ភាពតានតឹងនយោបាយងើបឡើងវិញក្រោយការបើកកញ្ចប់សុវត្ថិភាព
បន្ទាប់ពីបានបើកកញ្ចប់សុវត្ថិភាពមួយចំនួន ក្នុងខេត្តក្រចេះរួចមក ក្រុមប្រឹក្សាធម្មនុញ្ញបានបន្តបញ្ជាឲ្យគណៈកម្មាធិការជាតិរៀបចំការបោះឆ្នោត (គ.ជ.ប) បើកកញ្ចប់សុវត្ថិភាពខ្លះទៀតនៅក្នុងខេត្តបាត់ដំបងទៅតាមការទាមទារ របស់គណបក្សសង្គ្រោះជាតិ។ ប៉ុន្តែ ការបើកកញ្ចប់សុវត្ថិភាពបែរជាធ្វើឲ្យបក្សប្រឆាំងបរិហារកាន់តែខ្លាំងអំពីភាពមិនប្រក្រតី និងបានងាកមកនិយាយឡើងវិញអំពីគណៈកម្មាការឯករាជ្យ និងលទ្ធភាពនៃមហាបាតុកម្មទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ចាប់តាំងពីថ្ងៃអាទិត្យមក ថ្ងៃដែល គ.ជ.ប សម្រេចបើកកញ្ចប់សុវត្ថិភាពមួយចំនួនតាមបញ្ជារបស់ក្រុមប្រឹក្សាធម្មនុញ្ញ ភាពតានតឹងនយោបាយហាក់កំពុងឡើងកម្តៅឡើងវិញមួយកម្រិត។ គណបក្សសង្គ្រោះជាតិមិនបានអស់ចិត្តនឹងការផ្ទៀងផ្ទាត់លទ្ធផលដែលមាននៅក្នុងកញ្ចប់នោះទេ តែបែរជាបរិហាររិះគន់កាន់តែខ្លាំងទៅលើ គ.ជ.ប បន្ទាប់ពីមានកញ្ចប់សុវត្តិភាព«ក»មួយចំនួនមិនបានបិទឲ្យបានត្រឹមត្រូវ។
បើទោះបីជា គ.ជ.ប បានលើកហេតុផលបច្ចេកទេសមកពន្យល់ និងបានបញ្ជាក់ថា កំហុសបច្ចេកទេសទាំងនោះមិនប៉ះពាល់អ្វីសោះដល់លទ្ធផលបោះឆ្នោតក៏ដោយ ក៏គណបក្សប្រឆាំងនៅតែមិនអាចទទួលយកការពន្យល់នេះបានដែរ។ ខណៈដែលគេកំពុងរង់ចាំមើលការបើកកញ្ចប់សុវត្ថិភាពមួយចំនួនទៀតក្នុងខេត្តបាត់ដំបងនៅថ្ងៃពុធស្អែកនេះ គណបក្សសង្គ្រោះជាតិមិនបានសង្ឃឹមលើការបើកកញ្ចប់សុវត្ថិភាពដូចដែលខ្លួនបានទាមទារយ៉ាងទទូចនោះឡើយ។
លោក កឹម សុខា អនុប្រធានគណបក្សសង្គ្រោះជាតិបានប្រាប់វិទ្យុបារាំងអន្តរជាតិនៅថ្ងៃនេះថា បញ្ហាតានតឹងឡើងវិញ ក្រោយពីគេបានរកឃើញភាពមិនប្រក្រតីនៅក្នុងកញ្ចប់សុវត្ថិភាព។ យ៉ាងណាក៏ដោយ លោកអះអាងថា គណបក្សសង្គ្រោះជាតិនៅតែបន្តទាមទារឲ្យបើកកញ្ចប់សុវត្ថិភាពតទៅទៀតដើម្បីគោរពតាមនីតិវិធីច្បាប់។ លោក កឹម សុខា បានហៅភាពមិនប្រក្រតីទាំងនោះថា ជាចេតនានយោបាយ។
ក្នុងជំនួបជាមួយសកម្មជនរាប់ម៉ឺននាក់ កាលពីល្ងាចថ្ងៃចន្ទម្សិលមិញនៅទីលានប្រជាធិបតេយ្យ លោក សម រង្ស៊ី មេដឹកនាំគណបក្សសង្គ្រោះជាតិ បានថ្លែងនៅចំពោះមុខអ្នកគាំទ្រ ដោយងាកមកទាមទារឲ្យមានគណៈកម្មការឯករាជ្យមួយ ដើម្បីស៊ើបអង្កេតភាពមិនប្រក្រតីជុំវិញការបោះឆ្នោតដដែល។ លើសពីនេះ គណបក្សសង្គ្រោះជាតិក៏បានប្រកាសអំពីការរៀបចំប្តឹងគ.ជ.ប ពីបទក្លែងបន្លំឯកសារទៀតផង។
ក្រុមអ្នកគាំទ្រក៏ដូចជាមេដឹកនាំគណបក្សសង្គ្រោះជាតិ បាននាំគ្នានិយាយឡើងវិញអំពីមហាបាតុកម្មដែលអាចនឹងកើតឡើង ដើម្បីប្រឆាំងនឹងលទ្ធផលនៃការបោះឆ្នោត។ បាតុកម្មត្រូវបានគណបក្សនេះរៀបចំធ្វើជាបន្តបន្ទាប់រួចទៅហើយ នៅឯក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ