អគ្គមគ្គទេសន៍គីម ជុងអ៊ុនបន្តបោសសំអាតសត្រូវផ្ទៃក្នុងដើម្បីពង្រឹងអំណាចរបស់ខ្លួន
ចុះផ្សាយនៅថ្ងៃ៖
ស្តាប់ - ០៦:៤៣
នៅកូរ៉េខាងជើង ប៉ុន្មានថ្ងៃ បន្ទាប់ពីបានដកចេញពីតំណែងកំពូលជាផ្លូវការមក លោកចាង សុងថេកដែលជាត្រូវជាឱពុក មា របស់អគ្គមគ្គទេសន៍គីម ជុងអ៊ុនទើបត្រូវបានតុលាការយោធាពិសេសកាត់ទោសប្រហារជីវិត រួចប្រហារជីវិតចោលភ្លាមៗនៅថ្ងៃព្រហស្បតិ៍ទី១២ ធ្នូ។ មានអាយុ ៦៧ឆ្នំា លោកចាង សុងថេកត្រូវបានគេចាត់ទុកជាមនុស្សខ្លំាងលំដាប់ទី២ របស់របបកុម្មុយនិស្ត និងជាអ្នកប្រៀនប្រដៅក្មួយគីម ជុងអ៊ុនដែលបានស្នងតំណែងនៅក្រោយមរណៈភាពឱពុក គឺលោកគីម ជុងអ៊ីលកាលពីខែធ្នូ ឆ្នំា ២០១១។ អាមេរិក និងកូរ៉េខាងត្បូងបានសម្តែងក្តីបារម្ភចំពោះស្ថានការណ៍វិវត្តន៍នៅកូរ៉េខាងជើង។
ព័ត៌មានជុំវិញការចាប់ខ្លួន និងការប្រហារជីវិតលោកចាង សុងថេកត្រូវបានផ្តល់ឲ្យដោយសារព័ត៌មានផ្លូវការកូរ៉េខាងជើង KCNA។ យោងតាមសារព័ត៌មាន KCNA លោកចាង សុងថេក ជាមនុស្សក្បត់ជាតិ និងបានប្រព្រឹត្តិនូវទង្វើមួយចំនួនប្រឆំាងនឹងគណបក្ស ព្រមទំាងប្រឆំាងនឹងបដិវត្តន៍ក្នុងគោលបំណងរំលំថ្នាក់ដឹកនំាគណបក្ស ផ្តួលរំលំរដ្ឋាភិបាលបច្ចុប្បន្ន។ ធ្ងន់ធ្ងរជាងនេះ និងបើផ្អែកតាមសារព័ត៌មាន KCNA ដដែល លោកចាង សុងថេកបានជាប់ចោទពីបទក្បត់នឹងក្បួយប្រុសរបស់គាត់ គឺលោកគីម ជុងអ៊ុន ព្រមទំាងឱពុករបស់លោកគីម ជុងអ៊ុន គឺលោកគីម ជុងអ៊ីល។
គួររម្លឹកជូនថា មុននឹងបន្តធ្វើការជាមួយលោកគីម ជុនអ៊ុន លោកចាង សុងថេកក៏ធ្លាប់បម្រើការឲ្យលោកគីម ជុងអ៊ីលដែរ។ ក្នុងពេលនោះ លោកគីម ជុងអ៊ីលក៏ធ្លាប់បានដកតំណែងលោកចាង សុងថេកម្តងក្នុងឆ្នំា ២០០៤ មុននឹងហៅឲ្យត្រលប់ចូលមកកាន់តំណែងជាថ្មីនៅ ២ឆ្នំាក្រោយមក ពោលគឺក្នុងឆ្នំា ២០០៦។ តែផ្ទុយពីឱពុក លោកគីម ជុងអ៊ីលបានដកតំណែងលោកចាង សុងថេក រួចសម្លាប់ចោលតែម្តង។
សូមបញ្ជាក់ថា នៅក្នុងសវនាកាត់ទោសលោកចាង សុងថេកដោយតុលាការយោធាពិសេស លោកចាង សុងថេកបានប្រកាសទទួលស្គាល់ថា លោកពិតជាបាននិងកំពុងរៀបចំគម្រោងរដ្ឋប្រហារទម្លាក់ក្មួយប្រុសគីម ជុងអ៊ុន ដោយបានបញ្ចុះបញ្ចូលក្រុមមេទ័ព និងប្រជាជនឲ្យងើបបះបោរឡើង។
លោកគីម ជុងអ៊ុនលែងត្រូវការជំនួយរបស់ឱពុក មា
តំាងពីជំនាន់លោកគីម ជុងអ៊ីល រហូតដល់ជំនាន់លោកគីម ជុងអ៊ុន លោកចាង សុងថេកមានតួនាទីជាអនុប្រធានគណៈកម្មការការពារជាតិដែលជាស្ថានប័នកំពូល និងមានសិទ្ធិសម្រេចកិច្ចការរបស់ប្រទេស។ នៅក្នុងជំនាន់លោកគីម ជុងអ៊ីល លោកចាង សុងថេកមិនបានបញ្ចេញសកម្មភាពអ្វីគួរឲ្យចាប់អារម្មណ៍ទេ គឺទើបតែនៅពេលដែលលោកគីម ជុងអ៊ីលធ្លាក់ខ្លួនឈឺ និងស្លាប់ក្នុងខែធ្នូ ឆ្នំា ២០១១ ទេ ដែលលោកចាង សុងថេកបានផ្តើមបង្កើនឥទ្ធិពលអំណាចរបស់ខ្លួនបន្តិចម្តងៗ។ ក្នុងនាមជាឱពុក មា លោកចាង សុងថេកបានដើរតួនាទីយ៉ាងសំខាន់ក្នុងការជួយតម្រែតម្រង់ផ្លូវ ព្រមទំាងជួយប្រៀនប្រដៅក្មួយដែលទើបតែស្នងតំណែងពីឱពុក។
ទន្ទឹមគ្នានោះ លោកចាង សុងថេកបានដើរតួនាទីស្នូលនៅក្នុងកិច្ចការនយោបាយ និងយោធារបស់ប្រទេស ពិសេសនៅក្នុងផ្នែកសេដ្ឋកិច្ច។ លោកចាង សុងថេកបានចេញមុខនៅក្នុងការចរចាជាមួយបរទេស ពិសេសជាមួយសម្ព័ន្ធមិត្តចិន។ លោកចាង សុងថេកត្រូវបានគេស្គាល់ថា ជាមនុស្សកណ្តាលនិយម គឺមិនជ្រុលនិយមដូចអ្នកផ្សេងទេ។ គឺផ្តើមពីចំណុចហើយដែលលោកក្មួយគីម ជុងអ៊ុនមានអារម្មណ៍ថា អំណាចកំពូលរបស់ខ្លួនកំពុងទទួលការគំរាមកំហែងពីឱពុក មា។
តាមពិតទៅ លោកគីម ជុងអ៊ុនបានដឹងខ្លួនយូរដែរមកហើយ តែនៅមិនទាន់អាចធ្វើបាន ព្រោះថា ទី១ ខ្លួនឯងទើបតែឡើងកាន់តំណែងថ្មីថ្មោង ទី២ មកពីខ្លួនឯងមិនទាន់បានប្រមូលមនុស្សជំនិត និងគួរឲ្យទុកចិត្តជុំវិញខ្លួន និងទី៣ដែលសំខាន់នោះ មកពីអំណាចខ្លួនឯងនៅមិនទាន់បានពង្រឹងរឹងមំាដែលត្រូវការបទពិសោធន៍ជើងចាស់របស់ឱពុក មា។ តែបន្ទាប់ពីសំងំពង្រឹងអំណាចបានជាង ២ឆ្នំាមក លោកគីម ជុងអ៊ីលលែងត្រូវការជើងចាស់របស់ឱពុក មា ទៀតឡើយ។
លោកគីម ជុងអ៊ុនកំពុងដកដាវសម្លាប់ខ្លួនឯង !
ក្រោយពីការប្រហារជីវិតលោកចាងសុងថេក ក្រុមប្រទេសលោកខាងលិច ពិសេសសហរដ្ឋអាមេរិក និងកូរ៉េខាងត្បូងដែលជាបងប្អូនបង្កើតគូសត្រូវរបស់កូរ៉េខាងជើងកំពុងព្រួយបារម្ភពីស្ថានការណ៍វិវត្តន៍នៅកូរ៉េខាងជើង។ ទីក្រុងវ៉ាស៊ីនតោនបានកត់សម្គាល់ថា នេះជាទង្វើឃោរឃៅមួយទៀតដែលអនុវត្តន៍ដោយរបបផ្តាច់ការកូរ៉េខាងជើង និងថា អាមេរិកនឹងបន្តតាមដានស្ថានការណ៍នៅកូរ៉េខាងជើងជាមួយនឹងដៃគូផ្សេងទៀត។ គួរជម្រាបជូនថា ប៉ុន្មានថ្ងៃ មុនការប្រហារជីវិតលោកចាង សុងថេក រដ្ឋអំណាចក្រុងព្យុងយ៉ាងក៏បានប្រហារជីវិតមនុស្សជំនិតពីរនាក់របស់លោកចាង សុងថេកដែរ។ ដូច្នេះនៅថ្ងៃខាងមុខ រដ្ឋអំណាចក្រុងព្យុងយ៉ាងនឹងបន្តបោសសំអាតមនុស្សជំនិត ជិត ឬឆ្ងាយរបស់លោកចាង សុងថេកជាបន្តទៀត។
ពិតណាស់ថា មកដល់ម៉ោងនេះ គ្រប់គ្នាបានចាត់ទុកទង្វើនោះថា ជាសេចក្តីសម្រេចធ្លាក់មកពីលោកគីម ជុនអ៊ុន។ តែការពិតជាក់ស្តែងនោះ គេនៅមិនទាន់អាចដឹងច្បាស់ទេ ព្រោះវាអាចជាគំនាបមកពីបក្សពួកផ្សេង ឬមួយក៏ថា មកពីលោកគីម ជុងអ៊ុនស្តាប់ការអុជអាលរបស់មនុស្សជំនិតដែលតាមពិតទៅ ពួកនោះទេតើដែលចង់ផ្តួលរំលំខ្លួនលោកគីម ជុងអ៊ុន។
ក្រុម ឬបក្សពួកនោះ គឺគ្មាននរណាក្រៅពីក្រុមយុវវ័យជំនិតនឹងលោកគីម ជុងអ៊ុន មានអាយុស្រករលោក និងដែលមិនយល់ព្រមតាមនយោបាយគ្រប់គ្រងប្រទេសរបស់ត្រកូលគីមដែលបានធ្វើឲ្យស្ថានភាពសេដ្ឋកិច្ចកាន់តែដុនដាបទៅៗ។ និយាយយ៉ាងដូចនេះ វាហាក់ដូចជាគេមានសុទិដ្ឋិនិយមខ្លំាងពេក។ តែប្រសិនបើជាដូច្នោះមែន ការដែលលោកគីម ជុងអ៊ុនបានសម្លាប់ឱពុក មាខ្លួនឯង វាមិនខុសអ្វីពីការហែកសាច់ឲ្យខ្លាស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ