វិបត្តិនយោបាយថៃ៖កម្លំាងប៉ូលិសបានអន្តរាគមន៍បំបែកទីតំាងរបស់បាតុករអាវលឿង
ចុះផ្សាយនៅថ្ងៃ៖
ស្តាប់ - ០៦:៤១
នៅថ្ងៃសុក្រ ទី១៤ កុម្ភៈនេះ កម្លំាងប៉ូលិសថៃរាប់ពាន់នាក់បានផ្តើមអន្តរាគមន៍បំបែកក្រុម បាតុករអាវលឿងដែលបានបោះជំរំនៅកន្លែងសំខាន់ៗមួយចំនួនក្នុងទីក្រុងបាងកកតំាងពីជាង ៣ខែកន្លងមក ពិសេសនៅជុំវិញវិមានរដ្ឋាភិបាលរបស់លោកស្រីនាយករដ្ឋមន្រ្តីយីងឡាក់។ គួររម្លឹកជូនថា តំាងពីជាង ៣ខែកន្លងមកនេះដែលបាតុករអាវលឿងដឹកនំាដោយលោកស៊ូថេបបានទាមទារឲ្យលោកស្រីយីងឡាក់ចុះចេញពីតំណែង ព្រមទំាងការបង្កើតក្រុមប្រឹក្សាមួយដោយមិនបាច់ឆ្លងកាត់ការបោះឆ្នោតដែលគេហៅថា « ក្រុមប្រឹក្សាប្រជាជន »។ តែលោកស្រីយីងឡាក់មិនព្រម ដោយជ្រើសយកដំណោះស្រាយតាមការបោះឆ្នោតដែលបានរៀបចំកាលពីថ្ងៃទី២ កុម្ភៈកន្លងទៅ។ ទោះជាយ៉ាងនេះក្តី វិបត្តិនៅតែបន្តជាប់គំាងគ្មានច្រកចេញដដែល។
តាមការបញ្ជាក់របស់ប្រធានក្រុមប្រឹក្សាសន្តិសុខជាតិឲ្យដឹងថា មានកម្លំាងប៉ូលិសសរុបប្រមាណជា ៥ ០០០នាក់ប្រាប់ដោយអាវុធពិត ព្រមទំាងដំបងត្រូវបានគេដាក់ពង្រាយនៅក្នុងទីក្រុងបាងកកដើម្បីបើកប្រតិបត្តិការវាយបំបែកក្រុមបាតុករអាវលឿងដែលបានបោះជំរំនៅទីតំាងសំខាន់ៗមួយចំនួនតំាងពីជាង ៣ខែកន្លងមក។ កម្លំាងប៉ូលីសត្រូវបានដាក់ពង្រាយច្រើននៅតាមសង្កាត់នានាដែលប្រមូលផ្តុំដោយក្រសួង និងទីស្នាក់ការរបស់អង្គការជាតិ អន្តរជាតិ។ គឺនៅទីនោះឯងដែលពួកបាតុករបាននំាគ្នាបោះជម្រកជំរំសំពត់ ព្រមទំាងយកការ៉ុងដីខ្សាច់ព័ទ្ធធ្វើជារបង។
ក្រៅពីសង្កាត់ដែលប្រមូលផ្តុំដោយក្រសួង និងទីស្នាក់ការរបស់អង្គការជាតិ អន្តរជាតិ កម្លំាងប៉ូលិសក៏បានបើកប្រតិបត្តិការបោសសំអាតទីតំាងជាច្រើនកន្លែងរបស់ពួកបាតុករនៅជុំវិញវិមានរដ្ឋាភិបាលរបស់លោកស្រីនាយករដ្ឋមន្រ្តីយីងឡាក់។ នៅទីនោះ ប៉ូលិសបានចូលធ្វើអន្តរាគមន៍ដោយគ្មានឧបសគ្គធំដុំទេ ព្រោះពួកបាតុករបាននំាគ្នារត់ចេញពីទីនោះដោយមិនបានប្រឈមមុខខ្លំាងក្លាឡើយ។ មានការកត់សម្គាល់ចំនួនពីរនៅក្នុងអន្តរាគមន៍របស់កម្លំាងប៉ូលិសក្នុងថ្ងៃនេះ ទីមួយ គឺការចៀងវាងរបស់ប៉ូលិសក្នុងការប្រឈមមុខជាមួយពួកបាតុករ និងទីពីរ ទីតំាងដែលប៉ូលិសបានគាស់រំលើងមិនមែនជាទីតំាងសំខាន់ទំាងបីរបស់ពួកបាតុករទេ។
នៅយប់ថ្ងៃព្រហស្បតិ៍ ទី១៣ កុម្ភៈម្សិលមិញ មេបាតុករអាវលឿង គឺលោកស៊ូថេបបានអំពាវនាវឲ្យបាតុករទំាងអស់កុំចាញ់ច្រាបនឹងកម្លំាងប៉ូលិស ព្រមទំាងហៅពួកគេឲ្យបន្តក្រាញននៀលរហូតដល់សម្រេចបានជាស្ថាពរនូវកម្មវត្ថុរបស់ខ្លួន។
អន្តរាគមន៍វាយបំបែក ជាយុទ្ធសាស្រ្តដែលគ្រប់គ្នាមិនបានរង់ចំា
តំាងពីពួកអាវលឿងដឹកនំាដោយលោកស៊ូថេបបាននំាគ្នាចុះផ្លូវធ្វើបាតុកម្មប្រឆំាងរដ្ឋាភិបាលជាង ៣ខែមក នេះជាលើកទីមួយដែលកម្លំាងប៉ូលិសបានចេញអន្តរាគមន៍វាយបំបែកក្រោមទ្រង់ទ្រាយធំ។ តែនៅសល់ទីតំាងសំខាន់ៗមួយចំនួនទៀតដែលប៉ូលិសមិនទាន់ចូលអន្តរាគមន៍ទេ។ កន្លងមក ក៏មានអន្តរាគមន៍ដែរ តែគ្រាន់ជារូបភាពតូចតាចក្នុងគោលដៅជួយថៃរក្សាសន្តិសុខសណ្តាប់ធ្នាប់នៅក្នុងក្បួនដង្ហែរបាតុកម្មរបស់បាតុករប៉ុណ្ណោះ។ គិតមកទល់ថ្ងៃនេះ អំពើហិង្សានៅថៃបានបណ្តាលឲ្យមានមនុស្សស្លាប់ជាង ១០នាក់។
កម្មវត្ថុរបស់លោកស៊ូថេបនៅតែដដែល គឺការទាមទារឲ្យលោកស្រីយីងឡាក់ចុះចេញពីតំណែង ព្រមទំាងធ្វើកំណែទម្រង់ប្រព័ន្ធបោះឆ្នោតឡើងវិញដែលក្រុមប្រឆំាងយល់ឃើញថា បានអនុញ្ញាតឲ្យគ្រួសារត្រកូលស៊ីណាវ៉ាត់ត្រាបន្តមានឥទ្ធិពលនយោបាយគ្របដណ្តប់លើសង្គមថៃបច្ចុប្បន្ន។ ទន្ទឹមគ្នានេះ លោកស៊ូថេបក៏បានទាមទារឲ្យបង្កើតក្រុមប្រឹក្សាមួយសម្រាប់ដឹកនំាប្រទេសដោយមិនបាច់ឆ្លងកាត់ការបោះឆ្នោតដែលគេហៅថា
« ក្រុមប្រឹក្សាប្រជាជន »។ នៅខាងរដ្ឋាភិបាលឯណោះ លោកស្រីយីងឡាក់មិនព្រម និងនៅតែប្រកាន់ជំហរដោះស្រាយតាមរយៈការបោះឆ្នោត។
តែការបោះឆ្នោតដែលបានរៀបចំដូចការគ្រោងទុកកាលពីថ្ងៃទី២ កុម្ភៈត្រូវបានអុកឡុក រ៉ៅឆានពីពួកបាតុករ។ បន្ទាប់មក ក្រុមប្រឆំាងក៏បានប្តឹងតុលាការកុំឲ្យទទួលស្គាល់ការបោះឆ្នោតនោះ តែថ្មីៗនេះ តុលាការបានទាត់ចោលបណ្តឹងរបស់ក្រុមប្រឆំាង។ សេចក្តីសម្រេចរបស់តុលាការនេះបានធ្វើឲ្យលោកស្រីយីងឡាក់បន្តមានទឹកមាត់ប្រៃ និងអំណាចស្របច្បាប់ក្នុងការបន្តការងាររបស់រដ្ឋាភិបាលចំាផ្ទះ។
លោកស្រីយីងឡាក់ផុយស្រួចដោយកំពុងជាប់អង្កេតរឿងអាស្រូវពុករលួយ
តំាងពីក្រោយការបោះឆ្នោតក្នុងថ្ងៃទី២ កុម្ភៈមក គណៈកម្មការជាតិរៀបចំការបោះឆ្នោតនៅមិនទាន់បានប្រកាសលទ្ធផលទេ ដោយសារតែការរៀបចំបោះឆ្នោតមុននៅតំបន់មួយចំនួនកាលពីថ្ងៃទី២៦ មករា ក៏ដូចជាការរៀបចំបោះឆ្នោតទូទៅក្នុងថ្ងៃទី២ កុម្ភៈ ត្រូវបានរារំាង អុកឡុកដោយពួកបាតុករ។ ជាក់ស្តែងក្នុងថ្ងៃទី២ កុម្ភៈ មានមណ្ឌលបោះឆ្នោតប្រមាណជា ១០ភាគរយ ពោលចំនួន ២៨មណ្ឌលបានបិទទ្វារ។ គណៈកម្មការជាតិរៀបចំការបោះឆ្នោតបានកំណត់យកថ្ងៃបោះឆ្នោតជាថ្មីចំនួនពីរថ្ងៃទៀត គឺថ្ងៃទី២០ មេសាសម្រាប់មណ្ឌលមួយចំនួន និង ថ្ងៃទី២៧ មេសាសម្រាប់មណ្ឌលផ្សេងទៀតអាក់ខានមិនបានបោះឆ្នោត។
សព្វថ្ងៃនេះ រដ្ឋាភិបាលរបស់លោកស្រីយីងឡាក់បានក្លាយជារដ្ឋាភិបាលចំាផ្ទះ ដោយរង់ចំាលទ្ធផលបោះឆ្នោតសរុបនៅថ្ងៃខាងមុខ។ សូមជម្រាបជូនថា សភាថៃមានតំណាងរាស្រ្តសរុបចំនួន ៥០០រូប តែកង្វះតំណាងរាស្រ្តពី ២៨មណ្ឌលបោះឆ្នោតបានធ្វើឲ្យសភាមិនមានកូរ៉ូមគ្រប់គ្រាន់ក្នុងការបើកសម័យប្រជុំ និងជ្រើសរើសរដ្ឋាភិបាលថ្មីទេ។ តើគណបក្សភឿថៃនឹងទទួលបានជោគជ័យជាថ្មី ឬយ៉ាងណា?។ គេនៅមិនទាន់អាចឆ្លើយបានទេ អ្វីដែលគេដឹងនោះគឺថា រូបលោកស្រីយីងឡាក់ខ្លួនឯងកំពុងផុយស្រួយ ដោយកំពុងជាប់ការស៊ើបអង្កេតរឿងពុករលួយពីគណៈកម្មការប្រឆំាងពុករលួយដ៏មានឥទ្ធិពល រីឯតំណាងរាស្រ្តរបស់បក្សភឿថៃប្រមាណជា ១០នាក់ក៏កំពុងទទួលការគំរាមមិនឲ្យធ្វើនយោបាយចំនួន ៥ឆ្នំា ពីបទប៉ុនប៉ងធ្វើវិសោនកម្មច្បាប់រដ្ឋធម្មនុញ្ញ ដោយចង់បានការជ្រើសរើសសមាជិកព្រឹទ្ធសភាត្រូវធ្វើឡើងតាមរយៈការបោះឆ្នោត។ ទន្ទឹមគ្នានេះ ពួកអាវលឿងក៏មិនព្រមបញ្ឈប់ក្បួនបាតុកម្មរបស់ខ្លួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ