ថៃ៖១ភាគ៣ នៃសមាជិករដ្ឋាភិបាលថ្មីមានប្រភពចេញពីកងទ័ព
នៅក្នុងប្រទេសថៃ បន្ទាប់ពីបានតែងតំាងខ្លួនឯងជានាយករដ្ឋមន្រ្តីមក ឧត្តមសេនីយប្រាយុទ្ធ ចាន់អូចាដែលជាមេរដ្ឋប្រហារទម្លាក់រដ្ឋាភិបាលស៊ីវិលកាលពីខែឧសភាទើបបានប្រកាសឲ្យដឹងនូវសមាសភាពរដ្ឋាភិបាលថ្មីរបស់លោកដែលមានសមាជិកភាគច្រើនជាកងទ័ព។ ការដាក់បញ្ចូលមន្រ្តី និងអតីតមន្រ្តីយោធាទៅក្នុងរដ្ឋាភិបាលថ្មីបានបង្ហាញយ៉ាងច្បាស់ថា លោកចាន់អូចាមិនអាចទុកចិត្តអ្នកផ្សេង ក្រៅពីកងទ័ព និងក៏មានឆន្ទៈចង់បង្កើនឥទ្ធិពលកងទ័ពនៅក្នុងឆាកនយោបាយដែរ។
ចុះផ្សាយនៅថ្ងៃ៖
ស្តាប់ - ០២:១២
ដូចដែលបានគ្រោងទុក សមាសភាពរដ្ឋាភិបាលថ្មីដែលដឹកនំាដោយនាយករដ្ឋមន្រ្តី ឧត្តមសេនីយប្រាយុទ្ធ ចាន់អូចាត្រូវបានព្រះមហាក្សត្រព្រះចៅភូមិបុលចេញព្រះរាជក្រិត្យទទួលយល់ព្រមជាផ្លូវការនៅថ្ងៃអាទិត្យ ទី៣១ សីហា។ អ្វីជាការកត់សម្គាល់ មានសមាជិកជិត ១ភាគ៣ នៃសមាជិកសរុបទំាង ៣២រូបនៅក្នុងរដ្ឋាភិបាលថ្មីមានប្រភពចេញមកពីមន្រ្តីកងទ័ពជាន់ខ្ពស់ ពិសេសច្រើនជាមនុស្សជំនិតរបស់លោកប្រាយុទ្ធ ចាន់អូចា។ តែយ៉ាងណាក៏ដោយ តំណែងរបស់រដ្ឋមន្រ្តីម្នាក់ដែលស្នើដោយលោកចាន់អូចានឹងត្រូវទទួលការបញ្ជាក់យល់ព្រមពីព្រះមហាក្សត្រនៅក្នុងពិធីរៀបចំប្រគល់តំណែងដែលគ្រោងធ្វើក្នុងសប្តាហ៍នេះនៅក្នុងមន្ទីរពេទ្យមួយស្ថិតក្នុងទីក្រុងបាងកងដែលព្រះចៅភូមិបុលកំពុងសម្រាកព្យាបាលជំងឺ។ គួរជម្រាបជូនថាមានព្រះជន្ម ៨៦ព្រះវស្សា ព្រះចៅភូមិបុលត្រូវបានប្រជារាស្រ្តគោរពដូចព្រះអាទិទេព។
មានក្រសួងសំខាន់ៗមួយចំនួនត្រូវបានលោកចាន់អូចាប្រគល់ទៅឲ្យមន្រ្តីយោធាជាន់ខ្ពស់កាន់កាប់ ដូចជាក្រសួងយុត្តិធម៌ ការបរទេស ពាណិជ្ជកម្ម ឬមួយក៏ក្រសួងមហាផ្ទៃ។ មួយវិញទៀត ក្នុងចំណោមមន្រ្តីយោធាជាន់ខ្ពស់ដែលបានទទួលតំណែងជារដ្ឋមន្រ្តី ក៏មានមន្រ្តីខ្លះជាប់ឈ្មោះជាអ្នកទទួលខុសត្រូវនៅក្នុងព្រឹត្តិការណ៍វាយបង្រ្កាបលើពួកបាតុករអាវក្រហមកាលពីឆ្នំា ២០១០។ ជាក់ស្តែង គឺឧត្តមសេនីយអានុពុង ប៉ាវជិនដាដែលបានទទួលតំណែងជារដ្ឋមន្រ្តីក្រសួងមហាផ្ទៃ។ ជារួមគេសង្កេតឃើញថា សមាជិករដ្ឋាភិបាលថ្មីរបស់លោកចាន់អូចាមិនមានវត្តមានចូលរួមពីឥស្សរជននយោបាយកណ្តាលនិយមទេ។ នេះជាសញ្ញាមួយបញ្ជាក់ឲ្យឃើញថា របបសឹកពិតជាគ្មានបំណងណាមួយដើម្បីផ្សះផ្សាជាមួយក្រុមអ្នកគំាទ្រលោកអតីតនាយករដ្ឋមន្រ្តីថាក់ស៊ីនទេ។
គួររម្លឹកជូនថា តំាងតែពីថ្ងៃទី២២ ឧសភាមក ឥស្សរជននយោបាយភាគច្រើនបានបាត់ស្រមោលពីបណ្តាញឃោសនាមហាជន រីឯសិទ្ធិសេរីភាពបញ្ចេញមតិរិះគន់ក៏ត្រូវគេហាមប្រាមដែរ។ ចំណែកស្ថានប័នកងទ័ពធ្លាប់បានព្រមានរួចហើយថា ទោះបីជាមានការប្រសូត្រចេញនូវរដ្ឋាភិបាលស៊ីវិលមួយនាថ្ងៃខាងមុខក៏ដោយ ក៏របបសឹកនៅតែមានវត្តមានទន្ទឹមនឹងរដ្ឋាភិបាលស៊ីវិលជានិច្ច។ តែមកដល់ថ្ងៃនេះ ការរៀបចំបោះឆ្នោតត្រូវបានរបបសឹកលើកពេលរហូតដល់ខែតុលា ឆ្នំា ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ