ជប៉ុនបារម្ភពីការផ្ទុះបដិវត្តន៍នៅកូរ៉េខាងជើង ក្រោយពីការបណ្តេញលោកចាង សុងថេក
នៅថ្ងៃព្រហស្បតិ៍ ទី១២ ធ្នូនេះ ប្រទេសជប៉ុន តាមរយៈលោករដ្ឋមន្រ្តីក្រសួងការពារជាតិអ៊ីតស៊ូណូរី អូណូដេរ៉ាបានអះអាងថា លោកបារម្ភខ្លាចតែការបណ្តេញលោកចាង សុងថេកចេញពីអំណាចកន្លងទៅក្លាយជាភ្លើងបញ្ឆេះឲ្យមានការធ្វើបដិវត្តន៍ទូទៅនៅកូរ៉េខាងជើង។ សូមជម្រាបជូនថា លោកចាង សុងថេកដែលត្រូវជាឱពុកមារបស់អគ្គមគ្គទេសន៍គីម ជុងអ៊ុន និងជាមនុស្សខ្លំាងទី២នៅក្នុងរបបកុម្មុយនិស្ត ត្រូវបានក្មួយខ្លួនឯងដកអំណាចកាលពីថ្ងៃចន្ទ ដើមសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:១៩
គឺនៅក្នុងវេទិកានៃការជញ្ជឹងគិតដែលលោករដ្ឋមន្រ្តីក្រសួងការពារជាតិជប៉ុនអ៊ីតស៊ូណូរី អូណូដេរ៉ាបានសម្តែងក្តីបារម្ភចំពោះស្ថានការណ៍នៅកូរ៉េខាងជើង បន្ទាប់ពីមានការបណ្តេញមនុស្សខ្លំាងទី២ របស់របបកុម្មុយនិស្តចេញពីអំណាច។ លោករដ្ឋមន្រ្តីក្រសួងការពារជាតិជប៉ុនបានពិពណ៌នាថា រូបភាពនៃការចាប់គ្រាកលោកចាង សុងថេក ចេញពីកៅអីសភាបានធ្វើឲ្យគេនឹកឃើញដល់ឆាកនៃការធ្វើបដិវត្តន៍វប្បធម៌នៅក្នុងប្រទេសចិន។ លោកអ៊ីតស៊ូណូរី អូណូដេរ៉ាបានបន្ថែមថា នេះពិតជារូបភាពមួយដែលអាចនឹងបញ្ឆះឲ្យមានបដិវត្តន៍ទូទៅមួយនៅកូរ៉េខាងជើង និងថា នេះពិតជារឿងមួយដែលលោកកំពុងព្រួយបារម្ភខ្លំាង។
គួរជម្រាបជូនថាកាលពីថ្ងៃចន្ទដើមសប្តាហ៍នេះ របបក្រុងព្យុងយ៉ាងបានផ្សព្វផ្សាយជាផ្លូវការនូវព័ត៌មានស្តីពីការបណ្តេញលោកចាង សុងថេកចេញពីអំណាច។ លោកចាង សុងថេកដែលត្រូវជាឱពុក មា របស់អគ្គមគ្គទេសន៍គីម ជុងអ៊ុននិងត្រូវបានគេចាត់ទុកជាមនុស្សខ្លំាងទី២ នៅក្នុងរបបកុម្មុយនិស្តសព្វថ្ងៃ។
និយាយពីកូរ៉េខាងជើង និងជប៉ុនវិញ ប្រទេសជិតខាងទំាងពីរនេះមិនត្រឹមតែគ្មានទំនាក់ទំនងការទូតរវាងគ្នាប៉ុណ្ណោះទេ តែថែមទំាងមានភាពតានតឹងរវាងគ្នាទៀតផង ពិសេសទាក់ទងនឹងរឿងចំណាប់ខ្មំាងជប៉ុនក្នុងទសវត្សឆ្នំា ៧០ និង ៨០។ ក្រុងតូក្យូបានចោទក្រុងព្យុងយ៉ាងពីបទមិនបានបំភ្លឺឲ្យបានច្បាស់លាស់ជុំវិញជោគវាសនារបស់ចំណាប់ខ្មំាងជប៉ុនដែលនៅសេសសល់។ តែក្រុងព្យុងយ៉ាងធ្លាប់បានពន្យល់ថា រឿងនោះត្រូវបានដោះស្រាយតំាងពីឆ្នំា ២០០០ ជាមួយនឹងការបញ្ជូនឲ្យជប៉ុនវិញនូវរូបចំណាប់ខ្មំាងមួយចំនួន និងថា អ្នកដែលនៅសេសសល់បានបាត់បង់ជីវិតអស់ទៅហើយ។
ទន្ទឹមគ្នានេះ ភាពតានតឹងរវាងជប៉ុន និងកូរ៉េខាងជើងក៏បានកើតចេញពីការទាមទាររបស់ក្រុងតូក្យូឲ្យក្រុងព្យុងយ៉ាងបោះបង់ចោលកម្មវិធីនុយក្លេអ៊ែរ និងការផលិតគ្រាប់កំាជ្រួចមីស៊ីល។ កាលពីខែមេសាកន្លងទៅ កូរ៉េខាងជើងបានគំរាមវាយប្រហារជប៉ុនដោយប្រើនុយក្លេអ៊ែរ ប្រសិនបើជប៉ុនចូលលូកលាន់ក្នុងជម្លោះនៅឧបទ្វីបកូរ៉េនោះ។ ការគំរាមពេលនោះបានកើតមានឡើង បន្ទាប់ពីលោករដ្ឋមន្រ្តីការពារជាតិជប៉ុនបានបញ្ជាឲ្យទ័ពជប៉ុនបាញ់កម្ទេចគ្រាប់មីស៊ីលកូរ៉េខាងជើងទំាងអស់ដែលគំរាមអធិបតេយ្យភាពរបស់ជប៉ុន។ តែស្រាប់នៅមួយខែក្រោយមក លោកនាយករដ្ឋមន្រ្តីជប៉ុនស៊ីនហ្សូ អាបេបានប្រកាសឲ្យដឹងថា លោកត្រៀមខ្លួនដើម្បីបើកជំនួបកំពូលជាមួយលោកគីម ជុងអ៊ុនក្រោមលក្ខខណ្ឌមួយចំនួន។ តែមកទល់ពេលនេះ នៅមិនទាន់មានជំនួបណាមួយនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ