នៅពេលអ៊ីស្រាអែលកំពុងបង្កើនការវាយប្រហារលើពួកហាម៉ាស់ សហគមន៍អន្តរជាតិបន្តអំពាវនាវឲ្យមានការអត់ធ្មត់
ចុះផ្សាយនៅថ្ងៃ៖
ស្តាប់ - ០៨:៣៨
ថ្ងៃអាទិត្យ ទី១៣ កក្កដានេះ ឈានចូលដល់ថ្ងៃទី៦ហើយដែលកងទ័ពអ៊ីស្រាអែលបានធ្វើការទម្លាក់គ្រាប់បែកលើតំបន់ហ្កាហ្សា។ តំបន់ហ្កាហ្សាជាដែនដីប៉ាឡេស្តីនដែលកំពុងកាន់កាប់ដោយចលនាប៉ាឡេស្ទីនហាម៉ាស់។ គឺចលនានេះហើយដែលកំពុងបន្តបាញ់ផ្លោងគ្រាប់រ៉ូកែតចូលក្នុងទឹកដីអ៊ីស្រាអែល និងដែលបានជម្រុញឲ្យទាហានអ៊ីស្រាអែលធ្វើការវាយបកវិញយ៉ាងចាស់ដៃនាពេលនេះ។ ភាគីដែលកំពុងទទួលរងការខាតបង់ច្រើនជាងគេគឺប៉ាឡេស្ទីន ដោយមានស្លាប់ជនជាតិប៉ាឡេស្ទីនជាង ១៦០នាក់ និងរងរបួសជាង ៥០០នាក់ផ្សេងទៀតតំាងពីថ្ងៃអង្គារដើមសប្តាហ៍នេះមក។ អ៊ីស្រាអែល និងចលនាប៉ាឡេស្ទីនហាម៉ាស់បន្តរក្សាជំហររៀងៗខ្លួន។ ចំណែកសហគមន៍អន្តរជាតិក៏ហាក់ដូចជាអសមត្ថភាពនៅចំពោះមុខព្រឹត្តិការណ៍ច្រំដែលមួយនេះ។
អ្វីដែលគួរឲ្យកត់សម្គាល់ក្នុងថ្ងៃនេះ គឺការដែលមានកងកម្មង់ដូអ៊ីស្រាអែលម្នាក់បានឆ្លងចូលក្នុងតំបន់ហ្កាហ្សា ទឹកដីប៉ាឡេស្ទីនជាលើកទី១ នៅព្រលឹមស្រាងៗព្រឹកមិញ។ ប្រភពព័ត៌មានពីកងទ័ពអ៊ីស្រាអែលឲ្យដឹងថា កងកម្មង់ដូរបស់ខ្លួនបានចូលក្នុងតំបន់ហ្កាហ្សាដើម្បីបំផ្លាញទីតំាងបាញ់គ្រាប់រ៉ូកែតរបស់ពួកហាម៉ាស់ដែលកំពុងប្រើដើម្បីបាញ់ផ្លោងគ្រាប់រ៉ូកែតចូលក្នុងទឹកដីអ៊ីស្រាអែល។ វត្តមានរបស់កងកម្មង់ដូអ៊ីស្រាអែលក្នុងតំបន់ហ្កាហ្សាបានបង្កឲ្យមានការបាញ់តគ្នាមួយប្រាវរវាងទាហានអ៊ីស្រាអែល និងក្រុមប្រដាប់អាវុធហាម៉ាស់។ បើយោងតាមអ្នកនំាពាក្យរបស់កងទ័ពអ៊ីស្រាអែល ការប៉ះទង្គិចគ្នានោះបានបណ្តាលឲ្យទាហានអ៊ីស្រាអែលរងរបួសស្រាលចំនួន ៤នាក់។ នៅពេលនេះ ភាគីនីមួយៗសុទ្ធតែបានផ្តល់ចម្លើយរៀងៗខ្លួន។ កងទ័ពអ៊ីស្រាអែលបានចាត់ទុកជាជោគជ័យមួយ ដោយពួកគេបំផ្លាញបានទីតំាងបាញ់គ្រាប់រ៉ូកែតរបស់ពួកហាម៉ាស់។ រីឯពួកហាម៉ាស់បានឆ្លើយតបវិញថា ពួកគេបានរារំាងមិនឲ្យកងកម្មង់ដូអ៊ីស្រាអែលចូលក្នុងដែនដីខ្លួនបានទេ។ យ៉ាងណាក៏ដោយ នេះជាលើកទី១បង្អស់តំាងពីអ៊ីស្រាអែលបានបើកប្រតិបត្តិការផ្លូវអាកាសលើពួកហាម៉ាស់មក ដែលមានការបាញ់ត ទល់គ្នាដោយផ្ទាល់រវាងទាហានអ៊ីស្រាអែល និងពួកប៉ាឡេស្ទីនហាម៉ាស់។
កងទ័ពអ៊ីស្រាអែលកំពុងត្រៀមបើកការវាយប្រហារផ្លូវគោក !
គេសង្កេតឃើញថា កងទ័ពអ៊ីស្រាអែលបាន និងកំពុងរៀបចំជើងព្រួលយ៉ាងសម្បើមអស្ចារ្យក្នុងការត្រៀមបើកការវាយប្រហារផ្លូវគោកចូលក្នុងតំបន់ហ្កាហ្សា ទឹកដីប៉ាឡេស្ទីនក្រោមទ្រង់ទ្រាយធំ។ នៅតាមខ្សែបន្ទាត់ដែលខណ្ឌចែកដែនដីអ៊ីស្រាអែល និងប៉ាឡេស្ទីន កងទ័ពអ៊ីស្រាអែលបានដាក់ពង្រាយរថក្រោះជាច្រើនគ្រឿង រួមជាមួយនឹងកំាភ្លើងធំជាច្រើនដើម។ ទន្ទឹមគ្នានេះ រដ្ឋាភិបាលអ៊ីស្រាអែលក៏បានកោះហៅទាហានបម្រុងប្រមាណជា ៣០ ០០០នាក់មកប្រើដែរ។ ដោយឡែក តំាងពីយប់ថ្ងៃសៅរ៍ មកដល់ព្រឹកថ្ងៃអាទិត្យនេះ កងទ័ពអ៊ីស្រាអែលបានអំនាវនាវដល់ប្រជាជនប៉ាឡេស្ទីនដែលរស់នៅក្នុងតំបន់ហ្ហាហ្សាប៉ែកខាងជើងឲ្យចាកចេញពីលំនៅដ្ឋានទៅកាន់តំបន់ប៉ែកខាងត្បូងដែលមានសុវត្ថិភាព។
បើតាមការអះអាងរបស់ថ្នាក់ដឹកនំាអ៊ីស្រាអែល ប្រតិបត្តិផ្លូវគោកនឹងត្រូវចាប់ផ្តើមនៅប៉ុន្មានថ្ងៃខាងមុខ ប្រសិនបើពួកហាម៉ាស់នៅតែបន្តបាញ់ផ្លោងគ្រាប់រ៉ូកែតចូលក្នុងទឹកដីអ៊ីស្រាអែលទៀត។ យ៉ាងណាក៏ដោយ ប្រតិបត្តិការផ្លូវអាកាសកំពុងបន្តមានយ៉ាងគគ្រឹកគគ្រេង ដោយនៅព្រឹកថ្ងៃអាទិត្យនេះ គ្រាប់បែកអ៊ីស្រាអែលបានសម្លាប់ក្មេងប៉ាឡេស្ទីនអាយុ ១៤ឆ្នំាម្នាក់ និងស្រ្តីអាយុ ៤៤ឆ្នំាម្នាក់។ គ្រាន់តែមួយយប់ថ្ងៃសៅរ៍ម្សិលមិញ មានស្លាប់ប្រជាជនប៉ាឡេស្ទីនរហូតដល់ទៅ ៥៦នាក់នៅក្រោមគ្រាប់បែកអ៊ីស្រាអែល។ ជាសរុបក្នុងរយៈពេល ៦ថ្ងៃនេះ ប្រតិបត្តិផ្លូវអាកាសរបស់កងទ័ពអ៊ីស្រាអែលលើតំបន់ហ្កាហ្សា ទឹកដីប៉ាឡេស្ទីនបានបណ្តាលឲ្យស្លាប់ជនជាតិប៉ាឡេស្ទីន ១៦២នាក់។
គួររម្លឹកជូនថា កាលពីខែវិច្ឆិកា ឆ្នំា ២០១២ កងទ័ពអ៊ីស្រាអែលក៏ធ្លាប់បានបើកការវាយប្រហារលើតំបន់ហ្កាហ្សាក្នុងទឹកដីប៉ាឡេស្ទីនម្តងហើយ ដោយបានបណ្តាលឲ្យស្លាប់ប្រជាជនប៉ាឡេស្ទីន ១៧៧នាក់ និងជនជាតិអ៊ីស្រាអែលចំនួន ៦នាក់តែក្នុងរយៈពេល ១សប្តាហ៍។
អសមត្ថភាពរបស់សហគមន៍អន្តរជាតិនៅចំពោះមុខវិបត្តិអ៊ីស្រាអែល ប៉ាឡេស្ទីន
ជម្លោះអ៊ីស្រាអែល និងប៉ាឡេស្ទីនពេលនេះ ក៏គ្មានអ្វីខុសប្លែកអ្វីពីជម្លោះលើកមុនៗទេ ហើយប្រតិកម្មរបស់សហគមន៍អន្តរជាតិទៀតសោត ក៏គ្មានអ្វីថ្មីគួរឲ្យចាប់អារម្មណ៍ដែរ។ ក៏ដូចសព្វមួយដង ជំហរផ្ទុយគ្នានៅផ្ទៃក្នុងសហគមន៍អន្តរជាតិកំពុងបន្តមានរវាងក្រុមប្រទេសដែលគំាទ្រអ៊ីស្រាអែល និងក្រុមប្រទេសដែលគំាទ្រប៉ាឡេស្ទីន។ ក៏ដូចសព្វមួយដង សហគមន៍អន្តរជាតិមិនដែលមានជំហរច្បាស់លាស់អ្វីទេចំពោះសំណុំរឿងអ៊ីស្រាអែល ប៉ាឡេស្ទីន។ នៅលើកនេះទៀត ក្រុមប្រឹក្សាសន្តិសុខអង្គការសហប្រជាជាតិដែលបានកោះប្រជុំបន្ទាន់នៅយប់ថ្ងៃសៅរ៍ ក៏បានត្រឹមតែចេញសេចក្តីថ្លែងការណ៍មួយដោយថ្កោលទោសការសម្លាប់ជនស៊ីវិល និងអំពាវនាវភាគីជម្លោះឲ្យមានការអត់ធ្មត់ប៉ុណ្ណោះ ពោលមិនបានចេញសេចក្តីសម្រេចណាមួយយកជាសាច់ការបានទេ។ មួយវិញទៀត គ្រាន់តែពាក្យពេចន៍នៅក្នុងសេចក្តីថ្លែងការណ៍សាមញ្ញនោះ ក៏ត្រូវបានគេថ្លឹងថ្លែងត្រឹមត្រូវ ដោយមិនចង់ឲ្យមានភាគីណាទើសទាល់ចិត្តទេ។
ជម្លោះអ៊ីស្រាអែល-ប៉ាឡេស្ទីនគ្របដណ្តប់លើកិច្ចប្រជុំ ៥បូក១ស្តីពីនុយក្លេអ៊ែរអ៊ីរ៉ង់
នៅថ្ងៃអាទិត្យ ទី១៣ កក្កដានេះ ក្នុងទីក្រុងវីយែន ប្រទេសអូទ្រីស បណ្តារដ្ឋមន្រ្តីការបរទេសនៃប្រទេសលោកខាងលិចបានរួមប្រជុំគ្នាដើម្បីជជែកពីសំណុំរឿងនុយក្លេអ៊ែររបស់ប្រទេសអ៊ីរ៉ង់។ ជាកិច្ចប្រជុំដែលបានធ្វើឡើង ចំពេលដែលវិបត្តិរវាងអ៊ីស្រាអែល និងប៉ាឡេស្ទីនបានផ្ទុះជាថ្មីនៅពេលនេះ។ ដូច្នេះ នេះជាបច្ចុប្បន្នភាពក្តៅគគុកមួយដែលកិច្ចប្រជុំត្រូវលើកយកទៅជជែកដោយចៀសមិនរួច។ បើយោងតាមលោកប្រមុខការទូតអង់គ្លេសវីល្លីយ៉ាំ ហែក កិច្ចប្រជុំនឹងព្យាយាមស្វែករកដំណោះស្រាយជាលក្ខណៈអន្តរជាតិមួយដែលអាចទទួលយកបានទំាងអស់គ្នាក្នុងការឈានទៅរកបទឈប់បាញ់មួយ។ តែក្រុមអ្នកវិភាគបានប្រមើលមើលជាមុនថា នឹងគ្មានលទ្ធផលអ្វីជាដុំកំភួន ក្រៅតែពីការអំពាវនាវឲ្យភាគីជម្លោះបញ្ឈប់អធិកររវាងគ្នា និងមានការអត់ធ្មត់តែប៉ុណ្ណោះ។
និយាយពីកម្មវត្ថុចម្បងនៃកិច្ចប្រជុំ ៥ បូក ១ មានអាមេរិក អង់គ្លេស បារំាង រុស្ស៊ី ចិន បូកនឹងអាល្លឺម៉ង់វិញ គឺដើម្បីស្វែងរកកិច្ចព្រមព្រៀងចុងក្រោយមួយស្តីពីនុយក្លែអ៊ែរអ៊ីរ៉ង់។ សូមរម្លឹកជូនថា កាលពីខែវិច្ឆិកា ឆ្នំា ២០១៣ កិច្ចព្រមព្រៀងបឋមមួយស្តីពីនុយក្លេអ៊ែរអ៊ីរ៉ង់ត្រូវបានចុះហត្ថលេខាក្នុងទីក្រុងហ្សឺណែវ ប្រទេសស្វីស។ កិច្ចព្រមព្រៀងកាលណោះបានតម្រូវឲ្យអ៊ីរ៉ង់បញ្ឈប់កម្មវិធីនុយក្លេអ៊ែររបស់ខ្លួន ជាថ្នូរនឹងការលើកទ័ណ្ឌកម្មសេដ្ឋកិច្ចអន្តរជាតិ។ កិច្ចប្រជុំថ្ងៃនេះត្រូវបានគ្រប់គ្នាចាត់ទុកជាទឹកផ្តាច់ព័ត្រ ព្រោះគេត្រូវស្វែងរកកិច្ចព្រមព្រៀងចុងក្រោយមួយ ឲ្យបានមុនថ្ងៃទី២០ កក្កដាខាងមុខ។
តែគ្រប់គ្នាបានទទួលស្គាល់ថា នេះជាដំណាក់កាលមួយដ៏លំបាក ព្រោះនៅមានបញ្ហាចម្រូងចម្រាសមួយចំនួនដែលគេពិបាកនិយាយជម្នះអ៊ីរ៉ង់ ពិសេសទាក់ទងនឹងការកម្រិតឲ្យអ៊ីរ៉ង់ធ្វើការចម្រើនធាតុអ៊ុយរ៉ាញ៉ូមដោយខ្លួនឯង។ ត្រង់ចំណុចនេះ ប្រមុខសាសនាអ៊ីរ៉ង់អាលី ខាមេណីដែលជាអ្នកមានឥទ្ធិពលខ្លំាងជាងគេបានរម្លឹកជាថ្មីថា អ៊ីរ៉ង់ត្រូវការបង្កើនការចម្រើនធាតុអ៊ុយរ៉ាញ៉ូមដោយខ្លួនឯងឲ្យដល់កម្រិតមួយដែលអាចផលិតគ្រឿងបញ្ឆះសម្រាប់អនាគតមជ្ឈមណ្ឌលនុយក្លេអ៊ែររបស់ខ្លួន។ ឃើញថា ផ្លូវដែលត្រូវដើរនៅវែងឆ្ងាយ ដើម្បីអាចសម្រេចកិច្ចព្រមព្រៀងចុងក្រោយមួយស្តីពីនុយក្លេអ៊ែរអ៊ីរ៉ង់ដ៏ចម្រូងចម្រាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ