លោកហ៊ុន សែន ចុះកិច្ចព្រមព្រៀងលើ៨ឯកសារជាមួយវៀតណាម
ប្រមុខរដ្ឋាភិបាលកម្ពុជាលោកហ៊ុន សែន នឹងបំពេញទស្សនកិច្ចរយៈពេល៣ថ្ងៃ នៅប្រទេសវៀតណាម នៅក្នុងសប្តាហ៍នេះ ពីថ្ងៃទី២៦ដល់ថ្ងៃទី២៨ធ្នូ។ នៅក្នុងដំណើរទស្សនកិច្ចក្នុងប្រទេសជិតខាងមួយនេះ ប្រមុខរដ្ឋាភិបាលទាំងពីរគ្រោងចុះហត្ថលេខាលើឯកសារចំនួន៨ ដែលទាក់ទងនឹងកិច្ចសហប្រតិបត្តិការពាណិជ្ជកម្ម អប់រំ ព័ត៌មាន។ ប្រមុខរដ្ឋាភិបាលទាំងពីរ ក៏គ្រោងសម្ពោធរួមគ្នា នូវមន្ទីរពេទ្យជោរៃរបស់វៀតណាម-ភ្នំពេញ នៅក្នុងខែមករាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
នៅថ្ងៃព្រហស្បតិ៍ក្នុងសប្តាហ៍នេះ លោកនាយករដ្ឋមន្ត្រីហ៊ុន សែន នឹងផ្តើមទស្សនកិច្ច៣ថ្ងៃនៅក្នុងប្រទេសវៀតណាម។ ជាទស្សនកិច្ចដែលរៀបចំឡើងតាមការអញ្ជើញរបស់លោកនាយករដ្ឋមន្ត្រីវៀតណាម ង្វៀន តាន់យុង។ នៅក្នុងដំណើរទស្សនកិច្ចដែលអមដោយរដ្ឋមន្ត្រីក្រសួងការបរទេស លោក ហោ ណាំហុង រដ្ឋមន្ត្រីក្រសួងពាណិជ្ជកម្ម លោកស៊ុន ចាន់ថុល និងរដ្ឋមន្ត្រីក្រសួងសេដ្ឋកិច្ច លោកអូន ព័ន្ធមុនីរ័ត្ន ប្រមុខរដ្ឋាភិបាលក្រុងភ្នំពេញនឹងពិភាក្សាទ្វេភាគីជាមួយសមភាគីវៀតណាម និងធ្វើជាអធិបតីនៅក្នុងពិធីចុះហត្ថលេខាលើឯកសារនៃកិច្ចព្រមព្រៀងចំនួន៨។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ឯកសារទាំងនោះរួមមាន៖ ការសំរបសំរួលពាណិជ្ជកម្មទ្វេភាគីសម្រាប់ឆ្នាំ២០១៤-២០១៥ កិច្ចព្រមព្រៀងស្តីពីការផ្លាស់ប្តូរទំនិញ សន្ធិសញ្ញាស្តីពីបត្យប័ន កិច្ចព្រមព្រៀងឥណទានសម្បទាន ផែនការសហប្រតិបត្តិការរវាងក្រសួងអប់រំ ក្រសួងមហាផ្ទៃ ផែនការសហការស្តីពីព័ត៌មាន និងផែនការសហការស្តីពីបណ្ណសារដ្ឋានជាតិ។
សេចក្តីប្រកាសព័ត៌មានដដែលបានអោយដឹងថា លោកនាយករដ្ឋមន្ត្រីហ៊ុន សែន ក៏នឹងជួបជាមួយប្រធានរដ្ឋសភាវៀតណាម លោកង្វៀន ស៊ីនហ៊ុង លោកប្រធានាធិបតីវៀតណាម ជ្រឿង តឹងសាង និងលោកអគ្គលេខាធិការបក្សកុម្មុយនិស្តវៀតណាម ង្វៀន ភូ ត្រុង។
គួរបញ្ជាក់អោយដឹងផងដែរថា ក្រៅពីការចុះហត្ថលេខាលើកិច្ចព្រមព្រៀងជាច្រើននៅក្នុងសប្តាហ៍នេះហើយ នាយករដ្ឋមន្ត្រីទាំងពីរគ្រោងនឹងមានវត្តមានររួមគ្នាជាថ្មីទៀត នៅក្នុងរាជធានីភ្នំពេញ ដើម្បីសម្ពោធមន្ទីរពេទ្យជោរៃ នៅថ្ងៃទី១៣ខែមករាក្រោយនេះ។ មន្ទីរពេទ្យជោរៃរបស់វៀតណាម ត្រូវបានសាងសង់នៅក្នុងសង្កាត់និរោធ ខណ្ឌមានជ័យ លើផ្លូវជាតិលេខ១ ជាគម្រោងវិនិយោគរួមគ្នារវាងមន្ទីរពេទ្យជោរៃរបស់វៀតណាម និងក្រុមហ៊ុនសូគីមិចក្នុងតម្លៃ១៥លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ