អតីតក្រុមភឿថៃបង្កើតចលនាប្រឆាំងនឹងរបបដឹកនាំសឹកនៅបរទេស
អតីតមេដឹកនាំគណបក្សភឿថៃបានប្រកាសជាផ្លូវការ នៅថ្ងៃអង្គារទី ២៤ មិថុនានេះ បង្កើតចលនាប្រឆាំងនឹងរបបសឹកថៃ។ លោក ចារុពុង រួងស៊ូវ៉ាន់ មិនបានបញ្ជាក់ថា តើចលនាប្រឆាំងនេះមានទីតាំងនៅកន្លែងណាពិតប្រាកដទេ ក៏ប៉ុន្តែ អតីតអ្នកនាំពាក្យរបស់លោកថាក់ស៊ីនម្នាក់ធ្លាប់ ចលនាប្រឆាំងនេះទំនងជាត្រូវរៀបចំឡើង នៅក្រៅប្រទេសថៃ។ នេះគឺជាលើកទីមួយហើយ ដែលចលនាប្រឆាំង បានលេចមុខ ចេញជារូបរាង ប្រកាសប្រឆាំងនឹងរដ្ឋាភិបាលយោធា កើតចេញពីរដ្ឋប្រហារ កាលពីខែមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក ចារុពុង រួងស៊ុវ៉ាន់ អតីតរដ្ឋមន្ត្រីដ៏មានឥទ្ធិពលម្នាក់នៃរដ្ឋាភិបាលថៃសម័យលោកស្រីយីងឡាក់ ស៊ីណាវ៉ាត់ បានប្រកាសបង្កើតក្រុមប្រឆាំងមួយ មានឈ្មោះថា “អង្គការប្រជាជនថៃសេរី ដើម្បីសិទ្ធិមនុស្សនិងប្រជាធិបតេយ្យ” ដែលមានប្រមូលផ្តុំទៅដោយក្រុមអតីតតំណាងរាស្ត្រ បញ្ញាវន្តសកលវិទ្យល័យ និងអ្នកទទួលខុសត្រូវអាវក្រហម ដែលគាំទ្រត្រកូលថាក់ស៊ីនយ៉ាងអង់អាចរហូតមក។ ក៏ប៉ុន្តែលោកថាក់ស៊ីន ស៊ីណាវ៉ាត់ ដែលកំពុងនិរទេសខ្លួន នៅបរទេស គ្មានចំណែកនៅក្នុងចលនាប្រឆាំងនេះឡើយ។
នៅក្នុងអត្ថបទប្រកាសជូនដំណឹងអំពីការបង្កើតចលនាប្រឆាំងនឹងរបបសឹក លោក ចារុពុង ដែលរូបលោកផ្ទាល់បាននិរទេសខ្លួនដោយចេតនាចេញផុតពីប្រទេសថៃទៅកាន់ទីកន្លែងសម្ងាត់មួយ បានប្រដូចការឡើងគ្រប់គ្រងប្រទេសដោយយោធា ទៅនឹងការឆក់ប្លន់ដើម្បីអំណាច និងបានបរិហាររបបថាសឹកបានរំលោភច្បាប់ បំពានគោលការណ៍ប្រជាធិបតេយ្យ បំផ្លាញសិទ្ធិសេរីភាព និងមោទនភាពជាមនុស្សរបស់បណ្តាជនថៃ។
ការបង្កើតចលនាប្រឆាំងនេះ គឺដើម្បីលើកទឹកចិត្តដល់បណ្តាជនគ្រប់រូបដែលប្រឆាំងនឹងរដ្ឋប្រហារ ទាំងនៅក្នុងប្រទេស និងនៅក្រៅប្រទេស។ នេះបើតាមអតីតអ្នកនាំពាក្យម្នាក់របស់រដ្ឋាភិបាលលោកថាក់ស៊ីន ដែលមិនបានបញ្ជាក់អំពី ទីតាំង ឬការិយាល័យរបស់ចលនាឡើយ។ ព្រោះតាំងពីបានឡើងកាន់អំណាចមកនៅថ្ងៃទី ២២ឧសភាមក របបសឹកបានហាមឃាត់មិនឱ្យមានសកម្មភាពបាតុកម្ម និងបានបង្ខំអ្នកនយោបាយឱ្យចុះហត្ថលេខាជាលាយលក្ខ៍អក្សរ ដកខ្លួនចេញពីឆាកនយោបាយ ឬនិយាយបែបផ្សេង គឺបង្ខាំងសេរីភាពជនស៊ីវិល។ ការប្រមូលផ្តុំរប៉េះរប៉ោះតែងតែបញ្ចប់ដោយការចាប់ខ្លួន។
រដ្ឋធម្មនុញ្ញត្រូវព្យួរ គម្រោងកាលបរិច្ឆេទបោះឆ្នោតសភាក៏គ្មាន ... រដ្ឋប្រហារបានរងការរិះគន់យ៉ាងខ្លាំងពីសំណាក់សហគមន៍អន្តរជាតិ។ សហភាពអឺរ៉ុបទើបបានប្រកាសនៅថ្ងៃចន្ទម្សិលមិញផ្អាកកិច្ចសហប្រតិបត្តិការជាមួយថៃ ប៉ុន្តែរបបសឹកយល់ថាអឺរ៉ុបសម្រេចចិត្តលឿនពេកគួរឱ្យសោកស្តាយ មិនយល់អំពីស្ថានការណ៍ថៃ ដែលត្រូវការចាំបាច់ការដឹកនាំរបៀបសឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ