អង្គការសហប្រជាជាតិបិទការិយាល័យនៅក្រុងកូឡុំបូ រដ្ឋមន្ត្រីធ្វើកូដកម្មបង្អត់បាយ
អគ្គលេខាធិការអង្គការសហប្រជាជាតិ បាន គីមូន បានប្រកាសបិទការិយាល័យរបស់ខ្លួនមួយនៅទីក្រុងកូឡុំបូ ប្រទេសសេរីលង្កា និងកោះហៅតំណាងជាន់ខ្ពស់របស់អង្គការឲ្យត្រឡប់ចូលស្រុកវិញ នៅថ្ងៃព្រហស្បតិ៍ម្សិលមិញ បន្ទាប់ពីរដ្ឋមន្ត្រីក្រសួងលំនៅដ្ឋាន លោក វីម៉ាល វេរ៉ាវ៉ាន់សា (Wimal Weerawansa) បានដឹកនាំធ្វើបាតុកម្ម និងកូដកម្មបង្អត់អាហារខ្លួនឯង នៅមុខការិយាល័យអង្គការសហប្រជាជាតិ ពេញមួយសប្តាហ៍នេះមក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ចលនាបាតុកម្មជាច្រើន ដែលដឹកនាំ ដោយលោករដ្ឋមន្ត្រី វីម៉ាល វេរ៉ាវ៉ាន់សា (Wimal Weerawansa) សម្ព័ន្ធមិត្តរបស់ប្រធានាធិបតីសេរីលង្កា រ៉ាចាបាក់សា ត្រូវបានរៀបចំឡើងនៅមុខការិយាល័យរបស់អង្គការសហប្រជាជាតិ នៅទីក្រុងកូឡុំបូ តាំងពីដើមសប្តាហ៍មក ដោយមានការចូលរួមពីសំណាក់ក្រុមបាតុករជាង១ពាន់នាក់។
អង្គការសហប្រជាជាតិមិនអាចទទួលយកទង្វើជាអវិជ្ជមានរបស់មន្ត្រី និងរដ្ឋាភិបាលសេរីលង្កានេះបានទេ ទើប លោកអគ្គលេខាធិការ បាន គីមូន សម្រេចបិទមជ្ឈមណ្ឌល កម្មវិធីអភិវឌ្ឍន៍របស់អង្គការ សហប្រជាជាតិ ហៅកាត់ថា (Pnud)នៅកូឡុំបូ និងកោះហៅអ្នកសម្របសម្រួល អ.ស.ប. នៅសេរីលង្កាឲ្យចូលមកក្រុងញូយក ដើម្បីពិគ្រោះពិភាក្សាគ្នា។
ជាងនេះទៅទៀត នៅថ្ងៃទីបីនែបាតុកម្ម គឺនៅថ្ងៃព្រហស្បតិ៍ទី ៨កក្កដា ២០១០ម្សិលមិញ រដ្ឋមន្ត្រីក្រសួងលំនៅដ្ឋាន លោក វីម៉ាល វេរ៉ាវ៉ាន់សា ដែលជាមេដឹកនាំចលនាបាតុកម្មប្រឆាំងនឹងគម្រោងបង្កើតគណៈកម្មាការស៊ើបអង្កេតលើបទឧក្រិដ្ឋ រំលោភសិទ្ធិមនុស្សក្នុងសង្គ្រាមរបស់យោធារដ្ឋាភិបាលសេរីលង្កា បានចេញមុខ ការពារកិត្តិយសរបស់កងទ័ព ដោយបានប្រកាស ធ្វើកូដកម្ម បង្អត់អាហារខ្លួនឯងឲ្យស្លាប់ នៅមុខការិយាល័យអង្គការសហប្រជាជាតិតែម្តង។ ចំណែកក្រុមបាតុករវិញបានប្រកាសថានឹងបន្តសកម្មភាពរបស់ខ្លួនទៀត ដើម្បីបណ្តេញអ្នកឯកទេសបរទេសចេញពីស្រុកអស់។
ប្រឈមនឹងឥរិយាបថរបស់អាជ្ញាធរសេរីលង្កានេះ សហភាពអឺរុបបានចូលរួមចំណែកជាមួយអង្គការសហប្រជាជាតិ ដោយដាក់ទណ្ឌកម្មសេដ្ឋកិច្ច ៖ ចាប់ពីថ្ងៃទី១៥សីហានេះទៅ សេរីលង្កានឹងបាត់បង់សិទ្ធិអនុគ្រោះក្នុងទីផ្សារសហភាពអឺរុបហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ