សង្គ្រាមឧស្ម័ន ៖ ហេតុអ្វីរុស្ស៊ីហាក់ដូចជារារែកនឹងផ្តាច់ឧស្ម័ន?
ចុះផ្សាយនៅថ្ងៃ៖
ស្តាប់ - ០៧:៣២
ចំណោទជុំវិញការផ្គត់ផ្គង់ថាមពលឧស្ម័ន បានក្លាយជាបញ្ហាស្នូលនៃវិបត្តិអ៊ុយក្រែន។ ការចរចាអ៊ុយក្រែនរុស្ស៊ី និងអឺរ៉ុប បានប្រព្រឹត្តជាច្រើនលើកច្រើនសា ប៉ុន្តែគ្មានលទ្ធផល។ ដូច្នេះរុស្ស៊ីអាចនឹងកាច់បិទបំពង់បង្ហូរឧស្ម័ន បានគ្រប់ពេលវេលា ចាប់ពីថ្ងៃចន្ទទី ១៦មិថុនានេះតទៅ ! ថ្ងៃដែលរុស្ស៊ីបានដាក់ឱសានវាទឱ្យអ៊ុយក្រែនសងបំណុលចាស់ពាក់កណ្តាល នៃបំណុលសរុបដែលមានតម្លៃដល់ទៅបួនពាន់លានដុល្លារអាមេរិកកន្លះ។ ពេលនេះការគំរាមកំហែងរុស្ស៊ី អាចក្លាយជាសកម្មភាពជាក់ស្តែង! ក្រុមហ៊ុនហ្កាសរុស្ស៊ីប្រកាសថានឹងប្តឹងទៅតុលាការពាណិជ្ជកម្មអន្តរជាតិ ដើម្បីទារបំណុលពីអ៊ុយក្រែន ព្រមទាំងជ្រើសរើសដើរតាមប្រព័ន្ធ បង់ប្រាក់ សិនទើបលក់ទំនិញឱ្យ ពោលគឺរុស្ស៊ី នឹងកាច់បិទបំពង់បង្ហូរហ្គាស ដូចការគំរាម។
ឆ្នាំ២០០៦ម្តង- ២០០៩ម្តង ឥលូវ២០១៤ម្តងទៀតឬ? សង្គ្រាមឧស្ម័នហាក់ដូចជាចាប់កំរើកម្តងទៀតហើយ ពេលនេះ ! ការចរចាប៉ុន្មានថ្ងៃចុងក្រោយ ដែលគេចាត់ទុកជាច្រកចេញតែមួយគត់នោះ មិនបានរកឃើញកិច្ចព្រមព្រៀងអ្វីទាក់ទងនឹងតម្លៃឧស្ម័នរុស្ស៊ីនាំចេញលក់មកឱ្យអ៊ុយក្រែនទេ។ នៅក្នុងការចរចាយប់មិញ ភាគីអ៊ុយក្រែនបានទាមទារឱ្យរុស្ស៊ីលក់ហ្គាសក្នុងតម្លៃដូចទីផ្សារពិភពលោក មិនតម្លៃបំប៉ោងស្រេចតែនឹងចិត្តដូចពេលនេះទេ។ មុនបដិវត្ត អ៊ុយក្រែនទិញឧស្ម័នរុស្ស៊ីក្នុងតម្លៃ ២៦៨ដុល្លារក្នុងមួយពាន់ម៉ែត្រគូប ទល់នឹង៤៨៥ដុល្លារនា ពេលបច្ចុប្បន្ននេះ ដែលហួសពីតម្លៃទីផ្សារអឺរ៉ុប។ ហើយរដ្ឋាភិបាលអ៊ុយក្រែន ក៏បានបញ្ជាក់ថាមិនសងបំណុលរុស្ស៊ីមួយភាគ (២ពាន់លានដុល្លារ) ដូចការទាមទារនិងការដាក់ឱសានវាទដែរ។
រុស្ស៊ីប្តឹងទារបំណុលពីអ៊ុយក្រែននៅតុលាការអន្តរជាតិ
កិច្ចព្រមព្រៀងក៏គ្មាន ឱសានវាទក៏មកដល់ បំណុល បួនពាន់លានដុល្លារកន្លះ ក៏មិនសងសូម្បីតែមួយភាគ ដូច្នេះហើយបានជានៅថ្ងៃនេះ ក្រុមហ៊ុនយក្សរុស្ស៊ី បានប្រកាសថា នឹងលក់ទំនិញ ឱ្យតែក្នុងតម្លៃប្រាក់បង់។ នេះមានន័យថា អ៊ុយក្រែននឹងបិទបំពង់ឧស្ម័នឈប់លក់ឱ្យក្រុងគៀវហើយ ព្រោះអ៊ុយក្រែននៅជំពាក់បំណុលរុស្ស៊ី ហើយថ្លៃហ្គាសសម្រាប់តែមិថុនាក៏មិនឃើញបង់ឱ្យម៉ូស្គូដែរ។
ក្រុមហ៊ុនហ្កាស្ត្រុមរុស្ស៊ី បានអះអាងថាចាប់ពីថ្ងៃនេះតទៅ ទាល់តែបង់លុយ ទើបអ៊ុយក្រែនបានទទួលឧស្ម័នបាន។ ប៉ុន្តែក្រុមហ៊ុនមិនបានបញ្ជាក់ថា តើក្បាលរ៉ូប៊ីនេហ្កាសបានកាច់បិទហើយឬនៅទេ។ តែហ្កាស្ត្រុម បានដាក់ពាក្យបណ្តឹងទៅតុលាការអន្តរជាតិ ស្តុកខុម ដើម្បីទារបំណុលទាំងអស់ពីអ៊ុយក្រែន។
អឺរ៉ុបពង្រីកប្រភពផ្គត់ផ្គង់ថាមពល
ហ្កាសដែលរុស្ស៊ីតែងយកមកធ្វើជាអាវុធគំរាមកំហែងអឺរ៉ុប និងអ៊ុយក្រែន ជាកាំបិតមុខពីរ សម្រាប់រុស្ស៊ីខ្លួនឯង។ ជាការពិតណាស់ដែលថាអ៊ុយក្រែនជំពាក់បំណុលម៉ូស្គូរាប់ពាន់លានដុល្លារ មិនទាន់សង ប៉ុន្តែរុស្ស៊ី នៅតែរារែក ក្នុងការផ្តាច់ឧស្ម័នមែនទែន។ សម្រាប់លោកពូទីន បំណុលអ៊ុយក្រែនប៉ុណ្ណឹង មិនជាថ្វីទេ ប្រសិនបើអ៊ុយក្រែនមិនជ្រើសរើសងាកទៅអោបអឺរ៉ុបនោះ។ លោកប្រធានាធិបតីរុស្ស៊ី ដែលជាអ្នកគ្រប់គ្រងពិតៗក្រុមហ៊ុនហ្កាសតែងបានបញ្ជាឱ្យ សហគាសហ្កាសរុស្ស៊ី មិនបញ្ចេញសកម្មភាពមែនទែន រង់ចាំចូលចរចាគ្នាសិន ចាំបិទរ៉ូប៊ីនេជាក្រោយ។ ពីព្រោះរុស្ស៊ីខ្លួនឯងត្រូវការរក្សាទីផ្សារអឺរ៉ុប។
អឺរ៉ុបជាអតិថិជនដ៏ចម្បង ឬថាស្ទើរតែមួយគត់ដែលទិញហ្គាសរបស់រុស្ស៊ី ដោយមានពាក់កណ្តាលត្រូវបង្ហូរតាមបំពង់ឆ្លងកាត់តាមអ៊ុយក្រែន។ រុស្ស៊ីត្រូវការរក្សាទុកអតិថិជនដូចយ៉ាងអឺរ៉ុបផង និងត្រូវការពេលវេលារកអតិថិជនថ្មីបន្ថែមទៀតផង។ កាលពីខែឧសភា ក្នុងពេលដែលវិបត្តិអ៊ុយក្រែននិងឧស្ម័នផ្តើមពុះកញ្ជ្រោលខ្លាំងនោះ លោកពូទីនបានធ្វើដំណើរទៅប្រទេសចិន ដោយមានផែនការចង់សម្រេចឱ្យបានកិច្ចព្រមព្រៀងលក់ឧស្ម័ន។ ប៉ុន្តែរុស្ស៊ីដឹងច្បាស់ណាស់ថា អតិថិជនដូចយ៉ាងចិន មិនមែនស្រួលនិយាយដូចអឺរ៉ុបទេ។ ហើយបើរុស្ស៊ីបាត់បង់អឺរ៉ុបមែន នោះចិនរិតតែបានដៃ អាចធ្វើជាកំណត់តម្លៃឧស្ម័នដែលត្រូវទិញផងក៏ថាបាន។ រុស្ស៊ីនឹងខាតប្រយោជន៍យុទ្ធសាស្ត្របើត្រូវបញ្ឈប់ការបញ្ជូនហ្កាសទៅឱ្យអ៊ុយក្រែន មុនការចុះហត្ថលេខាលើកិច្ចសន្យាជាមួយចិន។ ហេតុដូច្នេះហើយបានរុស្ស៊ី ក៏ត្រូវតែប្រុងប្រយ័ត្នដែរនោះ។
អ៊ុយក្រែនអាចខ្វះឧស្ម័ននៅរដូវត្រជាក់
ក្រុងគៀវ បានដឹង និងបានត្រៀមខ្លួនជាស្រេចហើយ ថាបើមិនសងបំណុលទេ ម៉ូស្គូមុខជានឹងអាចផ្តាច់ឧស្ម័ននៅថ្ងៃណាមួយជាក់ជាពុំខាន។ សម្រាប់ពេលនេះថ្ងៃនេះ ប្រសិនបើរុស្ស៊ីបញ្ឈប់ការបង្ហូរឧស្ម័នលក់មែន អ៊ុយក្រែនទំនងជាមិនរងគ្រោះស្លន់ស្លោឡើយ។ ក្នុងរយៈពេលពីរបីខែដំបូងនេះ អ៊ុយក្រែនមានឧស្ម័នស្តុកបំរុងទុកក្រោមដីខ្លះ និងមានជំនួយឧបត្ថម្ភខ្លះពីខាងអឺរ៉ុបមកវិញ។ ម្យ៉ាងវិញទៀត រយៈពេលនេះ ជារដូវក្តៅ តម្រូវការឧស្ម័នក៏មានកំរិត។
ប៉ុន្តែសួរថាតើអ៊ុយក្រែន ដែល ជាប្រទេសធ្លាប់មានឧស្ម័នឆ្លងកាត់ ធ្លាប់បានទទួលផលចំណេញ និងប្រយោជន៍ពីការលក់ហ្កាសរុស្ស៊ី អាចធន់នឹងសម្ពាធបែបនេះបានប៉ុណ្ណា ? ថ្វីបើ សហភាពអឺរ៉ុបបន្តជួយគាំទ្រអ៊ុយក្រែនមែន ប៉ុន្តែវាមិនមែនជាប្រការសោះ ដែលផ្លូវផ្គត់ផ្គង់ថាមពលមួយខ្សែនេះត្រូវកាត់ផ្តាច់។ ក្នុងរយៈពេលវែងអ៊ុយក្រែនអាចជួបវិបត្តិខ្វះថាមពលប្រើផង។
អ៊ុយក្រែនអាចខាតច្រើន ពីការកាច់បិទផ្តាច់ឧស្ម័ន
កន្លងមកអ៊ុយក្រែនខ្លួនឯង តែងប្រើទីតាំងភូមិសាស្ត្រខ្លួន ធ្វើជាយុទ្ធសាស្ត្រយកចំណេញ និងទទួលប្រយោជន៍ពិសេសពីថាមពលហ្គាសរុស្ស៊ីនេះ ដូចជាទិញក្នុងតម្លៃថោកជាងទីផ្សាររហូតមក។ ប៉ុន្តែតម្លៃពិសេសត្រូវចប់ តាំងពីប្រធានាធិបតីស្និទ្ធនឹងរុស្ស៊ី យាណូកូវិច ខ្ទាតចេញពីតំណែង ! ហើយកាន់តែយ៉ាប់ជាងនេះទៅទៀត រុស្ស៊ីក៏បាននិងកំពុងសាងសង់បំពង់បង្ហូរប្រេងលក់ជាច្រើនទិសផ្សេងទៀត ដើម្បីបង្វៀងផ្លូវ ឬដើម្បីកុំឱ្យរំពឹងតែលើអ៊ុយក្រែន ក្នុងការលក់ឧស្ម័នទៅឱ្យអឺរ៉ុប។
មុនឆ្នាំ២០០៦ ៨០%នៃហ្កាសរុស្ស៊ីលក់ឱ្យអឺរ៉ុបត្រូវឆ្លងកាត់អ៊ុយក្រែន ផ្ទុះសង្គ្រាមម្តងការឆ្លងកាត់បានថយបន្តិច ឥលូវរុស្ស៊ីពឹងអ៊ុយក្រែនតែពាក់កណ្តាល ! សំណង់បំពង់ឧស្ម័នថ្មីនៅភាគខាងត្បូងកំពុងដំណើរការទៀត ដែលថ្ងៃអនាគតពិតជាអាចជួយរំលែកការដឹកជញ្ជូនពីរុស្ស៊ីមកអឺរ៉ុប បានបន្ថែមជាក់ជាពុំខាន។ ដូច្នេះការយកចំណេញលើចរន្តឆ្លងកាត់ក៏ចុះថយ អ៊ុយក្រែនក៏លែងអាចទាញប្រយោជន៍យកចំណេញពីប្រើការស្នាក់អាស្រ័យហ្គាស។ ប៉ុន្តែទោះជាយ៉ាងណាក៏ដោយ ក៏កិច្ចព្រមព្រៀងរកស៊ីលក់ឧស្ម័នរុស្ស៊ីអ៊ុយក្រែន នៅអាចរកឃើញ តែគៀវត្រូវតែចេះនិងហ៊ានលះបង់ខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ