ថៃ៖របបសឹកសន្យានឹងចែកអំណាចជាមួយរដ្ឋាភិបាលស៊ីវិលបណ្តោះអាសន្ន
នៅក្នុងប្រទេសថៃ របបសឹកបានប្រកាសឲ្យដឹងនៅថ្ងៃសុក្រ ទី១១ កក្កដាថា ទោះបីជារដ្ឋាភិបាលស៊ីវិលបណ្តោះអាសន្នមួយនឹងត្រូវបង្កើតឡើងនៅថ្ងៃខាងមុខក៏ដោយ ក៏ខ្លួននៅតែបន្តរក្សាតួនាទីជាអ្នកត្រួតត្រាផ្នែកសន្តិសុខនៅទូទំាងប្រទេសថៃដដែល។ ការប្រកាសរបស់របបសឹកពេលនេះបានធ្វើឡើង ចំពេលដែលសហគមន៍អន្តរជាតិបានបន្តអំពាវនាវយ៉ាងទទូចឲ្យមានការប្រគល់អំណាចទំាងស្រុងឲ្យក្រុមស៊ីវិល និងរៀបចំបោះឆ្នោតជាថ្មីនាពេលឆាប់ៗខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
« ក្រុមប្រឹក្សាជាតិដើម្បីសន្តិភាព និងសណ្តាបធ្នាប់ » នេះជាឈ្មោះផ្លូវការដែលរបបសឹកបានដាក់នៅក្រោយរដ្ឋប្រហារយោធាទម្លាក់រដ្ឋាភិបាលដែលដឹកនំាដោយគណបក្សភឿថៃកាលពីថ្ងៃទី២២ ឧសភា។ តំាងពីបានឡើងកាន់អំណាចពេញដៃមក មនុស្សខ្លំាងថ្មីរបស់ក្រុងបាងកក ឧត្តមសេនីយប្រាយុទ្ធ ចាន់អូចាតែងតែបានចេញមុខអន្តរាគមន៍តាមកញ្ចក់ទូរទស្សន៍រៀងរាល់មួយសប្តាហ៍ម្តងដើម្បីផ្សព្វផ្សាយពីការងាររបស់ខ្លួន។ នៅក្នុងសប្តាហ៍នេះ ឧត្តមសេនីយចាន់អូចាបានបញ្ជាក់ពីគម្រោងបង្កើតរដ្ឋាភិបាលស៊ីវិលបណ្តោះអាសន្នមួយនៅមុនខែកញ្ញាឆ្នំា ២០១៤ នេះ។ តែលោកបានបញ្ជាក់ច្បាស់ៗថា ទោះបីជារដ្ឋាភិបាលបណ្តោះអាសន្នមួយនឹងត្រូវបង្កើតឡើងក៏ដោយ ក៏កងទ័ពនៅតែបន្តដើរតួនាទីស្នូលរបស់ប្រទេសដដែល ពិសេសតួនាទីជាអ្នកការពារសន្តិសុខ និងសុវត្ថិភាពនៅទូទំាងប្រទេស។
យោងតាមលោកចាន់អូចា រដ្ឋាភិបាលបណ្តោះអាសន្ននឹងត្រូវជ្រើសតំាងចេញពីការបោះឆ្នោតនៅផ្ទៃក្នុងសភាដែលសមាជិកភាគច្រើនជាកងទ័ព។ សម្រាប់លោកចាន់អូចា រដ្ឋាភិបាលស៊ីវិលបណ្តោះអាសន្ននឹងមានតួនាទីចាត់ចែងកិច្ចការផ្នែករដ្ឋបាល ចំណែកក្រុមប្រឹក្សាជាតិដើម្បីសន្តិភាព និងសណ្តាបធ្នាប់ជាអ្នកទទួលបន្ទុកគ្រប់គ្រងផ្នែកសន្តិសុខ។ ទាក់ទងនឹងការរៀបចំបោះឆ្នោតសកល មេរដ្ឋប្រហាររូបនេះបានរម្លឹកជាថ្មីថា មិនអាចធ្វើឡើងនៅមុនខែតុលា ឆ្នំា ២០១៥ បានទេ។ គួររម្លឹកជូនថា តំាងពីក្រោយរដ្ឋប្រហារយោធាកាលពីថ្ងៃទី២២ ឧសភាមក របបសឹកបានព្យួររដ្ឋធម្មនុញ្ញ និងកម្រិតសិទ្ធិសេរីភាពរបស់ប្រជាពលរដ្ឋ។ ទន្ទឹមគ្នានេះ សហគមន៍អន្តរជាតិ ពិសេសសហរដ្ឋអាមេរិក និងសហភាពអឺរ៉ុបកំពុងបន្តអំពាវនាវយ៉ាងទទូចឲ្យមានការប្រគល់អំណាចទំាងស្រុងទៅឲ្យក្រុមស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ