សហរដ្ឋអាមេរិក និងរុស្ស៊ី នឹងប្រឈមមុខគ្នា នៅក្នុងកិច្ចប្រជុំ G8
បញ្ហាស៊ីរីត្រូវគេរំពឹងថា នឹងក្លាយជាប្រធានបទសំខាន់មួយសម្រាប់ការចាប់ផ្តើមប្រជុំនៃបណ្តាប្រទេសឧស្សាហកម្មជឿនលឿនទាំង៨ ដែលហៅកាត់ថា G8 នៅប្រទេសអៀកឡង់ខាងជើងដែលត្រូវបើកធ្វើនៅថ្ងៃចន្ទនេះ។ សហរដ្ឋអាមេរិក និងរុស្ស៊ី នឹងត្រូវប្រឈមមុខដាក់គ្នាយ៉ាងតឹងតែងអំពីបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ប៉ុន្មានថ្ងៃចុងក្រោយនេះ ទំនាស់ពាក្យសម្តីរវាងប្រធានាធិបតី អាមេរិក បារ៉ាក់ អូបាម៉ា និង លោក ប្លាឌីមៀ ពូទីន ប្រធានាធិបតីរុស្ស៊ី បានឡើងកម្តៅជាបន្តបន្ទាប់ ជុំវិញសង្គ្រាម នៅស៊ីរី។ទីក្រុងវ៉ាស៊ីនតោន និងម៉ូស្គូ គ្រោងបើកកិច្ចប្រជុំ ជាមួយគ្នាមួយ នាខែកក្កដាខាងមុខនេះដើម្បីពិភាក្សារកដំណោះស្រាយសន្តិភាព នៅក្នុងប្រទេសដែលកំពុងញាំញីដោយសង្គ្រាមស៊ីវិលមួយនេះ។
លោកពូទីនបានប្រឆាំងយ៉ាងខ្លាំងទៅនឹងគម្រោងរបស់លោកខាងលិចដែលជាសម្ព័ន្ធមិត្តរបស់ក្រុមប្រឆាំងនៅស៊ីរី ក្នុងការបញ្ជូនជំនួយយោធាទៅឲ្យក្រុមឧទ្ទាម ។ លោកពូទីនបានអះអាង កាលពីថ្ងៃអាទិត្យពេលចេញពីជំនួបជាមួយនាយករដ្ឋមន្ត្រីអង់គ្លេស David Cameron នៅទីក្រុងឡុងដ៏ថា គេមិនត្រូវគាំទ្រដល់ពួកមនុស្សដែលមិនត្រឹមតែសម្លាប់គូសត្រូវរបស់ខ្លួនប៉ុណ្ណោះទេ តែថែមទាំងបានបរិភោគសាច់សត្រូវទាំងនោះ នៅចំពោះមុខកាម៉េរ៉ាទៀតផងនោះឡើយ។ លោកចង់និយាយសំដៅទៅលើរូបភាពក្នុងខ្សែវីដេអូមួយដែលបង្ហាញពីក្រុមឧទ្ទាមស៊ីរីដែលបានស៊ីសាច់ទាហានស៊ីរីម្នាក់។
សូមបញ្ជាក់ថា រុស្ស៊ីជាប្រទេសផ្តល់អាវុធដល់រដ្ឋាភិបាលរបស់លោក បាស្សា អាល អាស្សាធ និងបានរក្សាសិទ្ធិផ្តល់មីស៊ីលប្រឆាំងយន្តហោះ S-300 ដល់ស៊ីរីទៀតផង។ ការដំឡើងសំឡេងរបស់រុស្ស៊ីបានកើតឡើង បន្ទាប់ពីសេតវិមានបានប្រកាស កាលពីថ្ងៃព្រហស្បតិ៍សប្តាហ៍មុនថា រដ្ឋាភិបាលក្រុងដាម៉ាសបានបំពានបន្ទាត់ក្រហមដែលគូសដោយសហរដ្ឋអាមេរិក នោះគឺកងទ័ពរដ្ឋាភិបាលស៊ីរីបានប្រើប្រាស់អាវុធគីមីទៅលើក្រុមឧទ្ទាម។ នេះជាហេតុផលដែលទីក្រុងវ៉ាស៊ីនតោនត្រូវបន្ថែមជំនួយយោធាដល់ក្រុមឧទ្ទាម។
ប្រធានាធិបតីបារាំង លោក François Hollandeដែលគ្រោងជួបជាមួយលោកពូទីននៅមុនជំនួបកំពូល G8 ក៏គ្រោងបង្ហាញភស្តុតាងនានាដល់លោក ពូទីន ផងដែរស្តីពីការប្រើអាវុធគីមី គឺឧស្ម័ន sarin ពីសំណាក់កងទ័ពរដ្ឋាភិបាលស៊ីរី ទៅលើក្រុមប្រឆាំង។ បារាំង និងអង់គ្លេសកំពុងតែជំរុញឲ្យមានការបញ្ជូនអាវុធដល់ក្រុមប្រឆាំងស៊ីរីឲ្យបានឆាប់។ កិច្ចប្រជុំអំពីបញ្ហានេះ គ្រោងបើកធ្វើ នៅចុងសប្តាហ៍នេះ នៅប្រទេសតួកគី។ ប៉ុន្តែ គេរំពឹងថា បញ្ហាទាំងនេះមិនអាចបញ្ចុះបញ្ចូលរុស្ស៊ីឲ្យជឿបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ