ក្រុមប្រឆាំងថៃប្តេជ្ញាមិនចុះញ៉មបើទោះបីជាប៉ូលិសបំបែកទីតាំងបាតុកម្មរបស់ពួកគេ
នៅថ្ងៃសៅរ៍នេះ ប៉ូលិសថៃរាប់ពាន់នាក់កំពុងត្រៀមចូលបំបែកទីតាំងបាតុកម្មផ្សេងៗទៀត នៅក្នុងទីក្រុងបាងកក ក្រោយពីទីតាំងបាតុកម្មមួយចំនួន ត្រូវបានបំបែក កាលពីថ្ងៃសុក្រម្សិលមិញ។ ក្រុមប្រឆាំងថៃវិញបានប្រកាសប្តេជ្ញាថា ពួកគេនឹងមិនបញ្ឈប់បាតុកម្មប្រឆាំងនឹងរដ្ឋាភិបាលរបស់លោកស្រីយីងឡាក់នោះទេ បើទោះបីជាមានការបំបែកពីប៉ូលិសក៏ដោយ។
ចុះផ្សាយនៅថ្ងៃ៖
ស្តាប់ - ០១:៣៤
ក្រោយពីបានបំបែកទីតាំងបាតុកម្មប្រឆាំងមួយចំនួន នៅជុំវិញវិមានរដ្ឋាភិបាល កាលពីថ្ងៃសុក្រ ប្រធានក្រុមប្រឹក្សាសន្តិសុខជាតិថៃបានប្រកាសថា ប៉ូលិសនឹងបន្តប្រតិបត្តិការបំបែកទីតាំងបាតុកម្ម នៅកន្លែងផ្សេងៗទៀត។ ក៏ប៉ុន្តែ គេឃើញថា ក្រុមបាតុករប្រឆាំងហាក់ដូចជាមិនមានចេតនាក្នុងការដកថយនោះទេ។ អ្នកនាំពាក្យម្នាក់ នៃក្រុមបាតុករប្រឆាំងបានអះអាង នៅថ្ងៃសៅរ៍នេះថា ពួកគេនឹងមិនបញ្ឈប់បាតុកម្មប្រឆាំងនឹងរដ្ឋាភិបាលជាដាច់ខាត បើទោះបីជាមានការបង្រ្កាបពីប៉ូលិសក៏ដោយ។
នៅថ្ងៃសៅរ៍នេះ ប៉ូលិសជាង១ពាន់នាក់ត្រូវបានគេបញ្ជូនឲ្យទៅបំបែកបាតុករប្រឆាំង នៅក្នុងអគាររដ្ឋាភិបាលមួយកន្លែង នៅខាងជើងក្រុងបាងកក ក៏ប៉ុន្តែ ក្រោយមក ប្រតិបត្តិការនេះត្រូវបានផ្អាកទៅវិញ ក្រោយពីប៉ូលិស និងមេដឹកនាំបាតុកម្មបានព្រមព្រៀងចរចាគ្នា ដើម្បីបញ្ចៀសការប្រឈមមុខដាក់គ្នា។ នេះបើយោងតាមឧត្តមសេនីយ៍ ប៉ារ៉ាដន ប៉ាតាណាតាប៊ុត (Paradorn Pattanatabut) ដែលបានប្រាប់ទីភ្នាក់ងារព័ត៌មានបារាំង AFP នៅថ្ងៃសៅរ៍នេះ។
គេសង្កេតឃើញថា ចាប់តាំងពីថ្ងៃម្សិលមិញមក ប៉ូលិសថៃបានចូលបំបែកបាតុកម្ម តែនៅតាមទីតាំងតូចៗប៉ុណ្ណោះ ហើយមិនបានព្យាយាមចូលបំបែកទីតាំងធំៗនោះទេ។ ម្យ៉ាងទៀត បើយោងតាមប្រធានក្រុមប្រឹក្សាសន្តិសុខថៃ ប៉ូលិសថៃបានព្យាយាមបញ្ចៀសអំពើហិង្សា ដោយផ្តល់អាទិភាពលើការចរចាជាមួយបាតុករ មុននឹងបញ្ជូនកម្លាំងឲ្យចូលទៅបំបែកទីតាំងបាតុកម្ម។
កាលពីថ្ងៃសុក្រម្សិលមិញ នៅពេលដែលប៉ូលិសចូលទៅបំបែកទីតាំងបាតុកម្ម នៅជុំវិញវិមានរដ្ឋាភិបាល ក៏គេមិនឃើញមានការប៉ះទង្គិចគ្នាអ្វីខ្លាំងនោះដែរ ក៏ប៉ុន្តែ បើយោងតាមអ្នកយកការណ៍របស់ទីភ្នាក់ងារព័ត៌មានបារាំង AFP ទីតាំងបាតុកម្មដែលត្រូវបំបែកនេះ ត្រូវបានក្រុមបាតុករប្រឆាំងវិលត្រឡប់ចូលមកកាន់កាប់វិញ នៅក្រោយពេលដែលប៉ូលិសបានដកថយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ