រុស្ស៊ីលក់អាវុធទៅរដ្ឋាភិបាលម៉ាលីដែលបន្តច្បាំងទល់នឹងពួកឧទ្ទាមអ៊ីស្លាមនិយម
កាសែតក្រុងម៉ូស្គូ Vedomosti ជាកាសែតរបស់មជ្ឈដ្ឋានធុរកិច្ចនិងសហគ្រិនរុស្ស៊ី ចុះផ្សាយដំណឹងនេះដោយយោងទៅលើប្រភពក្នុងក្រុមហ៊ុនរដ្ឋរុស្ស៊ីខាងលក់អាវុធទៅក្រៅ RosOboronExportដែលប្រមាណថាតាមមើលទៅ បារាំងមិនរារាំង ដល់ការបំពាក់អាវុធថ្មីៗទៅកងទ័ពម៉ាលីឡើយ ដ្បិតគោលដៅក៏សម្រាប់ប្រយុទ្ធទល់នឹងពួកអ៊ីស្លាមជ្រុលនិយមដែរ។
ចុះផ្សាយនៅថ្ងៃ៖
ស្តាប់ - ០២:៥០
តាមកាសែតរុស្ស៊ី Vedomosti រដ្ឋាភិបាលម៉ាលី បានស្នើសុំក្រុងម៉ូស្គូ ឲ្យលក់ទៅខ្លួន នូវឧទ្ធម្ភាគចក្រ ធុន Mi-35 និង Mi-17, យន្តហោះចម្បាំងនិងយន្តហោះដឹកជញ្ជូនយានយន្តពាសដែកធុន BTR-80, Radar សម្រាប់ប្រព័ន្ធការពារដែនអាកាស។ល។
មិនតែប៉ុណ្ណោះ ភាគីម៉ាលី ក៏ប្រាថ្នាទិញពីរុស្ស៊ីគឺកាំភ្លើងបាញ់ធុនស្រាល និងគ្រាប់របស់វា,គ្រឿងបន្លាស់សម្រាប់រថក្រោះនិងសម្រាប់យានយន្តពាសដែកនានា ធ្លាក់ខ្លួនចាស់ទៅហើយទិញតាំងពីជំនាន់សូវៀត ព្រមទាំងសុំឲ្យ ភាគីរុស្ស៊ីជួយជួសជុល គ្រឿងចម្បាំងទាំងនេះផង។
តាមទិន្នន័យកាសែតនោះ កុងត្រាស្តីអំពីការលក់សព្វាវុធរុស្ស៊ីទៅឲ្យម៉ាលី នឹងត្រូវចុះហត្ថលេខាក្នុងពេលឆាប់ៗខាងមុខទៅហើយ ប៉ុន្តែទំហំទឹកប្រាក់ឥតមានទម្លាយឲ្យដឹងឡើយ។
កាសែតក៏លើកយកមកចុះផ្សាយមតិរបស់តំណាងក្រុមហ៊ុនរដ្ឋរុស្ស៊ី RosOboronExport ដែលក្នុងលក្ខណៈមិនបញ្ចេញឈ្មោះប្រមាណថា រដ្ឋាភិបាលបារាំងដែលពួកយោធាប្រទេសនេះកំពុងច្បាំងនៅខាងរដ្ឋាភិបាលម៉ាលីទល់នឹងពួកឧទ្ទាមអ៊ីស្លាមជ្រុលនិយមមុខជាមិនរាំងរារំខានរុស្ស៊ីឡើយក្នុងការបំពាក់អាវុធថ្មីៗ ដល់កងទ័ពម៉ាលី។
ជាការកត់សម្គាល់ ក្រុមហ៊ុនរដ្ឋរុស្ស៊ីខាងលក់អាវុធទៅក្រៅ RosOboronExport ធ្លាប់បានចុះទៅហើយជាមួយក្រសួងការពារជាតិម៉ាលី គឺកិច្ចសន្យាលក់ទៅឲ្យម៉ាលី នូវកាំភ្លើងស្វ័យប្រវត្តទំនើបធុន AK ចំនួន ៣.០០០ ដើម អាកាលីប ៧,៦២ មីលីម៉ែត្រ។ កិច្ចសន្យានោះ ដែលចុះកាលពីខែកញ្ញាឆ្នាំ២០១២ មានទឹកប្រាក់ជាង ១លានដុល្លារស.រ.អា.។
គួរនិយាយថាថ្ងៃ៣មេសាម្សិលមិញ ដោយថ្លែងក្នុងកិច្ចប្រជុំនៃ “ គណៈកម្មការរដ្ឋរុស្ស៊ីខាងសហប្រតិបត្តិការយោធា-បច្ចេកទេស ជាមួយរដ្ឋបរទេស” លោកប្រធានាធិបតីរុស្ស៊ីពូទីនបានឲ្យដឹងថាក្នុងឆ្នាំ២០១២កន្លងទៅរុស្ស៊ីចេះលក់អាវុធបានទឹកប្រាក់ ១៥.២០០លានដុល្លារពោលគឺ ១២% ច្រើនជាងក្នុងឆ្នាំ២០១១។ គាត់បន្ថែមថា ឥឡូវក្នុងកញ្ចប់កុម៉ង់ទិញអាវុធពីរុស្ស៊ី គឺមាន កុងត្រាក្នុងទឹកប្រាក់ដល់ ៤៦.៣០០លានដុល្លារ។
លោកពូទីន ក៏កត់សម្គាល់ថា ប្រទេសរុស្ស៊ី ចេះដណ្តើមបានដល់ទៅជាង១/៤ នៃទីផ្សារអាវុធក្នុងលោកនិយាយឲ្យចំគឺ ២៦% ដោយស្ថិតនៅតែ ពីក្រោយស.រ.អា. ដែលស្រូបយកទីផ្សារនេះ អស់ ៣០%។ ប៉ុន្តែ រុស្ស៊ីឈ្នះដល់ទៅប៉ុន្មានដងឯណោះ លើ៣ប្រទេសផ្សេងទៀតដែលស្ថិតនៅក្នុង ចំណោម៥ប្រទេសនាំមុខគេក្នុងវិស័យនេះពោលគឺ ៧% ធ្លាក់លើប្រទេសអាល្លឺម៉ង់,៦% ធ្លាក់លើបារាំងនិង ៥% ធ្លាក់លើចិនប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ