អគ្គមគ្គទេសន៍គីម ជុងអ៊ុនបានកំចាត់ឱពុក មាខ្លួនឯងចេញពីអំណាច
នៅប្រទេសកូរ៉េខាងជើង បន្ទាប់ពីមានលេចឡើងនូវពាក្យចចាមអារ៉ាមមក របបក្រុងព្យុងយ៉ាងបានបញ្ជាក់ជាផ្លូវការនៅថ្ងៃចន្ទ ទី៩ ធ្នូនេះ ពីការដកលោកចាង សុងថេក និងក្រុមបក្សមួយចំនួនរបស់លោកចេញពីអំណាច។ លោកយ៉ាង សុងថេក គឺជាឱពុក មារបស់អគ្គមគ្គទេសន៍គីម ជុងអ៊ុននិងជាមនុស្សខ្លំាងលំដាប់ទី២ នៅក្នុងរបបកុម្មុយនិស្តកូរ៉េខាងជើងសព្វថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
រហូតមកពេលនេះ លោកចាង សុងថេកដែលជាឱពុក មា របស់អគ្គមគ្គទេសន៍គីម ជុងអ៊ុនត្រូវបានគេចាត់ទុកជាឥស្សរជននយោបាយកំពូលទី២ នៅក្នុងរបបក្រុងព្យុងយ៉ាងសព្វថ្ងៃ។ តែស្រាប់នៅក្នុងកិច្ចប្រជុំរបស់ការិយាល័យនយោបាយមជ្ឈិមបក្សនៃគណបក្សពលករនាថ្ងៃអាទិត្យ ទី៨ ធ្នូ អគ្គមគ្គទេសន៍គីម ជុងអ៊ុនបែរជាបានសម្រេចចិត្តដកតំណែងឱពុក មា ខ្លួន ព្រមទំាងមនុស្សជំនិតរបស់លោកចាង សុងថេកមួយចំនួនទៅវិញ។ តើនេះ មិនមែនជាទង្វើកំចាត់ដង្កូវស៊ីសាច់ឯងទេ ឬយ៉ាងណា?
យោងតាមព័ត៌មានចុះផ្សាយដោយសារព័ត៌មានផ្លូវការកូរ៉េខាងជើង KCNA ឲ្យដឹងថា ការដែលលោកគីម ជុងអ៊ុនបានបណ្តេញឱពុក មា ខ្លួនឯងចេញពីអំណាចនោះ មិនមែនដោយសារបញ្ហាបុគ្គល ឬគ្រួសារទេ តែមកពីលោកចាង សុងថេកបានប្រព្រឹត្តិនូវកំហុសឆ្គងមួយចំនួនដែលមិនអាចអត់អោនឲ្យបាន។ កំហុសឆ្គងទំាងនោះរួមមាន ការគ្រប់គ្រងប្រព័ន្ធហិរញ្ញវត្ថុជាតិមិនបានល្អ ប្រព្រឹត្តិអំពើពុករលួយ ស៊ីសំណូកសូកប៉ាន់ ផឹកស៊ី ស្រីញី អូនបង សេពគ្រឿងញាន និងបានរៀបចំជីវិតរស់នៅតាមបែបប្រទេសលោកខាងលិច។ ម្យ៉ាងទៀត និងបើយោងតាមសារព័ត៌មាន KCNA ដដែល លោកយ៉ាង សុងថេប គឺជាមនុស្សតែមួយ មានមុខពីរ នៅពីមុខ លោកបានសម្តែងជាអ្នកគំាទ្រគណបក្ស និងការពារអំណាចរបស់ក្មួយប្រុស តែនៅពីក្រោយ លោកបានព្យាយាមដើម្បីក្រសោបយកអំណាច។
គួរជម្រាបជូនថា នៅក្រោមការគ្រប់គ្រងរបស់ឱពុកលោកគីម ជុនអ៊ុន គឺលោកគីម ជុងអ៊ីល លោកចាង សុងថេកក៏ធ្លាប់បានលោកគីម ជុងអ៊ីលដកចេញពីតំណែងម្តងហើយក្នុងឆ្នំា ២០០៤ មុននឹងហៅឲ្យត្រឡប់វិញ នៅ២ឆ្នំាក្រោយមក គឺឆ្នំា ២០០៦។ នៅក្រោយមរណៈភាពរបស់លោកគីម ជុងអ៊ីលក្នុងខែធ្នូ ឆ្នំា ២០១១ លោកចាង សុងថេកបានដើរតួនាទីស្នូលក្នុងការផ្ទេរអំណាចពីលោកគីម ជុងអ៊ីល ទៅឲ្យលោកគីម ជុងអ៊ុន។ គឺចាប់តំាងពីពេលនោះឯងដែលលោកចាង សុងថេកបានផ្តើមពង្រឹងអំណាចផ្ទាល់ខ្លួនបន្តិចម្តងៗ។
គឺមហិច្ឆតាអំណាចប្រកបដោយគ្រោះថ្នាក់របស់លោកចាង សុងថេកនោះឯង ដែលបានជម្រុញឲ្យក្រុមទីប្រឹក្សា និងក្រុមជំនួយការវ័យក្មេងរបស់លោកគីម ជុងអ៊ុនផ្តល់ដំបូលន្មានឲ្យបណ្តេញលោកចាង សុងថេកចេញពីអំណាច។ តើទង្វើរបស់លោកគីម ជុងអ៊ុនពេលនេះ មិនមែនជារឿងគ្រោះថ្នាក់សម្រាប់រូបលោកផ្ទាល់ខ្លួនទៅវិញទេ ឬយ៉ាងណា?
ក្រុមអ្នកវិភាគខ្លះយល់ថា វាអាចជាគ្រោះថ្នាក់សម្រាប់រូបលោកគីម ជុងអ៊ុន ពិសេសអំណាចរបស់លោកតែម្តង ព្រោះថាចង់ ឬមិនចង់មកទល់ពេលនេះ លោកចាង សុងថេកដែលមានវ័យចំណាស់ជាង និងមានបទពិសោធន៍នយោបាយឆ្អិនជាង គឺជាជន្ទល់មួយយ៉ាងមំាសម្រាប់ទ្រលោកក្មួយគីម ជុងអ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ