មេដឹកនាំរបបសឹកថៃត្រូវបានតែងតាំងជានាយករដ្ឋមន្រ្តីដែលជាសញ្ញាមិនល្អសម្រាប់លទ្ធិប្រជាធិបតេយ្យ
ចុះផ្សាយនៅថ្ងៃ៖
ស្តាប់ - ០៥:១៩
លោកប្រាយុទ្ធ ចាន់អូចា មេដឹកនាំរដ្ឋប្រហារ និងជាប្រមុខដឹកនាំរបបសឹកថៃ ទើបនឹងត្រូវបានសភាបណ្តោះអាសន្នថៃតែងតាំងជានាយករដ្ឋមន្រ្តី នៅថ្ងៃព្រហស្បតិ៍នេះ ដើម្បីឈានទៅបង្កើតជារដ្ឋាភិបាលបណ្តោះអាសន្នមួយ។ ការតែងតាំងមេដឹកនាំរបបសឹកឲ្យដឹកនាំរដ្ឋាភិបាលស៊ីវិលនេះ ធ្វើឲ្យគេបារម្ភថា កងទ័ពថៃកំពុងតែត្រួសត្រាយផ្លូវ ដើម្បីបន្តកាន់អំណាចរយៈពេលយូរ។
សភា ដែលបោះឆ្នោតតែងតាំងលោកប្រាយុទ្ធ ចាន់អូចា ជានាយករដ្ឋមន្រ្តី នៅថ្ងៃព្រហស្បតិ៍នេះ គឺជាសភាបណ្តោះអាសន្ន ដែលបង្កើតឡើង កាលពីចុងខែកក្កដាកន្លងទៅ។ សភាបណ្តោះអាសន្ននេះមានសមាជិក ១៩៧នាក់ ក្នុងនោះ មានរហូតដល់ទៅជាង ១០០នាក់ ជាមន្រ្តីយោធា ១១នាក់មកពីជួរប៉ូលិស ហើយក្រៅពីនោះ គឺជាសាស្រ្តាចារ្យ អ្នកជំនួញ និងអ្នកនយោបាយ ដែលមាននិន្នាការប្រឆាំងនឹងលោកថាក់ស៊ីន។
សមាជិកសភាបណ្តោះអាសន្នទាំងអស់នេះ ត្រូវបានតែងតាំងដោយក្រុមប្រឹក្សាកងទ័ព ដែលដឹកនាំដោយលោកប្រាយុទ្ធ ចាន់អូចា ខ្លួនឯង។
នៅក្នុងការបោះឆ្នោតតែងតាំងនាយករដ្ឋមន្រ្តី នៅថ្ងៃព្រហស្បតិ៍នេះ គេឃើញថា គឺមានតែលោកប្រាយុទ្ធ ចាន់អូចាម្នាក់ប៉ុណ្ណោះជាបេក្ខជន ដោយមិនមានអ្នកណាផ្សេងជាគូប្រជែងទេ។ នៅក្នុងចំណោមសមាជិកសភាបណ្តោះអាសន្នទាំងអស់ក៏គេមិនឃើញមានអ្នកណាបោះឆ្នោតប្រឆាំងនឹងលោកប្រាយុទ្ធ ចាន់អូចាដែរ ដោយមានត្រឹមការបោះឆ្នោតអនុប្បវាទតែ ៣សំឡេងប៉ុណ្ណោះ ឯក្រៅពីនោះ សុទ្ធតែបានបោះឆ្នោតគាំទ្រទាំងអស់។
បន្ទាប់ពីមានការអនុម័តពីសភាបណ្តោះអាសន្ននេះហើយ ការតែងតាំងលោកប្រាយុទ្ធ ចាន់អូចា ជានាយករដ្ឋមន្រ្តីនឹងត្រូវឆ្លងកាត់ការឯកភាពពីព្រះមហាក្សត្រមួយទៀត។ ក៏ប៉ុន្តែ ដូចដែលគ្រប់គ្នាដឹងស្រាប់ហើយថា កងទ័ពថៃគឺជាស្ថាប័នស្និទ្ធិនឹងព្រះមហាក្សត្រថៃបំផុត។ ដូច្នេះ ការស្នើសុំការអនុម័តយល់ព្រមពីព្រះមហាក្សត្រថៃ ទៅលើការតែងតាំងលោកប្រាយុទ្ធ ចាន់អូចា វាគ្រាន់តែជាការធ្វើឡើង ដើម្បីបង្គ្រប់នីតិវិធីតែប៉ុណ្ណោះ ដោយគេមិនរំពឹងថា ព្រះមហាក្សត្រថៃនឹងជំទាស់ទៅនឹងការតែងតាំងនេះទេ។
បើតាមមើលទៅ ការណ៍ដែលរបបសឹកបង្កើតសភា និងរដ្ឋាភិបាលបណ្តោះអាសន្ននៅពេលនេះ ប្រហែលជាមានគោលដៅចង់បង្ហាញឲ្យគេឃើញថា អំណាចដឹកនាំប្រទេសថៃត្រូវបានផ្ទេរពីក្រុមប្រឹក្សាកងទ័ព ទៅឲ្យរដ្ឋាភិបាលបណ្តោះអាសន្នមួយ ដែលជារដ្ឋាភិបាលស៊ីវិល ដើម្បីកុំឲ្យមតិសាធារណៈជាតិ និងអន្តរជាតិមើលមកឃើញថា ប្រទេសថៃត្រូវដឹកនាំដោយរបបសឹកផ្តាច់ការ។
ក៏ប៉ុន្តែ ការផ្ទេរអំណាចទៅឲ្យរដ្ឋាភិបាលស៊ីវិលនេះ គ្រាន់តែជារូបភាពខាងក្រៅតែប៉ុណ្ណោះ។ ឯការពិតជាក់ស្តែង អំណាចនៅតែស្ថិតនៅក្នុងដៃកងទ័ពថៃដដែល ពីព្រោះថា សភាបណ្តោះអាសន្នក៏តែងតាំងដោយមេដឹកនាំរបបសឹក ហើយសមាជិកភាគច្រើនក៏ចេញពីជួរកងទ័ព។ ចំណែករដ្ឋាភិបាលបណ្តោះអាសន្នវិញ មានឈ្មោះជារដ្ឋាភិបាលស៊ីវិល ក៏ប៉ុន្តែ នៅតែស្ថិតក្រោមការដឹកនាំផ្ទាល់របស់មេដឹកនាំរបបសឹក។
ហេតុដូច្នេះហើយបានជាគេបារម្ភថា មេដឹកនាំរបបសឹកថៃទំនងជានឹងមិនចង់រៀបចំការបោះឆ្នោត ដើម្បីវិលត្រឡប់ទៅរកលទ្ធិប្រជាធិបតេយ្យវិញនោះទេ ប៉ុន្តែ ផ្ទុយទៅវិញ ពួកគេកំពុងតែពង្រឹងអំណាច និងខិតខំស្វះស្វែងរកភាពស្របច្បាប់ ដើម្បីបន្តក្តោបក្តាប់អំណាចក្នុងរយៈពេលយូរតទៅទៀត។
គួររំឭកឡើងវិញថា មេដឹកនាំកងទ័ពថៃធ្លាប់បានប្រកាសរួចទៅហើយថា ការរៀបចំបោះឆ្នោតជ្រើសរើសតំណាងរាស្រ្ត និងរដ្ឋាភិបាលស៊ីវិលថ្មី នឹងមិនអាចធ្វើឡើងនៅមុនចុងឆ្នាំ២០១៥ទេ ដែលនេះមានន័យថា ថៃនឹងបន្តស្ថិតក្រោមការដឹកនាំរបស់របបសឹក យ៉ាងហោចណាស់ក៏ដល់ចុងឆ្នាំ២០១៥ដែរ ហើយនៅក្រោយចុងឆ្នាំ២០១៥ ក៏គេមិនអាចដឹងប្រាកដថា មេដឹកនាំកងទ័ពថៃពិតជានឹងរៀបចំឲ្យមានការបោះឆ្នោតដោយសេរី និងយុត្តិធម៌ តាមបែបប្រជាធិបតេយ្យ ដើម្បីផ្ទេរអំណាចឲ្យរដ្ឋាភិបាលស៊ីវិលវិញនោះដែរ។
គ្រប់គ្នាសុទ្ធតែដឹងថា កងទ័ពថៃ ជាពិសេស លោកប្រាយុទ្ធ ចាន់អូចាផ្ទាល់ ស្អប់ក្រុមលោកថាក់ស៊ីន ហើយបទពិសោធន៍កន្លងមកបានបង្ហាញច្បាស់ហើយថា នៅរាល់ពេលដែលមានការបោះឆ្នោតដោយសេរី ជាលក្ខណៈសកល ក្រុមលោកថាក់ស៊ីនតែងតែឈ្នះឆ្នោតជាប់រហូត។
ជាក់ស្តែង គេឃើញថា កាលពីរដ្ឋប្រហារឆ្នាំ២០០៦ មេទ័ពថៃបានធ្វើរដ្ឋប្រហារទម្លាក់លោកថាក់ស៊ីន រួចហើយបានរៀបចំការបោះឆ្នោតឡើងវិញ នៅចុងឆ្នាំ២០០៧។ ក៏ប៉ុន្តែ ក្រុមលោកថាក់ស៊ីនជាអ្នកឈ្នះឆ្នោតឡើងមកកាន់អំណាចវិញដដែល ហើយវិបត្តិនយោបាយក៏ចេះតែបន្តកើតឡើងជាបន្តបន្ទាប់រហូតដល់ពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ