បេសកជនតំណាងអ.ស.ប ថ្មីទើបបានតែងតាំងដើម្បីដោះស្រាយវិបត្តិនៅយេម៉ែន
អង្គការសហប្រជាជាតិ ទើបតែបានតែងតាំងបេសកជនពិសេស ថ្មីមួយរូបទៀត ដើម្បីជំនួសលោក បេណូម៉ា ដែលបានលាលែងចេញពីតំណែង។ បេសកជនពិសេស នេះ នឹងទទួលបន្ទុកធ្វើការសម្រុសសម្រួល ក្នុងការចរចារកសន្តិភាពនៅប្រទេសយេម៉ែន។ ការចរចាសន្តិភាពដែលត្រូវបានរាំងស្ទះអស់រយៈពេលជាងមួយខែមកហើយ បន្ទាប់ពីក្រុមសម្ព័ន្ធមិត្តអារ៉ាប់ស៊ុនីត ដែលដឹកនាំដោយអារ៉ាប៊ីសាអ៊ូឌីត បានធ្វើការទម្លាក់គ្រាប់បែកលើក្រុមឧទ្ទាមហ៊ូទីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ទីបំផុត ដូចការប៉ាន់ស្មានទុក ប្រាកដមែន លោកបាន គីមូន អគ្គលេខាធិការអង្គការសហប្រជាជាតិ បានតែងតាំងលោក អ៊ីស្មាយ អ៊ូល ឈេក អាមេដ ធ្វើជាបេសកជនពិសេស តំណាងឲ្យអង្គការសហប្រជាជាតិ ដើម្បីដោះស្រាយវិបត្តិនៅយេម៉ែន។ បេសកជនថ្មីនេះ នឹងត្រូវចូលទៅធ្វើការជំនួសលោក បេណូម៉ា ដែលបានលាលែងចេញពីតំណែង កាលពីដើមខែមេសា។
លោក អ៊ូល ឈេក អាមេដ ជាជនជាតិ ម៉ូរីតានី មានអាយុ៥៥ឆ្នាំ ហើយមានបទពិសោធន៍បំរើការងារក្នុងក្របខណ្ឌអង្គការសហប្រជាជាតិ អស់រយៈពេល ២៨ឆ្នាំមកហើយ។ លោកត្រូវបានតែងតាំង ក៏ដោយសារតែបទពិសោធន៍ ក្នុងទ្វីបអាហ្រ្វិក និងតំបន់ដើមបូព៌ា ជាច្រើន ដែលគាត់ធ្លាប់បានឆ្លងកាត់។ ថ្មីៗនេះ លោកធ្លាប់មេក្រុមដឹកនាំបេសកកម្មអង្គការសហប្រជាជាតិ ដើម្បីកម្ចាត់មេរោគអេបូឡា។ លោកក៏ធ្លាប់ធ្វើជាអ្នកសម្របសម្រួល កម្មវិធីមនុស្សធម៌ របស់អង្គការសហប្រជាជាតិ ប្រចាំការនៅស៊ីរី នៅយេម៉ែន និងនៅលីប៊ីផងដែរ។ ការតែងតាំងរបស់លោក ត្រូវបានសហភាពអឺរ៉ុបគាំទ្រ ហើយសន្យា ផ្តល់ការគាំទ្រនយោបាយ ដើម្បីសម្រេចបេកកម្ម ក្នុងការស្វែងរក សន្តិភាពនៅយេម៉ែន។
ប៉ុន្តែទោះបីជាយ៉ាងណាក៏ដោយ បេសកកម្មស្វែងរកសន្តិភាពនៅយេម៉ែន មិនប្រាកដថាងាយស្រួលនោះទេ ព្រោះថាមានឧបសគ្គជាច្រើន កំពុងតែរងចាំ។ ក្រុមឧទ្ទាមហ៊ូទីស បានប្រកាសឲ្យដឹងថា ក្រុមគេនឹងមិនចូលតុចរចា ជាដាច់ខាត ដ៏រាបណា អារ៉ាប៊ីសាអ៊ូឌីត នៅតែបន្តទម្លាក់គ្រាប់បែក។ អ្នកនាំពាក្យក្រុមឧទ្ទាមហ៊ូទីស បានប្រាប់អ្នកកាសែតថា ការចរចា ត្រូវតែចាប់ផ្តើមពីចំណុច ដែលបានអាក់ខាន ពោលគឺមុនពេលលោក បេណូមា លាចេញពីតំណែង។
ចំណែកក្រុមសម្ព័ន្ធមិត្តអារ៉ាប់ ស៊ុនីតវិញ ដែលមានអារ៉ាប៊ីសាអ៊ូឌីតជាមេដឹកនាំ នៅតែបន្តធ្វើការទម្លាក់គ្រាប់បែកនៅយេម៉ែន។ នៅថ្ងៃអាទិត្យទី ២៦ មេសា នេះ អារ៉ាប៊ីសាអ៊ូឌីត បានទម្លាក់គ្រាប់បែក ៤កន្លែង ពីលើទីក្រុង សាណា នឹងនៅជាយៗក្រុង ដើម្បីបង្អាក់ដំណើរ របស់ក្រុមឧទ្ទាមហ៊ូទីស។
ជាការពិតណាស់ ការចរចាដោយសន្តិវិធី មិនអាចប្រព្រឹត្តិទៅបានទេ ដរាបណា ភាគីទាំងអស់មិនព្រមទម្លាក់អាវុធ។ អារ៉ាប៊ីសាអ៊ូឌីត ដែលប្រកាន់ជំហររឹងមាំ ហាក់មិនព្រមស្តាប់អ្នកណាទាំងអស់ ហើយប្តេជ្ញា វាយកម្ទេចក្រុមឧទ្ទាមទាល់តែអស់។ ជាមួយគ្នានេះ ជីវិតមនុស្ស ជាង១០០០នាក់ ត្រូវបានស្លាប់ ដែលពាក់កណ្តាលសុទ្ធសឹងជាប្រជាជនស្លូតត្រង់។ តាមរយៈបេសកជនថ្មីនេះ វាដល់ពេលហើយ ដែលអង្គការសហប្រជាជាតិ ត្រូវសំដែងឲ្យគេឃើញ ថាខ្លួនពិតជាមានឥទ្ធិពល បង្ខំឲ្យអារ៉ាប៊ីសាអ៊ូឌីត ឈប់ទម្លាក់គ្រាប់បែកលើយេម៉ែនឲ្យបាន ដើម្បីឲ្យភាគីទាំងអស់ វិលមករកតុចរចា ដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ