ប៉ូលីសថៃ «អញ្ជើញ» និស្សិតរាប់សិបនាក់ទៅជួបជជែក ក្រោយការជួបជុំរំលឹកខួបមួយឆ្នាំនៃរដ្ឋប្រហារ២២ឧសភា
ក្រុមនិស្សិតដែលបានប្រារព្ធពិធីជួបជុំរំលឹកខួបមួយឆ្នាំនៃរដ្ឋប្រហារ២២ឧសភា កាលពីយប់ថ្ងៃសុក្រ គឺគ្រាន់តែត្រូវបានអញ្ជើញទៅសាកសួរនៅប៉ុស្តិ៍ប៉ូលីសតែប៉ុណ្ណោះ។ នេះបើតាម មន្ដ្រីប៉ូលីសជាន់ខ្ពស់របស់ថៃ ដែលបានប្រាប់ទីភ្នាក់ងារព័ត៌មានបារាំង AFP នៅព្រឹកថ្ងៃសៅរ៍នេះ។ ការលើកឡើងរបស់មន្ដ្រីប៉ូលីសនេះ ធ្វើឡើងក្រោយពីមានការអូសនិស្សិតរាប់សិបនាក់ចេញពីកន្លែងប្រារព្ធពិធី ទៅកាន់ប៉ុស្តិ៍ប៉ូលីស កាលពីយប់ថ្ងៃសុក្រ។ យ៉ាងណាក៏ដោយ បើតាមមន្ដ្រីប៉ូលីសដដែល និស្សិតទាំងអស់ត្រូវបានដោះលែងឲ្យមានសេរីភាពវិញហើយ ដោយគ្មានការចោទប្រកាន់អ្វីទាំងអស់។
ចុះផ្សាយនៅថ្ងៃ៖
ស្តាប់ - ០២:១៣
ការប្រមូលផ្ដុំ និងការដើរហែក្បួនក្នុងលក្ខណៈតូចៗជាច្រើន ត្រូវបានរៀបចំឡើងនៅក្នុងទីក្រុងបាងកកកាលពីថ្ងៃទី២២ឧសភាម្សិលមិញ ដើម្បីរំលឹកខួបមួយឆ្នាំនៃរដ្ឋប្រហារយោធា។ រដ្ឋប្រហារយោធា ដែលដឹកនាំដោយឧត្តមសេនីយ៍ប្រាយុទ្ធ ចាន់អូចា ទម្លាក់រដ្ឋាភិបាលស្របច្បាប់របស់ពួកអាវក្រហម។
នៅក្នុងចំណោមការពិធីជួបជុំទាំងអស់នោះ ការជួបជុំរបស់ក្រុមនិស្សិតប្រឆាំងនឹងរដ្ឋប្រហារមួយក្រុមមានគ្នាជាង៥០នាក់ ត្រូវបានរំខានដោយក្រុមប៉ូលីស កាលពីយប់ថ្ងៃសុក្រម្សិលមិញ។ ដោយនៅក្នុងនោះ និស្សិតចំនួន៣១នាក់ត្រូវបានមន្ដ្រីប៉ូលីសអូសចេញពីទីកន្លែងប្រារព្ធពិធី ហើយក្រោយមកត្រូវបានបញ្ជូនទៅឃុំខ្លួនបណ្ដោះអាសន្ននៅប៉ុស្តិ៍ប៉ូលីស។
ប៉ុន្តែយ៉ាងណាក៏ដោយ មេបញ្ជាការនៃតំបន់ទី៦នៃក្រុងបាងកក លោក ឆាយ៉ាពល ឆាត់ឆៃដេត បានប្រាប់ទីភ្នាក់ងារព័ត៌មាន AFP នៅព្រឹកថ្ងៃសៅរ៍នេះថា ក្រុមនិស្សិតដែលបានប្រារព្ធពិធីជួបជុំរំលឹកខួបមួយឆ្នាំនៃរដ្ឋប្រហារ២២ឧសភា កាលពីយប់ថ្ងៃសុក្រ គឺគ្រាន់តែត្រូវបានអញ្ជើញទៅសាកសួរនៅប៉ុស្តិ៍ប៉ូលីសតែប៉ុណ្ណោះ។ និងថា និស្សិតទាំងអស់ត្រូវបានដោះលែងឲ្យមានសេរីភាពវិញហើយកាលពីរំលងអាធ្រាតថ្ងៃសុក្រ ឈានចូលថ្ងៃសៅរ៍នេះ ដោយគ្មានការចោទប្រកាន់អ្វីទាំងអស់។ ប៉ុន្តែយ៉ាងណាក៏ដោយ បើតាមមន្ដ្រីប៉ូលីសដដែល ក្រុមនិស្សិតនេះ អាចនឹងត្រូវបានហៅត្រឡប់មកបំភ្លឺពីសកម្មភាពរបស់ខ្លួនជាថ្មីទៀត ប្រសិនបើរកឃើញថាបានប្រព្រឹត្តអំពើខុសឆ្គង។
អ្នកវិភាគនិងសង្គមស៊ីវិលនៅក្នុងប្រទេសថៃ បានហៅសកម្មភាពរបស់របស់រដ្ឋាភិបាលយោធាថៃដូច្នេះថា ជាការបំបិទមាត់អ្នករិះគន់របបយោធា និងរឹតត្បឹតសិទ្ធិសេរីភាពនៃការបញ្ចេញមតិ ជាសាធារណៈ។ អង្គការសិទ្ធិមនុស្សរបស់ថៃបានឲ្យដឹងថា ចាប់តាំងពីរបបយោធាថៃឡើងកាន់អំណាចនៅថ្ងៃទី២២ខែឧសភាឆ្នាំ២០១៤រហូតមកទល់ពេលបច្ចុប្បន្ននេះ មនុស្សយ៉ាងហោចណាស់៧៥១នាក់ត្រូវបានកោះហៅដោយអាជ្ញាធរ ខណៈមនុស្សចំនួន១៦៦នាក់ទៀតត្រូវបានចាប់ឃុំខ្លួន ដោយសារការបញ្ចេញមតិជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ