ព្រះមហាក្សត្រថៃប្រកាសទទួលស្គាល់របបថ្មីក្នុងក្រុងបាងកកដឹកនំាដោយមេទ័ពប្រាយុទ្ធ ចាន់អូចា
នៅក្នុងប្រទេសថៃ នាថ្ងៃចន្ទ ទី២៦ ឧសភានេះ មេទ័ពប្រាយុទ្ធ ចាន់អូចាដែលបានធ្វើរដ្ឋប្រហារ ក្តោបយកអំណាចកាលពី ៤ថ្ងៃមុន ទើបបានទទួលការគំាទ្រជាផ្លូវការពីព្រះមហាក្សត្រ ព្រះចៅភូមិបុល អាឌូយ៉ាដេត។ តែក្នុងពេលជាមួយគ្នានេះ និងទោះបីជារបបសឹកបានហាមមិនឲ្យរៀបចំបាតុកម្មក៏ដោយ ក៏គេសង្កេតឃើញមានប្រជារាស្រ្តថៃកាន់តែច្រើនឡើងៗបាននំាគ្នាចុះផ្លូវប្រឆំាងនឹងរដ្ឋប្រហារ។ នៅថ្ងៃនេះ របបសឹកបានព្រមានទុកជាមុនថា កងទ័ពនឹងចេញប្រតិបត្តិការបង្រ្កាបលើគ្រប់បាតុកម្មទំាងអស់ដែលកើតមានចាប់ពីថ្ងៃនេះទៅ។
ចុះផ្សាយនៅថ្ងៃ៖
ស្តាប់ - ០២:១៧
មិនមានអ្វីថ្មីទេ តែគ្រាន់ជាការបំពេញបន្ថែមលើទម្រង់បែបបទមួយដែលបញ្ជាក់ពីភាពស្របច្បាប់របស់របបសឹកតែប៉ុណ្ណោះ។ គឺតាមរយៈកញ្ចក់ទូរទស្សន៍ដែលគេបានឃើញរូបមេទ័ពប្រាយុទ្ធ ចាន់អូចា និងក្រុមរបស់លោកមានសម្លៀកបំពាក់ពណ៌ ស និងបានអង្គុយលត់ជង្គង់នៅចំពោះមុខរូបថតព្រះចៅភូមិវិបុលនាឱកាសអានព្រះរាជក្រឹត្យរបស់ព្រះអង្គ។ ពិធីនោះត្រូវបានរបបសឹករៀបចំនៅទីស្នាក់ការកណ្តាលរបស់កងទ័ព និងដែលត្រូវបានគេចាក់ផ្សាយបន្តផ្ទាល់តាមកញ្ចក់ទូរទស្សន៍។ « គឺដើម្បីស្តារសន្តិភាពឡើងវិញ និងរៀបចំសណ្តាប់ធា្នប់សង្គមក្នុងប្រយោជន៍ឯកភាពជាតិ ព្រះមហាក្សត្របានតែងតំាងលោកឧត្តមសេនីយប្រាយុទ្ធ ចាន់អូចាឲ្យបំពេញបេសកកម្មជាអ្នកដឹកនំាប្រទេសចាប់ពីពេលនេះតទៅ » នេះជាខ្លឹមសារនៅក្នុងព្រះរាជក្រឹត្យរបស់ព្រះចៅភូមិវិបុលដែលអានដោយលោកប្រាយុទ្ធ ចាន់អូចាផ្ទាល់ខ្លួន។
បន្ទាប់ពីបានអានព្រះរាជក្រឹត្យរបស់ព្រះចៅភូមិបុល អាឌូយ៉ាដេតចប់ភ្លាម មនុស្សខ្លំាងថ្មីក្នុងទីក្រុងបាងកកក៏បានប្រកាសព្រមានដល់ក្រុមប្រឆំាងនឹងរដ្ឋប្រហារថា លោកនឹងមិនអនុញ្ញាតឲ្យមានបាតុកម្មថ្មីណាមួយទៀតទេចាប់ពីថ្ងៃចន្ទ ទី២៦ ឧសភានេះទៅ។ « បើពួកប្រឆំាងហ៊ានធ្វើបាតុកម្មជាថ្មី ខ្ញុំនឹងអនុវត្តន៍ច្បាប់ ហើយអ្នកចាប់ខ្លួននឹងត្រូវបញ្ជូនទៅកាន់តុលាការយោធា » នេះជាថ្លែងរបស់លោកប្រាយុទ្ធ ចាន់អូចានៅក្នុងសន្និសីតកាសែតមួយនារសៀលថ្ងៃនេះ។ ការព្រមានរបស់លោកចាន់អូចាពេលនេះបានធ្វើឡើង ក្រោយពីមានប្រជារាស្រ្តថៃជាង ១ ០០០នាក់បានបំពានលើច្បាប់អាជ្ញាសឹក ដោយនំាគ្នាចុះផ្លូវធ្វើបាតុកម្មប្រឆំាងរដ្ឋប្រហារនៅថ្ងៃអាទិត្យ ទី២៥ ឧសភាម្សិលមិញ។
ជាមួយនឹងព្រះរាជ្យក្រឹត្យរបស់ព្រះមហាក្សត្រពេលនេះ មេរដ្ឋប្រហារប្រាយុទ្ធ ចាន់អូចាអាចប្រើជាមូលដ្ឋានមួយដើម្បីបញ្ជាក់ពីភាពស្របច្បាប់នៃរបបសឹករបស់លោក។ ដោយឡែកក្នុងពេលនេះ គ្រប់គ្នាកំពុងបារម្ភពីការដែលរបបសឹកបានចាប់ខ្លួនឥស្សរជននយោបាយ និងសកម្មជនរបស់សង្គមស៊ីវិលជាច្រើននាក់យកទៅឃុំ ពិសេសលោកស្រីអតីតនាយករដ្ឋមន្រ្តីយីងឡាក់។ របបសឹកធ្លាប់បានប្រកាសថា អ្នកចាប់ខ្លួនទំាងអស់នឹងត្រូវឃុំទុកយ៉ាងយូរបំផុតរយៈពេល ១សប្តាហ៍។ តាមធម្មតា ពួកគេនឹងត្រូវដោះលែងនៅថ្ងៃព្រហស្បតិ៍ ទី២៩ ឧសភាខាងមុខ និងដោយមិនត្រូវទទួលទោសអ្វីទេ។ និយាយពីមេបាតុករអាវលឿងលោកស៊ូថេប តុលាការទើបបានដោះលែងឲ្យរួចខ្លួនក្នុងថ្ងៃចន្ទ ទី២៦ ឧសភានេះ ជាថ្នូរនឹងការតម្កល់ប្រាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ