ប្រទេសកាតាផ្តើមអនុវត្តន៍ច្បាប់ថ្មីស្តីពីលក្ខខណ្ឌការងាររបស់ពលករបរទេស
ចុះផ្សាយនៅថ្ងៃ៖
ស្តាប់ - ០៤:៣៣
ចាប់ពីថ្ងៃអង្គារ ទី១៨ សីហា ឆ្នំា ២០១៥នេះទៅ ប្រទេសកាតាបានផ្តើមអនុវត្តន៍ច្បាប់ថ្មីស្តីពីការងាររបស់ជនអន្តោប្រវេសន៍។ គឺជាច្បាប់មួយដែលធានាពីលក្ខខណ្ឌការងាររបស់ពលករបរទេសដែលកំពុងធ្វើការងារនៅក្នុងប្រទេសកាតា ពិសេសធានាពីការបង់ប្រាក់បៀវត្សឲ្យបានគ្រប់ចំនួន និងទៀងពេល។ បច្ចុប្បន្ននេះ មានពលករបរទេសជាង ២៥ម៉ឺននាក់ ពិសេសមកពីទ្វីបអាស៊ីដែលកំពុងធ្វើការនៅក្នុងប្រទេសកាតា។ តែទោះជាយ៉ាងនេះក្តី ក្រុមអង្គការក្រៅរដ្ឋាភិបាលបានសម្តែងការព្រួយបារម្ភរួចជាស្រេច ពីប្រសិទ្ធិភាពនៃការអនុវត្តន៍ច្បាប់ថ្មីនោះ។
« Wage Protection System » នេះជាឈ្មោះច្បាប់ការងារថ្មីមួយដែលរដ្ឋាភិបាលនៃប្រទេសកាតាបានតាក់តែងឡើងសម្រាប់ប្រយោជន៍ពលករបរទេសទំាងជាង ២៥ម៉ឺននាក់ដែលកំពុងធ្វើការងារនៅក្នុងប្រទេសកាតា។ ពលករបរទេសទំាងជាង ២៥ម៉ឺននាក់នោះ ភាគច្រើនមកពីទ្វីបអាស៊ី និងដែលភាគច្រើនត្រូវបានគេយកទៅប្រើនៅក្នុងសំណង់សង់ពហុកីដ្ឋានជាតិសម្រាប់រៀបចំការប្រកួតកីឡាបាល់ទាត់ពិភពលោកឆ្នំា ២០២២ ដែលប្រទេសកាតាធ្វើជាម្ចាស់ផ្ទះ។ សារៈសំខាន់នៃច្បាប់ថ្មីនោះ គឺធានាឲ្យមានការបើកប្រាក់ខែត្រឹមត្រូវ និងទៀងទាត់ដល់ពលករបរទេសទំាងអស់។ ក្នុងន័យនេះ ច្បាប់បានតម្រូវឲ្យនិយោជកបើកប្រាក់ខែឲ្យនិយោជិកបរទេសខ្លួន ដោយដាក់បញ្ចូលទៅក្នុងគណនីរបស់និយោជិកម្នាក់ៗដោយផ្ទាល់ ពោលមិនមែនផ្តល់ឲ្យផ្ទាល់ដៃដូចមុនទៀតឡើយ។ ជាមួយនឹងច្បាប់ថ្មីនេះ និយោជកត្រូវតែបញ្ជាក់ឲ្យបានច្បាស់តំាងពីដំបូងថា តើខ្លួននឹងត្រូវបើកប្រាក់ខែឲ្យនិយោជិកនៅរៀងរាល់ ២សប្តាហ៍ម្តង ឬមួយក៏គិត ១ខែម្តង។
ច្បាប់ថ្មីនេះនឹងផ្តើមចូលជាធរមានចាប់ពីថ្ងៃអង្គារ ទី១៨ សីហា ឆ្នំា ២០១៥នេះទៅ តែរដ្ឋបានទុករយៈពេល ៦ខែឲ្យក្រុមហ៊ុន និងរោងចក្រ សហគ្រាសសម្រាប់ធ្វើការកែប្រែ ផ្លាស់ប្តូរប្រព័ន្ធផ្ទៃក្នុងរបស់ខ្លួន មុននឹងផ្តើមអនុវត្តន៍ជាផ្លូវការ។ គួរជម្រាបជូនថា វត្តមានច្បាប់ថ្មីស្តីពីប្រាក់ខែពលករបរទេសពេលនេះបានធ្វើឡើង ចំពេលដែលក្រុមអង្គការក្រៅរដ្ឋាភិបាលតែងតែចេញមុខរិះគន់ ទិទៀនលើក្រុមថៅកែដែលយឺតយ៉ាវក្នុងការបើកប្រាក់ខែឲ្យពលករបរទេសរបស់ខ្លួន។ នៅក្នុងរបាយការណ៍មួយក្រោមចំណងជើងថា « រូបភាពនៃក្រុមជនអន្តោប្រវេសន៍តម្លៃថោកនៅកាតាសព្វថ្ងៃ » ឲ្យដឹងថា មានពលករបរទេសរហូតដល់ទៅ ២១% ឯណោះដែលត្រូវបានថៅកែបើកប្រាក់ខែឲ្យមិនទៀងពេល ពោលមានការយឺតយ៉ាវខ្លំាងណាស់។
តែចាប់ពីពេលនេះតទៅ ច្បាប់ថ្មីបានកំណត់យ៉ាងច្បាស់ថា ក្រុមហ៊ុន ឬរោងចក្រ សហគ្រាសណាដែលយឺតយ៉ាវក្នុងការបើកប្រាក់ខែឲ្យពលករបរទេសរបស់ខ្លួន នឹងត្រូវផាកពិន័យជាលុយចំនួន ១ ៦៥០ដុល្លារ ហើយថៅកែទៀតសោតអាចនឹងកាត់ទោសញាត់គុក។ ទន្ទឹមគ្នានេះ ក្រុមហ៊ុន ឬរោងចក្រ សហគ្រាសណាដែលរំលោភច្បាប់នឹងអាចគ្មានសិទ្ធិរើសពលករបរទេសថ្មីឲ្យធ្វើការទេ។ ដើម្បីអាចផ្ទៀងផ្ទាត់ពីការអនុវត្តន៍ច្បាប់ឲ្យបានត្រឹមត្រូវ រដ្ឋាភិបាលបានបង្កើតឲ្យមានក្រុមអធិការមួយដើម្បីចុះត្រួតពិនិត្យ។
ដូច្នេះឃើញថា នេះជាវិធានការថ្មីមួយដែលរដ្ឋាភិបាលទីក្រុងដូហាចង់បង្កើនលក្ខខណ្ឌការងាររបស់ជនអន្តោប្រវេសន៍ក្នុងស្រុកដែលជានិច្ចតែងតែទទួលការរិះគន់យ៉ាងចាស់ដៃពីក្រុមអង្គការក្រៅរដ្ឋាភិបាល។ កន្លងមក កាតាក៏ធ្លាប់បានអនុម័តច្បាប់ជាច្រើនដើម្បីបង្កើនលក្ខខណ្ឌការងាររបស់ពលករបរទេស តែមិនបានគោរពតាមទេ។ នៅក្នុងរបាយការណ៍មួយចេញផ្សាយកាលពីខែឧសភាកន្លងទៅ Amnesty international បានចោទកាតាពីបទមិនបានគោរពច្បាប់ដែលខ្លួនបានអនុម័តក្នុងឆ្នំា ២០១៤។
គឺជាច្បាប់ដែលកាលណោះ រដ្ឋាភិបាលបានធ្វើកំណែទម្រង់លើលក្ខខណ្ឌការងារមួយចំនួនរបស់ពលករបរទេស រួមមានបញ្ហាប្រាក់ខែ ឬមួយក៏គ្រោងលុបចោលវិញនូវប្រព័ន្ធកាហ្វាលាដែលអនុញ្ញាតឲ្យថៅកែមានសិទ្ធិពេញទីក្នុងការហាមឃាត់មិនឲ្យពលករទៅបម្រើការនៅកន្លែងផ្សេង ឬដកហូតលិខិតឆ្លងដែនរបស់ពលករមិនឲ្យចាកចេញពីប្រទេសជាដើម។ គឺនៅក្នុងន័យនេះហើយបានជាក្រុមអង្គការក្រៅរដ្ឋាភិបាលបានសម្តែងក្តីបារម្ភទុកជាមុនពីការអនុវត្តន៍ច្បាប់ថ្មី ក៏ដូចជាប្រសិទ្ធិភាពរបស់វានៅថ្ងៃខាងមុខ។
ជាការពិត ច្បាប់ថ្មីស្តីពីលក្ខខណ្ឌការងាររបស់ពលករបរទេស ពិសេសទាក់ទងនឹងប្រាក់ខែពិតជាកត្តាសំខាន់មួយដែលក្រុមអង្គការក្រៅរដ្ឋាភិបាលបានទាមទារយ៉ាងទទូចអស់ជាច្រើនឆ្នំាមកហើយ តែសំណួរដែលកំពុងចោទពេលនេះគឺថា តើរដ្ឋាភិបាលនឹងគោរពតាមពាក្យសន្យារបស់ខ្លួនឬអត់?។ យ៉ាងណាក៏ដោយនៅចំពោះមុខ ក្រុមអង្គការក្រៅរដ្ឋាភិបាលបានអំពាវនាវដល់រដ្ឋាភិបាលទីក្រុងដូហាទុកជាមុន កុំឲ្យបណ្តែតបណ្តោយ ឬក៏មានការយោគយល់អ្វីចំពោះក្រុមហ៊ុន រោងចក្រ សហគ្រាសឡើយ ពោលត្រូវឲ្យពួកគេគោរពឲ្យបានត្រឹមត្រូវនូវច្បាប់ថ្មីនោះ។
គួរជម្រាបជូនថា នៅក្នុងពិភពលោក កាតាជាប្រទេសដែលមានពលករបរទេសរស់នៅច្រើនជាងគេ ហើយចំនួនពលករបរទេសកាន់តែកើនឡើងនារយៈពេលចុងក្រោយ បន្ទាប់ពីប្រទេសកាតាកំពុងប្រញឹកដៃសាងសង់ហេដ្ឋារចនាសម្ព័ន្ធថ្មី ពិសេសពហុកីឡាដ្ឋានដើម្បីទទួលការប្រកួតកីឡាបាល់ទាត់ពិភពលោកនាឆ្នាំ ២០២២ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ