អាជ្ញាធរថៃទម្លាក់កំហុសលើ "បាតដៃទីបី" ក្នុងការប៉ះទង្គិចរវាងប៉ូលិសនិងបាតុករប្រឆាំង
នៅថ្ងៃពុធនេះ ក្រុមបាតុករប្រឆាំងបាននាំគ្នាបន្តឡោមព័ទ្ធការិយាល័យបណ្តោះអាសន្នរបស់លោកស្រីយីងឡាក់ មួយថ្ងៃក្រោយពីមានការប៉ះទង្គិចជាមួយប៉ូលិស បណ្តាលឲ្យជនស៊ីវិល ៤នាក់ និងប៉ូលិសម្នាក់ស្លាប់ កាលពីថ្ងៃអង្គារម្សិលមិញ។ អាជ្ញាធរថៃបានអះអាងថា ការប៉ះទង្គិចគ្នា កាលពីម្សិលមិញនេះ បង្កឡើងដោយ “បាតដៃទីបី”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
លោក ចាឡឺម យូបាមរុង (Chalerm Yubamrung) ប្រធានមជ្ឈមណ្ឌលទទួលបន្ទុករក្សាសន្តិភាព និងសណ្តាប់ធ្នាប់ បានអះអាង នៅថ្ងៃពុធនេះថា ក្រុម “បាតដៃទីបី” គឺជាអ្នកដែលបានបង្កឲ្យមានការប៉ះទង្គិចគ្នាដោយហិង្សា រវាងប៉ូលិស និងបាតុករប្រឆាំង ដែលបណ្តាលឲ្យមនុស្សស្លាប់ និងរបួស ជាច្រើននាក់ កាលពីថ្ងៃអង្គារម្សិលមិញ។ ក៏ប៉ុន្តែ លោកមិនបានបញ្ជាក់ថា តើក្រុម “បាតដៃទីបី” នេះជានរណា ឬមកពីក្រុមដែលប្រកាន់ពណ៌អ្វីនោះទេ។
ក៏ប៉ុន្តែ នៅថៃ គេតែងតែនាំគ្នានិយាយពីក្រុមជនអាថ៌កំបាំងមួយក្រុម ដែលគេឲ្យឈ្មោះថា “ក្រុមអាវខ្មៅ” ដែលតែងតែចូលពាក់ព័ន្ធ នៅពេលមានភាពវឹកវរ ក្នុងវិបត្តិនយោបាយថៃ តាំងពីឆ្នាំ២០១០មក។
កាលពីខែមេសា ឆ្នាំ២០១០ ក្រុមអាវលឿងកាន់អំណាច គេនាំគ្នាសង្ស័យថា “ក្រុមអាវខ្មៅ” ស្ថិតនៅក្នុងចំណោមបាតុករអាវក្រហម ហើយបានធ្វើការបាញ់ប្រហារទៅលើទាហានថៃ។ នៅពេលនេះ គេសង្ស័យថា “ក្រុមអាវខ្មៅ” កំពុងតែចេញមុខធ្វើសកម្មភាពសាជាថ្មីទៀត ក៏ប៉ុន្តែ លើកនេះ ស្ថិតនៅខាងបាតុករអាវលឿងវិញម្តង ដោយបានប្រើអាវុធទំនើបៗ បាញ់ប្រហារមកលើប៉ូលិស។
ប៉ូលិសបង្រ្កាបបាតុកម្មថៃបានរិះគន់រដ្ឋាភិបាលថា មិនបានបំពាក់អាវុធគ្រប់គ្រាន់ដល់ពួកគេ ដើម្បីទប់ទល់នឹងបាតុករ។ ប៉ូលិសបង្រ្កាបបាតុកម្ម មានត្រឹមតែខែល និងដំបង ឬយ៉ាងច្រើនបំផុត មានត្រឹមឧស្ម័នបង្ហូរទឹកភ្នែក និងកាំភ្លើងគ្រាប់ជ័រ ហើយត្រូវប្រឈមមុខនឹងបាតុករប្រដាប់ទៅដោយអាវុធទំនើប ដែលគេប្រើក្នុងការធ្វើសង្រ្គាម។ នេះបើយោងតាមសេចក្តីថ្លែងការណ៍របស់ប៉ូលិសជាតិថៃ ដែលត្រូវបានចុះផ្សាយ ក្នុងបណ្តាញព័ត៌មានក្នុងស្រុកថៃ នៅថ្ងៃពុធនេះ។
អគ្គស្នងការនគរបាលជាតិថៃវិញបានឲ្យដឹងថា ថ្វីដ្បិតតែប៉ូលិសបង្រ្កាបបាតុកម្មមិនមានអាវុធ ក៏ប៉ុន្តែ រដ្ឋាភិបាលតែងតែដាក់ពង្រាយក្រុមប៉ូលិសប្រដាប់អាវុធ នៅពីក្រោយប៉ូលិសបាតុកម្ម ដើម្បីជួយទប់ទល់ ក្នុងករណីមានការវាយប្រហារណាមួយកើតឡើងមកលើប៉ូលិស។ ក៏ប៉ុន្តែ លោកអគ្គស្នងការប៉ូលិសបានអះអាងថា ប៉ូលិសមិនដែលបានប្រើអាវុធនោះទេ នៅក្នុងការប៉ះទង្គិចគ្នាជាមួយក្រុមបាតុករ កាលពីពេលកន្លងមកនេះ។
តុលាការថៃវិញទើបនឹងបានចេញសេចក្តីសម្រេចមួយ នៅថ្ងៃពុធនេះ ដោយហាមឃាត់រដ្ឋាភិបាលមិនឲ្យប្រើកម្លាំងទៅលើបាតុកម្មអហិង្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ