RFI ចុះផ្សាយទាំងស្រុងនូវគម្រោងការណ៍សម្ងាត់របស់អាល់កៃដានៅម៉ាលី
វិទ្យុបារាំងអន្តរជាតិ RFI និងកាសែត Libération ចុះផ្សាយទាំងស្រុងនូវផែនការលម្អិត ដែលចេញដោយក្រុមភេរវជនអាល់កៃដាប្រចាំអាហ្វ្រិកខាងជើង (AQMI) សម្រាប់អនុវត្ត នៅក្នុងប្រទេសម៉ាលី។ ឯកសារនេះចុះហត្ថលេខាដោយមេដឹកនាំ AQMI ដោយផ្ទាល់ ហើយត្រូវបានរកឃើញដោយអ្នកកាសែត RFI និង Libération ដែលបានចុះទៅយកព័ត៌មាន នៅប៉ែកខាងជើងប្រទេសម៉ាលី។
ចុះផ្សាយនៅថ្ងៃ៖ កែប្រែថ្ងៃទី៖
ផែនការលម្អិតរបស់ AQMI ដែលចុះថ្ងៃទី២០ កក្កដា ២០១២ (មុនអន្តរាគមន៍យោធារបស់បារាំង) ត្រូវបានរកឃើញដោយអ្នកកាសែតរបស់ RFI និង Libaration កាលពីថ្ងៃទី១៦ ខែកុម្ភៈ ឆ្នាំ២០១៣ នៅទីក្រុង Tombouctou ក្រោយពីកងទ័ពបារាំងបានវាយបណ្តេញក្រុមឧទ្ទាម និងក្រុមភេរវជនចេញពីប៉ែកខាងជើងម៉ាលី។
នេះគឺជាលើកទីមួយហើយ ដែលឯកសាររបស់ក្រុមភេរវជនអាល់កៃដាប្រចាំអាហ្វ្រិកខាងជើងត្រូវបានចុះផ្សាយជាសាធារណៈ។ ឯកសារនេះត្រូវបានសរសេរជាភាសាអារ៉ាប់ ហើយត្រូវបានបកប្រែជាភាសាបារាំង។
យោងតាមឯកសារនេះ មេដឹកនាំ AQMI បានដាក់ចេញនូវគោលដៅមួយច្បាស់លាស់ គឺបង្កើតរដ្ឋអ៊ីស្លាមមួយ នៅប៉ែកខាងជើងប្រទេសម៉ាលី។ ដើម្បីសម្រេចបានតាមគោលដៅនេះ AQMI ដាក់ចេញនូវយុទ្ធសាស្រ្តមួយ គឺសហការជាមួយក្រុមឧទ្ទាមម៉ាលី ដើម្បីវាយដណ្តើមកាន់កាប់យកតំបន់ខាងជើងម៉ាលី។
បន្ទាប់មកទៀត ដើម្បីបំភាន់ភ្នែកសហគមន៍អន្តរជាតិ AQMI ចង់ឲ្យគេមើលពីខាងក្រៅមកឃើញថា តំបន់ឃើងជើងម៉ាលី ស្ថិតក្រោមការគ្រប់គ្រងរបស់ឧទ្ទាម មិនគ្រប់គ្រងដោយក្រុមភេរវជននោះទេ។ លើសពីនេះទៅទៀត តាមគម្រោងការណ៍របស់មេដឹកនាំ AQMI គេមិនទាន់ចង់ដាក់ឲ្យអនុវត្តច្បាប់ និងទំនៀមទម្លាប់តឹងរ៉ឹងរបស់អ៊ីស្លាម នៅម៉ាលី ភ្លាមៗនោះទេ ដោយត្រូវរង់ចាំពង្រឹងអំណាចពេញលេញសិន ទើបចាប់ផ្តើមអនុវត្ត។
ក៏ប៉ុន្តែ ឯកសារនេះក៏បានបង្ហាញឲ្យឃើញផងដែរថា ក្រុមភេរវជន AQMI មិនមានគោលដៅវាយលុកចុះមកប៉ែកខាងត្បូងម៉ាលីនោះទេ។ អ្នកដែលចង់វាយយករដ្ឋធានីបាម៉ាកូ គឺក្រុមឧទ្ទាមម៉ាលី ហើយមេដឹកនាំ AQMI បានប្រតិបត្តិការនេះ។
ដើម្បីអានឯកសារដើមទាំងស្រុង (ជាភាសាបារាំង) សូមចុចត្រង់នេះ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ