កម្ពុជា-កូរ៉េ បង្កើនមិត្តភាព តាមរយៈការជួបជុំ សកម្មភាពកីឡា និងវប្បធម៌
ស្ថានទូតកូរ៉េ ប្រចាំកម្ពុជា បានរៀបចំពិធីជួបជុំ ជាលើកដំបូង រវាងពលរដ្ឋកម្ពុជា និងពលរដ្ឋកូរ៉េ ដែលបំរើការងារក្នុងក្រុមហ៊ុនសហគ្រាសកូរ៉េ នៅកម្ពុជា។ ដើម្បីបង្កើនមិត្តភាពរវាងប្រជាជាតិទាំងពីរ ការជួបជុំរយៈពេលពេញមួយថ្ងៃ នៅថ្ងៃសៅរ៍ ទី១៨តុលានេះ នៅស្តាតអូឡាំពិក ក្នុងរាជធានីភ្នំពេញ មានសកម្មភាពកីឡាជាច្រើន ដូចជា ការប្រកួតបាល់ទះ និងរត់បណ្តាក់ រួមទាំងសកម្មភាពវប្បធម៌ របាំ និងការបង្ហាញសំលៀកបំពាក់ប្រពៃណីកម្ពុជា និងកូរ៉េ។
ចុះផ្សាយនៅថ្ងៃ៖
ស្តាប់ - ០២:១៦
កម្មវិធីចិត្តតែមួយ “One Mind Festival” ត្រូវបានស្ថានទូតកូរ៉េប្រចាំកម្ពុជា រៀបចំឡើង ដើម្បីផ្តល់ឱកាសដល់ប្រជាជនខ្មែរ និងប្រជាជនកូរ៉េ បានស្វែងយល់គ្នាទៅវិញទៅមក កាន់តែស៊ីជំរៅ និងដើម្បីឈានទៅរកមិត្តភាព ដែលពិតប្រាកដ។
កម្មវិធីជួបជុំ នៅស្តាតអូឡាំពិក រយៈពេលពេញមួយថ្ងៃ នៅថ្ងៃសៅរ៍នេះ មានការចូលរួមពីមន្ត្រីរដ្ឋាភិបាលកម្ពុជា និងកូរ៉េ ក្រុមហ៊ុនសហគ្រាសកូរ៉េប្រចាំកម្ពុជា និងបុគ្គលិកជាពលរដ្ឋខ្មែរ។ សកម្មភាពកីឡាជាច្រើន ត្រូវបានធ្វើឡើង ដូចជាការប្រកួតកាយសម្បទា បាល់ទះ បាល់ទាត់ និងរត់បណ្តាក់គ្នា ជាដើម។ សំណួរអំពីកូរ៉េ រួមទាំងការបង្ហាញរបាំប្រពៃណីខ្មែរ កូរ៉េ និងសម្លៀកបំពាក់ប្រពៃណីរវាងប្រទេសទាំងពីរ ក៏ត្រូវបានធ្វើឡើងផងដែរ។
លោក គីម ហាន់ស៊ូ ឯកអគ្គរដ្ឋទូតកូរ៉េ ប្រចាំកម្ពុជា បានលើកឡើងក្នុងពេលបើកកម្មវិធីជួបជុំ នៅព្រឹកថ្ងៃសៅរ៍នេះថា កម្ពុជា និងសាធារណរដ្ឋកូរ៉េ ឬប្រទេសកូរ៉េខាងត្បូង បានភ្ជាប់ទំនាក់ទំនងការទូតនឹងគ្នាឡើងវិញ កាលពីឆ្នាំ១៩៩៧។ ទំហំពាណិជ្ជកម្មរវាងប្រទេសទាំងពីរ មានចំនួន ៧៥០ លានដុល្លារ នៅឆ្នាំ២០១៣។ រីឯចំនួនអ្នកទេសចរកូរ៉េ ចូលមកកម្ពុជា នៅឆ្នាំ២០១៣ មានចំនួន ៤៣ ម៉ឺននាក់។
តាមលោកឯកអគ្គរដ្ឋទូត បច្ចុប្បន្ន ពលរដ្ឋកូរ៉េ ដែលកំពុងស្នាក់នៅប្រទេសកម្ពុជា មានចំនួនប្រហែលជាង ៨ ពាន់នាក់។ ចំណែកពលរដ្ឋខ្មែរ ដែលកំពុងរស់នៅប្រទេសកូរ៉េវិញ មានចំនួនប្រហែល ១ម៉ឺន ២ ពាន់នាក់។ ម្យ៉ាងទៀត ក្រុមហ៊ុនរោងចក្រកូរ៉េ ដែលកំពុងដំណើរការនៅកម្ពុជា បានស្រូបយកប្រជាជនខ្មែរឲ្យធ្វើការរាប់ម៉ឺននាក់។
ចំណែកលោកអ៊ិតសំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានកត់សម្គាល់ពីកំណើនអ្នកទេសចរកូរ៉េ ពាណិជ្ជកម្ម និងវិនិយោគកូរ៉េ នៅកម្ពុជា ដែលបានកើនឡើងពីមួយឆ្នាំទៅមួយឆ្នាំ។ ជាពិសេសលោករដ្ឋមន្ត្រី លើកឡើងថា នៅកម្ពុជាមានប្រជាជនខ្មែរធ្វើការនៅតាមក្រុមហ៊ុន និងរោងចក្រកូរ៉េជាច្រើន ហេតុនេះ នាំឲ្យការប្រាស្រ័យទាក់ទងគ្នា គឺជាកត្តាមួយចាំបាច់។
លោករដ្ឋមន្ត្រី ក៏បានបន្តលើកទឹកចិត្តឲ្យក្រុមហ៊ុនរោងចក្រសហគ្រាសកូរ៉េ បន្តអនុវត្តច្បាប់ស្តីពីការការងារ និងបទដ្ឋានការងារ ឲ្យបានល្អបន្ថែមទៀត ដើម្បីលើកកម្ពស់នូវលក្ខខណ្ឌការងារ ក្នុងភាពសុខដុមរមនាក្នុងទំនាក់ទំនងវិជ្ជាជីវៈនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ