ស្វែងយល់អំពីចលនាភេរវនិយមនៅនីហ្សេរីយ៉ា
ចុះផ្សាយនៅថ្ងៃ៖
ស្តាប់ - ០៥:៤៥
លោក ហ្វ្រង់ស៊ី កូឡុម (Francis Collomp) ដែលទើបរត់គេចខ្លួនរួចពីកណ្តាប់ដៃភេរវជនចំណាប់ថ្នូរ នៅប្រទេសនីហ្សេរីយ៉ា បានអញ្ជើញមកដល់ក្រុងប៉ារីសហើយ ព្រឹកមិញ តាមជើងយន្តហោះពិសេស។ ជាមួយនឹងការត្រេកអរ ចំពោះសេរីភាពចំណាប់ថ្នូរ ភាពស្រពិចស្រពិលក៏មានច្រើនទាក់ទងលក្ខខណ្ឌនៃការរត់គេចខ្លួនរបស់លោកវិស្វករ ហ្វ្រង់ស៊ី កូឡុម។ ពីព្រោះដំបូងឡើយ ប្រមុខរដ្ឋបារាំង លោក ហ្វ្រង់ស័រ ហូឡង់ បានចេញសេចក្តីថ្លែងការអបអរ និងអរគុណភ្លាម ប្រទេសនីហ្សេរីយ៉ាចំពោះសេរីភាពលោក ហ្វ្រង់ស៊ី កូឡុំ មុននឹងបញ្ជាក់ថាអតីតចំណាប់ថ្នូរបារាំងរូបនេះ បានរត់គេចខ្លួនរួច ដោយខ្លួនឯងទេ។
លោកហ្វ្រង់ស៊ី កូឡុម ជាវិស្វករ មានអាយុ៦៤ឆ្នាំ ដែលបានជាប់ជាចំណាប់ថ្នូរ នៅប្រទេសនីហ្សេរីយ៉ា កាលពីថ្ងៃទី ១៩ធ្នូ ឆ្នាំ២០១២ បានធ្វើដំណើរមកដល់ក្រុងប៉ារីសនៅវេលាម៉ោង ៥ព្រឹក ម៉ោងសកល អមដំណើរដោយរដ្ឋមន្ត្រីក្រសួងការបរទេស និងដោយគ្មានសេចក្តីថ្លែងការណ៍ផ្លូវការអ្វីទេ។ ទទួលស្វាគមន៍ជាលក្ខណៈគ្រួសាររួច លោកហ្វ្រង់ស៊ី កូឡុម ត្រូវបញ្ជូនទៅសម្រាកព្យាបាលតាមដានសុខភាពនៅមន្ទីរពេទ្យសិន។ លោកចុះស្គមអស់៣០គីឡូ ក្នុងរយៈពេល១១ខែក្នុងកណ្តាប់ដៃពួកភេរវជន ប៉ុន្តែសតិបញ្ញាស្មារតីនៅរឹងមាំល្អ។
លក្ខខណ្ឌស្រពិចស្រពិលនៃការរត់គេចខ្លួច
បន្ទាប់ពីមានព័ត៌មានចម្រូងចម្រាសគ្នា ពីរបីម៉ោង ទាក់ទងនឹងសេរីភាពរបស់លោក ហ្វ្រង់ស៊ី កូឡុំ លក្ខខណ្ឌនៃការរត់គេចខ្លួន បានបញ្ជាក់កាន់តែច្បាស់ឡើងៗហើយ។ បើតាមប្រភពការទូត ដែលវិទ្យុបារាំងទទួលបាន អតីតចំណាប់ថ្នូររបស់យើង បានរត់គេចខ្លួន ចេញពីកន្លែងឃុំឃាំងនៅក្រុង zaria នៃតំបន់បែកខាងជើងនីហ្សេរីយ៉ា។ ឆ្លៀតពេលឆ្មាំគុកធ្វេសប្រហែស ព្រោះជាប់សូត្រធម៌ភ្លេចចាក់សោទ្វារគុក លោក ហ្វ្រង់ស៊ី កូឡុម បានរត់ចេញ ជិះម៉ូតូឌុបសំដៅប៉ុស្តិ៍ប៉ូលិស រួចទូរស័ព្ទទៅស្ថានទូតបារាំង ប្រចាំក្រុងអាប៊ូហ្សា ដើម្បីបានការការពារពីបារាំង។
ប៉ុន្តែការរៀបរាប់នេះមានលាក់នូវចំណុចស្រពិចស្រពិលខ្លះ ព្រោះបើតាមប្រភពព័ត៌មានមួយទៀតស្និទ្ធនឹងភ្នាក់ងារសារព័ត៌មានបារាំង AFP មានបញ្ជាក់អំពីប្រតិបត្តិការយោធា ការប្រយុទ្ធគ្នារវាងកងទ័ពនីហ្សេរីយ៉ា និងពួកភេរវជនប្រដាប់អាវុធ ទើបលោកកូឡុមអាចឆ្លៀតរត់គេចខ្លួនបាន ប៉ុន្តែទាហាននីហ្សេរីយ៉ា មិនបញ្ជាក់ដំណឹងនេះទេ។ សម្រាប់ប្រភពការទូតបារាំង គឺនៅពេលដែលអ្នករត់បាត់ទើបឆ្មាំគុកនាំគ្នាផ្ទុះអាវុធតាមរក។ ចំណុចអាទិ៍កំបាំងមួយទៀត គឺថ្ងៃ។ ដំបូងឡើយគេនិយាយពីថ្ងៃអាទិត្យ ឯប្រភពនីហ្សេរីយ៉ា ថាថ្ងៃសៅរ៍។ តែអ្វីដែលប្រាកដ គឺនេះ ជាលើកទីមួយ ដែលចំណាប់ថ្នូរអាចគេច រួចជីវិតពីកណ្តាប់ដៃពួកភេរវនិយម អាន់ហ្សារ៉ូ។ អាន់ហ្សារ៉ូ ដែលមិនបានបញ្ជាក់ពីមូលហេតុនៃការចាប់ចំណាប់ថ្នូរទេ ប៉ុន្តែ ពីរឆ្នាំចុងក្រោយនេះ ក្រុមAnsaru សាខារបស់លចនាអ៊ីស្លាមជ្រុលនិយមបូកូអារ៉ាម បានសម្លាប់ទាំងអស់ចំណាប់ថ្នូរបរទេស១០នាក់ ក្នុងប្រតិបត្តិការរំដោះពួកគេ។
សកម្មភាពនិងឥទ្ធិពលរបស់ អាន់ហ្សារ៉ូ Ansaru ឬ បូកូហារ៉ាម Boko Haram នៅនីហ្សេរីយ៉ា
បូកូ ហារ៉ាម បង្កើតឡើងនៅឆ្នាំ២០០២ ដោយ Mohammed Yusuf នៅ Maiduguri ភាគឦសានប្រទេសនីហ្សេរីយ៉ា។ ថ្វីបើប្រទេសនេះ មានប្រជាជនភាគច្រើន ប្រកាន់សាសនាគ្រិស្ត ភាគខាងជើងវិញគ្របដណ្តប់ដោយអ្នកកាន់សាសនាអ៊ីស្លាម។ ចលនាបូកូហារ៉ាម ជាភាសាតំបន់មានន័យថា “អប់រំតាមបែបបស្ចឹមលោកជាការប្រព្រឹត្តកំហុស”។ ក្រុមនេះជានិកាយជ្រុលនិយម និងយង់ឃ្នងបំផុត ប្រកាន់យកច្បាប់អ៊ីស្លាមតឹងរ៉ឹង charia…
ដំបូង ក្រុមនេះវាយប្រហារតែអាជ្ញាធរនីហ្សេរីយ៉ា ដោយអំពើលួច ប្លន់ យកអាវុធ និងសម្លាប់ប៉ូលិស ព្រមទាំងចាប់ចំណាប់ថ្នូរដើម្បីទារលុយ។ រដ្ឋាភិបាលក្រុងអាប៊ូហ្សា បានបើកយុទ្ធនាការបោសសម្អាតក្រុមនេះ ជាទ្រង់ទ្រាយធំនៅឆ្នាំ២០០៩ ដោយសម្លាប់ក្រុមប្រដាប់អាវុធបាន៨០០នាក់ ប៉ុន្តែបូកូហារ៉ាម កាន់តែខ្លាំង និងកាន់តែផ្តាច់ការ ធ្វើសកម្មភាពកាន់ខ្លាំង បង្កជាភេរវកម្មប្រឆាំងសាលារៀន វិហារកាតូលិក តំណាងស្ថាប័នអន្តរជាតិ និងចាប់ខ្លួនបរទេស។
ទំនាក់ទំនងរបស់បូកូហារ៉ាម ជាមួយនឹងអង្គការភេរវនិយអាល់កៃដា មិនសូវច្បាស់ទេ។ បូកូហារ៉ាមធ្លាប់ទទួលស្គាល់ថាបានបំពាក់បំប៉នក្រុមជីហាត នៅក្នុងជំរំជាមួយនឹងក្រុម Aqmi នៅសូម៉ាលី ស៊ូដង់ ឬនៅដើមបូព៌ា។ ពោលគឺមានកិច្ចសហប្រតិបត្តិការរវាងក្រុមបូកូហារ៉ាម និងAqmi នេះបើភ្នាក់ងារស៊ើបការណ៍អាល់ហ្សេរី ហើយអាមេរិកក៏បានបញ្ចូលក្រុមបូកូហារ៉ាម និងអាន់ហ្សារ៉ូនេះ នៅក្នុងបញ្ជីខ្មៅភេរវនិយម កាលពីថ្ងៃពុធ និងផ្តល់តម្លៃក្បាលមេកើយបូកូហារ៉ាម ៧លានដុល្លារ។
អាន់ហ្សារ៉ូ ដែលតាំងពីចូលឆ្នាំ២០១៣មក ធ្វើសកម្មភាពខ្លាំង ចាប់ខ្លួននិងសម្លាប់ជនបរទេសជាច្រើននាក់។ រហូតក្រុងអាប៊ូហ្សា ចេញក្រិត្យដាក់តំបន់ឦសាន តាំងពីខែឧសភាឆ្នាំ២០១៣មក ក្នុងភាពអាសន្ន ដោយបញ្ជូនកម្លាំងយោធាយ៉ាងសន្ធឹកសន្ធាប់ទៅឈរជើង និងបានអំពាវនាវឱ្យប្រទេសជិតខាង មានជាអាទិ៍ នីហ្សេ ឆាដ ឬកាមឺរ៉ូន ជួយសហការ។ តែសកម្មភាព ចាប់ជំរិតនៅតែមានជាក់ស្តែង ការចាប់ខ្លួនសង្ឃកាតូលិកបារាំង បង្ហាញយ៉ាងច្បាស់ អំពីផ្លូវដ៏វែងឆ្ងាយនៃការប្រយុទ្ធប្រឆាំងនឹងភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ