អាមេរិកបើកប្រតិបត្តិការយន្តហោះក្នុងដែនអាកាសនីហ្សេរីយ៉ា ស្វែងរកចំណាប់ខ្មាំងសិស្សសាលា
ចុះផ្សាយនៅថ្ងៃ៖
ស្តាប់ - ០៦:៣៨
នៅល្ងាចថ្ងៃចន្ទម្សិលមិញ អាមេរិកបានប្រកាសបើកប្រតិបត្តិការយន្តហោះ ក្នុងទឹកដីនីហ្សេរីយ៉ា ដើម្បីស្វែងរកសិស្សសាលាស្រីៗជាង២០០នាក់ ដែលក្រុមឧទ្ទាមអ៊ីស្លាមបូកូ អារ៉ាំ បានចាប់យកទៅកាលពីថ្ងៃ ១៤មេសា។ ក្នុងប្រតិបត្តិការស្វែងរក អ្នកជំនាញអាមេរិកផ្តោតការចិត្តទុកដាក់លើរូបភាពវីដេអូមានរូបក្មេងស្រីៗច្រើននាក់ ដែលមេក្រុមបូកូអារ៉ាំបង្ហាញនៅថ្ងៃចន្ទម្សិលមិញ។ អ្នកជំនាញបារាំង និងអង់គ្លេសបានចុះទៅនីហ្សេរីយ៉ារួចហើយ។ រដ្ឋាភិបាលនីហ្សេរីយ៉ាបានទាត់ចោលសំណើរបស់ក្រុមបូកូអារ៉ាំ ដែលទាមទារអោយមានការដោះលែងអ្នកទោសខ្លួន ជាថ្នូរនឹងការដោះលែងសិស្សសាលាស្រីៗ។ នៅទីលានត្រូកាដេរ៉ូ ក្នុងក្រុងប៉ារីសថ្ងៃអង្គារនេះ អតីតជំទាវទី១បារាំង២រូប គឺលោកស្រី វ៉ាឡេរី ទ្រីយាលវេឡឺ និងលោកស្រីកាឡា ប្រុយនី សាកូហ្ស៊ី រួមទាំងអង្គការជាច្រើននាំគ្នាធ្វើបាតុកម្មបរិហារការចាប់សិស្សសាលាស្រីៗទាំងនេះ និងទាមទារអោយដោះលែងពួកគេមកវិញ។
យប់ថ្ងៃ១៤មេសា ក្រុមបូកូ ហារ៉ាំ ចាប់សិស្សស្រីៗនៅសាលារៀន ក្នុងភាគឥសាន រហូតដល់ចំនួនរាប់រយនាក់ បានដោយគ្មានបញ្ហា
គេមិនដឹងថា សិស្សសាលាស្រីៗកំពុងនៅឯណាពិតប្រាកដទេ។ ថ្ងៃចន្ទម្សិលមិញ គេគិតថា ក្មេងស្រីទាំងនេះប្រហែលកំពុងនៅក្នុងព្រៃក្នុងប្រទេសនៅឡើយទេ។ ពេលនេះ ការស្វែងរកពេលនេះ គឺផ្តោតក្នុងប្រទេសនីហ្សេរីយ៉ាសិន។ ក្នុងប្រតិបត្តិការនេះ អាមេរិកផ្តល់រូបភាពផ្កាយរណបអោយអាជ្ញាធរនីហ្សេរីយ៉ា។ អាមេរិកក៏មានឧបករណ៍ដែលអាចចាប់យកទំនាក់ទំនងតាមទូរសព្ទ រឺវិទ្យុបានដែរ។
គួររំលឹកថា កាលពីយប់ថ្ងៃ១៤មេសា ក្រុមបូកូអារ៉ាំបានចូលទៅវិទ្យាល័យរបស់សិស្សស្រីៗទាំងនេះ ស្ថិតនៅក្រុងជីបក ភាគឥសាននីហ្សេរីយ៉ា។ សមាជិកក្រុមបូកូអារ៉ាំ បានស្លៀកសម្លៀកបំពាក់ក្លែងធ្វើជាទាហាន ហើយភរថា ចូលមកការពារសន្តិសុខសាលា។ តែក្រុមបូកូអារ៉ាំបានសម្លាប់ទាហាននិងប៉ូលិសនៅទីនោះ ២នាក់ ហើយដុតវិទ្យាល័យនោះ ចោលតែម្តង ដើម្បីងាយចាប់យកសិស្សសាលា។ ពួកគេបានបង្ខំអោយសិស្សស្រីៗរាប់រយនាក់ឡើងចូលឡានកាំម្ញ៉ុងធំៗច្រើនគ្រឿង។ គួររំលឹកថា ដើមឡើយ មានសិស្សសាលាស្រីៗ ដល់ទៅ២៧៦នាក់ ដែលក្រុមនេះចាប់យកទៅ។ ប៉ុន្តែ សិស្ស៥៣នាក់ បានរត់គេចខ្លួនតាមផ្លូវ។ ក្មេងស្រីៗមួយចំនួនដែលបានរត់រួចមកនោះ ប្រាប់ថា ពួកគេបានប្រថុយជីវិត លោតចុះពីឡានកាំម្ញ៉ុង ពេលដែលឡានកាំម្ញ៉ុងមានបញ្ហា ឈប់តាមផ្លូវ។
សហគមន៍អន្តរជាតិបញ្ចេញប្រតិកម្មថ្កោលទោស យឺតយ៉ាវ
ក្រុមបូកូអារ៉ាំ ចាប់សិស្សស្រីៗទាំងនេះ តាំងតែពីថ្ងៃ១៤មេសាម្ល៉េះ។ សហគមន៍អន្តរជាតិទើបចេញប្រតិកម្មប្រឆាំងក្រុមបូកូអារ៉ាំ នៅដើមខែឧសភានេះប៉ុណ្ណោះ ពោលគឺយឺតពេលដល់ទៅ២សប្តាហ៍។ ដំបូងឡើយ គ្រប់គ្នាចាប់អារម្មណ៍តែពីព័ត៌មានទាក់ទងការលិចសាឡាងនៅកូរ៉េខាងត្បូង រឺក៏ការបាត់ខ្លួនយន្តហោះបូអ៊ីងម៉ាឡេស៊ីឯណោះទេ។ ក្រោយពេលបណ្តាញសង្គមបានចុះផ្សាយពីបាតុកម្មមនុស្សរាប់រយនាក់ នៅក្រុងឡាហ្កូស និងអាប៊ូចា នៅនីហ្សេរីយ៉ា បរិហារការចាប់ជំរិតក្មេងស្រីទាំងនេះ ទើបសហគមន៍អន្តរជាតិងាកមកចាប់អារម្មណ៍រឿងនេះវិញ។ នេះក៏ដោយសារតែមេក្រុមបូកូអារ៉ាំ អាប៊ូបាកា ស្ហេកូ បានប្រកាសផ្ទាល់មាត់ថ្មីៗ ក្នុងដើមខែឧសភានេះដែរថា បានចាប់សិស្សស្រីៗ និងចង់លក់ពួកគេជាទាសករ បង្ខំអោយពួកគេរៀបការ។ ទំរាំបានទទួលការចាប់អារម្មណ៍នេះ គ្រួសារសិស្សស្រីៗរងគ្រោះ ក៏បាននាំគ្នារហូតដល់ចុះព័ត៌មានតាមបណ្តាញសង្គមទ្វីតតឺផងដែរ។ ឥឡូវនេះ គ្រប់ប្រទេស គ្រប់ប្រជាជនទើបចាប់អារម្មណ៍តៗគ្នា បន្តពីភរិយាថ្នាក់ដឹកនាំអាមេរិករឺក៏បារាំង ដូចជាលោកស្រីមីឆែល អូបាម៉ា រឺក៏លោកស្រីកាឡា ប្រុយនីសាកូហ្ស៊ី ដែលកំពុងនាំគ្នាតវ៉ាអោយដោះលែងសិស្សសាលាស្រីៗមកវិញនេះ។
នីហ្សេរីយ៉ាមានសេដ្ឋកិច្ចល្អ តែអសមត្ថភាពការពារសន្តិសុខប្រជាជនខ្លួន
អាជ្ញាធរនីហ្សេរីយ៉ា ត្រូវការជំនួយពីប្រទេសនានា ដើម្បីស្វែងរកសិស្សសាលាស្រីៗទាំងនេះ។ នីហ្សេរីយ៉ាជាប្រទេសសំបូរធនធានប្រេង មានសេដ្ឋកិច្ចល្អ ប៉ុន្តែ ស្ថានភាពសន្តិសុខវិញធ្លាក់ដុនដាបខ្លាំង។ ដោយសារតែមូលហេតុថា ប្រទេសជាតិសំបូរធនធានប្រេង ជាចំណូលថវិកាជាតិ ដោយសារសេដ្ឋកិច្ចជាតិជួបស្ថានភាពល្អ ថ្នាក់ដឹកនាំតាមរដ្ឋនិមួយៗ នៅនីហ្សេរីយ៉ា ភ្លេចខ្លួនការពារសន្តិសុខជាតិ ភ្លេចគិតដល់សេដ្ឋកិច្ចនិងសង្គមតាមតំបន់មួយចំនួន។ ថ្នាក់ដឹកនាំម្នាក់ៗគិតតែប្រជែងដណ្តើមអំណាចយសសក្តិគ្នា ធ្វើអោយក្រុមបូកូអារ៉ាំឆ្លៀតឱកាសចូលវាយលុក និងសម្លាប់មនុស្សក្នុងស្រុក បានស្រួល។
ក្រុមបូកូអារ៉ាំច្រើនវាយប្រហារសាលារៀន សម្លាប់សិស្សសាលានិងកុមារច្រើនសន្ធឹកសន្ធាប់ នៅភាគខាងជើងនីហ្សេរីយ៉ា ព្រោះថា ខុសពីភាគខាងត្បូង ដែលសំបូរអ្នកកាន់សាសនាគ្រិស្ត នៅភាគខាងជើង សំបូរអ្នកកាន់សាសនាអ៊ីស្លាមរស់នៅ ជាជម្រករបស់ក្រុមបូកូអារ៉ាំ ហេតុនេះក្រុមនេះងាយវាយប្រហារ សម្លាប់មនុស្សនៅភាគខាងជើង។ គួររំលឹកដែរថា ក្រុមអ៊ីស្លាមបូកូអារ៉ាំដើមឡើយ គឺគ្រាន់តែចង់អោយមានការអនុវត្តន៍ច្បាប់ឆារីយ៉ាអ៊ីស្លាម អោយបានតឹងរ៉ឹងនៅតាមបណ្តារដ្ឋ ដែលមានប្រជាជនកាន់សាសនាអ៊ីស្លាមច្រើនប៉ុណ្ណោះ។ ក្រុមនេះបានចាប់វាយប្រហារសាលារៀនសម្លាប់មនុស្សនៅនីហ្សេរីយ៉ា ក៏ដើម្បីសងសឹករដ្ឋាភិបាលដែលបានសម្លាប់សមាជិកក្រុមខ្លួនរាប់រយនាក់ កន្លងមកដែរ។ ថ្វីបើក្រមបូកូអារ៉ាំស្អប់ការអប់រំបែបប្រទេសលោកខាងលិច ក្រុមនេះកម្រវាយប្រហារផលប្រយោជន៍បរទេសណាស់។
រួមសេចក្តីមកវិញ ការដែលក្រុមបូកូអារ៉ាំអាចសម្លាប់មនុស្សរហូតរាប់ពាន់នាក់ ក្នុងរយៈពេល៥ឆ្នាំមកនេះ ក៏ដោយសារតែថ្នាក់ដឹកនាំនីហ្សេរីយ៉ាគ្រប់គ្រងប្រទេសមិនបានល្អដែរ។ ក្នុងនយោបាយសន្តិសុខជាតិ រដ្ឋាភិបាលមិនដែលបានបង្ហាញជំហរ យុទ្ធសាស្ត្រច្បាស់លាស់ជាមួយក្រុមអ៊ីស្លាមជ្រុលនិយមបូកូអារ៉ាំទេ។ រដ្ឋាភិបាលចង់ប្រើធម៌ត្រជាក់តាមរយៈការចរចា ដោយធ្លាប់បានស្នើចរចាបទឈប់បាញ់ជាមួយមេក្រុមបូកូអាំរ៉ាំស្ហេកូ។ ទន្ទឹមនេះ ក៏ចង់ប្រើធម៌ក្តៅវាយប្រហារ ក្រុមឧទ្ទាមដែរ។ អ្វីដែលហួសហេតុដែរនោះ យោងតាមក្រុមសិទ្ធិមនុស្ស កន្លងមក អាជ្ញាធរបានចាប់មនុស្សសន្ធឹកសន្ធាប់ដែលជាប់សង្ស័យថា ជាសមាជិកក្រុមបូកូអារ៉ាំ។ រឿងទាំងអស់នេះ មិនបានសម្រួលអ្វីអោយមានការចរចាបិទបញ្ចប់ហិង្សាក្នុងស្រុកជាមួយក្រុមឧទ្ទាមទេ។
អ្នកជំនាញគិតថា រដ្ឋាភិបាលនីហ្សេរីយ៉ាគួរទទួលយកសំណើដោះលែងអ្នកទោសបូកូអារ៉ាំ ដើម្បីទទួលបានការដោះលែងសិស្សសាលាស្រីៗ
រដ្ឋាភិបាលនីហ្សេរីយ៉ាបានទាត់ចោលសំណើរបស់ក្រុមបូកូអារ៉ាំ។ ប៉ុន្តែ អ្នកជំនាញច្រើនរូបគិតថា នីហ្សេរីយ៉ាគួរតែទទួលយកសំណើនេះ ព្រោះថា ថ្វីបើក្រុមបូកូអារ៉ាំទើបចាប់ជំរិតមនុស្សក្នុងស្រុកជាលើកទី១មែន កន្លងមក ក្រុមបូកូអារ៉ាំធ្លាប់បានចាប់ជំរិតគ្រួសារជនជាតិបារាំងហើយដែរ។ ហើយដោយសារការការចរចា ជនជាតិបារាំងបានរួចខ្លួនមកវិញ។
យោងតាមអ្នកជំនាញ ថ្វីបើបារាំងប្រាប់ថា មិនបានបង់ថ្នូរអ្វីមែន តែគឺប្រាកដជាមានថ្នូរអ្វីមួយហើយ ទើបក្រុមបូកូអារ៉ាំបានដោះលែងចំណាប់ខ្មាំងបារាំង ក្នុងបេលកន្លងមក។ រដ្ឋាភិបាលអាចដោះលែងត្រឹមតែសមាជិកក្រុមគ្រួសារក្រុមបូកូអារ៉ាំ ក៏ប្រហែលជាអាចជួយអោយមានការដោះលែងក្មេងស្រីៗសិស្សសាលាបានមួយចំនួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ