បញ្ហាមួយ ក្នុងជំនួបកំពូល រុស្ស៊ី-សហភាពអឺរ៉ុប គឺស្ថានការណ៍នៅប្រទេសស៊ីរី
បញ្ហានេះ ដាក់ចេញដោយភាគីអឺរ៉ុប ទៅក្នុងរបៀបវារៈ នៃការពិភាក្សាជាផ្លូវការ ក្នុងជំនួបកំពូល រុស្ស៊ី-សហភាពអឺរ៉ុប លើកទី២៧ ដែលថ្ងៃនេះ ធ្វើការងារខ្លួន នៅក្រុងរុស្ស៊ី ឈ្មោះ Nijni Novgorod។ តាំងពីមុនដល់ជំនួបនេះម៉្លេះ ស្ថានការណ៍ នៅប្រទេសស៊ីរី អស់ប៉ុន្មានថ្ងៃជាប់មកហើយញ៉ាំងឲ្យមានការខ្វែងគំនិតគ្នារវាង រុស្ស៊ីនិងសហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០២:១៣
នៅរុស្ស៊ី គឺប្រធានាធិបតី ដែលជាអ្នកកំណត់ នយោបាយក្រៅប្រទេស។ ហើយច្បាស់ជារំលេចឲ្យឃើញពីគោលជំហរលោកមេដវេដេវតែម្តងដែលចូលរួមដោយផ្ទាល់ក្នុងជំនួបកំពូលនេះដែលនាប៉ុន្មានថ្ងៃចុងក្រោយ លោករដ្ឋមន្ត្រីការបរទេសរុស្ស៊ី ឡាវ្រ៉ូវ បានធ្វើសេចក្តីថ្លែងការណ៍ក្នុងន័យថា៖
- ទីក្រុងម៉ូស្គូ ប្រឆាំងនឹងការលើកបញ្ហាស្តីអំពីស្ថានការណ៍នៅប្រទេសស៊ីរី ទៅពិភាក្សា នៅឯ ក្រុមប្រឹក្សាសន្តិសុខអ.ស.ប. ដោយថែមទាំងចោទ ប្រទេសខ្លះ នៃលោកខាងលិច មានបារាំង និងអង់គ្លេសជាដើម ដែលគាំទ្រយ៉ាងសកម្មទៅផង ដោយ ស.រ.អា.ថា ចេះតែ ប៉ុនប៉ង ផ្តល់លក្ខណៈអន្តរជាតិ ដល់ជម្លោះផ្ទៃក្នុងសុទ្ធសាធ របស់ប្រទេសស៊ីរី។
គម្រោងនៃសេចក្តីសម្រេចទាក់ទងនឹងប្រទេសស៊ីរី ដាក់ចេញដោយបារាំង និងអង់គ្លេស ដើម្បី ទទួលការអនុម័ត ដោយក្រុមប្រឹក្សាសន្តិសុខ អ.ស.ប. បន្ទាប់ពីក្រុមប្រឹក្សានេះ បានចេញ ឯកសារប្រភេទនេះ ជុំវិញប្រទេសលីប៊ីទៅហើយ តាមយោបល់រុស្ស៊ី គឺនឹងហុចលទ្ធផលបញ្ច្រះ ទៅវិញទេតើ ពីព្រោះវាមានន័យ ជាការកាន់ជើង តែភាគីម្ខាងនៃអធិករណ៍នៅស៊ីរី គឺភាគីបះបោរ ដែលចង់ផ្តួលរំលំ លោកប្រធានាធិបតី បាហ្សារ អាស្សាដ ដូចចង់ផ្តួល មេដឹកនាំ លីប៊ី ឈ្មោះ កាដាហ្វ៊ី អ៊ីចឹង មិនមែនតម្រង់ទៅស្វែងរក ការផ្សះផ្សាជាតិនៅទីនោះឡើយ។
ចំណែកតំណាងអចិន្ត្រៃយ របស់រុស្ស៊ីប្រចាំនៅអ.ស.ប. លោកអគ្គរដ្ឋទូត វីតាលី ឈួរគីន បាន ថ្លែងយប់មិញនៅក្រុងញីវយ៉កថា រុស្ស៊ីនឹងប្រើសិទ្ធិវេតូ មិនឲ្យ ក្រុមប្រឹក្សាសន្តិសុខ អនុម័តឡើយគម្រោងនៃសេចក្តីសម្រេចស្តីអំពីប្រទេសស៊ីរីដ្បិតឯកសារនេះ មិនធានាឲ្យមានការបើកធ្វើសំវាទរវាងភាគីបដិបក្ខនៅស៊ីរីនិងមិននាំទៅបញ្ឈប់ការបង្ហូរឈាម នៅទីនោះឡើយ។
លោករដ្ឋមន្ត្រីការបរទេសបារាំង អាឡាំង ហ្ស៊ូព្ពេ ដែលជាម្ចាស់នៃឯកសារនោះ ធ្លាប់បានថ្លែង ព្រមានថាក្នុងករណីបើទីក្រុងម៉ូស្គូ ប្រើសិទ្ធិវេតូមែននោះនាទីទទួលខុសត្រូវ ចំពោះដំណើរវិវឌ្ឍន៍ទៅនៃស្ថានការណ៍នៅស៊ីរីគឺនឹងធ្លាក់ទៅលើប្រទេសរុស្ស៊ី។
តាមតួលេខអ.ស.ប. ដោយមកពីការបង្ក្រាប យ៉ាងហិង្សា ពីខាងកម្លាំងអាជ្ញាធរស៊ីរី មានបាតុករប្រទេសនោះ ធ្លាក់ខ្លួនស្លាប់អស់ ប្រមាណមួយពាន់នាក់ហើយ។
គឺក្នុងសន្និសីទកាសែតថ្ងៃនេះ ដែលថ្នាក់ដឹកនាំ សហភាពអឺរ៉ុប និងរុស្ស៊ី នឹងប្រកាសអំពី លទ្ធផល នៃកិច្ចចរចាជុំវិញសាច់រឿង ស្តីអំពីប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ