លោកអូបាម៉ាទទួលជួបលោកត្រាំ ដើម្បីរៀបចំអន្តរកាលនយោបាយ
ចុះផ្សាយនៅថ្ងៃ៖
ស្តាប់ - ០៥:៣៧
ថ្ងៃព្រហស្បតិ៍នេះ ប្រធានាធិបតីផុតអាណត្តិអាមេរិក អូបាម៉ា ទទួលជួបដូណាល់ ត្រាំ និងភរិយា នៅសេតវិមាន ដើម្បីពិភាក្សាពិការរៀបចំអន្តរកាលនយោបាយ។ លោកស្រីមេឡានៀ នឹងក្លាយជាស្ត្រីទី១ បន្តពីភរិយាលោកអូបាម៉ា។
ខាងបេក្ខនារីចាញ់ឆ្នោត ហ៊ីលឡារី គ្លីនតុន វិញ ម្សិលមិញ បានថ្លែងសន្ទករថា សុំអោយអ្នកគាំទ្របក្សប្រជាធិបតេយ្យទទួលស្គាល់បរាជ័យ ក្នុងការបោះឆ្នោត។ លោកស្រីគ្លីនតុន ថែមទាំងបង្ហាញបំណងចង់ធ្វើការជាមួយលោកត្រាំទៀតផង។ នៅតាមទីក្រុងជាច្រើន នៅសហរដ្ឋអាមេរិក ប្រជាជនរាប់ពាន់នាក់ បាននាំគ្នាបាតុកម្មប្រឆាំងនឹងលោកដូណាល់ ត្រាំ។
មុននេះប៉ុន្មានថ្ងៃ គ្មានអ្នកណាគិតថា លោកអូបាម៉ាអាចនឹងទទួលជួបលោកត្រាំទេ
អ្នកណាក៏បានមើលឃើញដែរពីបុគ្គលិកលក្ខណៈរបស់លោកត្រាំ ថាលោកត្រាំជាមនុស្សកាច និងច្រងេងច្រងាង មានចរឹតរាងជម្លើយបន្តិច ថែមទាំងមានរឿងអាស្រូវបំពានភេទស្រីៗជាដើម។ ទាក់ទងរឿងផ្ទាល់ខ្លួនជាមួយលោកអូបាម៉ា លោកត្រាំធ្លាប់សង្ស័យថា លោកអូបាម៉ាមិនបានកើតក្នុងទឹកដីអាមេរិក ដែលជាលក្ខខណ្ឌដើម្បីកាន់អំណាចប្រធានាធិបតី ទៀតផង។
ទោះយ៉ាងនេះក្តី ក្នុងនាមជាប្រធានាធិបតីអាមេរិក លោកអូបាម៉ាត្រូវតែបំភ្លេចរឿងផ្ទាល់ខ្លួន ត្រូវតែគោរពការចង់បានរបស់ពលរដ្ឋដែលបានបោះឆ្នោតអោយលោកត្រាំ ឡើងបន្តអំណាចពីលោក។ ក្រោយដូណាល់ ត្រាំ ជាប់ឆ្នោត លោកអូបាម៉ាក៏បានអបអរលោកត្រាំដែរ។
រឿងអាស្រូវបុគ្គលិកលក្ខណៈផ្ទាល់ខ្លួន របស់លោកត្រាំ ជារឿងបុគ្គល ជារឿងអតីតកាលរបស់លោកត្រាំ។ គេមិនត្រូវយកវាមកលាយឡំជាមួយកិច្ចការដឹកនាំប្រទេសទេ។ ក្នុងការឃោសនាកន្លងមក បក្សប្រជាធិបតេយ្យបានវាយប្រហារលោកត្រាំ ទាក់ទងរឿងផ្ទាល់ខ្លួន តែក៏នៅតែមិនអាចធ្វើអោយលោកត្រាំ បរាជ័យ។ ដូច្នេះ យុទ្ធសាស្ត្រនេះគ្មានប្រយោជន៍អ្វិសម្រាប់បក្សប្រជាធិបតេយ្យតទៅទៀតទេ។ ប្រជាជនអាមេរិកចង់បានការផ្លាស់ប្តូរ។
ដូច្នេះ គ្រប់អ្នកនយោបាយពេលនេះ ត្រូវតែសម្លឹងមើលអនាគត ពេលលោកត្រាំត្រូវកាន់អំណាចវិញប្រសើរជាង។ លោកត្រាំគ្មានបទពិសោធន៍នយោបាយបន្តិចណាឡើយ។ បកុ្សប្រជាធិបតេយ្យ ក៏ដូចជាលោកអូបាម៉ា មានតែត្រូវផ្តល់យោបល់យ៉ាងណា ដើម្បីអាចអោយលោកត្រាំក្លាយជាប្រធានាធិបតីដ៏ល្អម្នាក់ ដើម្បីបន្តដោះស្រាយបញ្ហាជាតិតែប៉ុណ្ណោះ។ គេក៏ត្រូវគិតដល់ចំណុចល្អរបស់លោកត្រាំដែរ ព្រោះអ្នកណាក៏មានចំណុចល្អរបស់គេដែរ។ ជាក់ស្តែង មុនជាប់ឆ្នោត លោកត្រាំបានប្តេជ្ញាចិត្តមុតមាំ ថានឹងធ្វើជាប្រធានាធិបតីរបស់ពលរដ្ឋអាមេរិកគ្រប់រូប។
មិនខ្វះទេ អ្នកមានបទពិសោធន៍នយោបាយ ដែលចង់ធ្វើការអោយលោកត្រាំ
លោកត្រាំគ្មានបទពិសោធន៍នយោបាយសោះ ដូច្នេះ លោកត្រូវចាប់ផ្តើមពីចំណុចសូន្យទៅ។ ខុសពីលោកស្រីគ្លីនតុន ដែលបានត្រៀមរៀបចំក្រុមការងាររដ្ឋាភិបាលរួចស្រេចហើយនោះ លោកត្រាំមិនបានត្រៀមអ្វីធុំដុំទេ។ លោកមិនបានរៀបចំក្រុមការងារផ្នែកទំនាក់ទំនងអន្តរជាតិ រឺក្រុមជំនាញយោធាអ្វីទេ ព្រោះលោកប្រហែលមិនបានគិតពីមុនមកទេ ថាលោកអាចជាប់ឆ្នោត។
ក្នុងការឃោសនាកន្លងមក លោកគ្រាន់តែបានបង្ហាញឈ្មោះអ្នកគាំទ្រលោកមួយចំនួនប៉ុណ្ណោះ មានដូចជា អតីតចៅហ្វាយក្រុងញូវយក លោកហ្គូល្យានី ជាដើម។ ទោះយ៉ាងនេះក្តី ពេលនេះ អ្នកដែលត្រូវធ្វើជាអនុប្រធានាធិបតី គឺលោក ម៉ែក ផិន Mike Pence អាយុ៥៧ឆ្នាំ ជាតំណាងរាស្រ្តបក្សសាធារណរដ្ឋ។
លោកផិន មានទេពកោសល្យផ្នែកទំនាក់ទំនង។ លោកជាអ្នកអភិរក្ស គាំទ្រប្រពៃណីគ្រួសារ។ លោកជាអ្នកប្រឆាំងការរំលូតកូន និងអាពាហ៍ពិពាហ៍អ្នកស្រលាញ់ភេទដូចគ្នា។ ពីមុនមក លោកមិនមែនជាអ្នកជំនិតលោកត្រាំទេ។ លោកម៉ែក ផិន មិនពេញចិត្តគំនិតលោកត្រាំដែលចង់ដាក់នយោបាយប្រឆាំងភេរវកម្ម ដោយហាមឃាត់អ្នកកាន់សាសនាអ៊ីស្លាមចូលដែនដីអាមេរិក។
ដោយលោកត្រាំខ្វះបទពិសោធន៍នយោបាយ មិនខ្វះទេ អ្នកដែលចង់ចូលធ្វើការជាមួយលោកដូណាល់ ត្រាំ មានទាំងអ្នកមកពីបក្សប្រជាធិបតេយ្យដែលចាញ់ឆ្នោតផងដែរ ទោះជាពីមុនមក អ្នកទាំងនោះស្អប់លោកត្រាំក៏ដោយ។ ក្នុងនោះមានដូចជា លោកប៊ែរនី សាន់ដឺ សកម្មជនសំខាន់ដែលធ្លាប់ប្រជែងជាមួយលោកស្រីគ្លីនតុន ធ្វើជាបេក្ខជនឈរឈ្មោះអោយបក្សប្រជាធិបតេយ្យ។ សូម្បីលោកស្រីហ៊ីលឡារី គ្លីនតុន ចាញ់ឆ្នោតទៅហើយ ក៏នៅស្រមៃចង់បន្តកិច្ចការនយោបាយជាមួយលោកត្រាំដែរ។ លោកស្រី បានស្នើខ្លួនធ្វើការជាមួយលោកត្រាំទៀតផង។
លោកស្រីគ្លីនតុន៖លទ្ធផលឆ្នោតខុសពីការព្យាករណ៍ទុក សបង្ហាញពីការបែកបាក់រវាងពលរដ្ឋអាមេរិក
លោកស្រី គ្លីនតុន បានខំទប់ចិត្ត និយាយជំរុញអោយអ្នកគាំទ្រលោកស្រី អោយបក្សប្រជាធិបតេយ្យ ព្រមទទួលស្គាល់បរាជ័យ។ ការស្ទាបស្ទង់មតិដែលបង្ហាញថា លោកស្រីនាំំមុខ តែទីបំផុតលោកស្រីបែរជាត្រូវបាក់មុខ ចាញ់ឆ្នោត ចាញ់លោកត្រាំ ដែលលោកស្រីធ្លាប់វាយប្រហារធ្ងន់ៗមិនប្រណីមាត់ទៅវិញ។
ហ៊ីលឡារីធ្លាប់តែទុកចិត្តថា ប្រជាជនដើមកំណើតអាមេរិកឡាទីន អាចបោះឆ្នោតអោយលោកស្រី ព្រោះលោកត្រាំ ជាអ្នកប្រឆាំងនឹងជនអន្តោប្រវេសន៍មានដើមកំណើតនៅអាមេរិកឡាទីន- ព្រោះលោកត្រាំ ធ្លាប់ប្រកាសសង់ជញ្ជាំងព្រំដែននៅម៉ិចស៊ិក។ តែប្រជាជនដើមកំណើតអាមេរិកឡាទីនទាំងនេះ មានរហូតដល់២៩ភាគរយ បែរជាបោះឆ្នោតអោយដូណាល់ ត្រាំទៅវិញ។ វាជាបរាជ័យដែលលោកស្រីគ្លីនតុនពិបាកទទួលយកណាស់។
លោកស្រីវាយតម្លៃថា លទ្ធផលឆ្នោត ដែលខុសពីការព្យាករណ៍ទុកនោះ សបង្ហាញថា ពលរដ្ឋអាមេរិកបានបែកបាក់គ្នា។ យើងឃើញថា លោកត្រាំជាប់ឆ្នោតមែន តែក៏មានប្រជាជនរាប់ពាន់នាក់ បានចុះបាតុកម្មនៅទូទាំងសហរដ្ឋអាមេរិកប្រឆាំងលោកដែរ។ វាពិតជាបង្ហាញថា ប្រជាជនអាមេរិកបែកបាក់គ្នាមែនហើយ។
លោកស្រី គ្លីនតុន និងលោកអូបាម៉ា បានរំលឹកពលរដ្ឋគ្រប់រូបឡើងវិញ ពីគោលការណ៍នៃការរួបរួមជាតិ ពីគោលការណ៍ផ្សះផ្សាគ្នា សម្រាប់ពេលតទៅមុខនេះ។
គួរបញ្ជាក់ដែរថា អ្នកបោះអោយត្រាំ ច្រើនតែជាជនជាតិស្បែកស ជាបុរសៗ ជាអ្នកមិនសូវជាបានរៀនសូត្រខ្ពង់ខ្ពស់ ដល់កម្រិតមហាវិទ្យាល័យ។ ពួកគេពិតជាពិបាកនឹងទុកចិត្តអ្នកដែលរៀនចេះដឹងដូចលោកស្រីគ្លីនតុនណាស់។
ក្នុងចំណោមអ្នកបោះឆ្នោតជនជាតិស្បែកសដែលមានអត្រា៧០ភាគរយ មាន៥៨ភាគរយគាំទ្រលោកដូណាល់ ហើយ៣៧ភាគរយបោះឆ្នោតអោយលោកស្រីហ៊ីលឡារី។ ចំណែកអ្នកមិនពេញចិត្តទាំងលោកត្រាំ ទាំងលោកស្រីគ្លីនតុន វិញ ទីបំផុត ១៨ភាគរយ បានសម្រេចបោះឆ្នោតអោយលោកត្រាំ។ នេះក៏ប្រហែលជាពួកគេចង់បានការផ្លាស់ប្តូរក្នុងប្រទេសដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ