សង្ឃកាតូលិកបារាំង Georges Vandenbeusch ចំណាប់ខ្មាំងនៅអាហ្វ្រិក ត្រូវបានដោះលែង
នៅថ្ងៃអង្គារនេះ ប្រធានាធិបតីបារាំង ហ្វ្រង់ស៊័រ ហូឡង់ បានប្រកាសថា សង្ឃកាតូលិកបារាំង George Vandenbeusch ហ្ស៊ក វ៉ាន់ដិនបឺស្ហ ដែលក្រុមឧទ្ទាមអ៊ីស្លាម បូកូអារ៉ាំ ចាប់ជាចំណាប់ខ្មាំង នៅប្រទេសកាមេរូន កាលពីពាក់កណ្តាលខែវិច្ឆិកា កន្លងទៅ ត្រូវបានដោះលែងអោយមានសេរីភាពវិញហើយ។ ប្រមុខការទូតបារាំង ឡូរ៉ង់ ហ្វាប៊ីយុស ត្រូវទៅទទួលសង្ឃ Vandenbeusch នៅក្រុងយ៉ាអ៊ូនដេ ដើម្បីនាំរូបគាត់មកក្រុងប៉ារីសវិញ នៅយប់ថ្ងៃអង្គារនេះ។ ប្រធានាធិបតីបារាំងបានថ្លែងអំណរគុណប្រធានាធិបតីកាមេរូន ដែលបានជួយជ្រោមជ្រៃងអោយមានការដោះលែងសង្ឃបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២១
គួររំលឹកថា នៅយប់ថ្ងៃ១៣វិច្ឆិកា កន្លងទៅ សង្ឃកាតូលិកបារាំង George Vandenbeusch ហ្ស៊ក វ៉ាន់ដិនបឺស្ហ ជន្មាយុ៤២ព្រះវស្សា ត្រូវបានក្រុមឧទ្ទាមអ៊ីស្លាមនីហ្សេរីយ៉ា បូកូអារ៉ាំ ចាប់ជាចំណាប់ខ្មាំង នៅភាគខាងជើងប្រទេសកាមេរូន ជាប់ព្រំប្រទល់ជាមួយប្រទេសនីហ្សេរីយ៉ា។
សង្ឃ Vandenbeusch បានត្រូវដោះលែងអោយមានសេរីភាព នៅព្រឹកព្រលឹមថ្ងៃអង្គារនេះ។ ថ្ងៃអង្គារនេះ គេបានរកឃើញសង្ឃបារាំង នៅក្នុងទឹកដីកាមេរូន។ ប្រធានាធិបតីបារាំង ហ្វ្រង់ស៊័រ ហូឡង់ បានអរគុណដល់អាជ្ញាធរកាមេរូន និងអាជ្ញាធរនីហ្សេរីយ៉ា ពិសេសប្រធានាធិបតីកាមេរូន ប៉ូល ប៊ីយ៉ា តែម្តង ដែលបានខិតខំសំរេចអោយមានការដោះលែង សង្ឃ Vandenbeusch។
សង្ឃកាតូលិកបារាំង George Vandenbeusch បានបំរើការងារនៅវិហារ Nguetchewé ភាគខាងជើងកាមេរូន ចាប់ពីឆ្នាំ២០១១ម្ល៉េះ។ លោកតែងតែចុះទៅទេសនាទូន្មាន ជួយដល់តំបន់ឆ្ងាយៗ និងតំបន់ដែលមិនសូវសំបូរសន្តិសុខ។ លោកបានបំរើការងារជួយជាពិសេស ដល់ប្រជាជននីហ្សេរីយ៉ាប្រមាណមួយម៉ឺននាក់ ដែលបានភៀសខ្លួនមកកាមេរូន។
បុរីវ៉ាទីកង់ បានសំដែងការរីករាយចំពោះការដោះលែងសង្ឃកាតូលិកបារាំង នៅអាហ្វ្រិក និងបានអំពាវនាវអោយមានការបួងសួង ដើម្បីអោយចំណាប់ខ្មាំងផ្សេងទៀត នៅទូទាំងពិភពលោក បានទទួលសេរីភាពដូចគ្នាដែរ។
បច្ចុប្បន្ននេះ បារាំងនៅមានចំណាប់ខ្មាំងខ្លួន ៦នាក់ទៀត នៅម៉ាលី និងស៊ីរី។ ប្រធានាធិបតីបារាំង បានសំដែងការគាំទ្រដល់ក្រុមគ្រួសាររបស់ចំណាប់ខ្មាំង ក្នុងឱកាសបុណ្យចូលឆ្នាំសកល ២០១៤នេះ។ លោកហ្វ្រង់ស៊័រ ហូឡង់ បានប្តេជ្ញាថា នឹងខិតខំសំរេចអោយចំណាប់ខ្មាំងបារាំងគ្រប់រូប ទទួលបានសេរីភាពឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ