ប៉ារីសបើកជំនួបកំពូលស្តីពីសន្តិសុខនីហ្សេរីយ៉ា មួយខែក្រោយការចាប់ខ្លួនសិស្សស្រី
ចុះផ្សាយនៅថ្ងៃ៖
ស្តាប់ - ០៦:៥៨
មួយខែក្រោយការចាប់ខ្លួនសិស្សជាង២០០នាក់ សុទ្ធតែភេទស្រី ដោយក្រុមភេរវនិយមអ៊ីស្លាមជ្រុលនិយម បូកូអារ៉ាម ប្រទេសបារាំងបានសុខចិត្តធ្វើជាម្ចាស់ផ្ទះនៅថ្ងៃសៅរ៍នេះ បើកជំនួបកំពូលតូចមួយស្តីពីសន្តិសុខនីហ្សេរីយ៉ា។ ប្រធានាធិបតី បារាំង នីហ្សេរីយ៉ា និងបណ្តាប្រទេសជិតខាងមួយចំនួនទៀតដូចជា បេណាំង នីហ្សេ កាមេរូន ឆាដ ព្រមទាំងតំណាងសហរដ្ឋអាមេរិក អង់គ្លេស សហភាពអឺរ៉ុប សង្ឃឹមថាការជួបជុំពិភាក្សាគ្នានៅទីក្រុងប៉ារីសថ្ងៃនេះ នឹងអាចរកឃើញនិងដាក់ឱ្យដំណើរការយុទ្ធសាស្ត្រតំបន់មួយ ប្រយុទ្ធប្រឆាំងក្រុមនិកាយភេរវនិយមដឹកនាំដោយមេក្លោង អាប៊ូបាការ ស្ហេកូ (Abubakar Shekau)។
ជំនួបកំពូលវិសាមញ្ញស្តីអំពីសន្តិសុខនីហ្សេរីយ៉ានេះ ប្រព្រឹត្តទៅក្នុងបរិបទនៃការរិះគន់។ សហរដ្ឋអាមេរិកទ្រាំមិនបានទើប រិះគន់ប្រធានាធិបតីនីហ្សេរីយ៉ា ថាបញ្ចេញប្រតិកម្ម និងសកម្មភាព ដូចអូសឬស្ស៊ីបញ្ច្រាសចុង ប្រឈមមុខនឹងការគំរាមកំហែងពីពួកភេវនិយម ប្រឈមមុខនឹងការចាប់ជំរិតសិស្សស្រីដល់ទៅជាង២០០នាក់។
ពួកបូកូអារ៉ាម បានចាប់សិស្សអស់មួយសាលា មកធ្វើជាចំណាប់ថ្នូរ តាំងពីថ្ងៃទី ១៤មេសា និងបានចាក់ផ្សាយវីដេអូ គំរាម ចាប់ក្មេងស្រីឱ្យរៀបការទាំងមិនទាន់គ្រប់អាយុ និងយកទៅធ្វើជាទាសករ និងសុំធ្វើជាថ្នូរជាមួយអ្នកទោស តែប្រធានាធិបតីនីហ្សេរីយា បដិសេធមិនចរចា ហើយគេត្រូវរង់ចាំ ដល់ទៅជាងពីរសប្តាហ៍ ទើបឮលោក Goodluck Jonathan បានសម្តែងការព្រួយបារម្ភចំពោះជោគវាសនាយុវតីដែលពួកភេរវជនចាប់ខ្លួន។ ហើយនៅថ្ងៃម្សិលមិញ មុននឹងអញ្ជើញមកក្រុងប៉ារីស លោកបានលុបចោលដំណើរទស្សនកិច្ចនៅ Chibok ភាគខាងជើង ប្រទេស រដ្ឋដែលមានកើតហេតុចាប់ខ្លួនសិស្សស្រីទៀត។ ទង្វើនេះបានទទួលរងការរិះគន់ពីគ្រប់ទិសទី និងពីអន្តរជាតិទាំងមូល។
នីហ្សេរីយ៉ា មិនអាចទប់ទល់ជាមួយពួកភេរវនិយមបូកូអារ៉ាម ម្នាក់ឯងបាន ត្រូវការពឹងពំនាក់អ្នកជិតខាងនិងបរទេស។ ហើយប្រទេសដែលមានទំនាក់ទំនងការទូតល្អបំផុត ក្នុងពេលបច្ចុប្បន្ននេះ គឺជាមួយបារាំង ជាពិសេសតាំងពីមានលោកហ្វ្រង់ស័រហូឡង់ ជាប្រធានាធិបតីបារាំងមក។ ម្យ៉ាងទៀត នីហ្សេរីយ៉ា ជាប្រទេសនិយាយភាសាអង់គ្លេស មានអំណាចសេដ្ឋកិច្ចខ្លាំងប្រចាំទ្វីប ត្រូវការមានសហប្រតិបត្តិការល្អជាមួយប្រទេសជាប់របងជាអ្នកនិយាយភាសាបារាំង។ ដូច្នេះនីហ្សេរីយ៉ា អាចពឹងពាក់ប៉ារីសបានក្នុងចំណុចនេះ ដើម្បីពង្រឹងកិច្ចសហប្រតិបត្តិការក្នុងតំបន់។
ក្រោមសំណើរបស់លោក Goodluck បារាំងគ្មានអ្វីត្រូវប្រកែកឡើយ ក្នុងនាមជាអគ្គមេបញ្ជាការកងទ័ពServal និង Sangari លោកហ្វ្រង់ស័រហូឡង់ ដែលមានឈ្មោះបោះសំឡេងខ្លាំងនៅអាហ្វ្រិក មិនដូចនៅក្នុងស្រុក ចេញធ្វើសង្គ្រាមជួយម៉ាលី ជួយអាហ្វ្រិកកណ្តាល បើកជំនួបកំពូលស្តីពីសន្តិសុខឱ្យអាហ្វ្រិក បារាំងត្រូវតែឆក់យកឱកាសនេះផ្តល់ចំណេញឱ្យប្រទេសជាតិ បានគ្រប់អត្ថន័យទាំងអស់ ដោយជួយរៀបចំបើកជំនួបកំពូលនៅទីក្រុងប៉ារីស ដើម្បីប្រយុទ្ធប្រឆាំងនឹងភេរវនិយមបូកូអារ៉ាម នៅនីហ្សេរីយ៉ា។
គ្មានអន្តរាគមន៍យោធាបស្ចឹមលោកនៅនីហ្សេរីយ៉ា
សម្រាប់វិមានប្រធានាធិបតីបារាំង គឺគ្មានទេ អន្តរាគមន៍យោធានៅនីហ្សេរីយ៉ា ! កម្មវត្ថុចំបងមួយ គឺស្វែងរកសន្តិសុខឱ្យតំបន់អាហ្វ្រិកប្រឈមនឹងស្ទុះឡើងនៃពួកភេរវនិយម អ៊ីស្លាមជ្រុលនិយម បូកូអារ៉ាម។ ចលនាដែលមានចំណាប់ថ្នូរជាក្មេងសិស្សសាលាស្រីៗដល់ទៅជាង២រយនាក់ក្នុងកណ្តាប់ដៃ តាំងពីជាងមួយខែមក។ ពួកជីហាតនេះមានសកម្មភាពខ្លាំង និងជាក្រុមដែលពិបាកកំចាត់ខ្លាំងណាស់ ព្រោះជាក្រុមតូចៗមានមេមានកើយនិងស្វ័យភាព តាមមូលដ្ឋាន មានសកម្មភាព និងឥទ្ធិពលរាលដល់ភាគខាងជើង ប្រទេសកាមេរូន ខាងកើតប្រទេសឆាដ និងខាងត្បូងប្រទេសនីហ្សេ។
ដូច្នេះត្រូវបង្កើត ឬធ្វើឱ្យប្រសើរឡើង នូវកិច្ចសហប្រតិបត្តិការរវាងបណ្តាប្រទេសដែលពួកជីហាត ប្រើប្រាស់ជាមូលដា្ឋនសម្រាប់លាក់ខ្លួន សម្រាប់ចាប់ចំណាប់ថ្នូរ ឬសម្រាប់ដោះដូរអាវុធ។ ប្រសិនបើគ្មានការសហការត្រឹមត្រូវទេ នោះអស្ថិរភាពនឹងកាន់តែខ្លាំង ដោយពួកបូកូអារ៉ាម អាចជួបបញ្ជះឥទ្ធិពលដល់ក្រុមឧទ្ទាមនៅអាហ្វ្រិកកណ្តាល ឬដល់ប្រទេសស៊ូដង់ផងក៏ថាបាន។
នីហ្សេរីយ៉ា និងប្រទេសជិតខាង
ប៉ុន្តែការសហការសន្តិសុខរវាងនីហ្សេរីយ៉ា ជាមួយប្រទេសជិតខាងគ្មានសមភាពទេ។ បើតាមប្រភពខ្លះ ទំនាក់ទំនងរវាងនីហ្សេ និងនីហ្សេរីយ៉ា អាចចាត់ទុកបានល្អ តែជាមួយឆាដ ដូចជាឃ្លាតគ្នាបន្តិច ហើយបើជាមួយកាមេរូនស្ទើរតែគ្មានសោះ ព្រោះតែជម្លោះទឹកដី ការបញ្ជូនទ័ពទៅការពារគ្នាពិតមិនសូវបានទទួលការស្វាគមន៍ឡើយ។ ការរួមដៃគ្នារវាងប្រទេសទាំងពីរ នីហ្សេរីយ៉ា និងកាមេរូន គឺជាកត្តាចាំបាច់ និងមិនអាចខ្វះបានក្នុងការប្រយុទ្ធប្រឆាំងនឹងភេរវនិយមក្នុងតំបន់។ កាមេរូន ជាប្រទេសដែលរងការគំរាមកំហែងខ្លាំងជាងគេមួយពីសំណាក់ពួកបូកូអារ៉ាម។ ជាក់ស្តែងនៅថ្ងៃនេះ ជនជាតិចិនម្នាក់ទើបត្រូវបានសម្លាប់ និង១០នាក់ផ្សេងទៀត ទំនងជាត្រូវបានពួកភេរវជនចាប់ខ្លួនធ្វើជាចំណាប់ថ្នូរផង។
ករណីចាប់ខ្លួនសិស្សស្រីនៅនីហ្សេរីយ៉ា ជាកត្តា ជំរុញឱ្យជំនួបកំពូលស្តីអំពីសន្តិសុខនីហ្សេរីយ៉ាចេញជារូបរាងនៅ ចំណែកប្រតិបត្តិការជាក់ស្តែង ដែលដាក់ឱ្យដំណើរការជាបន្ទាន់ តាមរករំដោះសិស្សស្រីៗជាប់ជាចំណាប់ថ្នូរ ដោយប្រើរូបភាពសាតឺលីត អ្នកឯកទេសជំនាញ តាមដាន នឹងអាចប្រយោជន៍ឈានដល់ការសម្រេចកម្មវត្ថុចុងក្រោយដ៏សំខាន់ គឺការកម្ចាត់ពួកបូកអារ៉ាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ