គណបក្សកាន់អំណាចចាញ់ឆ្នោតនៅអូស្រ្តាលី
ចុះផ្សាយនៅថ្ងៃ៖
ស្តាប់ - ០៥:៥២
ការបោះឆ្នោតជាតិនៅអូស្រ្តាលីបានបិទបញ្ចប់ ហើយលទ្ធផលបឋមបង្ហាញថា គណបក្សអភិរក្សនិយម ដែលជាបក្សប្រឆាំង បានទទួលជោគជ័យ ទៅលើគណបក្សរបស់លោកនាយករដ្ឋមន្រ្តី Kevin Rudd។ ក្រោយពីបានកាន់អំណាចរយៈពេល ៦ឆ្នាំ និងប្រឈមមុខនឹងជម្លោះដណ្តើមអំណាចនៅក្នុងបក្ស គណបក្សពលករអូស្រ្តាលីត្រូវរបូតអំណាចចេញពីដៃវិញ។
សំណួរ-ជាដំបូង យើងចង់ធ្វើការចាប់អារម្មណ៍បន្តិចលើអត្រាអ្នកចូលរួមបោះឆ្នោត ពីព្រោះ យើងសង្កេតឃើញថា តាំងពីដើមមក អត្រាអ្នកចេញទៅបោះឆ្នោតនៅអូស្ត្រាលីមានមិនដែលក្រោម ៩០%ទេ ដែលនេះជាអត្រាខ្ពស់បំផុត ជាពិសេស បើធៀបនឹងបណ្តាប្រទេសប្រជាធិបតេយ្យផ្សេងទៀត។ តើហេតុអ្វីបានជាពលរដ្ឋអូស្រ្តាលីតែងតែនាំគ្នាចេញទៅបោះឆ្នោត ក្នុងអត្រាខ្ពស់បែបនេះ?
តាមពិត មូលហេតុងាយយល់ទេ គឺដោយសារតែនៅអូស្រ្តាលី ការចេញទៅបោះឆ្នោតមិនមែនត្រឹមតែជាសិទ្ធិទេ ប៉ុន្តែ វាជាកាតព្វកិច្ចដែលត្រូវតែបំពេញ។ ច្បាប់អូស្រ្តាលី កំណត់ថា ពលរដ្ឋ ដែលមានអាយុចាប់ពី ១៨ឆ្នាំឡើងទៅ មានកាត្វកិច្ចត្រូវតែទៅចុះឈ្មោះបោះឆ្នោត និងចេញទៅបោះឆ្នោត។ អ្នកណាដែលមិនចេញទៅបោះឆ្នោត ដោយគ្មានមូលហេតុត្រឹមត្រូវ នឹងត្រូវទទួលការផាកពិន័យជាប្រាក់ ២០ដុល្លារអូស្រ្តាលី (ប្រហែល ១៨ដុល្លារអាមេរិក)។
ដូច្នេះហើយបានជាអត្រាអ្នកចេញទៅបោះឆ្នោត នៅអូស្រ្តាលីតែងតែមានកម្រិតខ្ពស់។
សំណួរ-តើការកំណត់ឲ្យពលរដ្ឋត្រូវតែចេញទៅបោះឆ្នោតនេះ មាននៅប្រទេសណាផ្សេងទៀត ឬក៏មានតែនៅក្នុងប្រទេសអូស្រ្តាលីមួយទេ?
បើគិតមកទល់នឹងសព្វថ្ងៃនេះ យើងឃើញថា នៅទូទាំងពិភពលោក មានប្រទេសទាំងអស់ជាង ២០ ដែលមានច្បាប់កំណត់ឲ្យពលរដ្ឋត្រូវតែចេញទៅបោះឆ្នោត ប៉ុន្តែ ក្នុងចំណោមប្រទេសទាំងអស់នេះ មានជាងពាក់កណ្តាល ដែលគេលែងអនុវត្តច្បាប់នេះទៀតហើយ។ មានន័យថា កាតព្វកិច្ចចេញទៅបោះឆ្នោត នៅតែមានចែងក្នុងច្បាប់ ក៏ប៉ុន្តែ បើពលរដ្ឋណាមិនទៅបោះឆ្នោត ក៏អាជ្ញាធរមិនរករឿងអ្វីដែរ។
សព្វថ្ងៃនេះ ប្រទេសដែលនៅបន្តអនុវត្តច្បាប់ស្តីពីការកំណត់កាតព្វកិច្ចឲ្យពលរដ្ឋចេញទៅបោះឆ្នោត ក្រៅពីអូស្រ្តាលី នៅមានប្រទេសមួយចំនួនផ្សេងទៀត ដូចជា សិង្ហបុរី ប្រេស៊ីល អាហ្សង់ទីន ជាដើម។ គិតជាសរុបទាំងអស់ មាន ១០ប្រទេស នៅទូទាំងពិភពលោក។
សំណួរ-ធម្មតាសិទ្ធិបោះឆ្នោត គឺជាសិទ្ធិជាមូលដ្ឋាន ក្នុងរបបប្រជាធិបតេយ្យ។ ក៏ប៉ុន្តែ បើបង្ខំឲ្យប្រជាជនចេញទៅបោះឆ្នោត តើវាមិនជាការផ្ទុយនឹងគោលការណ៍ប្រជាធិបតេយ្យទៅវិញទេឬ?
ចំពោះរឿងនេះ គេឃើញមានទឡ្ហីករណ៍ខុសៗគ្នា។ អ្នកដែលប្រឆាំងនឹងការបង្កើតច្បាប់បង្ខំឲ្យពលរដ្ឋចេញទៅបោះឆ្នោត គេយល់ថា នេះគឺជាការធ្វើផ្ទុយនឹងគោលការណ៍ប្រជាធិបតេយ្យ គឺជាការរំលោភលើសិទ្ធិសេរីភាពរបស់ប្រជាជន។ ក៏ប៉ុន្តែ មានអ្នកខ្លះទៀត គេយល់ថា វាជារឿងល្អ ពីព្រោះ វាជំរុញឲ្យពលរដ្ឋចូលរួមក្នុងជីវិតនយោបាយរបស់ប្រទេសជាតិ ហើយជាពិសេស កាលណាអ្នកចេញទៅបោះឆ្នោតមានអត្រាកាន់តែខ្ពស់ វាធ្វើឲ្យសភា និងរដ្ឋាភិបាល ក៏កាន់តែមានភាពស្របច្បាប់។
ក៏ប៉ុន្តែ បើមើលទៅលើចំនួនប្រទេស ដែលនៅបន្តអនុវត្តច្បាប់បង្ខំពលរដ្ឋឲ្យចេញទៅបោះឆ្នោត សព្វថ្ងៃនេះ យើងអាចសន្និដ្ឋានបានថា មតិភាគច្រើនចង់ឲ្យការបោះឆ្នោតធ្វើឡើងទៅតាមគោលការណ៍ស្ម័គ្រចិត្ត។ ការបោះឆ្នោត គឺជាសិទ្ធិ ហើយមិនមែនជាកាតព្វកិច្ច។
សំណួរ-យើងត្រឡប់មកនិយាយពីលទ្ធផលបោះឆ្នោតវិញ។ តាមលទ្ធផលបឋម គឺគណបក្សប្រឆាំងរបស់លោក Tony Abott ជាអ្នកទទូលជោគជ័យ លើគណបក្សរបស់លោក Kevin Rudd ហើយជោគជ័យដោយទទួលបានសំឡេងយ៉ាងច្រើនលើសលុប។ យើងចាំបានថា កាលពី៦ឆ្នាំមុន លោក Kevin Rudd ធ្លាប់ជាអ្នកនយោបាយដ៏មានប្រជាប្រិយភាព ហើយបានទទួលជ័យជម្នះយ៉ាងសន្ធឹកសន្ធាប់ ក្នុងការបោះឆ្នោតជាតិ ឆ្នាំ២០០៧។ តើមានបញ្ហាអ្វី ក្នុងរយៈពេល ៦ឆ្នាំកន្លងទៅនេះ ដែលធ្វើឲ្យលោក Kevin Rudd ត្រូវទទួលបរាជ័យយ៉ាងជូរចត់ ក្នុងការបោះឆ្នោតថ្ងៃនេះ?
បើយើងពិនិត្យមើលជាទូទៅ ក្នុងរយៈពេលប៉ុន្មានឆ្នាំកន្លងទៅនេះ យើងឃើញថា នៅតាមប្រទេសប្រជាធិបតេយ្យ ហើយដែលមានសេដ្ឋកិច្ចជឿនលឿន គណបក្សកាន់អំណាចច្រើនតែធ្លាក់ប្រជាប្រិយភាព ក្នុងការបោះឆ្នោត ដោយសារតែមានវិបត្តិសេដ្ឋកិច្ច៖ សេដ្ឋកិច្ចគ្មានកំណើន ហើយជាពិសេស ប្រជាជនអត់ការងារធ្វើមានច្រើន។ ប្រជាជនក៏នាំគ្នាទម្លាក់ការទទួលខុសត្រូវទៅលើរដ្ឋាភិបាល ហើយនាំគ្នាចង់ផ្លាស់ប្តូរមេដឹកនាំ។
ប៉ុន្តែ នៅអូស្រ្តាលី យើងឃើញថា គណបក្សកាន់អំណាចរបស់លោក Kevin Rudd បានការចាត់ចែងបញ្ហាសេដ្ឋកិច្ចបានល្អគ្រាន់បើដែរ។ អត្រាកំណើនសេដ្ឋកិច្ច នៅត្រីមាសទី២ ឆ្នាំ២០១៣នេះ មានរហូតដល់ទៅ ២,៦%។ ទាបជាង ៣% ដែលជាអត្រាកំណើនជាមធ្យម ក្នុងរយៈពេលប៉ុន្មានឆ្នាំចុងក្រោយនេះ ក៏ប៉ុន្តែ វាជាអត្រាកំណើនសេដ្ឋកិច្ចមួយខ្ពស់ បើធៀបនឹងប្រទេសមហាអំណាចសេដ្ឋកិច្ចផ្សេងទៀត។ អត្រាអ្នកអត់ការងារធ្វើក៏ដូចគ្នា មានប្រហែលជា ៥,៥% ដែលជាអត្រាមួយខ្ពស់ តែបើធៀបនឹងប្រទេសមហាអំណាចសេដ្ឋកិច្ចផ្សេងទៀត ដូចជា អាមេរិក ដែលមានជាង ៧% ហើយតំបន់អឺរ៉ុប រហូតដល់ទៅ១២% យើងឃើញថា អត្រាអ្នកអត់ការងារធ្វើនៅអូស្រ្តាលី ក៏ហាក់ដូចជាមិនខ្ពស់ខ្លាំងប៉ុន្មានដែរ។
ដូច្នេះ បញ្ហាសេដ្ឋកិច្ច គួរតែមិនមែនជាមូលហេតុចម្បងនៃបរាជ័យរបស់លោក Kevin Rudd និងគណបក្សពលករអូស្រ្តាលីទេ។ មូលហេតុចម្បងជាងនេះទៅទៀត គឺជម្លោះផ្ទៃក្នុងបក្ស កាលពីប៉ុន្មានឆ្នាំចុងក្រោយនេះ រវាងក្រុមរបស់លោក Kevin Rudd និងក្រុមរបស់លោកស្រី Julia Gillard។ ដំបូង លោកស្រី Gillard រៀបចំបោះឆ្នោតដណ្តើមតំណែងជាប្រធានបក្ស និងតំណែងនាយករដ្ឋមន្រ្តីពីលោក Kevin Rudd។ ក្រោយមកទៀត ខាងក្រុមលោក Kevin Rudd មកទម្លាក់លោកស្រី Gillard ហើយដណ្តើមយកតំណែងនាយករដ្ឋមន្រ្តីវិញ។
ជម្លោះដណ្តើមអំណាចគ្នានៅផ្ទៃក្នុងគណបក្ស វាអាចធ្វើឲ្យប្រជាជនបាត់បង់ទំនុកចិត្តលើមេដឹកនាំបក្ស ក្នុងការគ្រប់គ្រងប្រទេសជាតិ។ ប្រជាជនអាចនាំគ្នាគិតថា បើត្រឹមតែនៅក្នុងបក្សគ្នាឯង គ្រប់គ្រងមិនបានល្អ ចុះទម្រាំប្រទេសជាតិទាំងមូល តើដឹកនាំម៉េចនឹងបាន?
ដូច្នេះហើយបានជា យើងឃើញថា គណបក្សប្រឆាំងបានយកជម្លោះផ្ទៃក្នុងបក្សនេះ មកធ្វើជាចំណុចចម្បងមួយ ដើម្បីវាយប្រហារលើគណបក្សពលករ របស់លោក Kevin Rudd កាលពីក្នុងអំឡុងយុទ្ធនាការឃោសនាបោះឆ្នោតកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ