ស៊ីរី៖រថក្រោះតួកគីប្រឈមផ្ទាល់នឹងកងកម្លាំងគួដឌីស្ថានជាលើកដំបូង
ចុះផ្សាយនៅថ្ងៃ៖
ស្តាប់ - ០៤:១៥
ថ្ងៃអាទិត្យនេះ កងទ័ពតួកគីបានបន្តទំលាក់គ្រាប់បែកលើក្រុមប្រយុទ្ធគួដឌីស្ថាន នៅភាគខាងជើងស៊ីរី។ មានជនស៊ីវិលយ៉ាងហោច៣៥នាក់បានស្លាប់ដោយការទំលាក់គ្រាប់បែកតួកគី។ជាលើកទី១ ថ្ងៃសៅរ៍ម្សិលមិញ រថក្រោះតួកគីបានប្រឈមមុខផ្ទាល់ជាលើកដំបូង ជាមួយកងកម្លាំងគួដឌីស្ថាន រឺក៏ក្រុមប្រយុទ្ធដែលគាំទ្រដោយពួកគួដឌីស្ថាន នៅភាគខាងជើងស៊ីរី។ តាំងពីមានប្រតិបត្តិការយោធាតួកគី ក្នុងទឹកដីស៊ីរី នេះជាលើកទី១ដែរ ដែលមានទាហានតួកគីម្នាក់ស្លាប់ និង៣នាក់ទៀតរបួស ក្នុងការវាយ ប្រហាររ៉ុកកែត របស់ក្រុមប្រយុទ្ធគួដឌីស្ថាន ទៅលើរថក្រោះតួកគី២គ្រឿង នៅស្រុកចារ៉ប្លូស។
ថ្មីៗនេះ តួកគីទើបនឹងជួយក្រុមឧទ្ទាមអោយវាយយកស្រុកចារ៉ាប្លូសនេះ បានពីក្រុមរដ្ឋអ៊ីស្លាមមកវិញ។
អង្គការសហប្រជាជាតិបង្ខំអោយគ្រប់ភាគីជម្លោះសម្រេចចិត្តអោយដាច់ស្រេចនៅថ្ងៃអាទិត្យនេះ ថាតើពួកគេត្រូវផ្អាកបាញ់គ្នា៤៨ម៉ោង រឺយ៉ាងណា ដើម្បីអាចអោយគេដឹកស្បៀងមនុស្សធម៌ ទៅជួយប្រជាជនក្រុងអាឡិប។
កងទ័ពតួកគីនិងក្រុមប្រយុទ្ធគួដឌីស្ថានស៊ីរី កាន់តែតានតឹងនឹងគ្នា ក្រោយមរណភាពទាហានតួកគីជាលើកដំបូង
មិនត្រឹមតែរារែកនឹងដកថយពីភាគខាងលិចទន្លេអឺហ្វ្រាត តាមព្រំដែនតួកគី កងកម្លាំងគួដឌីស្ថានបែរជានៅបន្តបង្កភាពតានតឹងជាមួយតួកគី ដោយបានវាយប្រហាររថក្រោះតួកគីដល់ទៅ២គ្រឿង។ ទាហានតួកគីស្លាប់ម្នាក់ របួស៣នាក់ ពេលនេះ តួកគីប្រហែលពិបាកផ្សះផ្សាជាមួយក្រុមគួដណាស់។
តាំងពីថ្ងៃពុធមក តួកគីចេញប្រតិបត្តិការយោធា នៅស៊ីរី ឈ្មោះថា “ខែលទន្លេអឺហ្វ្រាត” មិនត្រឹមដើម្បីកំទេចក្រុមជីហាតរដ្ឋអ៊ីស្លាមតាមព្រំដែនជាប់តួកគីទេ តែក៏ដើម្បីបង្ខំអោយកងកម្លាំងគួដឌីស្ថាន ដកថយពីភាគខាងលិចទន្លេ អឺហ្វ្រាត ឆ្ពោះទៅភាគខាងកើតវិញដែរ។ ក្រុមគួដឌីស្ថានតែងធ្វើចលនាផ្តាច់ទឹកដីពីតួកគី រឺក៏ស៊ីរី។ តួកគីមិនចង់ឃើញក្រុមគួដឌីស្ថានពង្រីកដែនដីនៅតាមបណ្តោយព្រំដែនតួកគីទេ។
នៅភាគខាងលិចទន្លេអឺហ្វ្រាត មានស្រុកម៉ាន់ប៊ីជ របស់ស៊ីរី។ ស្រុកនេះ ស្ថិតក្បែរព្រំដែនតួកគី។ ក្រុមប្រយុទ្ធគួដឌីស្ថាន និងក្រុមប្រយុទ្ធអារ៉ាប់ ជាដៃគូបានវាយដណ្តើមយកស្រុកម៉ាន់ប៊ីជនេះ ពីក្រុមជីហាតរដ្ឋអ៊ីស្លាមបានមកវិញ។
ប៉ុន្តែ កិច្ចព្រមព្រៀងស្រុកម៉ាន់ប៊ីជ ដាក់កំហិតថា ពេលណាយកបានស្រុកម៉ាន់ប៊ីជ ពីក្រុមភេរវជនហើយ ក្រុមប្រយុទ្ធគួដឌីស្ថានត្រូវតែដកកម្លាំងចេញពីស្រុកម៉ាន់ប៊ីជ ដោយត្រូវធ្វើដំណើរទៅភាគខាងកើតទន្លេអឺហ្វ្រាតវិញ។
បញ្ហាត្រង់ថា ២ថ្ងៃមុននេះ ក្រុមសិទ្ធិមនុស្សស៊ីរីប្រាប់ថា មានក្រុមគួដឌីស្ថានតែមួយភាគតូចប៉ុណ្ណោះដែលចាកចេញពីស្រុកម៉ាន់ប៊ីជ។ ភាគច្រើននៅបន្តវត្តមានក្នុងស្រុកនៅឡើយ។ ម្ល៉ោះហើយបានជាតួកគីផ្លោងគ្រាប់បែកលើក្រុមគួដឌីស្ថានតែម្តងទៅ កាលពីថ្ងៃព្រហស្បតិ៍ ដើម្បីអោយក្រុមនេះគោរពតាមកិច្ចព្រមព្រៀងស្រុកម៉ាន់ប៊ីជ។ ផលវិបាកសម្រាប់ស៊ីរីពេលនេះ គឺជនស៊ីវិលស៊ីរីស្លូតត្រង់ នៅតែបន្តស្លាប់ ក្រោមល្បែងសង្គ្រាម។ អង្គការសហប្រជាជាតិទៀតសោត ក៏មិនអាចដឹកស្បៀងមនុស្សធម៌ទៅជួយប្រជាជន។
អាមេរិកលេងខូច ក្នុងកិច្ចព្រមព្រៀងស្រុកម៉ាន់ប៊ីជ ទាក់ទងនឹងការដកថយរបស់ក្រុមប្រយុទ្ធគួដឌីស្ថាន?
ក្រុមប្រយុទ្ធគួដឌីស្ថាននៅស៊ីរី មានក្រុមប្រយុទ្ធអារ៉ាប់ផ្សេងៗក្នុងស្រុកជាដៃគូ បង្កើតបានជាក្រុមប្រយុទ្ធធំមួយ ឈ្មោះថា ក្រុមប្រជាធិបតេយ្យស៊ីរី យើងហៅកាត់ថា FDS។ យោងតាមកិច្ចព្រមព្រៀងស្រុកម៉ាន់ប៊ីជ ក្រុមប្រយុទ្ធគួដឌីស្ថានត្រូវដកចេញពីស្រុកនេះ។ ប៉ុន្តែ ក្រុមអារ៉ាប់ជាដៃគូ អាចបន្តរស់នៅក្នុងស្រុកតទៅទៀត។
បញ្ហានៅត្រង់ថា ក្នុងក្រុមប្រយុទ្ធនេះ គឺក្រុមគួដឌីស្ថាននេះហើយដែលជាគ្រឹះសំខាន់ ព្រោះក្រុមគួដឌីស្ថានរៀបផែនការវាយក្រុមរដ្ឋអ៊ីស្លាមបានល្អណាស់។ បើក្រុមគួដឌីស្ថានដកកម្លាំងចេញពីស្រុកម៉ាន់ប៊ីជ អស់ទៅ គឺក្រុមភេរវជនរដ្ឋអ៊ីស្លាមអាចនឹងបកមកវាយយកស្រុកនេះបានជាថ្មីទៀត។ ក្រុមគួដឌីស្ថានប្រហែលសម្អាងលើអាមេរិកដែលបានគាំទ្រលើកស្ទួយក្រុមខ្លួន កន្លងមកដែរ ក្នុងការប្រឆាំងនឹងក្រុមរដ្ឋអ៊ីស្លាម ទើបនៅរារែកចាកចេញពីស្រុកម៉ាន់ប៊ីជ។
ត្រង់នេះគេអាចចោទថា អាមេរិករាងខូចបន្តិចក្នុងល្បែងសមរភូមិស៊ីរី។ អាមេរិកគាំទ្រក្រុមគួដឌីស្ថានស៊ីរី ទាំងបានដឹងថា ក្រុមគួដស៊ីរីជិតដិតនឹងក្រុមគួដឌីស្ថាន PKK នៅតួកគី។ អាមេរិកដឹងពីយូរដែរថា តួកគីចាត់ទុកក្រុមគួដឌីស្ថាន PKK នេះថាជាក្រុមភេរវជន។ ក្រុមគួដឌីស្ថាន PKK ជាសត្រូវធំរបស់តួកគី។
ដូច្នេះ ពេលស្រុកម៉ាន់ប៊ីជរួចផុតពីកណ្តាប់ដៃក្រុមជីហាតរដ្ឋអ៊ីស្លាម អាមេរិកគួរតែដឹងហើយថា ក្រុមគួដឌីស្ថានស៊ីរី ដែលជិតដិតនឹងក្រុមគួដតួកគី PKK ពិតជាពិបាកនឹងចង់ដកថយពីស្រុកម៉ាន់ប៊ីជក្បែរព្រំដែនតួកគីហើយ។ ម្យ៉ាងយើងដឹងថា ក្រុមគួដឌីស្ថានតែងចង់ផ្តាច់ទឹកដី នៅតាមតួកគី ស៊ីរី រឺអ៊ីរ៉ាក់ ស្រាប់ផង។ គ្រាន់តែយល់ព្រមអោយក្រុមគួដឌីស្ថានដកចេញពីក្រុងម៉ាន់ប៊ីជ ដើម្បីយកចិត្តតួកគី គឺមិនគ្រប់គ្រាន់ទេ សម្រាប់អាមេរិក ដរាបណាគេនៅមិនអាចទុកចិត្តថា ក្រុមគួដឌីស្ថាននឹងដកកម្លាំងចេញអស់ពីស្រុកម៉ាន់ប៊ីជ។
អាមេរិកក៏គួរដឹងដែរថា ដោយសារខ្លួនជួយក្រុមគួដឌីស្ថាននេះហើយ ទើបបានជាទំនាក់ទំនងជាមួយតួកគី ជួបភាពតានតឹង។ សមរភូមិស៊ីរីពេលនេះ ជាសមរភូមិបែបថ្មីមួយទៀត គឺការប្រយុទ្ធរវាងតួកគី និងក្រុមគួដឌីស្ថាន ដរាបណាក្រុមគួដឌីស្ថានមិនដកថយអស់ពីភាគខាងលិចទន្លេអឺហ្វ្រាត។
បទឈប់បាញ់មនុស្សធម៌៤៨ម៉ោងពិបាកចេញរូបរាង
ច្រើនថ្ងៃហើយ ដែលអង្គការសហប្រជាជាតិទាមទារអោយផ្អាកបាញ់គ្នា៤៨ម៉ោងមក ដើម្បីអាចដឹកស្បៀងទៅជួយប្រជាជនក្រុងអាឡិប។ មានតែរុស្ស៊ីទេដែលគិតគូរមុនគេ ដោយប្រកាសព្រមតាមការទាមទារនេះ។ ភាគីជម្លោះផ្សេងៗទៀត ស្ងាត់មាត់អោយឈឹង។ មើលទៅ បើពួកគេនៅតែបន្តប្រយុទ្ធគ្នា ក៏អង្គការសហប្រជាជាតិធ្វើអ្វីពួកគេមិនបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ