មន្រ្តីយោធាថៃបដិសេធព័ត៌មានដែលថារដ្ឋប្រហារមានគម្រោងការណ៍ទុកជាមុន
មន្រ្តីជាន់ខ្ពស់នៃកងទ័ពថៃបានច្រានចោលនូវព័ត៌មាន ដែលលើកឡើងថា រដ្ឋប្រហារទម្លាក់រដ្ឋាភិបាល កាលពីថ្ងៃទី២២ឧសភាកន្លងទៅ ត្រូវបានធ្វើឡើងដោយមានគម្រោងការណ៍ទុកជាមុន ក្នុងគោលដៅកម្ចាត់ក្រុមលោកថាក់ស៊ីនពីអំណាច។ ការចេញមុខបដិសេធនេះត្រូវបានធ្វើឡើង ក្រោយពីលោកស៊ូថេប ធឿកស៊ូបាន មេដឹកនាំបាតុករប្រឆាំងនឹងរដ្ឋាភិបាលបានធ្លោយមាត់ប្រាប់អ្នកកាសែតថា លោកធ្លាប់បានពិភាក្សាជាច្រើនលើកជាមួយមេទ័ព អំពីការដណ្តើមអំណាចតាមរយៈរដ្ឋប្រហារ។
ចុះផ្សាយនៅថ្ងៃ៖
មន្រ្តីយោធាជាន់ខ្ពស់ថៃ គឺឧត្តមសេនីយ៍ ចាត់ចាឡឺម ចាឡឺមស៊ុឃ (Chatchalerm Chalermsukh) បានប្រាប់ទូរទស្សន៍ BBC នៅក្នុងបទសម្ភាសន៍ចុះផ្សាយ នៅថ្ងៃព្រហស្បតិ៍នេះថា រដ្ឋប្រហារ កាលពីថ្ងៃទី២២ឧសភាត្រូវបានសម្រេចធ្វើឡើងភ្លាមៗ ដោយមិនមានការរៀបចំគម្រោងការណ៍ទុកជាមុន ដូចសេចក្តីរាយការណ៍មួយចំនួននាពេលកន្លងទៅនេះទេ ពីព្រោះមេដឹកនាំកងទ័ពដឹងច្បាស់ថា ការរៀបចំគម្រោងការណ៍ដណ្តើមអំណាចដោយរដ្ឋប្រហារ គឺជារឿងមិនត្រឹមត្រូវ។
ឧត្តមសេនីយ៍រូបនេះបានបញ្ជាក់បន្ថែមថា ការណ៍ដែលរដ្ឋប្រហារបានប្រព្រឹត្តទៅដោយរលូន មិនមែនដោយសារតែមានគម្រោងការណ៍ជាមុននោះទេ ប៉ុន្តែ ដោយសារតែកងទ័ពត្រូវបានដាក់ពង្រាយពេញក្រុងបាងកក តាំងពីយូរមកហើយ ដើម្បីជួយប៉ូលិសក្នុងការរក្សាសន្តិសុខចាប់តាំងពីមានបាតុកម្មប្រឆាំង និងគាំទ្ររដ្ឋាភិបាល។
គួរបញ្ជាក់ថា កាលពីពេលថ្មីៗនេះ លោកស៊ូថេប ធឿកស៊ូបាន ដែលជាមេដឹកនាំក្រុមប្រឆាំងនឹងរដ្ឋាភិបាលលោកស្រីយីងឡាក់ និងជាអ្នកដែលគាំទ្ររដ្ឋប្រហារ បានធ្លោយមាត់ប្រាប់អ្នកកាសែតថៃថា លោកធ្លាប់បានជជែកជាច្រើនលើកជាមួយឧត្តមសេនីយ៍ប្រយុទ្ធ ចាន់អូចា អំពីការធ្វើរដ្ឋប្រហារទម្លាក់រដ្ឋាភិបាល។ ការអះអាង ដែលត្រូវបានអ្នកនាំពាក្យកងទ័ពថៃចេញមុខបដិសេធភ្លាមៗថា ឧត្តមសេនីយ៍ប្រយុទ្ធ ចាន់អូចា មិនដែលបានជួប ឬផ្ញើសារឆ្លើយឆ្លងជាមួយលោកស៊ូថេបនោះទេ។
មេដឹកនាំរដ្ឋប្រហារតែងតែអះអាងម្តងហើយម្តងទៀតថា ការធ្វើរដ្ឋប្រហារ កាលពីថ្ងៃទី២២ឧសភា ត្រូវបានសម្រេចធ្វើឡើងភ្លាមៗ ដើម្បីបញ្ចៀសកុំឲ្យប្រទេសជាតិធ្លាក់ទៅក្នុងភាពអនាធិបតេយ្យ និងការបង្ហូរឈាម។
នៅក្នុងបទសម្ភាសន៍ជាមួយទូរទស្សន៍ BBC នៅថ្ងៃព្រហស្បតិ៍នេះ ឧត្តមសេនីយ៍ ចាត់ចាឡឺម បានបញ្ជាក់សាជាថ្មីម្តងទៀតអំពីជំហររបស់មេដឹកនាំរបបសឹកថានឹងរៀបចំការបោះឆ្នោត ដើម្បីប្រគល់អំណាចទៅឲ្យអ្នកនយោបាយស៊ីវិលកាន់កាប់វិញ នៅពេលណាកំណែទម្រង់នយោបាយស៊ីជម្រៅមួយត្រូវបានធ្វើចប់សព្វគ្រប់ ហើយថា នៅពេលនោះ អ្នកណាក៏អាចឈរឈ្មោះក្នុងការបោះឆ្នោតបានដែរ ដោយរាប់ទាំងក្រុមគ្រួសាររបស់លោកថាក់ស៊ីនផង។
ក៏ប៉ុន្តែ រហូតមកទល់នឹងពេលនេះរបបសឹកថៃមិនបានបញ្ជាក់អំពីកាលបរិច្ឆេទច្បាស់លាស់ នៃការធ្វើកំណែទម្រង់ និងការផ្ទេរអំណាចទៅឲ្យជនស៊ីវិលវិញនោះទេ ដោយគ្រាន់តែបានឲ្យដឹងថា ការបោះឆ្នោតនេះនឹងមិនអាចធ្វើឡើង នៅក្នុងរយៈពេល ១ឆ្នាំខាងមុខនេះបានទេ។
ថ្មីៗនេះ មន្រ្តីជាន់ខ្ពស់នៃក្រសួងការបរទេសអាមេរិកធ្លាប់បានប្រាប់ទៅសភាអាមេរិកថា មេដឹកនាំកងទ័ពថៃទំនងជានឹងបន្តក្តាប់អំណាចក្នុងរយៈពេលវែងទៅមុខ ហើយថានេះគឺជារឿងដែលគួរឲ្យព្រួយបារម្ភផង និងជាបញ្ហាស្មុគស្មាញផងសម្រាប់អាមេរិក ដោយសារតែថៃគឺជាសម្ព័ន្ធមិត្តរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ