អ.ស.ប ថ្កោលទោសក្រុមឧទ្ទាមបូកូ អារ៉ាំ ដែលចាប់ជំរិតនិងចង់លក់សិស្សស្រីៗនីហ្សេរីយ៉ារាប់រយនាក់
ឧត្តមស្នងការជាន់ខ្ពស់ទទួលបន្ទុកសិទ្ធិមនុស្សនៃអង្គការសហប្រជាជាតិបានថ្កោលទោសក្រុមឧទ្ទាមបូកូអារ៉ាំ ដែលបានចាប់ជំរិតសិស្សស្រីនៅនីហ្សេរីយ៉ារាប់រយនាក់។ កាលពីថ្ងៃចន្ទ មេក្រុមឧទ្ទាមបានប្រកាសថានឹងលក់សិស្សសាលាស្រីៗទាំងនេះ ហើយនឹងចាប់បង្ខំអោយពួកគេរៀបការផងដែរ។ អង្គការសហប្រជាជាតិបានព្រមាននៅថ្ងៃអង្គារនេះថា ក្រុមបូកូអារ៉ាំ អាចជាប់សង្ស័យក្នុងបទឧក្រិដ្ឋប្រឆាំងមនុស្សជាតិ ប្រសិនបើហ៊ានលក់សិស្សស្រីៗទាំងនេះ ដូចទាសករ ដូចជាការប្រកាសរបស់ក្រុមខ្លួនពិតមែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
លោក រូពែរ កុលវីល អ្នកនាំពាក្យនៃឧត្តមស្នងការជាន់ខ្ពស់ទទួលបន្ទុកសិទ្ធិមនុស្សអង្គការសហប្រជាជាតិបានបរិហារថ្កោលទោសអំពើហិង្សាចាប់ជំរិតសិស្សស្រីៗរាប់រយនាក់ នៅសាលាមួយកន្លែង នៅរដ្ឋបរណូ ភាគឥសានប្រទេសនីហ្សេរីយ៉ា។ ជាការចាប់ជំរិតធ្វើឡើងដោយក្រុមឧទ្ទាមបូកូអារ៉ាំ កាលពីថ្ងៃ១៤មេសា កន្លងទៅ។ លោក រូពែរ កុលវីល បានទាមទារអោយក្រុមឧទ្ទាម ដោះលែងសិស្សសាលាទាំងនោះ និងប្រគល់ពួកគេអោយទៅក្រុមគ្រួសារពួកគេវិញជាបន្ទាន់។
កាលពីពាក់កណ្តាលខែមេសា ក្រុមឧទ្ទាមបូកូអារ៉ាំ បានចាប់ជំរិតសិស្សស្រីៗ ២៧៦នាក់ ហើយបានប្រកាសថា ចង់លក់សិស្សស្រីៗទាំងនេះដូចជាទាសករ និងចង់បង្ខំពួកគេអោយរៀបការទៀតផង។ សិស្សសាលា៥៣នាក់បានរត់រួចខ្លួន ២២៣នាក់ទៀតស្ថិតក្នុងកណ្តាប់ដៃក្រុមឧទ្ទាមបូកូអារ៉ាំនៅឡើយ។ ក្រៅពីចាប់សិស្សស្រីៗ ក្រុមឧទ្ទាមក៏បានបំផ្លាញក្រុងហ្កំបូរូ នៅភាគឥសាន និងបានបាញ់រះលើប្រជាជន និងសម្លាប់មនុស្សច្រើននាក់ផងដែរ។
ក្នុងរូបភាពវីដេអូដែលសារព័ត៌មានបារាំង អា អេហ្វ ប៉េ ទទួលបាន គេឃើញមេក្រុមឧទ្ទាមអាប៊ូបាកា ស្ហេកូ ប្រកាសថា នឹងលក់សិស្សស្រីៗនៅទីផ្សារ ក្នុងនាមព្រះអាឡា។ អាប៊ូបាកាប្រាប់ទៀតថា នឹងបង្ខំ សិស្សស្រីអាយុ៩ឆ្នាំ និង១២ឆ្នាំ អោយរៀបការ។ ក្នុងរូបភាពវីដេអូដដែល មេក្រុមឧទ្ទាមបានមើលងាយមើលថោកការអប់រំតាមបែបប្រទេសលោកខាងលិច និងមើលងាយរាល់បណ្តាជនដែលមិនគោរពសាសនាអ៊ីស្លាម។
នៅពេលនះ យោងតាមផ្នែកការទូតអាមេរិក សិស្សស្រីៗទាំងនេះ ប្រហែលជាត្រូវបានគេបញ្ជូនចេញពីទឹកដីនីហ្សេរីយ៉ាហើយ។ ប្រភពព័ត៌មានជាច្រើនបានប្រាប់ថា សិស្សសាលាទាំងនេះអាចត្រូវគេបញ្ជូនទៅប្រទេសឆាដ រឺក៏កាំម៉ឺរូន នៅក្បែរនោះ។ ពួកគេអាច ត្រូវបានគេលក់ ក្នុងតម្លៃម្នាក់ ១២ដុល្លារ។ ប្រធានាធិបតីនីហ្សេរីយ៉ា ហ្គូដឡាក់ ចូណាតាន់ បានបញ្ជាអោយធ្វើគ្រប់បែបយ៉ាងដើម្បីទទួលបានការដោះលែងសិស្សស្រីៗទាំង២២៣នាក់នោះ។ អាមេរិកបានចូលរួមជួយនីហ្សេរីយ៉ា ក្នុងផ្នែកចែករំលែកព័ត៌មាន ក្នុងបញ្ហានេះ។
នៅនីហ្សេរីយ៉ា ក្រុមឧទ្ទាមបូកូអារ៉ាំ ទាមទារបង្កើតរដ្ឋអ៊ីស្លាមមួយនៅភាគខាងជើងប្រទេស។ គិតចាប់ពីឆ្នាំ២០០៩មក ក្រុមនេះបានសម្លាប់មនុស្សរាប់ពាន់នាក់មកហើយ ក្នុងពេលដែលបានវាយប្រហារសាលារៀន វិហារជាច្រើនកន្លែងក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ