ស្តេចថៃនឹងដង្ហែកឋិនមកកម្ពុជា
បើទោះបីជាកម្ពុជា និងថៃមានទំនាស់ព្រំដែន ដែលបានអូសបន្លាយជាង៣ឆ្នាំមកហើយ ក៏ប៉ុន្តែ កឋិនព្រះរាជទ្រព្យរបស់ព្រះមហាក្សត្រថៃ នៅឆ្នាំនេះ នឹងត្រូវដង្ហែចូលមកកាន់ប្រទេសកម្ពុជាដូចរៀងរាល់ឆ្នាំ។ សម្រាប់ឆ្នាំនេះ កឋិនព្រះរាជទ្រព្យរបស់ស្តេចថៃ ត្រូវបានសម្តេចព្រះសង្ឃរាជ ទេព វង្ស អនុញ្ញាតឲ្យហែចូលវត្តនិរោធ ជាយក្រុងភ្នំពេញ។ ថៃតែងតែដង្ហែកឋិន មកកាន់ប្រទេសកម្ពុជាជារៀងរាល់ឆ្នាំ ដើម្បីផ្សារភ្ជាប់ទំនាក់ទំនងមិត្តភាពរវាងព្រះពុទ្ធសាសនា និងដើម្បីសម្ព័ន្ធមេត្រីភាពរវាងប្រជាជន និងប្រទេសទាំងពីរ។
ចុះផ្សាយនៅថ្ងៃ៖
ស្តាប់ - ០២:២២
កិច្ចប្រជុំរវាងសម្តេចព្រះសង្ឃរាជ ទេព វង្ស ជាមួយអាជ្ញាធរខណ្ឌមានជ័យ ដើម្បីនិយាយពីការដង្ហែកឋិនរបស់ស្តេចថៃ ទៅកាន់វត្តនិរោធ ជាប់ផ្លូវជាតិលេខ១ ជាយក្រុងភ្នំពេញ ត្រូវបានធ្វើឡើងកាលពីព្រឹកថ្ងៃពុធនេះ។ ក៏ប៉ុន្តែ ថ្ងៃខែជាក់លាក់នៃការដង្ហែកឋិនថៃ ក្នុងរដូវចេញវស្សា ចាប់ពីពាក់កណ្តាលខែតុលា ដល់ពាក់កណ្តាលខែវិច្ឆិកាខាងមុខ មិនទាន់ត្រូវបានកំណត់នៅឡើយទេ។ នេះបើតាមការបញ្ជាក់របស់ព្រះតេជព្រះគុណ ឈិត សំណាង ជំនួយការសម្តេចព្រះសង្ឃរាជ ទេព វង្ស។
តាមព្រះតេជព្រះគុណ ឈិត សំណាង សម្តេចព្រះសង្ឃរាជ ទេព វង្ស បានអនុញ្ញាតឲ្យកឋិនព្រះរាជទ្រព្យរបស់ព្រះមហាក្សត្រថៃ ដង្ហែមកកាន់ប្រទេសកម្ពុជា ដូចរៀងរាល់ឆ្នាំ។ នៅឆ្នាំនេះ សម្តេចព្រះសង្ឃរាជ បានជ្រើសរើសយកវត្តនិរោធ។ លោក គួច ចំរើន អភិបាលខណ្ឌមានជ័យ អះអាងថា វត្តនិរោធនេះធ្លាប់បានទទួលកឋិនរបស់ស្តេចថៃម្តងរួចមកហើយ។
កាលពីរដូវកឋិនឆ្នាំមុន កឋិនរបស់ព្រះអង្គម្ចាស់ក្សត្រី ចក្រី សូរិន្ទថន តាមរយៈសាកលវិទ្យាល័យមហាចុឡាលុងកន រាជវិទ្យាល័យរបស់ប្រទេសថៃ ត្រូវបានប្រគេនសម្តេច ទេព វង្ស ដើម្បីដង្ហែទៅកាន់វត្តចាស់ នៅជ្រោយចង្វា ទល់មុខព្រះបរមរាជវាំង ដោយបានបច្ច័យជាង ៣សែនបាត។
តាមព្រះតេជព្រះគុណ ឈិត សំអាង អង្គកឋិនទានរបស់ថៃ ជាការបង្កើតទំនាក់ទំនងមិត្តភាព ផ្នែកព្រះពុទ្ធសាសនារបស់ប្រទេសថៃ ជាមួយកម្ពុជា។ ម្យ៉ាងទៀត កឋិនទានរបស់រាជាយាទថៃ ដង្ហែមកកាន់ប្រទសកម្ពុជារៀងរាល់ឆ្នាំនេះ ក៏បង្កើតឲ្យមានទំនាក់ទំនងរវាងប្រជាជនកម្ពុជា-ថៃ ដែលកាន់ព្រះពុទ្ធសាសនាដូចគ្នា។
ចំណែកសម្តេចព្រះមហាសង្ឃរាជ ទេព វង្ស បានចាត់ទុកកឋិនរបស់ស្តេចថៃជាជីវិត និងសាមគ្គីភាពរវាងប្រទេសកម្ពុជា និងថៃ ព្រមទាំងជាសហប្រតិបត្តិការរវាងព្រះពុទ្ធសាសនាប្រទេសទាំងពីរ។
យ៉ាងណាក៏ដោយ ដោយសារតែជម្លោះព្រំដែន លោកនាយករដ្ឋមន្ត្រី ហ៊ុន សែន បានបង្ហាញកំហឹងចំពោះថៃ ដោយចាត់ទុកថា កឋិន គឺជាផ្នែកមួយនៃជំនួយរបស់ថៃមកកម្ពុជា។ លោកនាយករដ្ឋមន្ត្រីក៏បានប្រកាសឲ្យមានការត្រួតពិនិត្យឲ្យហ្មត់ចត់លើការហែកឋិនរបស់ថៃ ចូលមកកម្ពុជា ខណៈដែលកម្ពុជាបានប្រកាសឈប់ទទួលជំនួយពីរដ្ឋាភិបាលថៃ សម័យលោក អាប់ភិស៊ីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ