អង្គការសហប្រជាជាតិគំរាមដាក់ទណ្ឌកម្មប្រឆាំងក្រុមប្រយុទ្ធនៅស៊ូដង់ខាងត្បូង
ចុះផ្សាយនៅថ្ងៃ៖
ស្តាប់ - ០៤:៥៩
ក្រុមប្រឹក្សាសន្តិសុខនៃអង្គការសហប្រជាជាតិកំពុងតែរិះគិតពីទណ្ឌកម្មដែលត្រូវដាក់ប្រឆាំងនឹងអ្នកទទួលខុសត្រូវក្នុងអំពើកាប់សម្លាប់មនុស្សរាប់ពាន់នាក់ នៅប្រទេសស៊ូដង់ខាងត្បូង។ យោងតាមអង្គការសហប្រជាជាតិ ប៉ុន្មានថ្ងៃចុងក្រោយនេះ ក្រុមឧទ្ទាមបានសម្លាប់ជនស៊ីវិលរាប់រយនាក់ នៅក្រុងប្រេង Bentiu ភាគខាងជើង។ ជនស៊ីវិលជាង៥០នាក់ ដែលរត់មកជ្រកភៀសខ្លួន ក្នុងមូលដ្ឋានអង្គការសហប្រជាជាតិមួយកន្លែង នៅភាគខាងកើត ក៏ត្រូវបានសម្លាប់ដែរ។ អាមេរិកនិងបារាំងបានយល់ព្រមអោយអង្គការសហប្រជាជាតិចេញទណ្ឌកម្មប្រឆាំងស៊ូដង់ខាងត្បូង ដើម្បីបិទបញ្ចប់អំពើហិង្សាទាំងនេះ។
តាំងពីពាក់កណ្តាលខែធ្នូមក អំពើហិង្សាកាប់សម្លាប់មនុស្សនៅស៊ូដង់ខាងត្បូងនៅមិនទាន់បញ្ចប់នៅឡើយទេ ហើយក៏ប្រហែលជាពិបាកនឹងបញ្ចប់ដែរ ប្រសិនបើសហគមន៍អន្តរជាតិ ពិសេសអង្គការសហប្រជាជាតិ មិនកម្រើកខ្លួនចាត់វិធានការដាច់ខាតនោះទេ។ លោក អ៊ែរវេ ឡាត់ស៊ូ Hervé Ladsous អ្នកទទួលខុសត្រូវកងទ័ពមួកខៀវនៅស៊ូដង់ខាងត្បូង និងលោក Ivan Simonovic ជាអគ្គលេខាធិការរងទូទៅទទួលបន្ទុកផ្នែកមនុស្សធម៌ បានផ្តល់ព័ត៌មានដល់សមាជិកក្រុមប្រឹក្សាសន្តិសុខអង្គការសហប្រជាជាតិ ពីការកាប់សម្លាប់ជនស៊ីវិល ដែលបានកើតឡើងថ្មីៗនេះ ក្នុងនោះក៏មានអំពើហិង្សានៅក្រុងប្រេង បិនជូ Bentiu ស្ថិតនៅភាគខាងជើងប្រទេសផងដែរ។ យោងតាមអង្គការសហប្រជាជាតិ នៅទីនោះ ក្រុមឧទ្ទាមបានសម្លាប់មនុស្សជាង២០០នាក់។
អំពើហិង្សានៅស៊ូដង់ខាងត្បូង កើតចេញមកពីជម្លោះដណ្តើមអំណាចរវាង ប្រធានាធិបតីសាល់វ៉ា គៀ និង អតីតអនុប្រធានាធិបតី រៀក ម៉ាស្ហារ ដែលត្រូវបានគេដកពីតំណែងកាលពីខែកក្កដា ឆ្នាំមុននេះ។ លោកសាល់វ៉ា គៀ ហូតតំណែងលោកម៉ាស្ហារ ដោយចោទលោកម៉ាស្ហារថា បានព្យាយាមធ្វើរដ្ឋប្រហារទំលាក់រដ្ឋាភិបាល។ ការប្រយុទ្ធគ្នារវាងសកម្មជនគាំទ្រមេដឹកនាំទាំង២នេះ បានរាលដាលរហូតដល់សម្លាប់ជនស៊ីវិលសន្ធឹកសន្ធាប់។ ពិសេសទៅទៀត វាក៏ជាការកាប់សម្លាប់រវាងសហគមន៍មកពីជាតិពិន្ធុ២ផ្សេងគ្នាដែរ ព្រោះថា ប្រធានាធិបតីសាល់វ៉ា គៀ មានជាតិពិន្ធុឌីនកា ហើយលោក ម៉ាស្ហារ ជាគូសត្រូវរបស់លោក មកពីជាតិពិន្ធុនូអេ។ យោងតាមអ្នកសង្កេតការណ៍ អំពើហិង្សាបានសម្លាប់មនុស្សរាប់ពាន់នាក់ ហើយអាចឡើងដល់ម៉ឺននាក់ក៏ថាបាន។ មនុស្សជាងមួយលាននាក់ បាននាំគ្នាភៀសខ្លួន ទៅប្រទេសជិតខាង។
អំពើហិង្សានៅតែកើតឡើង ហើយជនស្លូតត្រង់នៅតែបន្តស្លាប់ ព្រោះថា គ្មានភាគីប្រយុទ្ធណាមួយព្រមចុះញ៉មគ្នាទេ។ ទោះជាភាគីទាំង២សម្រេចបានបទឈប់បាញ់ជាមួយគ្នា កាលពីថ្ងៃ២៣មករាក៏ដោយ។ អង្គការសហប្រជាជាតិចោទក្រុមឧទ្ទាមដែលគាំទ្រអតីតអនុប្រធានាធិបតីម៉ាស្ហារថា បានសម្លាប់ជនស៊ីវិលស្លូតត្រង់ ហើយក៏ទទួលស្គាល់ដែរថា អ្នកបង្កហិង្សានោះគឺទាំង២ភាគីតែម្តង គឺទាំងក្រុមឧទ្ទាម ទាំងក្រុមគាំទ្ររដ្ឋាភិបាល។ អង្គការសហប្រជាជាតិចោទទៀតថា ក្នុងការកាប់សម្លាប់ទៀតសោត ក្រុមឧទ្ទាមគាំទ្រអតីតអនុប្រធានាធិបតីម៉ាស្ហារ ដែលមានជាតិពន្ធុនូអេ សម្លាប់តែមនុស្សដែលមានជាតិពន្ធុឌីនកា តែប៉ុណ្ណោះ។ ពោលគឺមនុស្សមានជាតិពិន្ធុឌីនកា ដូចប្រធានាធិបតីសាល់វ៉ា គៀ។ ការរើសអើងជាតិពិន្ធុគ្នានេះ ក៏មានក្នុងជួររដ្ឋាភិបាលសាល់វ៉ា គៀដែរ។ កាលពីថ្ងៃពុធ ប្រធានាធិបតីបានដកតំណែងមេយោធាមួយរូប ដែលមានជាតិពិន្ធុនូអេ ហើយបានដាក់អ្នកជំនួសមកពីជាតិពិន្ធុឌីនកា ដូចប្រធានាធិបតី អោយឡើងកាន់កាប់តំណែងនេះវិញ។ ដោយឡែក ការដកតំណែងនេះ ប្រហែលអាចមកពីថា ក្រុមឧទ្ទាមវាយដណ្តើមបានពីរដ្ឋាភិបាល នូវក្រុងយុទ្ធសាស្ត្របិនជូ ស្ថិតនៅភាគខាងជើងប្រទេសដែរ។ ក្រុងនេះសំបូរប្រេង ផ្តល់ចំណូលចំបងបំផុតដល់សេដ្ឋកិច្ចជាតិ។
ប្រាកដណាស់ថា សហគមន៍អន្តរជាតិ និងអង្គការសហប្រជាជាតិបានគាំទ្រស៊ូដង់ខាងត្បូង ក្នុងការទទួលបានឯករាជ្យភាពពីប្រទេសស៊ូដង់ កាលពីខែកក្កដា ឆ្នាំ២០១១។ ប៉ុន្តែ ស្ថានភាពប្រទេសឯករាជ្យដ៏វ័យក្មេងនេះ នៅផុយស្រួយណាស់។ ជាជាងគិតគូរដល់សន្តិសុខស្ថិរភាពនយោបាយ មេដឹកនាំម្នាក់ៗបែរជាសម្លាប់គ្នា រើងអើងគ្នា ដណ្តើមអំណាចគ្នាទៅវិញ។ សហភាពអាហ្វ្រិកខ្លួនឯងផ្ទាល់ ដែលធ្លាប់ធ្វើជំនួបកំពូលរកដំណោះស្រាយហិង្សានេះដែរ ក៏នៅមិនទាន់ឃើញចេញវិធានការអ្វីយកជាការបាន។ ដូច្នេះ មានតែអង្គការសហប្រជាជាតិទេ ដែលមានអានុភាពលើសគេ ក្នុងការចាត់វិធានការម៉ឹងម៉ាត់ អោយបានឆាប់រហ័សបំផុត ព្រោះថា បើយឺតយ៉ាវ ជនល្មោភអំណាចអាហ្វ្រិក តែបន្តធ្វើអ្វីស្រេចតែចិត្ត បន្តរំលោភសិទ្ធិមនុស្ស ហើយជនដែលរងគ្រោះគ្មានអ្នកណាក្រៅពីជនស៊ីវិលនោះទេ។ ជនល្មោភអំណាចអាហ្វ្រិកទាំងអស់នេះ មិនត្រឹមមិនបានគិតគូរអាយុជីវិតមនុស្សទេ ថែមទាំងបានចោទគ្នាទៅវិញទៅមក ថាម្ខាងៗជាអ្នកបង្កហេតុទៀតផង។
កន្លងមក គេបានត្រឹមតែលឺលោកបាន គីមូន អគ្គលេខាធិការទូទៅនៃអង្គការសហប្រជាជាតិព្រមានថា នឹងស៊ើបអង្កេតលើបទឧក្រិដ្ឋនៅស៊ូដង់ខាងត្បូងប៉ុណ្ណោះ។ អង្គការសហប្រជាជាតិបានសម្រេចពិចារណាលើទណ្ឌកម្ម ប្រឆាំងស៊ូដង់នៅពេលនេះ ក៏ប្រហែលដោយសារតែ អង្គការសហប្រជាជាតិបានឃើញផ្ទាល់ភ្នែក នូវការកាប់សម្លាប់ជនស្លូតត្រង់ ជិត៦០នាក់ នៅមូលដ្ឋានជនភៀសខ្លួនមួយកន្លែង របស់អង្គការ នៅស៊ូដង់ខាងត្បូងដែរ។ ហើយប្រទេសមហាអំណាចអាមេរិកក៏បានស្រែករន្ធត់នឹងហេតុការណ៍អស់នេះដែរ រហូតដល់ជូនដំណឹងក្រុមប្រឹក្សាសន្តិសុខអង្គការសហប្រជាជាតិថា អាមេរិកត្រៀមអនុម័តទណ្ឌកម្មប្រឆាំងប្រទេសមួយនេះ។ អង្គការសហប្រជាជាតិដឹងច្បាស់និងលើកឡើងថា ប្រហែលជាមិនអាចសហការជាមួយរដ្ឋាភិបាលស៊ូដង់ខាងត្បូងនេះទៀតទេ ព្រោះថា អំពើកាប់សម្លាប់មនុស្ស មិនមែនជាស្នាដៃក្រុមឧទ្ទាមតែមួយក្រុមនោះទេ ក៏ជាស្នាដៃរបស់រដ្ឋាភិបាលផងដែរ។
ប៉ុន្តែសួរថា បើអង្គការសហប្រជាជាតិដាក់ទណ្ឌកម្មឡើង តើទណ្ឌកម្មទាំងនោះ មានលក្ខណៈដូចម្តេច អាចជាទណ្ឌកម្មម៉ឹងម៉ាត់ មានប្រសិទ្ធភាពប្រឆាំងនឹងអ្នកទទួលខុសត្រូវស៊ូដង់ខាងត្បូងទេ ? ព្រោះថា ទាំងក្រុមឧទ្ទាមរបស់អតីតអនុប្រធានាធិបតីម៉ាស្ហា ដែលធ្លាក់ពីតំណែង ទាំងក្រុមគាំទ្រប្រធានាធិបតីកាន់អំណាចសាល់វ៉ា គៀ មិនដែលបានគោរពតាមបទឈប់បាញ់នោះទេ។ ហើយអាជ្ញាធរក្នុងស្រុកក៏មិនអាចគ្រប់គ្រងស្ថិរភាពសន្តិសុខបានផង។ បើកងទ័ពមួកខៀវអង្គការសហប្រជាជាតិត្រូវការការសហការជ្រោមជ្រែងពីបណ្តាប្រទេសអាហ្វ្រិកផ្សេងទៀត ប្រហែលជាអាចជួបការពិបាក ព្រោះថា សហភាពអាហ្វ្រិកនៅពិបាកបង្កើតកងកម្លាំងដែលអាចចុះប្រតិបត្តិការភ្លាមៗ ពេលមានស្ថានការណ៍អាសន្នបានណាស់។
លើសពីនេះ អង្គការសហប្រជាជាតិហាក់នៅញញើតបញ្ជូនទ័ពទៅស៊ូដង់ខាងត្បូងដែរ។ កន្លងមក អង្គការសហប្រជាជាតិបានសម្រេចដាក់បន្ថែមទ័ពមួកខៀវ ៥០០០នាក់ ធ្វើអោយទ័ពមួកខៀវ ត្រូវកើនចំនួនដល់១ម៉ឺន២ពាន់៥រយនាក់។ ប៉ុន្តែ មានតែទ័ព៧០០នាក់ប៉ុណ្ណោះ ដែលមានវត្តមានក្នុងតំបន់។ ទន្ទឹមទណ្ឌកម្មដែលត្រូវដាក់ចេញ អង្គការសហប្រជាជាតិដឹងច្បាស់ថា ដល់ពេលដែលខ្លួនត្រូវគិតគូរមើលឡើងវិញ ពីអាណត្តិនិងតួនាទីបេសកកម្មទ័ពមួកខៀវនេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ