពអាសន្នដោយខ្វះខាតជាពិសេស ថ្នាំពេទ្យ ស្បៀងអាហារ និងប្រេងសាំង។ ការបាញ់ប្រហារគ្នា នៅលើដីរវាង ក្រុមហ៊ូទីស និងក្រុមកម្លាំងរបស់រដ្ឋាភិបាល បន្ថែមពីលើមេឃ ដោយគ្រាប់បែករបស់ក្រុមប្រទេសសម្ព័ន្ធមិត្តអារ៉ាប់ ដែលមានអារ៉ាប៊ីសាអ៊ូឌីតជាអ្នកបញ្ជា បានបំបែកប្រជាជនយេម៉ែន ជាច្រើនពាន់នាក់ ឲ្យរត់ខ្ចាត់ខ្ចាយ។
គិតមកដល់ត្រឹមថ្ងៃទី ១៨មេសា នេះ មានមនុស្សស្លាប់ ប្រមាណជា ៧៦៧ នាក់ និងរបួស២៩០៦ នាក់។ ចំនួនជាក់ស្តែងអាចមានលើសនេះ ដោយសារតែសាកសព មួយចំនួន ត្រូវគេទុកចោលនៅតាមផ្លូវ ហើយមិនត្រូវបានស្រង់ចូលស្ថិតិទេ។ អង្គការសហប្រជាជាតិ រួមជាមួយអង្គការមនុស្សធម៌ផ្សេងទៀត បានអំពាវនាវរកថវិកាចំនួន ២៧៣លានដុល្លារ ដើម្បីទិញស្បៀងអាហារ និងថ្នាំពេទ្យ ទៅជួយប្រជាជនយេម៉ែន។
យ៉ាងណាមិញ នៅថ្ងៃសុក្រទី ១៧មេសា លោក បាន គីមូន អគ្គលេខាធិការអង្គការសហប្រជាជាតិបានប្រកាសអំពាវនាវ ឲ្យភាគីទាំងអស់ ដាក់អាវុធចុះឈប់បាញ់ ជាបន្ទាន់ ដើម្បីចាប់ផ្តើមឲ្យមានការចរចាគ្នាដោយសន្តិវិធី។ លោក បាន គីមូន បានសន្ទនាតាមទូរស័ព្ទជាមួយលោក ឆារីហ្វ រដ្ឋមន្រ្តីការបរទេសអ៊ីរ៉ង់ ស្តីពីបញ្ហានៅយេម៉ែន។ លោក បាន គីមូន បានបញ្ជាក់ថា ការចរចាដោយសន្តិវិធី គឺជាវិធីតែមួយគត់ ដើម្បីបញ្ចប់ជម្លោះនៅយេម៉ែន។
សូមបញ្ជាក់ផងដែរថា អ៊ីរ៉ង់ បានអំពាវនាវជាច្រើនលើក ឲ្យមានការដាក់អាវុធឈប់បាញ់។ អ៊ីរ៉ង់បានរិះគន់ ការវាយប្រហារ ដែលដឹកនាំដោយអារ៉ាប៊ីសាអ៊ូឌីត ថានេះ គឺវាបានបន្ថែមភ្លើងសង្រ្គាមទៅលើយេម៉ែន។ អ៊ីរ៉ង់បានបដិសេធ ការចោទប្រកាន់របស់ អារ៉ាប៊ីសាអ៊ូឌីត ថា អ៊ីរ៉ង់ជាអ្នកផ្តល់សម្ភារៈយោធាឲ្យពួកឧទ្ទាមហ៊ូទីស។ លោករដ្ឋមន្ត្រីការបរទេសអ៊ីរ៉ង់ បានបញ្ជាក់ថា អ៊ីរ៉ង់ត្រៀមខ្លួនជានិច្ច ក្នុងការប្រើឥទ្ធិពលរបស់ខ្លួន ដើម្បីអូសទាញ ភាគីមួយចំនួនឲ្យមកចូលតុចរចា ដរាបណាអារ៉ាប៊ីសាអ៊ូឌីត បញ្ឈប់ការទម្លាក់គ្រាប់បែក។
ទោះបីជាយ៉ាងណា រហូតមកដល់ពេលនេះហើយ គេមិនដែលទទួលបានប្រតិកម្មអ្វីពី អារ៉ាប៊ីសាអ៊ូឌីត ទាល់តែសោះ ហើយបើតាមការស្មាន អារ៉ាប៊ីសាអ៊ូឌីត គ្មានឆន្ទៈបញ្ឈប់ប្រតិបត្តិការយោធាខ្លួនទេ មានតែបន្ថែមតាមផ្លូវគោកទៀត។ ដោយឡែក លោក បេណូម៉ា អាជ្ញាកណ្តាល តំណាងពិសេសរបស់អង្គការសហប្រជាជាតិ បានលាលែងពីតំណែងហើយ ក្រោមសម្ពាធរបស់អារ៉ាប៊ីសាអ៊ូឌីត និងក្រុមប្រទេសអារ៉ាប់ស៊ុនីត។ អ្នកដែលកំពុងតែក្រេបជញ្ជក់យកផល យ៉ាងសប្បាយដៃ ពីភាពចលាចលនៅយេម៉ែន គឺក្រុមអាល់កាអ៊ីដាឯណោះទៅវិញទេ ដែលបានឆ្មក់វាយយកទីតាំងយុទ្ធសាស្ត្រជាច្រើនកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ