ក្រុមប្រទេសជាមិត្តរបស់ក្រុមឧទ្ទាមស៊ីរីកំពុងចរចាគ្នាដើម្បីបញ្ជូនអាវុធឲ្យក្រុមឧទ្ទាម
ចុះផ្សាយនៅថ្ងៃ៖
ស្តាប់ - ០៥:៣៦
ថ្ងៃសៅរ៍ ទី២២ មិថុនានេះ ក្រុមប្រទេសទំាង ១១ ដែលគំាទ្រក្រុមឧទ្ទាមស៊ីរីបានរួមប្រជុំគ្នាក្នុងទីក្រុងដូហា ប្រទេសកាតា។ ក្រុមប្រទេសទំាង ១១ នោះមានបារំាង អង់គ្លេស សហរដ្ឋអាមេរិក អាល្លឺម៉ង់ អ៊ីតាលី ហ្ស៊កដានី អារ៉ាប៊ីសាអូឌីត កាតា អេមីរ៉ាតអារ៉ាប់រួម តួកគី និងប្រទេសអេហ្ស៊ីប។
ក៏ដូចជាកិច្ចប្រជុំមុនៗដែរ គោលដៅសំខាន់ គឺស្វែងរកជំហររួមគ្នាមួយក្នុងការជួយជ្រោមជ្រែងក្រុមឧទ្ទាមស៊ីរី ពិសេសផ្តល់ជំនួយជាគ្រឿងសព្វាវុធឲ្យក្រុមនេះដើម្បីប្រឈមទប់នឹងកម្លំាងរបស់លោកប្រធានាធិបតីស៊ីរីបាស្ហា អាល់អាសាដ។ កម្លំាងរបស់លោកបាស្ហាដែលកំពុងមានឥទ្ធិពលខ្លំាង និងកំពុងមានប្រៀបជាងកម្លំាងឧទ្ទាមឆ្ងាយណាស់ ពិសេសគឺគ្រឿងសព្វាវុធ។ ពួកឧទ្ទាមមានត្រឹមតែកំាភ្លើងធម្មតា ចំណែកនៅខាងកម្លំាងរបស់លោកអាស្ហាមានបំពាក់ទៅដោយកំាភ្លើងស្វ័យប្រវត្តិទំនើបៗ យន្តហោះចម្បំាង រថក្រោះ ព្រមទំាងអាវុធគីមី។ ជារួម តុល្យភាពធនធានមនុស្ស និងគ្រឿងសព្វាវុធរវាងកម្លំាងឧទ្ទាម និងកម្លំាងរដ្ឋាភិបាលមានលក្ខណៈខុសគ្នាឆ្ងាយណាស់។ តំាងពីសង្រ្គាមស៊ីវិលនៅស៊ីរីបានផ្ទុះឡើងក្នុងខែមីនា ឆ្នំា ២០១១ មក កម្លំាងរដ្ឋាភិបាលនៅតែមានកម្លំាងខ្លំាង និងថែមទំាងបានវាយដណ្តើមយកមកវិញនូវទីតំាងរបស់ក្រុមឧទ្ទាម។ ថ្មីៗចុងក្រោយនេះ គឺការវាយដណ្តើមកាន់កាប់ទីក្រុង Qousseir ដោយមានជំនួយគំាទ្រពីយុទ្ធជន Hezbollah លីបង់។
ក្រោមភ្នែកច្រមុះរបស់ក្រុមប្រទេសជាមិត្តរបស់ក្រុមឧទ្ទាមស៊ីរី វាជារឿងមួយបន្ទាន់បំផុតដែលគេត្រូវជួយគំាទ្រក្រុមឧទ្ទាម ពិសេសគឺជំនួយជាគ្រឿងសព្វាវុធ។ ត្រង់ចំណុចនេះ ក្រុមឧទ្ទាមធ្លាប់បានទាមទារយ៉ាងទទូចជាច្រើនលើក ច្រើនសារ។ នៅក្នុងកិច្ចប្រជុំថ្ងៃនេះទៀត ក្រុមឧទ្ទាមបានធ្វើបញ្ជីគ្រឿងសព្វាវុធដែលខ្លួនចង់បានជាបន្ទាន់ រួមមាន អាវុធធុនធ្ងន់ កំាភ្លើងបាញ់យន្តហោះ កំាភ្លើងបាញ់រថក្រោះ សម្ភារៈទូរគមនាគមន៍ ព្រមទំាងម៉ាស់ការពារឧស្ម័នពុល។ ជាមួយគ្នានេះ ក្រុមឧទ្ទាមក៏បានស្នើឲ្យបង្កើតតំបន់ហោះហើរហាមឃាត់ដើម្បីរារំាងការទម្លាក់គ្រាប់បែកពីកម្លំាងរដ្ឋាភិបាលលើតំបន់ដែលមានជនស៊ីវិលរស់នៅ។
ក្រុមប្រទេសលោកខាងលិចខ្វែងគំនិតគ្នាជុំវិញការបំពាក់អាវុធឲ្យក្រុមឧទ្ទាម
នេះមិនមែនជាលើកទីមួយទេ ដែលក្រុមប្រទេសជាមិត្តរបស់ក្រុមឧទ្ទាមស៊ីរីបានរួមប្រជុំគ្នាដើម្បីជជែកពីរឿងផ្តល់អាវុធទៅឲ្យក្រុមឧទ្ទាម។ តែក្តីបារម្ភនៅបន្តមានដែលអ្នកខ្លះខ្លាចអាវុធដែលផ្តល់ទៅឲ្យក្រុមឧទ្ទាមស៊ីរី បែរជាធ្លាក់ទៅក្នុងដៃរបស់ក្រុមអ្នកជ្រុលនិយម ពិសេសគឺក្រុមអ៊ីស្លាមនិយមជ្រុល។ ចំណែកអ្នកខ្លះទៀត គេយល់ឃើញថា ការបំពាក់អាវុធទៅឲ្យក្រុមឧទ្ទាមស៊ីរី មិនច្បាស់ថា ក្រុមនេះនឹងអាចយកជ័យជំនះលើកម្លំាងរបស់លោកបាស្ហា អាល់អាសាដបានទេ។ ផ្ទុយទៅវិញ វាអាចនឹងធ្វើឲ្យស្ថានការណ៍កាន់តែអាក្រក់ថែមទៀត ហើយអ្នកដែលរងគ្រោះខ្លំាងជាងគេ គឺជនស៊ីវិលស្លូតត្រង់។
យ៉ាងណាក៏ដោយ តំាងពីមានព័ត៌មានជាក់ច្បាស់ជុំវិញការប្រើប្រាស់អាវុធគីមីពីសំណាក់កម្លំាងរបស់លោកបាស្ហា និងការចូលរួមរបស់ក្រុមប្រដាប់អាវុធ Hezbollah លីបង់មក ក្រុមប្រទេសជាមិត្តរបស់ក្រុមឧទ្ទាមស៊ីរីអាចនឹងផ្តើមពិចារណាជាថ្មី ពីលទ្ធភាពក្នុងការផ្តល់អាវុធឲ្យក្រុមឧទ្ទាម។ ទន្ទឹមគ្នានេះ សង្រ្គាមពាក្យសម្តីក៏កំពុងបន្តមានរវាងក្រុមប្រទេសលោកខាងលិច និងប្រទេសរុស្ស៊ីដែលជាសម្ព័ន្ធមិត្តចាក់ទឹកមិនលេចរបស់ទីក្រុងដាម៉ាស។ តំាងពីដើមមក រុស្ស៊ីបានជំទាស់ដាច់ខាតចំពោះការបំពាក់អាវុធឲ្យក្រុមឧទ្ទាមស៊ីរី។
អ្វីដែលទីក្រុងម៉ូស្គូចង់បាន គឺការដោះស្រាយបញ្ហាតាមរយៈការចរចា។ ការចរចាដែលនឹងត្រូវចូលរួមដោយគ្រប់ភាគីពាក់ព័ន្ធទំាងអស់។ ថ្មីៗនេះ រុស្ស៊ីបានបញ្ជាក់យ៉ាងច្បាស់ថា សន្និសីទដើម្បីសន្តិភាពនៅស៊ីរីដែលគ្រោងរៀបចំជាលើកទី២ នៅពេលខាងមុខក្នុងទីក្រុងហ្សឺណែវ ប្រទេសស្វីស មិនមែនជាការកំចាត់របបរបស់លោកបាស្ហា អាល់អាសាដចោល ដូចដែលក្រុមប្រទេសលោកខាងលិចចង់បាននាពេលកន្លងមកទេ។
ក្រុមឧទ្ទាមស៊ីរីបានទទួលអាវុធ រីឯសហរដ្ឋអាមេរិកបានបង្កើនចំនួនទ័ពនៅក្នុងប្រទេសហ្យ៊កដានី
អ្នកនំាពាក្យរបស់ទាហានស៊ីរីសេរី ដែលជាកម្លំាងរបស់ក្រុមឧទ្ទាមបានអះអាងថា ពួកគេបានទទួលគ្រឿងសព្វាវុធទំនើបៗក្នុងកម្រិតតិចតួចពីបរទេស។ អាវុធទំនើបៗទំាងនោះ រួមមាន អាវុធបាញ់យន្តហោះ អាវុធបាញ់រថក្រោះ ព្រមទំាងគ្រាប់មីស៊ីលបាញ់ផ្ទាល់ដី។ ម្យ៉ាងទៀត និងបើយោងតាមប្រភពពីក្រុមប្រឆំាងដដែរ អាវុធទំាងអស់នោះផលិតនៅរុស្ស៊ី តែមិនបានប្រាប់ថា តើប្រទេសណាជាអ្នកផ្តល់ឲ្យទេ។
ទន្ទឹមគ្នានេះ អាមេរិកបានប្រកាសពីការបង្កើនចំនួនទ័ពរបស់ខ្លួននៅក្នុងប្រទេសហ្យ៊កដានី ពី ២៥០នាក់ ទៅ ១ ០០០នាក់។ ដោយឡែក កាសែតអាមេរិកំាង Los Angeles Times ទើបបានទម្លាយព័ត៌មានមួយឲ្យដឹងថា តំាងពីខែវិច្ឆិកា ឆ្នំា ២០១១ មក ក្រុម CIA និងកម្លំាងអាមេរិកំាងពិសេសបានលួចហ្វឹកហ្វឺនកម្លំាងឧទ្ទាមស៊ីរីនៅក្នុងប្រទេសហ្ស៊កដានី និងប្រទេសតួកគី។
យោងតាម Los Angeles Times ដដែល ក្រុម CIA និងកម្លំាងអាមេរិកំាងពិសេសបានបង្រៀនក្រុមឧទ្ទាមឲ្យចេះប្រើអាវុធបាញ់យន្តហោះ ឬអាវុធបាញ់រថក្រោះ។ ពត៌មាននេះបានធ្លាក់មក បន្ទាប់ពីសេតវិមានបានប្រកាសកាលពីថ្ងៃទី១៣ មិថុនាកន្លងមក ពីបំណងចង់ជួយគំាទ្រផ្លូវយោធាដល់ក្រុមឧទ្ទាមស៊ីរី ដោយមិនបានលំអិតទេថា តើអាចមានជំនួយជាអាវុធ ឬអត់។ យ៉ាងណាក៏ដោយ ក្រសួងស៊ើបការសម្ងាត់ CIA និងសេតវិមានបានបដិសេធមិនធ្វើអត្ថាធិប្បាយចំពោះព័ត៌មានចុះផ្សាយដោយកាសែត Los Angeles Times ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ