តំបន់កាស្មៀរ ៖ ឥណ្ឌាចោទប៉ាគីស្ថានថារំលោភលើបទឈប់បាញ់
ការឆ្លើយឆ្លងគ្នាដោយគ្រាប់កាំភ្លើង រវាងទាហានឥណ្ឌា និងក្រុមឧទ្ទាមប៉ាគីស្ថាន នៅភាគខាងជើងក្រុងស្រីណាហ្គារ៍ ក្នុងតំបន់កាស្មៀរ កាលពីថ្ងៃសៅរ៍ម្សិលមិញ បានសម្លាប់ទាហានឥណ្ឌាម្នាក់។ ឥណ្ឌាបានចេញប្រតិកម្មថា នេះគឺជាការរំលោភលើបទឈប់បាញ់ពីសំណាក់ប៉ាគីស្ថាន ហើយថាការនេះ នឹងធ្វើឲ្យប្រទេសទាំងពីរ កាន់តែមើលមុខគ្នាលែងត្រង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
តំបន់កាស្មៀរ ភាគខាងជើងប្រទេសឥណ្ឌា តែងតែជាទីលានប្រយុទ្ធរវាងទាហានឥណ្ឌា ជាមួយនឹងទាហានប៉ាគីស្ថាន រឺក៏ក្រុមឧទ្ទាមដែលទាមទារឯករាជ្យនៅតំបន់នេះ។ ជាក់ស្តែងកាលពីថ្ងៃសៅរ៍ម្សិលមិញ មានការឆ្លើយឆ្លងទៅវិញទៅមក ដោយគ្រាប់កាំភ្លើង រវាងទាហានឥណ្ឌានិងក្រុមឧទ្ទាមទាមទារឯករាជ្យនៅតំបន់កាឡារ៉ូស ភាគពាយ័ព្យក្រុងស្រីណាហ្គារ៍ ដែលជាទីក្រុងធំរបស់រដ្ឋចាម្មុនិងកាស្មៀរ របស់ឥណ្ឌា។
តាមការរាយការណ៍របស់ នគរបាលឥណ្ឌា មានទាហានឥណ្ឌាម្នាក់បានស្លាប់ក្នុងហេតុការណ៍នេះ។ ដូចគ្នាដែរ កាលពីដើមសប្តាហ៍នេះ ក៍មានការបាញ់តបតគ្នាដែរ នៅតាមព្រំដែនរវាងទាហានប៉ាគីស្ថាននិងទាហានឥណ្ឌា ហើយបានបណ្តាលឲ្យទាហានឥណ្ឌាស្លាប់បីនាក់ និងមានសកម្មជនទាមទារឯករាជ្យ៥នាក់ស្លាប់ដែរ។
លោករដ្ឋមន្ត្រីក្រសួងការពារជាតិឥណ្ឌា បានថ្លែងថានេះ គឺជាការរំលោភបំពានយ៉ាងធ្ងន់ធ្ងរ ទៅលើបទឈប់បាញ់រវាងប្រទេសទាំងពីរ។ លោកថា ទង្វើនេះ គឺជាការអុជអាលបញ្ឆេះកំហឹង រវាងគ្នានឹងគ្នា ដែលប៉ាគីស្ថានបានបង្កឡើង។ ការនេះនឹងនាំឲ្យការចរចារកសន្តិភាពនៅតំបន់កាស្មៀរ វាងប្រទេសទាំងពីរ កាន់តែរាំងស្ទះតទៅទៀត។ គួររំលឹកផងដែរថា ឥណ្ឌាបានព្យួរទុកការចរចាមួយអន្លើ ដោយហេតុថា ឥណ្ឌាមិនពេញចិត្ត ដែលថ្នាក់ដឹកនាំប៉ាគីស្ថាន បានទៅជួបជាមួយមេក្រុមបះបោរទាមទារឯករាជ្យ នៅក្រុងញូដេលី។
សូមបញ្ជាក់ថា តំបន់កាស្មៀរដែលស្ថិតនៅចុងខាងជើងជួរភ្នំហិមាល័យ មានប្រជាជនរស់នៅប្រមាណជា១០លាននាក់ ដែលភាគច្រើនកាន់សាសនាអ៊ីស្លាម។ តំបន់នេះចែកជាបីផ្នែក មួយក្រោមការកាន់កាប់របស់ប៉ាគីស្ថាន មួយផ្នែករបស់ឥណ្ឌា និងមួយផ្នែកទៀតរបស់ចិន។ កន្លងមកមានការប្រយុទ្ធគ្នាទ្រង់ទ្រាយធំរវាង ប៉ាគីស្ថាន និងឥណ្ឌាចំនួនពីរលើក គឺនៅឆ្នំា១៩៤៧ និង ១៩៧១។ ប្រទេសទាំងពីរបានព្រមព្រៀងគ្នាចុះហត្ថលេខាលើសន្ធិសញ្ញា ស្ហីមឡា នៅខែកក្កដា ឆ្នាំ១៩៧២ ដើម្បីធ្វើការឈប់បាញ់។ ការប្រឈមមុខគ្នាថ្មីៗនៅថ្ងៃខាងមុខ រវាងប្រទេសទាំងពីរ អាចនឹងកាន់តែធ្ងន់ធ្ងរ ព្រោះថាទាំងឥណ្ឌា ទាំងប៉ាគីស្ថាន សុទ្ធសឹងតែមានអាវុធនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ