ការបាញ់សាកល្បងរបស់កូរ៉េខាងជើង៖ ផ្កាយរណប ឬមីស៊ីល?
ចុះផ្សាយនៅថ្ងៃ៖
ស្តាប់ - ០៣:៥២
កាលពីថ្ងៃពុធ ១២ ធ្នូ កន្លងទៅនេះ កូរ៉េខាងជើងបានធ្វើការបាញ់សាកល្បងនូវអ្វីដែលខ្លួនអះអាងថា ជាការសាកល្បងបង្ហោះផ្កាយរណប។ មានអ្នកជំនាញជាច្រើនសុទ្ធតែបានទទួលស្គាល់ថា កូរ៉េខាងជើងពិតជាបានបង្ហោះផ្កាយរណបទៅដាក់ក្នុងតារាវិថីពិតមែន។ ក៏ប៉ុន្តែ អាមេរិក និងសម្ព័ន្ធមិត្ត ព្រមទាំងប្រទេសជាច្រើនផ្សេងទៀត ហើយបូករួមទាំងក្រុមប្រឹក្សាសន្តិសុខអ.ស.ប.ផង សុទ្ធតែបាននាំគ្នាថ្កោលទោសកូរ៉េខាងជើងថាបានបាញ់សាកល្បងមីស៊ីលបាលីស្ទីក (Ballistic Missile)។ តើអ្នកណានិយាយពិត អ្នកណានិយាយមិនពិត? តើអ្វីដែលកូរ៉េខាងជើងបាញ់សាកល្បង កាលពីថ្ងៃពុធនោះ គឺជាមីស៊ីលបាលីស្ទីក ឬជាផ្កាយរណប?
តាមការពិត គេសង្កេតឃើញថា មានអ្នកជំនាញភាគច្រើន រួមទាំងអ្នកជំនាញរបស់អាមេរិកផង សុទ្ធតែបានឯកភាពថា កាលពីថ្ងៃពុធ កន្លងទៅនេះ កូរ៉េខាងជើងពិតជាបានបាញ់បង្ហោះផ្កាយរណបមួយដាក់ក្នុងតារាវិថីពិតមែន ឬបើមិនមែនផ្កាយរណបពិតប្រាកដ យ៉ាងហោចណាស់ក៏ជាវត្ថុមួយ ដែលស្រដៀងនឹងផ្កាយរណបដែរ។
កាលពីថ្ងៃព្រហស្បតិ៍ ម្សិលមិញ ក្រសួងការពារជាតិកូរ៉េខាងត្បូង បានថែមទាំងទទួលស្គាល់ទៀតផងថា ផ្កាយរណបដែលកូរ៉េខាងជើងបាញ់បង្ហោះ កាលពីថ្ងៃពុធ កំពុងតែធ្វើដំណើរជាធម្មតានៅលើគន្លងតារាវិថី គ្រាន់តែគេមិនដឹងថាតើជាផ្កាយរណបប្រភេទណា ហើយមានបេសកកម្មអ្វីតែប៉ុណ្ណោះ។ ក្រុមអ្នកវិទ្យាសាស្រ្តកូរ៉េខាងត្បូងបានអះអាងថា ផ្កាយរណបនេះស្ថិតនៅក្នុងរយៈកម្ពស់ ប្រមាណ ពី ៤៩៤គីឡូម៉ែត្រ ទៅ ៥៨៨គីឡូម៉ែត្រ ពោលគឺប្រហាក់ប្រហែលនឹងតួលេខ ដែលអះអាងដោយរដ្ឋាភិបាលកូរ៉េខាងជើង។
និយាយជារួម មានការទទួលស្គាល់ជាទូទៅថា កាលពីថ្ងៃពុធ កូរ៉េខាងជើងពិតជាបានបាញ់បង្ហោះផ្កាយរណបទៅក្នុងតារាវិថីពិតមែន។ ផ្កាយរណបនេះពិតជាមានដំណើរការមែនឬក៏អត់ វាគឺជារឿងដោយឡែក ក៏ប៉ុន្តែ វាគឺជាការបាញ់សាកល្បងបង្ហោះផ្កាយរណបដូចការអះអាងរបស់កូរ៉េខាងជើងពិតមែន។
បើដូច្នេះ តើហេតុអ្វីបានជាគ្រប់គ្នានាំគ្នាថ្កោលទោសកូរ៉េខាងជើងថាបាញ់សាកល្បងមីស៊ីលទៅវិញ? សូម្បីតែចិន ដែលជាសម្ព័ន្ធមិត្តរបស់កូរ៉េខាងជើង ក៏បានអនុម័តគាំទ្រសេចក្តីថ្លែងការណ៍របស់ក្រុមប្រឹក្សាសន្តិសុខ ដើម្បីថ្កោលទោសកូរ៉េខាងជើងដែរ ដោយចោទថា កូរ៉េខាងជើងបានរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខ ចេញកាលពីឆ្នាំ២០០៦ និង២០០៩។
នៅក្នុងសេចក្តីសម្រេចទាំងពីរនេះ ក្រុមប្រឹក្សាសន្តិសុខអ.ស.ប.បានហាមឃាត់ដាច់ខាតមិនឲ្យកូរ៉េខាងជើងធ្វើសកម្មភាពអ្វីទាំងអស់ ដែលទាក់ទងនឹងនុយក្លេអ៊ែរ និងមីស៊ីលបាលីស្ទីក។ ក៏ប៉ុន្តែ បើគេទទួលស្គាល់ថា អ្វីដែលកូរ៉េខាងជើងបាញ់បង្ហោះ កាលពីថ្ងៃពុធ គឺជាផ្កាយរណប តើមានអ្វីត្រូវរំលោភទៅលើការហាមឃាត់របស់ក្រុមប្រឹក្សាសន្តិសុខនេះ?
តាមការពិត បើពិនិត្យមើលទៅ ការអះអាងរបស់កូរ៉េខាងជើង និងអ្នកថ្កោលទោសកូរ៉េខាងជើង សុទ្ធតែត្រឹមត្រូវដូចគ្នា។ អ្វីដែលកូរ៉េខាងជើងបាញ់សាកល្បង កាលពីថ្ងៃពុធ គឺអាចជាការបាញ់បង្ហោះផ្កាយរណបផង ហើយក៏ជាការបាញ់សាកល្បងមីស៊ីលបាលីស្ទីកផងដែរ ពីព្រោះថា ការបាញ់បង្ហោះផ្កាយរណបទៅក្នុងតារាវិថី គឺត្រូវប្រើតួរ៉ុកកែត ដែលមានបច្ចេកវិទ្យាដូចគ្នាស្ទើរតែទាំងស្រុងនឹងមីស៊ីលបាលីស្ទីក។ និយាយជារួម គឺជាតួរ៉ុកកែត ដែលប្រើបច្ចេកវិទ្យាដូចគ្នា គ្រាន់តែមួយ មានផ្ទុកផ្កាយរណបនៅខាងលើ ឯមួយទៀត គឺផ្ទុកក្បាលគ្រាប់។ បើជាផ្កាយរណប គឺត្រូវស្ថិតនៅក្នុងតារាវិថី ក្នុងរយៈពេលយូរអង្វែង។ បើសិនជាក្បាលគ្រាប់ គឺត្រូវហោះទៅដល់រយៈកម្ពស់ប្រហាក់ប្រហែលនឹងផ្កាយរណបដែរ ប៉ុន្តែ វាហោះនៅក្នុងទីអវកាសនោះតែប្រមាណជា ២៥នាទីប៉ុណ្ណោះ បន្ទាប់មកវាត្រូវធ្លាក់ចុះមកផែនដីវិញ ដោយសំដៅទៅលើគោលដៅណាមួយច្បាស់លាស់។
ដូច្នេះ បើទោះជាកាលពីថ្ងៃពុធ កូរ៉េខាងជើងពិតជាបានបញ្ចូនផ្កាយរណបទៅដាក់ក្នុងតារាវិថីមែនក៏ដោយ ក៏ប៉ុន្តែ តួរ៉ុកកែត ដែលដឹកផ្កាយរណបនេះ គឺជាប្រភេទរ៉ុកកែត ដែលប្រើបច្ចេកវិទ្យាមីស៊ីលបាលីស្ទីក។ ហេតុដូច្នេះហើយបានជា អាមេរិក និងសម្ព័ន្ធមិត្តចោទកូរ៉េខាងជើងថាបានបាញ់សាកល្បងមីស៊ីលបាលីស្ទីក ក្នុងរូបភាពជាការបាញ់បង្ហោះផ្កាយរណប។
ជាការពិត អ្នកជំនាញភាគច្រើនសុទ្ធតែអះអាងថា ថ្វីដ្បិតតែការបាញ់សាកល្បងរបស់កូរ៉េខាងជើង កាលពីថ្ងៃពុធ ទទួលបានជោគជ័យ ក៏ប៉ុន្តែ មិនមែនមានន័យថា កូរ៉េខាងជើងអាចយករ៉ុកកែតនេះ មកប្រើ ដើម្បីផ្ទុកក្បាលគ្រាប់បានភ្លាមៗនោះទេ។ កូរ៉េខាងជើងត្រូវការពេលវេលាច្រើនឆ្នាំទៀត ទើបអាចផលិតជាមីស៊ីលបាលីស្ទីក ដែលអាចប្រើការបាន។ ក៏ប៉ុន្តែ ជោគជ័យកាលពីថ្ងៃពុធ គឺជាការវិវឌ្ឍដ៏សំខាន់មួយក្នុងកម្មវិធីមីស៊ីលបាលីស្ទីករបស់កូរ៉េខាងជើង។ ជោគជ័យ ដែលធ្វើឲ្យអាមេរិក និងប្រទេសជាសម្ព័ន្ធមិត្ត ពិសេស ជប៉ុន និងកូរ៉េខាងត្បូង ព្រួយបារម្ភ។
អ្វីដែលអាមេរិក និងប្រទេសជាសម្ព័ន្ធមិត្តព្រួយបារម្ភ គឺនៅត្រង់ថា នៅពេលនេះ កូរ៉េខាងជើងអាចផលិត និងសាកល្បងរ៉ុកកែតផ្ទុកផ្កាយរណបបាន ទៅថ្ងៃអនាគត កូរ៉េខាងជើងនឹងមានជំនាញពិតប្រាកដ ហើយយកបច្ចេកវិទ្យារ៉ុកកែតដឹកផ្កាយរណបនេះ ទៅប្រើ ដើម្បីផលិតជាមីស៊ីលបាលីស្ទីក ដែលផ្ទុកក្បាលគ្រាប់នុយក្លេអ៊ែរវិញ។ ដល់ពេលនោះ សូម្បីតែដែនដីអាមេរិកក៏អាចត្រូវស្ថិតក្រោមការគំរាមកំហែងពីអាវុធនុយក្លេអ៊ែររបស់កូរ៉េខាងជើងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ