ស្រីលង្កាពង្រឹងសន្តិសុខក្រោយពីមានការវាយប្រហារប្រឆាំងសហគមន៍អ៊ីស្លាម
ក្រោយពី មានការវាយប្រហារមួយចំនួនពីសំណាក់ពួកអ្នកកាន់ព្រះពុទ្ធសាសនានិយមជ្រុលទៅលើសហគមន៍អ្នកកាន់សាសនាអ៊ីស្លាមមក កងកុម្មង់ដូពិសេសរបស់ប៉ូលិសស្រីលង្កា បានប្រតិបត្តិការយាមត្បាតនៅតាមជាយក្រុងកូឡុំបូនៅថ្ងៃសុក្រ២៩មីនានេះ។ ការវាយប្រហារចុងក្រោយ ប្រព្រឹត្តទៅនៅយប់ថ្ងៃព្រហស្បតិ៍ ម្សិលមិញ ដោយក្រុមជនជាច្រើនរយនាក់ដែលជាអ្នកនិយមជ្រុលខាងលទ្ធិព្រះពុទ្ធសាសនា បានចូលប្លន់និងដុតបំផ្លាញហាងលក់ទំនិញមួយដែលកាន់កាប់ដោយប្រជាជនអ៊ីស្លាមម្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
យ៉ាងតិចជន ៣នាក់ត្រូវរងរបួស នៅខណៈដែលក្រុមជនសេរីលង្កាមួយហ្វូង ជាអ្នកនិយមជ្រុលលិទ្ធិព្រះពុទ្ធសាសនា បានគុបចោលដុំថ្មនិងបន្ទាប់មកប្លន់និងដុតបំផ្លាញហាងលក់សំលៀកបំពាក់របស់អ្នកកាន់សាសនាអ៊ីស្លាមម្នាក់កាលពីយប់មិញ នេះជាការបញ្ជាក់របស់នគរបាលស្រីលង្កា។
អ្នកនាំពាក្យម្នាក់របស់ប៉ូលិសម្នាក់ បានប្រាប់ទីភ្នាក់ងារព័ត៌មានបារាំង AFP ថា កងកុម្ម៉ង់ដូពិសេសនិងប៉ូលិសស្រី បានដាក់ពង្រាយគ្នាបន្ថែមទៀតដើម្បីធ្វើប្រតិបត្តិការរក្សាសន្តិសុខនៅតំបន់ជាយទីក្រុងកូឡុមបូ។ ក្រោយពីឧប្បត្តិហេតុហិង្សានេះមក ប៉ូលិស ពុំបានធ្វើការចាប់ខ្លួនជនឈ្លានពានណាម្នាក់ឡើយ។
អាជ្ញាធរស្រីលង្កា មិនបានថ្លែងបញ្ជាក់អ្វីដែរ ពីមូលហេតុនៃការវាយប្រហារនេះ ក៏ប៉ុន្តែ យោងតាមប្រភពផ្លូវការ ការវាយប្រហារប្រហែលជាបានផ្តើមឡើងក្នុងក្របខណ្ឌរបស់ចលនាដាច់ខាតនៃក្រុមអ្នកកាន់ព្រះពុទ្ធសានាប្រឆាំងទល់នឹងសហគមន៍សាសនាអ៊ីស្លាមដែលមានភាគតិចនៅក្នុងប្រទេសស្រីលង្កា។
គួររំលឹកថា ឧប្បត្តិហេតុកាលពីយប់ថ្ងៃព្រហស្បតិ៍ម្សិលមិញ បានកើតឡើងមួយថ្ងៃមុនការរៀបចំបង្កើតឲ្យមានលេខទូរស័ព្ទជំនួយមួយរបស់ប៉ូលិសស្រីលង្កា ដើម្បីរង់ចាំទទួលពាក្យបណ្តឹងតវ៉ាពីប្រជាជនរងគ្រោះ ដោយសារពួកជនជាប់សង្ស័យក្នុង បទញុះញង់ឲ្យមានអំពើហិង្សា ចងគំនុំសាសនាឬក៏ការប្រកាន់ពូជសាសន៍។
កាលពីខែមករាកន្លងមកនេះ ហ្វូងមនុស្សមួយក្រុមបានលើកគ្នាគប់ដុំថ្មប្រឆាំងទៅលើបណ្តាញហាងលក់សំលៀកបំពាក់ដ៏ធំមួយនៅជិតទីក្រុងកូឡុំបូដែលកាន់កាប់ដោយប្រជាជនអ៊ីស្លាម។ នៅខែមីនានេះទៀត អ្នកដឹកនាំសាសនាអ៊ីស្លាមមួយរូប បានសម្រេចចិត្តដកផ្លាកសញ្ញា Halal ចេញពីម្ហូបអាហារ អ៊ីស្លាមវិញ ដើម្បីភាពសុខសាន្តនៅក្នុងសហគមន៍ នានា ក្រោយពីមានយុទ្ធនាការ ធ្វើពហិការមិនទិញទំនិញមួយ ដែលធ្វើឡើងចលនាដាច់ខាតរបស់អ្នកកាន់លទ្ធិពុទ្ធសាសនា។
សូមបញ្ជាក់ថា សេរីលង្កាជាកោះមួយដែលមានអ្នកកាន់លទ្ធិព្រះពុទ្ធសាសនាចំនួនដល់ទៅ៧០% ចំណែក ឯ អ្នកកាន់សាសនាអ៊ីស្លាមវិញ មានតែ១០%ប៉ុណ្ណោះ នៃចំនួនប្រជាជន សរុប២០លាននាក់នៅក្នុងប្រទេស។
ម្យ៉ាងទៀត កោះសេរីលង្កា ក៏ធ្លាប់ទទួលរងគ្រោះម្តងរួមមកហើយ នៅក្នុងសង្គ្រាមប្រកាន់ពូជសាសន៍ ដ៏កាចសាហាវមួយនៅចន្លោះឆ្នាំ ១៩៧២និង២០០៩ រវាងប្រជាជន តាមូលកាន់សាសនាហិនឌូ និងប្រជាជនសេរីលង្កាកាន់សាសនាព្រះពុទ្ធដែលមានភាគច្រើននៅក្នុងប្រទេស។ ជម្លោះរវាងសហគមន៍សាសនានេះ បានសម្លាប់ជីវិតមនុស្សយ៉ាងតិច ១០ ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ