អង្គការមនុស្សធម៌៖ថៃ ម៉ាឡេស៊ី និងឥណ្ឌូណេស៊ីកំពុងយកជីវិតជនអន្តោប្រវេសន៍ធ្វើជាបាល់ពីងប៉ុង
តំបន់អាស៊ីអាគ្នេយ៍បាន និងកំពុងប្រឈមមុខនឹងកំណើនជនអន្តោប្រវេសន៍ខុសច្បាប់តាមសមុទ្រដែលខ្លួនមិនធ្លាប់ជួបប្រទះទេនាពេលកន្លងមក។ ជនអន្តោប្រវេសន៍ដែលភាគច្រើនជាជនជាតិភាគតិចរ៉ូហ៊ីងយ៉ាមកពីប្រទេសភូមា និងជនជាតិបង់ក្លាដែសបាននំាគ្នារត់ភៀសខ្លួនទៅកាន់ប្រទេសថៃ ម៉ាឡេស៊ី ឬឥណ្ឌូណេស៊ី។ តែរដ្ឋអំណាចថៃ ម៉ាឡេស៊ី ឬមួយក៏ឥណ្ឌូណេស៊ីបានបដិសេធមិនទទួលយក ហើយទូកណាដែលបានទៅដល់ដីថៃ ម៉ាឡេស៊ី ឬម៉ាឡេស៊ីក៏ត្រូវបានរដ្ឋអំណាចក្នុងប្រទេសនោះរុញច្រានទៅក្នុងសមុទ្រវិញ។ អង្គការសហប្រជាជាតិបានទាញសញ្ញាអាសន្ន និងអំពាវនាវជាថ្មីឲ្យប្រទេសពាក់ព័ន្ធរួមសហការណ៍គ្នាជួយស្រង់ជីវិតជនអន្តោប្រវេសន៍ទំាងនោះ។ ចំណែកអង្គការមនុស្សធម៌បានបរិហារថៃ ម៉ាឡេស៊ី និងឥណ្ឌូណេស៊ីដែលយកជីវិតជនអន្តោប្រវេសន៍ធ្វើជាបាល់ពីងប៉ុង។
ចុះផ្សាយនៅថ្ងៃ៖
ស្តាប់ - ០៧:២០
រហូតមកពេលនេះ មានជនអន្តោប្រវេសន៍ពី ៨ ០០០ ទៅ ១៥ ០០០នាក់ត្រូវបានឆ្មំាសមុទ្រក្នុងប្រទេសថៃ ម៉ាឡេស៊ី ឬមួយឥណ្ឌូណេស៊ីជួយសង្រ្គោះជីវិតពីសមុទ្រដែលពួកគេបានជិះទូកផ្សងព្រេងចេញពីប្រទេសភូមា និងបង់ក្លាដែសឆ្ពោះទៅកាន់ប្រទេសម៉ាឡេស៊ី ថៃ ឬឥណ្ឌូណេស៊ី។ តែភាគច្រើនចង់ធ្វើដំណើរទៅកាន់ប្រទេសម៉ាឡេស៊ី ឬឥណ្ឌូណេស៊ីដែលកាន់កាន់សាសនាអ៊ីស្លាម ព្រោះជនអន្តោប្រវេសន៍ភាគច្រើនជាពួករ៉ូហ៊ីងយ៉ាអ្នកកាន់សាសនាអ៊ីស្លាមរស់ក្នុងប្រទេសភូមា និងប្រជាជនបង់ក្លាដែស។ អ្វីដែលគួរឲ្យកត់សម្គាល់ គ្មានប្រទេសណាមួយក្នុងចំណោមប្រទេសទំាង ៣ បានយល់ព្រមទទួលយកជនអន្តោប្រវេសន៍ទំាងនោះឲ្យជ្រកកោនទេ។ ទោះជាយ៉ាងនេះក្តី ក៏មិនបានធ្វើឲ្យជនអន្តោប្រវេសន៍ទំាងនោះរាងចាលដែរ ពោលរឹតតែធ្វើឲ្យពួកគេនំាគ្នាចុះទូកផ្សេងព្រេងកាន់តែច្រើនថែមទៀត។
គឺប្រឈមនឹងលំហូរយ៉ាងគំហុកនេះហើយដែលបានបង្ខំឲ្យរដ្ឋអំណាចថៃ ម៉ាឡេស៊ី ឬឥណ្ឌូណេស៊ីលែងយកភ្នែកមើល និងចាប់បញ្ជូន ឬរុញច្រានទូករបស់ពួកគេទៅក្នុងសមុទ្រឲ្យផុតពីដែនទឹករបស់ខ្លួនដោយមិនបាច់ពិចារណាច្រើន។ ការធ្វើយ៉ាងនេះដោយគេយល់ឃើញថា ការទទួលយកពួកនេះ គឺជាការបើកផ្លូវជួយលើកទឹកចិត្តឲ្យអ្នកផ្សេងរត់ភៀសខ្លួនដែរ។ ជាក់ស្តែងក្នុងថ្ងៃនេះ មានទូកដឹកជនអន្តោប្រវេសន៍ប្រមាណជា ៧០០នាក់ដែលបានចូលដល់សមុទ្រឥណ្ឌូណេស៊ីក្នុងខេត្តអាសេត្រូវបានរដ្ឋអំណាចទីក្រុងហ្សាការតាទុកបណ្តោយឲ្យលិច តែត្រូវបានក្រុមអ្នកនេសាទឥណ្ឌូណេស៊ីជួយសង្រ្គោះទាន់។ នៅប្រទេសថៃ ទីក្រុងបាងកកបានសារភាពត្រង់ៗថា ខ្លួនបានបញ្ជូនទូកដឹកជនអន្តោប្រវេសន៍ប្រមាណជា ៣០០នាក់ទៅក្នុងសមុទ្រវិញ បន្ទាប់ពីបានជួយជួសជុលម៉ាស៊ីន និងចែកចាយម្ហូបអាហារសម្រាប់ពួកគេ។
ជនអន្តោប្រវេសន៍គ្មានជម្រើសក្រៅពីផ្សងព្រេងស្វែងរកជីវិតរុងរឿង
ទោះជារដ្ឋអំណាចថៃ ម៉ាឡេស៊ី ឬឥណ្ឌូណេស៊ីបានចាត់វិធានការម៉ឹងម៉ាត់ក៏ដោយ ក៏មិនបានធ្វើឲ្យអ្នករត់ភៀសខ្លួនរានចាលដែរ។ នេះក៏ដោយសារតែពួកគេមានជម្រើសតែពីរគត់ ឬមួយស្លាប់នៅនឹងកន្លែង ឬមួយក៏រត់ផ្សងព្រេង ចេញក្រៅ ក្រែននឹងទទួលបានជីវិតភ្លឺស្វាង រុងរឿង។ គួរជម្រាបជូនថា ករណីជនអន្តោប្រវេសន៍ជាជនជាតិបង់ក្លាដែស គឺរត់ភៀសខ្លួនគេចពីភាពក្រីក្រតោកយ៉ាក់ក្នុងប្រទេសកំណើតដើម្បីស្វែងរកអនាគតភ្លឺស្វាងនៅប្រទេសផ្សេង ពិសេសម៉ាឡេស៊ី។
ចំណែកពួករ៉ូហ៊ីងយ៉ាវិញ គឺស្វែងរកជីវិតរុងរឿងផង និងរត់គេចពីការតាមធ្វើទុក្ខបុកម្នេញរបស់រដ្ឋាភិបាលភូមាផង។ សូមជម្រាបជូនថា រដ្ឋាភិបាលភូមាមិនដែលបានចាត់ទុកពួករ៉ូហ៊ីងយ៉ាថា ជាជនជាតិភាគតិចរបស់ខ្លួនទេ តែជាជនអន្តោប្រវេសន៍ខុសច្បាប់ឆ្លងពីប្រទេសបង់ក្លាដែស។ ជនជាតិភាគតិចរ៉ូហ៊ីងយ៉ានេះត្រូវបានអង្គការសហប្រជាជាតិចាត់ទុកជាជនជាតិភាគតិចដែលបានទទួលការរងគំរាមកំហែង ធ្វើទុក្ខបុកម្នេញខ្លំាងជាងគេនៅក្នុងពិភពលោក។
ភូមាកំពុងពិចារណាពីការចូលរួមនៅក្នុងជំនួបកំពូលស្នើដោយប្រទេសថៃ
ដើម្បីប្រឈមមុខនឹងការជួញដូរមនុស្ស និងទប់ស្កាត់លំហូរជនអន្តោប្រវេសន៍ខុសច្បាប់ ប្រទេសថៃបានស្នើឲ្យរៀបចំជំនួបកំពូលតំបន់មួយនៅថ្ងៃទី២៩ ឧសភាខាងមុខ ដោយមាន ១៥ប្រទេសចូលរួម ក្នុងនោះមានអូស្ត្រាលី ឥណ្ឌូណេស៊ី ម៉ាឡេស៊ី កម្ពុជា ឡាវ វៀតណាម បង់ក្លាដែស អាមេរិក ឬភូមា។ តែភូមាបានប្រាប់ឲ្យដឹងនៅថ្ងៃនេះថា ខ្លួនប្រហែលជានឹងមិនចូលរួមទេ។ បើយើងពិនិត្យមើលជារួមទៅឃើញថា តំាងពីមានផ្ទុះលំហូរជនអន្តោប្រវេសន៍ខុសច្បាប់នៅតាមសមុទ្រមក ភូមាបានក្លាយជាផ្ទំាងស៊ីប និងត្រូវបានគ្រប់គ្នាចោទថា ជាអ្នកបង្កបញ្ហា។
មូលហេតុមកពីជនអន្តោប្រវេសន៍ខុសច្បាប់ភាគច្រើនទំាងនោះ ជាពួករ៉ូហ៊ីងយ៉ារត់ចេញពីប្រទេសភូមា។ តែរដ្ឋាភិបាលក្រុងណៃពីដ៏បានបញ្ជាក់ថា ភូមាមិនមែនជាអ្នកបង្កើតបញ្ហាតែម្នាក់ឯងទេ និងថា រឿងជនអន្តោប្រវេសន៍ខុសច្បាប់ជាបញ្ហានៅតំបន់ទំាងមូលដែលគេត្រូវដោះស្រាយជាលក្ខណៈសមូហភាពដោយមិនត្រូវចង្អុលចំមុខប្រទេសណាមួយទេ។ អ្វីដែលភូមាចង់និយាយត្រង់ចំណុចនេះ គឺអសមត្ថភាពរបស់ប្រទេសទំាងអស់នៅក្នុងតំបន់ក្នុងការដោះស្រាយបញ្ហាជនអន្តោប្រវេសន៍ខុសច្បាប់។
តាមពិតទៅ ភូមាមិនបានជំទាស់ទៅនឹងគំនិតផ្តួចផ្តើមរបស់ប្រទេសថៃទេ តែអ្វីដែលភូមាចង់បាន គឺចង់ឲ្យថៃ ម៉ាឡេស៊ី ឬមួយក៏ឥណ្ឌូណេស៊ីចាត់ទុកបញ្ហាជនអន្តោប្រវេសន៍ខុសច្បាប់នេះជាបញ្ហារួមក្នុងតំបន់ ពោលមិនមែនជាបញ្ហារបស់ភូមាតែម្នាក់គត់ទេ។ សូមជម្រាបជូនថា រដ្ឋអំណាចថៃក្តី ម៉ាឡេស៊ីក្តី ឬមួយក៏ឥណ្ឌូណេស៊ីក្តីធ្លាប់បានបញ្ជាក់រួមគ្នាថា គេត្រូវតែដោះស្រាយបញ្ហាជនអន្តោប្រវេសន៍ខុសច្បាប់នៅឯប្រភពដើមរបស់វា ពោលគេចង់និយាយសំដៅត្រង់ទៅប្រទេសភូមា។ នេះហើយជាអ្វីដែលបានធ្វើឲ្យភូមាក្តៅស្លឹកត្រចៀក និងកំពុងពិចារណាពីការចូលរួមរបស់ខ្លួននៅក្នុងជំនួបកំពូលដែលគ្រោងរៀបចំដោយប្រទេសថៃនៅថ្ងៃ២៩ ឧសភាខាងមុខ។
អាស៊ានគួរតែចេញមុខដោះស្រាយបញ្ហាជនអន្តាប្រវេសន៍ក្នុងតំបន់ខ្លួន
មកដល់ពេលនេះ គេនៅមិនទាន់បានឮប្រតិកម្មអ្វីពីអាស៊ាននៅឡើយទេ នោះបើទោះបីជាបញ្ហាជនអន្តោប្រវេសន៍ខុសច្បាប់នេះបានផ្ទុះចេញនៅផ្ទៃក្នុងប្រទេសសមាជិកអាស៊ានក៏ដោយ។ មានការលើកឡើងថា អាស៊ានគួរតែខ្នះខ្នែងចាត់វិធានការចំពោះរឿងនេះ ដូចដែលសហភាពអឺរ៉ុបកំពុងព្យាយាមធ្វើចំពោះលំហូរជនអន្តោប្រវេសន៍ខុសច្បាប់តាមសមុទ្រក្នុងទ្វីបរបស់ខ្លួន។ គួរជម្រាបជូនថាមកទល់ពេលនេះ ប្រទេសអឺរ៉ុបមិនបានចាប់បញ្ជូន ឬមិនរវីរវល់ទូកដែលបានដឹកជនអន្តោប្រវេសន៍មកដល់ទឹកដីខ្លួន ឬកំពុងស្ថិតក្នុងដែនទឹកខ្លួនទេ ពោលតែងតែបានជួយស្រោចស្រង់ជានិច្ច។ ខណៈនេះទៀត អឺរ៉ុបកំពុងពិចារណាពីការចែកចាយទទួលយកជនអន្តោប្រវេសន៍ណាដែលបានចូលដល់ទឹកដីអឺរ៉ុប។
ក៏ប៉ុន្តែ គេក៏ពិបាកនឹងឲ្យអាស៊ានយកតាមគំរូតាមសហភាពអឺរ៉ុប ព្រោះអាស៊ានបានប្រកាន់យកគោលការណ៍មិនលូកដៃចូលជ្រៀតជ្រែកកិច្ចការផ្ទៃក្នុងរបស់ប្រទេសសមាជិកផ្សេង។ តែអង្គការសប្រជាជាតិ និងអង្គការអន្តរជាតិនានាបានក្រើនរម្លឹកថា ការជួយស្រោចស្រង់ជីវិតមនុស្សនៅតាមសមុទ្រ គឺជាកាតព្វកិច្ចអាទិភាពមិនអាចខ្វះ។ ចំណែកអាមេរិកបានលើកឡើងពីបញ្ហាប្រឈមដែលប្រទេសក្នុងតំបន់ត្រូវដោះស្រាយជាបន្ទាន់។ រីឯអង្គការមនុស្សធម៌បានបរិហារលើប្រទេសថៃ ម៉ាឡេស៊ី និងឥណ្ឌូណេស៊ីពីទង្វើយកជីវិតជនអន្តោប្រវេសន៍ធ្វើជាបាល់ពីងប៉ុងបោះឲ្យគ្នាទៅវិញ ទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ