អ.ស.ប ចេញផ្សាយរបាយការណ៍ស្តីពីសង្រ្គាមស៊ីវិលនៅក្នុងប្រទេសសេរីលង្កា
នៅថ្ងៃច័ន្ទ ទី២៥ មេសាម្សិលមិញ អង្គការសហប្រជាជាតិបានចេញរបាយការណ៍មួយស្តីពីទឡ្ហីករណ៍នៃបទឧក្រិដ្ឋនាសម័យសង្រ្គាមក្នុងឆ្នំា ២០០៩នៅប្រទេសសេរីលង្កា។ គឺជាសង្រ្គាមរវាងកងកម្លំាងរដ្ឋាភិបាលទីក្រុងកូឡុមបូ និងក្រុមឧទ្ទាមខ្លារំដោះអេឡាម តាមូល។ យោងតាមរបាយការណ៍ ភាគីទំាងពីរសុទ្ធតែបានប្រព្រឹត្តិនូវឧក្រិដ្ឋកម្មសង្រ្គាម និងឧក្រិដ្ឋកម្មប្រឆំាងមនុស្សជាតិក្នុងសម័យសង្រ្គាមរវាងគ្នា។
ចុះផ្សាយនៅថ្ងៃ៖
ស្តាប់ - ០២:១៨
នៅទីបំផុត និងបន្ទាប់ពីមានការពន្យារពេលអស់ជាច្រើនលើក ច្រើនសា ដោយហេតុការជំទាស់ពីរដ្ឋាភិបាលសេរីលង្កាមក អង្គការសហប្រជាជាតិបានសម្រេចចិត្តចុះផ្សាយរបាយការណ៍មួយដែលគ្រប់គ្នាបានទន្ទឹងរង់ចំាជាយូរមកហើយ។ គឺជារបាយការណ៍ស្តីពីបទឧក្រិដ្ឋមួយចំនួនដែលភាគីរដ្ឋាភិបាល និងក្រុមឧទ្ទាមតាមូលបានប្រព្រឹត្តនាសម័យសង្រ្គាមរវាងគ្នាក្នុងឆ្នំា ២០០៩។ យោងតាមរបាយការណ៍ មានភស្តុតាងជាច្រើន និងគ្រប់គ្រាន់ដែលបានបង្ហាញយ៉ាងច្បាស់ពីឧក្រិដ្ឋកម្មសង្រ្គាម និងឧក្រិដ្ឋកម្មប្រឆំាងមនុស្សជាតិនៅក្នុងប្រទេសសេរីលង្កានាសម័យសង្រ្គាម។
សេចក្តីសន្និដ្ឋានរបៀបនេះ ដោយក្រុមអ្នកឯកទេសរបស់អង្គការសហប្រជាជាតិលើកឡើងថា នៅក្នុងពេលធ្វើសង្រ្គាមប្រឆំាងនឹងក្រុមឧទ្ទាមតាមូលក្នុងឆ្នំា ២០០៩ កម្លំាងទ័ពរដ្ឋាភិបាលបានទម្លាក់គ្រាប់បែកទៅលើប្រជាជនស៊ីវិលដោយចេតនា។ ចំណែកក្រុមឧទ្ទាមតាមូលវិញ បានយកប្រជាជនស៊ីវិលធ្វើជាខែល ដោយរារំាងមិនឲ្យពួកគេរត់ចេញពីតំបន់ជម្លោះឡើយ។ ដូច្នេះ ភាគីជម្លោះទំាងពីរសុទ្ធតែបានប្រព្រឹត្តនូវឧក្រិដ្ឋកម្មសង្រ្គាម និងឧក្រិដ្ឋកម្មប្រឆំាងមនុស្សជាតិដូចគ្នា។
ដោយឡែក ក្រៅពីការទម្លាក់កំហុសទៅលើ រដ្ឋាភិបាលទីក្រុងកូឡុមបូ និងក្រុមឧទ្ទាមខ្លារំដោះអេឡាម តាមូល របាយការណ៍ក៏បានទិតៀនអង្គការសហប្រជាជាតិ ពីបរាជ័យក្នុងបេសកកម្មជួយការពារជនស៊ីវិល និងពីការរក្សាភាពស្ងៀមស្ងាត់របស់ខ្លួនជុំវិញចំនួនអ្នកស្លាប់រាប់ពាន់នាក់ក្នុងចន្លោះខែឧសភា និងមិថុនា ឆ្នំា ២០០៩។
នៅក្នុងសេចក្តីសន្និដ្ឋានចុងក្រោយ របាយការណ៍បានបញ្ជាក់ពីភាពចំាបាច់ក្នុងការបង្កើតឲ្យមានគណៈកម្មការស៊ើបអង្កេតអន្តរជាតិមួយជុំវិញការសម្លាប់រង្គាលជនស៊ីវិលនៅប្រទេសសេរីលង្កាក្នុងសម័យសង្រ្គាមឆ្នំា ២០០៩។ ក៏ប៉ុន្តែ លោកអគ្គលេខាធិការអង្គការសហប្រជាជាតិ បាន គីមូនបានប្រកាសថា លោកគ្មានសិទ្ធិអំណាចអ្វីក្នុងការស្នើឲ្យមានការស៊ើបអង្កេតជាផ្លូវការលើបញ្ហានេះទេ និងបានប្រគល់រឿងនេះទៅឲ្យរដ្ឋាភិបាលសេរីលង្កា ក្រុមប្រឹក្សាសន្តិសុខអង្គការសហប្រជាជាតិ ឬមួយក៏ស្ថាប័នអន្តរជាតិផ្សេងទៀត ជាអ្នកសម្រេច។
ប៉ុន្តែចម្លើយពីរដ្ឋាភិបាលសេរីលង្កាគឺច្បាស់ហើយ ដោយគេមិនចង់ឲ្យអង្គការសហប្រជាជាតិ ឬមួយក៏ស្ថាប័នអន្តរជាតិផ្សេងទៀតលូកដៃកកូរ កកាយកិច្ចការផ្ទៃក្នុងរបស់ខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ